ಅತಿರುದ್ರ ಮಹಾಯಾಗದ, ಏಳನೇ ದಿನ

ಶಿವಪಾಡಿದ ಶ್ರೀ ಉಮಾಮಹೇಶ್ವರ ದೇವಸ್ಥಾನಡ್ ಫೆಬ್ರವರಿ 22, 2023 ಡ್ದ್ ನಡತೊಂದುಪ್ಪುನ ಅತಿರುದ್ರ ಮಹಾಯಾಗದ, ಏಳನೇ ದಿನ ಫೆಬ್ರವರಿ 28, 2023 ಮಂಗಳವಾರದಾನಿ ಕಾಂಡೆದ ಪೊರ್ತುಡ್ ತುಮಕೂರು ಜಿಲ್ಲೆದ ತಿಮ್ಮಲಾಪುರಡ್ದ್ ಉಡುಪಿಗ್ ಬತ್ತಿನ 100 ವರ್ಷದ ಶಿವಮ್ಮ ಬೊಕ್ಕ ಅರೆನ ಮಗೆ ಶಿವರುದ್ರಯ್ಯ ಶಿವಪಾಡಿಡ್ ನಡತೊಂದುಪ್ಪುನ ಅತಿರುದ್ರ ಮಹಾಯಾಗಗ್ ಬೈದಿನವ್ವ್ ವಿಶೇಷವಾದುಂಡ್. ಆರು ಈ ಪ್ರಾಯೊಡುಲಾ ಅತಿರುದ್ರ ಮಹಾಯಾಗನ್ ತೂಪಿನ ಹಂಬಲೊನ್ ದೀಯೊಂದ್ ಶಿವಪಾಡಿದ ಉಮಾಮಹೇಶ್ವರ ಸನ್ನಿಧಿಗ್ ಬೈದಿನವ್ವ್ ಮಾತೆರೆನ ಗಮನ ಸೆಳೆದುಂಡ್.

ಈ ಸಂದರ್ಭಡ್ ಅತಿರುದ್ರ ಮಹಾಯಾಗ ಸಮಿತಿದ ಅಧ್ಯಕ್ಷೆರು ಶಾಸಕ ಕೆ. ರಘುಪತಿ ಭಟ್ ಬೊಕ್ಕ ದೇವಸ್ಥಾನ ಅಭಿವೃದ್ಧಿ ಟ್ರಸ್ಟ್ ದ ಅಧ್ಯಕ್ಷೆರಾಯಿನ ಮಹೇಶ್ ಠಾಕೂರ್ ಶಿವಮ್ಮ ಅರೆಗ್ ಸತ್ಕಾರ ಮಲ್ತುದ್ ಆಶೀರ್ವಾದ ದೆತೊಂಡೆರು. ಶಿವಮ್ಮ ಬೊಕ್ಕ ಅರೆನ ಮಗೆ ಶಿವರುದ್ರಯ್ಯ ಮೊಕುಲು ಶ್ರೀ ಉಮಾಮಹೇಶ್ವರ ದೇವೆರೆನ ಆಶೀರ್ವಾದನ್ ಪಡೆತೊಂದು, ಅತಿರುದ್ರ ಮಹಾಯಾಗಡ್ ಪಾಲ್ ಪಡೆಯೆರ್. ಅತಿರುದ್ರ ಮಹಾಯಾಗ ಸಮಿತಿ ಬೊಕ್ಕ ದೇವಸ್ಥಾನದ ಪ್ರಮುಖೆರು, ದೇವಸ್ಥಾನಗ್ ಬತ್ತಿನ ಭಕ್ತಾದಿಲು ಶಿವಮ್ಮನ ಕಾರುಗ್ ಬೂರ್ದ್ ಆಶೀರ್ವಾದ ದೆತೊಂಡೆರ್. ಕಾಂಡೆ ಅತಿರುದ್ರ ಯಾಗಮಂಟಪಡ್ ಋತ್ವಿಜರೆಡ್ದ್ ಮಹಾನ್ಯಾಸಪೂರ್ವಕ ಶ್ರೀ ರುದ್ರ ಪುರಶ್ಚರಣ ಬೊಕ್ಕ ದೇವಸ್ಥಾನದ ಪ್ರಾಂಗಣಡ್ ಋತ್ವಿಜರೆಡ್ದ್ ಸಪ್ತಶತೀ ಪಾರಾಯಣ, ಶ್ರೀ ಭಾಗ್ಯಸೂಕ್ತ ಹೋಮ ನಡತುಂಡ್.