ಪ್ರಭುತ್ವಗ್ ಜೈಕಾರ ಪಾಡುಂಡ ಕಲೆ ನಾಶ ಆಪುಂಡ್..

ಸುಮನಸಾದ ರಂಗಹಬ್ಬ ಉದಿಪನ ಮಲ್ತಿನ ಸಿ. ಬಸವಲಿಂಗಯ್ಯ
ಪ್ರಭುತ್ವಗ್ ಜೈಕಾರ ಪಾಡುಂಡ ಕಲೆ ನಾಶ ಆಪುಂಡ್..

ಉಡುಪಿ: ರಂಗಭೂಮಿಡ್ ರಾಜಕೀಯನ್ ವಸ್ತುವಾದ್ ದೀಯೊಂದ್ ನಾಟಕ ಮಲ್ಪೊಡ್. ಆಂಡ ರಾಜಕೀಯ ಮಲ್ಪರೆಗ್ ಬಲ್ಲಿ. ರಂಗಾಯಣ ಸೇರಿನಂಚ ರಂಗಭೂಮಿಡ್ ಕೆಲಸ ಮಲ್ಪುನಕುಲು ಪ್ರಭುತ್ವಗ್ ಜೈಕಾರ ಪಾಡುಂಡ ಕಲೆ ನಾಶ ಆಪುಂಡ್ ಪಂಡುದು ಹಿರಿಯ ರಂಗಕರ್ಮಿ ಸಿ. ಬಸವಲಿಂಗಯ್ಯ ಪಂಡೆರ್.

ಸಾಂಸ್ಕøತಿಕ ಸಂಘಟನೆ ಸುಮನಸಾ ಅಜ್ಜರಕಾಡು ಬಯಲು ರಂಗಭೂಮಿಡ್ ಆಯೋಜನೆ ಮಲ್ದಿನ ರಂಗಹಬ್ಬನ್ ಐತಾರದಾನಿ ಉದಿಪನ ಮಲ್ತಿನ ಆರು ಪಾತೆರಿಯೆರ್.

ರಂಗಭೂಮಿ ವ್ಯವಸ್ಥೆದ ಪ್ರತಿರೋಧ. ಅವ್ವೆನ್ ಬುಡುದು ಎರೆನ ಬಗ್ಗೆಲಾ ಪನೊಂದ್ ಪೋಂಡ ರಂಗಭೂಮಿ ಒರಿಯುಜಿ. ನೀತಿ ಬೋಧನೆ, ಧರ್ಮಬೋಧನೆ ರಂಗಭೂಮಿದ ಕೆಲಸ ಅತ್ತ್.. ಆ ಕೆಲಸ ಮಲ್ಪರೆಗ್ ಬೇತೆಕುಲು ಉಲ್ಲೆರ್. ಮನಸ್ಸುಲೆನ್ ಅರಳಿಸಾವುನ ಕೆಲಸೊನ್ ರಂಗಭೂಮಿ ಮಲ್ಪೊಡ್. ಮನಸ್ಸುನ್ ಕೆಟ್ಟಾವುನ ಕೆಲಸನ್ ಮಲ್ಪರೆಗ್ ಬಲ್ಲಿ ಪಂಡುದು ಸಲಹೆ ಕೊರಿಯೆರ್.

ಅದ್ಭುತ ನಾಟಕೊಲು ಪುಟ್ಟುನೇ ದುರಿತ ಕಾಲೊಡ್. ಸಮಾಜ ಸಂಕಷ್ಟೊಡ್ ಉಪ್ಪುನಗ ಎಡ್ಡೆ ನಾಟಕೊಲು ಪಿದಾಯಿ ಬರ್ಪುಂಡ್. ಸದ್ಯದ ಕಾಲ ತೂವನಗ ಅಂಚಿನ ನಾಟಕೊಲು ಬರ್ಪಿನ ಅವಶ್ಯಕತೆ ಉಂಡು ಪಂಡೆರು.

ಭಾರತೀಯೆರಾಯಿನ ನಮ ಏಪ ನಮ್ಮ ಸಂವಿಧಾನದ ಪ್ರಸ್ತಾವನೆಡುಂಡ್. ಅವ್ ಬದಲಾದ್ ಹಿಂದೂಲಾಯಿನ ನಮ, ಮುಸ್ಲಿಮೆರಾಯಿನ ನಮ, ಕ್ರಿಶ್ಚಿಯನ್ನೆರಾಯಿನ ನಮ ಪಂಡುಂದಾಂಡ ಸಂವಿಧಾನ ಎಕ್ಕುಟ್ಟುದ್ ಪೋಪುಂಡ್. ನಮ ಬಹುತ್ವದ ಭಾರತನ್ ಒರಿತೊನೊಡ್ ಪಂಡುದ್ಬ ಪಂಡೆರ್.

ರಾಜಕೀಯದ ಬಗ್ಗೆ ಎರೆಗ್ ತೆರಿದುಜಾ ಅಕುಲೇ ನಿಜವಾಯಿನ ಅನಕ್ಷರಸ್ತೆರು ಪಂಡುದು ಚಿಂತಕೆರು ಪಂತೆರ್. ದಾಯೆಗ್ ಪಂಡ ನಮ್ಮ ನಿತ್ಯದ ಬದುಕುಡ್ ಆಪಿನ ಮಾತಲಾ ರಾಜಕೀಯ ನಿರ್ಧಾರೊಲು ಕಾರಣವಾದುಂಡ್. ಇಂಚಿನ ರಾಜಕೀಯ ರಾಜಕೀಯ ಹೊಲಸಾದ್ ಪೋನಗ ಅವ್ವೆನ್ ಸಮಾಜಗ್ ತೋಜಾವೊಡ್ ಅತ್ತಾವಂದೆ ಒವ್ವ್ ತಾದಿಡ್ ಪೋವೊಡುಂದ್ ರಂಗಭೂಮಿ ಮಲ್ಪೊಡ್ ಪಂಡುದು ಸಲಹೆ ಕೊರಿಯೆರ್.

ರಂಗ ಸನ್ಮಾನ ಪಡೆಯಿನ ಕಲಾವಿದ ತೋನ್ಸೆ ವಿಜಯಕುಮಾರ್ ಪಾತೆರ್ದ್, ಯಾನು ಮುಂಬೈಗ್ಬ ಪೋಯಿನಪಗ ಮುಲ್ಪ ಕಲ್ದಿನವ್ವೆನ್ ಅಲ್ಪ ಪ್ರದರ್ಶನ ಮಲ್ಪರೆಗ್ ಪೋನಗ ಎಂಕ್ ತಡೆ ಬತ್ತಿತ್ತುಂಡ್. ಮುಲ್ಪಡ್ದ್ ಪೋಯಿನಕುಲು ಅಲ್ಪದ ಮರಾಠಿ, ಹಿಂದಿಡ್ ಲೀನರಾದಿತ್ತೆರ್. ನಮ್ಮ ನಾಟಕೊಲೆಗ್ ಪ್ರೇಕ್ಷಕೆರಿತ್ತುಜಿ. ಪ್ರೇಕ್ಷಕೆರೆನ್ ಸೃಷ್ಟಿಸಾದ್ ನಾಟಕ ಮಲ್ದೆ ಪಂಡುದಗ ನೆಂಪು ಮಲ್ತೊಂಡೆರ್.

“ಶಾಲೆದ ಅಧ್ಯಾಪಕೆರು, ಯಕ್ಷಗಾನ ಗುರುಕುಳು ಮಾತೆರ್ಲಾ ಕಲ್ಪಾದೆರ್. ಆಂಡ ಎನ್ನಿಷ್ಟದ ರಂಗಭೂಮಿನ್ಬ ಕಲ್ಪಾಯಿನಾರ್ ಆನಂದ ಗಾಣಿಗ, ರಾಘವೇಂದ್ರ ಭಟ್, ವೆಂಕಟಾಚಲ ಭಟ್ ಮೊಕುಲು. ಅಕ್ಲೆಗ್ ಈ ಸನ್ಮಾನ್ ಸಮರ್ಪಿಸಾವೆ ಪಂಡೆರು.

ಮುಂಬೈಡ್ ಮುಲ್ಪದ ಜನಕ್ಲೆಗ್ ಗಟ್ಟಿತನದ ಭಾಷೆ ಇತ್ತುಜಿ. ಅಲ್ಪ ತುಳು, ಹಿಂದಿ ಒವ್ವೇ ಭಾಷೆಡ್ ಒಂಜಿ ವಾಕ್ಯ ಪಂಡ ಅಯಿಟ್ ನಾಲು ಭಾಷೆದ ಮಿಶ್ರಣ ಇತ್ತುಂಡ್. ಅವ್ವೆನ್ ತಿದ್ದುನವ್ವೇ ಕಷ್ಟದ ಕೆಲಸ ಆದಿತ್ತುಂಡ್.
60 ವರ್ಷಗ್ 60 ಪಾತ್ರೊಲೆನ್ ಮಲ್ತುದ್ ಯಾನು ದಾದ ಕಲ್ದೆ ಪಂಡುದ್ ತೋಜಾವುನೈಕ್
ಯಾನು ಸಾಂಸಾರಿಕ ನಾಟಕೊಕೆನ್ ಜಾಸ್ತಿ ಮಲ್ದಿನಿ ಪಂಡೆರ್.

ಜಿಲ್ಲಾ ರಂಗಮಂದಿರಗ್ 2012ಡ್ 50 ಲಕ್ಷ ರೂಪಾಯಿ ಅನುದಾನ ಬುಡುಗಡೆಯಾದಿತ್ತುಂಡ್ . ಆಂಡ ಭೂಮಿ ಸಿಕ್ಕುದುಜಿ. ಐನ್ ವರ್ಷದ ಪಿರಾವು ಕುಡೊರ ಅನುದಾನ ಬತ್ತುಂಡ್. ಕೆಲವೇ ಸಮಯೊಡ್ ರಂಗಮಂದಿರ ನಿರ್ಮಾಣ ಆಪುಂಡ್ ಪಂಡುದು ಕನ್ನಡ ಬೊಕ್ಕ ಸಂಸ್ಕøತಿ ಇಲಾಖೆದ ಸಹಾಯಕ ನಿರ್ದೇಶಕಿ ಪೂರ್ಣಿಮಾ ಪಂಡೆರ್.

ಉದ್ಯಮಿಲಾಯಿನ ಆನಂದ ಪಿ. ಸುವರ್ಣ, ಹರಿಯಪ್ಪ ಕೋಟ್ಯನ್, ದಿವಾಕರ ಸನಿಲ್, ಸುಮನಸಾ ಗೌರವಾಧ್ಯಕ್ಷ ಎಂ.ಎಸ್. ಭಟ್, ಸಂಚಾಲಕ ಭಾಸ್ಕರ ಪಾಲನ್ ಉಪಸ್ಥಿತರಿತ್ತೆರ್.

ಸುಮನಸಾ ಸಂಘಟನೆದ ಅಧ್ಯಕ್ಷ ಪ್ರಕಾಶ್ ಜಿ. ಕೊಡವೂರು ಸ್ವಾಗತ ಮಲ್ತೆರ್. ಕಾರ್ಯದರ್ಶಿ ಚಂದ್ರಕಾಂತ್ ಕುಂದರ್ ವಂದಿಸಾಯೆರ್. ನಾಗೇಶ್ ಪ್ರಸಾದ್ ಕಾರ್ಯಕ್ರಮ ನಿರೂಪಣೆ ಮಲ್ತೆರ್. ಬೊಕ್ಕ ನವೋದಯ ಮೈಸೂರು ತಂಡೊಡ್ದ್ ಅರಣ್ಯಕಾಂಡ ನಾಟಕ ಪ್ರದರ್ಶನ ಆಂಡ್.