ಪತ್ರಕರ್ತೆರೆಗ್ ಧರ್ಮಾರ್ಥ ಆರೋಗ್ಯ ಶಿಬಿರ

ಉಡುಪಿ: ಸಾಂಕ್ರಾಮಿಕ ರೋಗದ ಬಗ್ಗೆ ನಮ ಎಚ್ಚರ ವಹಿಸೊನೊಡ್.. ಕೇವಲ ಸಾಂಕ್ರಾಮಿಕ ಮಾತ್ರ ಅತ್ತಾವಂದೆ ಮಾತಾ ರೀತಿದ ಸಾಂಕ್ರಾಮಿಕ ರೋಗಲೆನ್ ಲಾ ತಡೆಗಟ್ಟುನವ್ ನಮ್ಮ ಗುರಿಯಾತುಂಡ್. ದುಂಬುದ ದಿನಕ್ಲೆಡ್ ಬೇತೆ ಬೇತೆ ಸಂಘಸಂಸ್ಥೆಲೆನ್ ಒಟ್ಟು ಪಾಡೊಂದ್ ಜಿಲ್ಲೆದ ಮಾತಾ ಕಡೆಟ್ 200 ಆರೋಗ್ಯ ಶಿಬಿರ ಲೆನ್ ನಡಪಾವರೆಗ್ ಉದ್ದೇಶ ಮಲ್ದುಂಡ್ ಪಂಡುದು ಉಡುಪಿ ಜಿಲ್ಲಾ ಆರೋಗ್ಯ ಬೊಕ್ಕ ಕುಟುಂಬ ಕಲ್ಯಾಣಾಧಿಕಾರಿ ಡಾ.ನಾಗಭೂಷಣ ಉಡುಪ ತೆರಿಪಾದೆರ್..

ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ರಜತ ಮಹೋತ್ಸವದ ಪ್ರಯುಕ್ತ ಉಡುಪಿ ಜಿಲ್ಲಾ ಆರೋಗ್ಯ ಬೊಕ್ಕ ಕುಟುಂಬ ಕಲ್ಯಾಣ ಇಲಾಖೆ, ಭಾರತೀಯ ವೈದ್ಯಕೀಯ ಸಂಘ ಉಡುಪಿ- ಕರಾವಳಿ ಶಾಖೆ, ಜಿಲ್ಲಾಸ್ಪತ್ರೆ ಎನ್ಸಿಡಿ ವಿಭಾಗ, ಜಿಲ್ಲಾ ಸರ್ವೇಕ್ಷಣ ಘಟಕ, ರಾಷ್ಟ್ರೀಯ ಆರೋಗ್ಯ ಅಭಿಯಾನ ಉಡುಪಿ, ಸಮುದಾಯ ವೈದ್ಯಕೀಯ ವಿಭಾಗ ಕೆಎಂಸಿ ಮಣಿಪಾಲ, ದಂತ ವೈದ್ಯಕೀಯ ವಿಭಾಗ ಕೆಎಂಸಿ ಮಣಿಪಾಲ ಬೊಕ್ಕ ಉಡುಪಿ ಪ್ರಸಾದ್ ನೇತ್ರಾಲಯದ ಸಂಯುಕ್ತ ಆಶ್ರಯಡ್ ಉಡುಪಿ ಜಿಲ್ಲೆದ ಪತ್ರಕರ್ತೆರ್ ಬೊಕ್ಕ ಅರೆನ ಕುಟುಂಬದಕ್ಲೆಗ್ ಉಡುಪಿ ಐಎಂಎ ಭವನಡ್ ಐತಾರದಾನಿ ಆಯೋಜನೆ ಮಲ್ದಿನ ಧರ್ಮಾರ್ಥ ಆರೋಗ್ಯ ತಪಾಸಣಾ ಶಿಬಿರನ್ ಉದಿಪನ ಮಲ್ತುದ್ ಆರು ಪಾತೆರಿಯೆರು.

ಅಧ್ಯಕ್ಷತೆಡಿತ್ತಿನ ‌ ಐಎಂಎ ಉಡುಪಿ ಕರಾವಳಿ ಅಧ್ಯಕ್ಷ ಡಾ.ಪಿ.ವಿ. ಭಂಡಾರಿ ಪಾತೆರ್ದ್, ಒವ್ವೇ ರೋಗದೊಟ್ಟುಗ್ ನರಮಾನಿ ಡೀಡ್(ಕರಾರು ಪತ್ರ) ಮಲ್ತೊನೊಡ್. ಡಯಟ್, ಎಕ್ಸಸೈಸ್(ವ್ಯಾಯಾಮ), ಕಾಯಿಲೆದ ಬಗೆಟ್ ಸರಿಯಾಯಿನ ಎಜುಕೇಶನ್(ಶಿಕ್ಷಣ) ಬೊಕ್ಕ ಸರಿಯಾಯಿನ ಡ್ರಗ್ಸ್(ಔಷಧಿ) ಮುಖ್ಯವಾದುಂಡ್. ಈ ಬಗೆಟ್ ವೈದ್ಯೆರು ಪ್ರತಿಯೊರಿಗುಲಾ ಸರಿಯಾಯಿನ ಮಾಯಿತಿ ಕೊರ್ಪಿನ ಕಾರ್ಯ ಮಲ್ಪೊಡ್ ಪಂಡೆರು.

ರಕ್ತದೊತ್ತಡ, ಮಧುಮೇಹ ಪನ್ಪಿನವ್ ಇನಿ ಜನಕ್ಲೆನ ಜೀವನ ಸಂಗಾತಿ ಆವೊಂದುಂಡ್. ಈ ನಿಟ್ಟುಡ್ ಐಎಂಎ ಜನ ಸಾಮಾನ್ಯೆರೆನ ಆರೋಗ್ಯದ ಬಗ್ಗೆ ಕಾಳಜಿ ವಹಿಸೊಂದ್, 100ಕ್ ಲಾ ಜಾಸ್ತಿ ಅರಿವು ಕಾರ್ಯಕ್ರಮ ಬೊಕ್ಕ ಶಿಬಿರಲೆನ್ ಮಲ್ದುಂಡ್. ಪ್ರತಿಯೊರಿಲಾ ಅಕ್ಲೆನ ಆರೋಗ್ಯದ ಕಡೆ ಗಮುನ ಕೊರ್ದ್ ತಪಾಸಣೆಲೆನ್ ಮಲ್ತೊನೊಡ್ ಪಂಡುದು ಆರು ಪಂಡೆರು.

ಮುಖ್ಯ ಅತಿಥಿಯಾದ್ ಪ್ರಸಾದ್ ನೇತ್ರಾಲಯದ ವೈದ್ಯಕೀಯ ನಿರ್ದೇಶಕ ಡಾ.ಕೃಷ್ಣಪ್ರಸಾದ್, ಮಣಿಪಾಲ ಕೆಎಂಸಿ ದಂತ ವೈದ್ಯಕೀಯ ವಿಭಾಗದ ಡಾ.ರಾಮಪ್ರಸಾದ್, ಮಣಿಪಾಲ ಸಮುದಾಯ ವೈದ್ಯಕೀಯ ವಿಭಾಗದ ಡಾ.ಈಶ್ವರಿ, ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ರಜತ ಮಹೋತ್ಸ ಸಮಿತಿದ ಸಂಚಾಲಕ ಮುಹಮ್ಮದ್ ಶರೀಫ್ ಪಾತೆರಿಯೆರು.

ಪತ್ರಕರ್ತರ ಸಂಘದ ಪ್ರಧಾನ ಕಾರ್ಯದರ್ಶಿ ನಝೀರ್ ಪೊಲ್ಯ, ಐಎಂಎ ಕಾರ್ಯದರ್ಶಿ ಡಾ.ಕೇಶವ್ ನಾಯಕ್, ವೈದ್ಯಕೀಯ ತಜ್ಞೆರಾಯಿನ ಡಾ.ಜಯ ಪ್ರಕಾಶ್ ಹೆಗ್ಡೆ, ಡಾ.ಅನಂತ್ ಶೆಣೈ, ಜಿಲ್ಲಾಸ್ಪತ್ರೆ ಎನ್‌ಸಿಡಿದ ಆಪ್ತ ಸಮಾಲೋಚಕ ಮನು ಎಸ್.ಬಿ. ಉಪಸ್ಥಿತರಿತ್ತೆರು. ಮಧುಮೇಹ ತಜ್ಞೆ ಡಾ.ಶ್ರುತಿ ಬಲ್ಲಾಳ್ ಸೊಲ್ಮೆ ಸಂದಾಯ್ತ ಮಲ್ತೆರ್. ದೀಪಾಶ್ರೀ ನಾಯಕ್ ಕಾರ್ಯಕ್ರಮ ನಿರೂಪಣೆ ಮಲ್ತೆರ್..

ಶಿಬಿರಡ್ ಮಧುಮೇಹ ನೆತ್ತೆರ್ ಪರೀಕ್ಷೆ, ರಕ್ತದೊತ್ತಡ ಪರೀಕ್ಷೆ, ಇಸಿಜಿ ಪರೀಕ್ಷೆ, ಕಣ್ಣುದ ಪರೀಕ್ಷೆ, ಕೂಲಿದ ಪರೀಕ್ಷೆ, ಚರ್ಮರೋಗ ತಪಾಸಣೆ, ಕಿವಿ ಗಂಟಲು ಮೂಗು ತಪಾಸಣೆ, ಅಸಾಂಕ್ರಾಮಿಕ ರೋಗಲೆನ ಬಗ್ಗೆ ಆಪ್ತ ಸಮಾಲೋಚನೆ ನಡತುಂಡ್.