ತುಳುನಾಡುಡ್ ನಮ್ಮ ಪೆರಿಯಕ್ಲು ಪ್ರತಿಯೊಂಜಿ ಇಚಾರೊಗ್ ಗಾದೆ ಕಟ್ಟೊಂದಿತ್ತೆರ್.ಅವ್ವ್ ನಮ್ಮ ತೆನಸ್ ಆದಿಪ್ಪು, ನಮ ತುತ್ತುನ ಕುಂಟು ಆದುಪ್ಪು,ಅತ್ತುಂದಾಂಡ ನಮ್ಮ ಆಚಾರ ವಿಚಾರೊಲು ಆದುಪ್ಪು..ಅಕುಲು ಶಾಲೆ ಕಲ್ದುಜೆರೆಡಲಾ ತನ್ನನೇ ಆಯಿನ ಗೇನದ ಗೊಂಚಿಲು ಅಕಲೆಡ ಇತ್ತುಂಡ್.ಅವ್ವೆನೇ ಇತ್ತೆದ ವಿಜ್ಞಾನಲಾ ಪನ್ಪುಂಡ್.ಅಂಚಾದ್ ನಮ್ಮ ಮೂಲೊಡು ಪೆರಿಯಕ್ಲು ಪಂತಿನ ವಿಚಾರೊಲೆಡ್ ಒಂಜಿ ಅರ್ಥಪೂರ್ಣವಾಯಿನ ನಿಜ ಸಂಗತಿ ದೆಂಗುದುಂಡ್ ಪನ್ಪಿನೇಕ್ ಕೆಲವೊಂಜಿ ಗಾದೆಲೇ ಸಾಕ್ಷಿ.ಇಂಚಿತ್ತಿನ ಕೆಲವು ಗಾದೆಲು ಬೊಕ್ಕ ಐತ ಅರ್ಥೊಲೆನ್ ನಿಕಲೆಗ್ ತೆರಿಪಾವುನ ಒಂಜಿ ಎಲ್ಯ ಪ್ರಯತ್ನ ಮುಲ್ಪ ಮಲ್ಪುವಾ.
ಕಂಚಲ ಇತ್ತುಂಡ ಎಂಚಲಾ ಉನೊಲಿ ಪನ್ಪಿನ ಗಾದೆ ಕಂಚಲ ಪನ್ಪಿನ ಕಜಿಪುದ ತರಕಾರಿಡ್ದ್ ಬೈದಿನವ್.ಈ ಕಂಚಲೊಡ್ ಮಸ್ತ್ ಬಗೆತ್ತ ಮರ್ದ್ ದ ಅಂಶ ಉಂಡು.ಸೀಪೆ ಪಡಿಕೆಗ್ ಈ ಕಂಚಲ ಪಂಡುದ್ ಮಲ್ದಿನ ಮರ್ದ್.ಕಂಚಲೊನ್ ಸೀಪೆ ಪಡಿಕೆ ಇತ್ತಿನಕುಲು ಜಾಸ್ತಿ ತಿಂದುಂಡ ಎಡ್ಡೆ.ಕಂಚಲೊಗ್ ಅಂಬಡೆ ಪಾಡ್ದ್ ಒಂತೆ ಬೆಲ್ಲ ಪಾಡ್ದ ಆಜಾಂಡ ಐತ ಕೈಪೆಲಾ ಪೋಪುಂಡ್.ವನಸ್ ಮಲ್ಪರೆಗುಲಾ ಬಾರೀ ಎಡ್ಡೆ ಆಪುಂಡ್.ಒಂತೆ ಜಾಸ್ತಿಯೇ ವನಸ್ ಮಲ್ಪೊಲಿ.
ಅಂಚೆನೇ ಕಂಚಲಡ್ ಬೇತೆ ಬೇತೆ ಬಗೆಲಾ ಮಲ್ಪೊಲಿ.ಉಪ್ಪಡ್ ಮಲ್ತುದುಲಾ ದೀಯೊಲಿ.ದಿನೊಲಾ ವನಸ್ ದೊಟ್ಟುಗ್ ನಾಲಾಯಿದ ಕೊಡಿಟ್ ನಕ್ಕುದ್ ಉನರೆಗ್ ಲಾಯ್ಕಾಪುಂಡ್.ಅಂಚೆನೇ ಕಂಚಲ ಫ್ರೈಲಾ ಮಲ್ಪೊಲಿ.ಅವ್ಲಾ ಗಂಜಿ ವನಸ್ ಗ್ ಬಾರೀ ಸೋಕಾಪುಂಡ್.ಸೀಪೆ ಪಡಿಕೆ ಇತ್ತಿನಕುಲು ಮಾತ್ರ ಅತ್ತ್ ಮಾತೆರ್ಲಾ ತಿನೊಲಿ ಆರೋಗ್ಯಗ್ ಬಾರೀ ಎಡ್ಡೆ ಈ ಕಂಚಲ.
ಕೆಲವೊಂಜಿ ಸರ್ತಿ ನಮ ತಿನ್ಪುನ ತೆನಸ್ ಡ್ ವಾಯಿ ಜಾಸ್ತಿ ಆಯಿನಪಗ ಈ ಕಂಚಲದ ಇರೆತ್ತ ಕಷಾಯ ಮಲ್ತುದ್,ಮಂಜೊಲ್ದ ಪೊಡಿ ಪಾಡ್ದ್ ಕಲತ್ತುದ್ ಪರುಂಡಲಾ ವಾಯಿ ಕಮ್ಮಿ ಆಪುಂಡ್.ಎಲ್ಯ ಜೋಕ್ಲೆಗ್ ಕಂಚಲದ ಇರೆತ್ತ ರಸ ದೆತ್ತುದ್ ಪರ್ಪಾಂಡ ಬಂಜಿ‌ಬೇನೆ ಆಪಿನ ಕಮ್ಮಿ ಆಪುಂಡ್.ಜೀರ್ಣ ಶಕ್ತಿಲಾ ಎಡ್ಡೆ ಆಪುಂಡ್.
ಸೀಪೆ ಪಡಿಕೆದಕುಲು ದಿನೊಲಾ ಕಂಚಲ ಬೈಪಾದ್ ಉಪ್ಪು ಎಡ್ಡೆಮುಂಚಿದ ಪೊಡಿ ಮಂಜೊಲುದ ಪೊಡಿ ಬೆರಸಾದ್ ಕಾಂಡೆ ಸೂಪು ಮಲ್ತ್ ಪರುಂಡ ಸೀಪೆ ಪಡಿಕೆ ಕಮ್ಮಿ ಆಪುಂಡ್.
ಇಂಚ ವನಸ್ ದ ರುಚಿತ್ತ ಒಟ್ಟುಗ್ ನಮ್ಮ ಆರೋಗ್ಯನ್ ಕಾಪಾಡುನ ಶಕ್ತಿ ಕಂಚಲಗ್ ಉಂಡು.ಆಧುನಿಕತೆದ ಆಹಾರ ಪದ್ಧತಿ ಇನಿ ನರಮಾನಿನ ಆರೋಗ್ಯದ ಮಿತ್ತ್ ಮಸ್ತ್ ದುಷ್ಪರಿಣಾಮ ಬೂರ್ದುಂಡ್.ಅವ್ವೆನ್ ಸರಿ ಮಲ್ತೊನಡಾಂಡ ದುಂಬುದ ಕಾಲದ ಆಹಾರ ಪದ್ಧತಿಲೆನ್ ನಮ್ಮ ಬದುಕುಡ್ ಗಲಸುಂಡ ನಮ್ಮ ಆರೋಗ್ಯನ್ ಕಾತೊನೊಲಿ ಅತೇ..
by 