ಇತ್ತೆದ ಕಾಲೊಡ್ ನಮ ಬದುಕುನ ಜೀವನ ಶೈಲಿಡ್ ಸಾಮಾನ್ಯ ವಾಯಿನ ಒಂಜಿ ಸೀಖ್ ಮೂಲವ್ಯಾಧಿ.ಇಂಚಪ್ಪೊಗ್ ಈ ಸೀಖ್ ಗಣನೀಯವಾದ್ ಜಾಸ್ತಿ ಆವರೆಗ್ ಕಾರಣ, ಇತ್ತೆದ ಬದಲಾಯಿನ ಜೀವನ ಶೈಲಿ ಬೊಕ್ಕ ಆಹಾರ ಪದ್ಧತಿ.
ಮೂಲವ್ಯಾಧಿ ಪಂಡ ದಾದ:- ಗುದನಾಳೊಡುಪ್ಪುನ ನೆತ್ತೆರುದ ನಾಳೊಲು ನಿರಂತರವಾಯಿನ ಒತ್ತಡೊಡ್ದಾವರ ಬಾತುದ್ ನೆತ್ತೆರ್ ಬರ್ಪುಂಡ್.ಬೊಕ್ಕ ಅವ್ವ್ ಬೇನೆ ಆಪುಂಡ್.
ಮೂಲವ್ಯಾಧಿ ಗ್ ಕಾರಣ:-* ಜಾಸ್ತಿಯಾದ್ ಮಾಂಸಾಹಾರ ಸೇವನೆ,*ಜಾಸ್ತಿಯಾದ್ ಕುಲ್ಲುದ್ ಬೇಲೆ ಮಲ್ಪುನ್,*ಕುಲ್ಲುದ್ ಪ್ರಯಾಣ ಮಲ್ಪುನ್(ಡ್ರೈವರ್ ನಕುಲು), *ಸ್ಥೂಲಕಾಯದಕುಲು & ಬಂಜಿನ ಪೊಂಜೊವುನಕ್ಲೆನ ಬಂಜಿಡ್ ಒತ್ತಡ ಜಾಸ್ತಿ ಆಪಿನೆಡ್ದಾವರ.,*ಕಮ್ಮಿ ನೀರು ಪರ್ಪಿನಕ್ಲೆಗ್,& ತಪ್ಪು ತರಕಾರಿ ತಿನಂದೆ ಉಪ್ಪುನಕ್ಲೆಗ್,*ವನಸ್ ದ ಪೊರ್ತುನ್ ದಿನೊಲಾ ಬದಲಾವಣೆ ಮಲ್ಪುನೆಡ್ದಾವರ.,*ಗ್ಯಾಸ್ (ಎಸಿಡಿಟಿ ಆದ್ )*,ಕಮ್ಮಿ ನಿದ್ರೆ ಮಲ್ಪುನಕ್ಲೆಗ್.
ಲಕ್ಷಣೊಲು & ಪ್ರಕಾರೊಲು :- ಮುಖ್ಯವಾದ್ ಪಿದಾಯಿದ ಮೂಲವ್ಯಾಧಿ & ಉಲಾಯಿದ ಮೂಲವ್ಯಾಧಿ.
ಉಲಾಯಿದ ಮೂಲವ್ಯಾಧಿಡ್ ಸುರುತ ಹಂತೊಡ್ ಬೇನೆ ಉಪ್ಪುಜಿ.ನೆತ್ತೆರ್ ಮಾತ್ರ ಪೋಪುಂಡ್.ರಡ್ಡನೇ ಹಂತೊಡ್ ಮಲವಿಸರ್ಜನೆ ಮಲ್ಪನಗ ಪಿದಾಯಿ ಬತ್ತುದ್ ಅವ್ವ್ ತನ್ನಾತೆಗೇ ಉಲಾಯಿ ಪೋಪುಂಡ್. ಮೂಜನೇ ಹಂತೊಡ್ ನೆತ್ತೆರ್ ಸ್ರಾವ ಇತ್ತುದ್ ಮಲವಿಸರ್ಜನೆದ ಪೊರ್ತುಗ್ ಪಿದಾಯಿ ಬತ್ತುದ್ ಬೊಕ್ಕ ಉಲಾಯಿ ಪೋಪುಂಡ್. ನಾಲನೇ ಹಂತೊಡ್ ಸಂಪೂರ್ಣ ಪಿದಾಯಿ ಇತ್ತುದ್ ಮಸ್ತ್ ಬೇನೆ ಆಪುಂಡ್.ಪಿದಾಯಿದ ಭಾಗೊಡುಪ್ಪುನ ಮೂಲವ್ಯಾಧಿ ದ್ರಾಕ್ಷಿದ ಲೆಕ್ಕ ಪಿದಾಯಿ ಬಾಗುದ್ ಕುಲ್ಲನಗ ಮಸ್ತ್ ಬೇನೆ ಆಪುಂಡ್.ನೆಟ್ ನೆತ್ತೆರ್ ಸ್ರಾವ ಆಪುಜಿ.ಕೆಲವೆರೆಗ್ ಒಂತೆ ಕಿರುಂಬುಂಡ್.
ಚಿಕಿತ್ಸೆ:- ಆಯುರ್ವೇದಡ್ ಮೂಲವ್ಯಾಧಿಗ್ ಆಮಜನ್ಯವ್ಯಾಧಿ ಪಂಡುದ್ ಪರಿಗಣನೆ ಮಲ್ತುದ್ ಚಿಕಿತ್ಸೆ ಕೊರೊಡಾಪುಂಡ್.ಆಮ ಪಂಡ ಜೀರ್ಣಕ್ರಿಯೆ.ಅಸಮರ್ಪಕ ವಾದ್ ಅಪಕ್ವ ಅಹಾರರಸ ನೆತ್ತೆರುನ್ ಸೇರ್ದ್ ಐಟ್ ಈ ವ್ಯಾಧಿ ಬರ್ಪುಂಡ್.ಐಕ್ ಮುಖ್ಯವಾದ್ ಈ ಆಮಗ್ ಚಿಕಿತ್ಸೆ ಕೊರ್ಪುನೆಡ್ದಾವರ ಜೀರ್ಣಶಕ್ತಿ ಸರಿಟ್ ಆಪಿಲೆಕ್ಕ ಮರ್ದ್ ಕೊರೊಡಾಪುಂಡ್.ಮಲವಿಸರ್ಜನೆ ಸಲೀಸಾದ್ ಆಪಿಲೆಕ್ಕ ಮರ್ದ್ ಕೊರುಂಡ ಈ ಸೀಖ್ ನ್ ಬೇಗ ಗುಣ ಮಲ್ಪೊಲಿ.ಐಕಾದ್ ಆಹಾರ ಕ್ರಮೊಟ್ ಬದಲಾವಣೆ ಮಲ್ಪೊಡಾಪುಂಡ್.ಮುಲ್ಪ ಮಿತ್ತುಡ್ ಮೂಲವ್ಯಾಧಿಗ್ ಕಾರಣ ಒವ್ವ್ ಮಾತಾ ಪಂತೆನಾ ಅವ್ವೆನ್ ಬುಡೊಡಾಪುಂಡ್.ಪಂಡ ಮೆದುತ ,ಹಿತಮಿತವಾಯಿನ ತೆನಸುನ್ ಹೆಚ್ಚಾದ್ ತಿನೊಡ್.ಮಸಾಲ,ಖಾರ,ಉಪ್ಪು,ಪುಳಿ ಉಪ್ಪುನ ತೆನಸುನ್ ಬೊಕ್ಕ ಮಾಂಸಾಹಾರ ಕಮ್ಮಿ ಮಲ್ಪೊಡ್.ಮಲವಿಸರ್ಜನೆ ಗ್ ಅನುಕೂಲ ಆಪಿಲೆಕ್ಕ ಪಲವಸ್ತು,ತರಕಾರಿ,ತಂಪು ಬೀಜ ಬೊಕ್ಕ ಮಸ್ತ್ ನೀರು ಪರೊಡ್.ಆಹಾರ ಸೇವನೆ ಮಲ್ಪುನ ಪೊರ್ತು ಬೊಕ್ಕ ಮಲವಿಸರ್ಜನೆ ಮಲ್ಪುನ ಪೊರ್ತು ನಿಗದಿತವಾದುಪ್ಪೊಡ್.ಮಲವಿಸರ್ಜನೆ ಮಲ್ಪನಗ ಜಾಸ್ತಿ ಪೊರ್ತು ಬಿಕ್ಕರೆಗ್ ಬಲ್ಲಿ.
ಮರ್ದ್ ದ ಚಿಕಿತ್ಸೆ:-ನೆಟ್ 2 ಪ್ರಕಾರ ಉಂಡು.1. ಮರ್ದ್ ದ ಚಿಕಿತ್ಸೆ,2. ಕ್ಷಾರ ಸೂತ್ರ. ಆರಂಭದ ಹಂತೊಡ್ ಇತ್ತುಂಡ ಶಮನ ಮರ್ದ್ ಡ್ ಗುಣ ಮಲ್ಪೊಲಿ.ಸಾಮಾನ್ಯವಾದ್ ತ್ರಿಫಲಾ ಚೂರ್ಣ,ಇಸಬ್ ಗುಲ್ ಚೂರ್ಣ,ಇಂಚಿತ್ತಿನ ಮಲಬದ್ಧತೆನ್ ಕಮ್ಮಿ ಮಲ್ಪುನ ಮರ್ದ್ ನ್ ಗಳಸೊಲಿ.ನೆತ್ತ ಒಟ್ಟುಗ್ ತೀವ್ರತೆಗ್ ಅನುಗುಣವಾದ್ ರಸ ಮರ್ದ್ ದ ಪ್ರಯೋಗೊಲೆನ್ ಸೀಖ್ ಗ್ ಅನುಸಾರ ಗಳಸೊಲಿ.ರೋಗ ಮೂಜನೇ ಹಂತ ಅತ್ತುಂಡ ನಾಲನೇ ಹಂತೊಡುಪ್ಪನಗ ಅತ್ತುಂಡ ತೀವ್ರ ನೆತ್ತೆರ್ ಸ್ರಾವ ಆವೊಂದಿತ್ತುಂಡ ಐಕ್ ಕ್ಷಾರ ಅತ್ತುಂಡ ಕ್ಷಾರ ಸೂತ್ರದ ಮುಖೇನ ಚಿಕಿತ್ಸೆ ಕೊರೊಲಿ.ಕ್ಷಾರಸೂತ್ರ ಶಸ್ತ್ರ ಚಿಕಿತ್ಸೆ ದಾತೇ ಫಲಕಾರಿಯಾದುಪ್ಪುಂಡ್.ಉಂದೆನ್ ಪಿದಾಯಿದ ರೋಗಿಯಾದೇ ಮಲ್ತೊನೊಲಿ.ಮಸ್ತ್ ಕಮ್ಮಿ ದಿನೊಟ್ (15-20 ) ನಿಮಿಷೊಡ್ ಮಲ್ಪೊಲಿ.100% ಪರಿಣಾಮಕಾರಿಯಾದುಪ್ಪುಂಡ್.ಆಸ್ಪತ್ರೆಡ್ ಜೆಪ್ಪುನ ಅವಶ್ಯಕತೆ ಇಜ್ಜಿ.ಬೇತೆ ಚಿಕಿತ್ಸೆ ಗ್ ಹೋಲಿಸಾಂಡ ಮಸ್ತ್ ಕಮ್ಮಿ ಖರ್ಚಿಡ್ ಆಪುಂಡ್.ಒಂಜಿ ರಡ್ಡ್ ದಿನ ಜಾಗ್ರತೆ ಮಲ್ಪೊಡ್.ಬೊಕ್ಕ ಮಾಮೂಲಿ ಕೆಲಸೊನ್ ಮಲ್ಪೊಲಿ. ದುಂಬುದ ಎಗ್ಗೆಡ್ ಫಿಷರ್ ಬೊಕ್ಕ ಭಗಂದರ (ಫಿಸ್ತುಲಾ) ದ ಬಗ್ಗೆ ತೆರಿಗ..
ಡಾ.ಬಿ.ದೇವದಾಸ್ ಶೆಟ್ಟಿ ಆಯುರ್ವೇದ ಚಿಕಿತ್ಸಾ ತಜ್ಞೆರ್ ಯುನಿಟಿ ಹೆಲ್ತ್ ಕ್ಲಿನಿಕ್,ವಿ.ಬಿ.ರೋಡ್.ಮಲ್ಪೆ. 9902209668
by 