ಧರ್ಮನೇ ಆದ್ ಅವತರಿತೆ “ಕ್ರಷ್ಣೆ”

“ಧರ್ಮ” ನೇ ಆದ್ ಅವತರಿತೆ “ಕೃಷ್ಣೆ” ಪೆತ್ತಿ ಅಪ್ಪೆಗ್ ಶ್ಯಾಮೆ ಆದ್,ತಾಂಕಿನ ಅಪ್ಪೆಗ್ ಕೃಷ್ಣೆ ಆದ್ ,ಗೋಪಾಲ ಮಂದೆಗ್ ಗೋವಿಂದೆ ಆದ್, ರಾಧೆಗ್ ಕನ್ನೆ ಆದ್ ಬುಲೆಯಿನ್ ಈ ಪೋಕ್ರಿ‌, ಒಂಜಿ ಜನಮಂದೆನ್ ಉದ್ದರಿಪರೆ ಬೋಡಾದ್ ಕರ್ಪಿಲ್ಲ್ ಡ್ ನಡುರಾತ್ರಿಡ್ ಪುಟಿಯೆ.ಈ ಬಾಲೆ ಗೊಲ್ಲೆರೆ್ ಬಾಲೆ ಆದ್ ಒರಿಯಂದೆ ಆಕಾಲದ ಜಗತ್ತ್ ದ ಕಷ್ಟೊಲೆನ್ ಪಿರಿ ಮಲ್ಪುವೆ.ತನ್ನ ಪೊರ್ಲ ದೇಕಿಡ್ ಜಗತ್ತ್ ದ ಮನಸ್ಸ್ ನ್ ಗೆಂದುವೆ.ಈ ಅಚ್ಚಿರದ ಕರಿಯೆನೇ ಕೃಷ್ಣೆ. ಕರಿಯೆ ಆಂಡ ದಾನೆ ಅಯನ್ ಅನಂತೆ ಪಂಡೆರ್,

ಕರ್ಪಿಲ್ಲ್ ಡ್ ಪುಟ್ಟಿಯೆಡ ದಾನೆ ಜಗತ್ತ್ ಡ್ ತೆಕ್ ದ್ ಫೋತಿನ ಧರ್ಮೊದ ಬೊಲ್ಪುನಿ ಕುಡ ಒರ ಬೆಳಗಾದ್ ಮಸ್ತ್ ಎಡ್ಡೇದಿಗೆದ ಸಜ್ಜನೆರೆನ್ ಕರ್ಪಿಲ್ಲ್ ಡ್ದ್ ಬುಡ್ಪಾವೆ,ಆಮೂಲಕ ದೇಶದ ಒರ್ಮೆ ಮಾನ್ಯತೆ ಪಡೆಯೆ.ನಾರಾಯಣ ದೇವೆರ್ನ ಅವತಾರ
ಪಂಡ್ ದೇ ಋಷಿ ಮುನಿಕುಲು ಪುಗರಿಯೆರ್. ಧರ್ಮೊನೇ ಕೃಷ್ಣ ರೂಪೊಡು ಅವತರಿತ್ಂಡ್.
ಗೋ ಮಂದೆದ ನಡುಟು ಗೊಲ್ಲೆರೆ ಜೋಕುಲೊಟ್ಟುಗು ಗೊಬ್ಬೊಂದು ಕೊಲಲ್ ಉರ್ತೊಂದು ಗೋಮಂದೆನ್ ಅಂಚೆನೆ ಗೊಲ್ಲೆರ್ನ,ಗೊಲ್ಲ ಪೊಣ್ಣುಲೆ , ಇಡೀ ಸಮುದಾಯದ ಜನಕುಲೆ ಪ್ರೀತಿನ್ ಸಂಪಾದಿತೆ,ಅಕಲೆನ ಏವುದೆಪ್ಪುದ ಕಷ್ಟೊನು ಪರಿಹರಿಪುವೆ ಕೃಷ್ಣೆ. ಈ ಬೀರಬಿರ್ಸಾದಿಗೆದ ಕೃಷ್ಣೆ ಜಗತ್ತ್ ದ ಅಂಗಣೊಗು‌ ಜಪ್ಪುವೆ .ಅಲ್ಪ ಸಾಧಿತಿನ ಧರ್ಮೊದ ಕಾರ್ಯೊಲು ಕಾರಣವಾದ್ ಸಜ್ಜನೆರೆ ಬಾಯಿಡ್ , ಋಷಿ ಮುನಿಕುಲೆನ ಸುಗಿಪುಡು ಕೇಂಡ್ ದ್ ಬತ್ತಿನೇ “ಕೃಷ್ಣವತಾರ ಪರಿಪೂರ್ಣ ಅವತಾರ”.
ನಾರಾಯಣ ದೇವೆರ್ನ ಅವತಾರೊಲು ಪೂರ ಒಂಜೊಂಜಿ ಕಾರಣೊಗು ಬೋಡಾದ್ ನಡತ್ಂಡ್. ಆ ಒಂಜಿ ಕಾರಣಲಾ ಸರ್ವೆರೆಗ್ ಸುಖ ಒದಗ್ಂಡ್,
ಧರ್ಮ ನೆಲೆ ಆವೊಂದು ಬತ್ತ್ಂಡ್.ಆಂಡ ಕೃಷ್ಣಾವತಾರ ನಿಜ ಅರ್ಥದ ‘ಅಬತಾರನೇ’ ಆಂಡ್.
ದ್ವಾಪರಾ ಯುಗತ ಅಕೇರಿಡ್ ಪೊರ್ಲಕಂಟ್ ದ ಮುಗಿತಾಯೊನು ಬರೆಯಿನ ಕೃಷ್ಣ ದೇವೆರ್ ಜನ ಮಂದೆಗ್ ಕೊರಿನಿ ಅಳಿದಾಂತಿ ಗೇನ,ಅವ್ವೆ “ಗೀತೆ” ಪನ್ಪಿನ ‘ಸಂಧಿ’. ಸಾರ ಸಾರ ವರ್ಸ ಕರಿದ್ ಪೋಂಡಲಾ ಗೀತೆ ಪನ್ಪಿನ ಗೇನ ಇನಿಗ್ ಲಾ ಜನಮನ್ನಣೆ ,ದೇಶದ ಮಾನಿಪು ಪಡೆಯಿನ ಗ್ರಂಥಲಾ ಅಂದ್.ಆ ಕಾಲೊಡು ನೆಲೆ ಮಲ್ತಿನ ಅತ್ತಡ ತೋಜಾಯಿನ ಧರ್ಮದ ಸಾದಿಯೇ ಈ ಮಣ್ಣ್ ದ ಸಂಸ್ಕೃತಿಯಾದ್ ‘ಗೀತೆ ಪಂಡ ಗೇನ’ ಆದ್ ಬೆಳಗೊಂದು ಉಂಡು.
ಒರಿ ಗೊಲ್ಲೆ ಆದ್ ಪುಟಿನ ಕೃಷ್ಣೆ ತನ್ನ ಸಾಧನೆಡ್ ಮಾಮಲ್ಲ‌ ಬಿರ್ಸೆ ಆದ್ ಪೆಟ್ಟ್ ದ ಕಲೊಟು,
ಗೇನದಾಯೆ ಆದ್ ವಿದ್ವಾಂಸರ್ನ ಕೂಟೊಡು,
ಆಳುನ ಅರಸುಲೆ ಮಧ್ಯೊಡು ಮಾನ್ಯತೆ ಪಡೆತೊಂದು ಏರೊಂದು ಪೋಯಿನ ಎತ್ತರ ನರಮಾನಿ ಸಾಧಿತೆಡ ಇಂಚ ಸಾದಿಪೊಡು ಪನ್ಪಿನ ಸತ್ಯೊನು ಲೋಕೊಗು ತೋಜಾದ್ ಕೊರಿಲೆಕ್ಕ ಉಂಡು ಕೃಷ್ಣನ ಬದ್ ಕ್.ಅಂಚಾದೆ ಕೃಷ್ಣ ಪಂಡ ಇಂಚ ಉಪ್ಪೊಲಿ ಪಣ್ಪಿನೆಕ್ಕ್ ಒಂಜಿ ಉದಾರ್ನೆ.
ದ್ವಾಪರಯುಗತ ಅಕೇರಿಡ್ ದೇಶದ ಆಡಳಿತ ಏರೆಗ್ ಪನ್ಪಿನ ಕಲಹ ಒಂಜಿ ಅರಸು ಕುಟುಮೊಡು ಉಂಡಾಪುಂಡು.ಈ ಕಲಹ ಒಂಜಿ ಕುಟುಮೊದ ಜಿದ್ದ್ ಆದ್ ಒರಿಪುಜಿ ಇಡೀ‌ ದೇಶದ ಭವಿಷ್ಯದ ಬೊಕ್ಕ ಧರ್ಮದ ಪ್ರಶ್ನೆ ಆಪುಂಡು.ಈ ಸಂದರ್ಭೊಡು ಅರಸು ಕುಟುಮದ ಧರ್ಮಿಷ್ಟೆರ್ನ ಪಕ್ಷ ವಹಿಸಿನ ಕೃಷ್ಣೆ ನ್ಯಾಯ ತೀರ್ಮಾನೊಗು ಅರಂತಡೆಕ್ ಪೋಪೆ.
ದ್ವೇಷ ಸಾಧಿಪಡೆ,ನ್ಯಾಯೊಡು ದೇಶೊನು ಪಾಲ್ ಮಲ್ತೊನ್ಲೆ,ಪಾಲ್ ಪಂತೆಡ್ ದೇಶದ ಪ್ರಜೆಕುಲೆನ ಶಾಂತಿಸಮಾದಾನೊಗು ತೊಂದರೆ ಆವರ ಬಲ್ಲಿ,
ಧರ್ಮದ ಮಣ್ಣ್ ಡ್ ಅಧರ್ಮ ನಲಿಪರೆ ಬಲ್ಲಿ ಪನ್ಪಿ ಸಮಾಧಾನದ ಪಾತೆರ ಪನ್ಪಿನ ಕೃಷ್ಣೆ ಮಲ್ತಿನ ಪಂಚಾತಿಕೆ ನಡಪಂದೆ ಪೋನಗ ಪೆಟ್ಟ್ ದ ಬೂಲ್ಯೆ ಪತೊಂದು ಬರ್ಪೆ.ಧರ್ಮದ ಪಕ್ಷೊಡು ಉಂತುದು,ಅನ್ಯಾಯ ಅಧರ್ಮ ಏಪೊಲಾ ಈ ಮಣ್ಣ್ ಡ್ ಗೆಂದೂಜಿ‌ ಪನ್ಪಿನ ಸತ್ಯೊನು ನಡತಿನ ಮಲ್ಲ‌ಪೆಟ್ಟ್ ದ ಕಲೊಟು ನೆಗತಿಲೆಕ್ಕ ಮಲ್ಪುವೆ ಕೃಷ್ಣೆ. ಧರ್ಮ ನೆಲೆ ಮಲ್ಪರೆನೇ ಕೃಷ್ಣೆ ಅವತರಿತೆ ಪನ್ಪಿನ ಋಷಿವಾಕ್ಯೊಳು ಸತ್ಯ ಆಂಡ್.
——————–
$ ವಸುದೇವನ ಮಗೆ ಆದ್ ಕೃಷ್ಣೆ ವಾಸುದೇವ ಅತ್ತ್ ಆಯೆ “ವಸುದೈವ” ಕುಟುಂಬಿಯಾದ್ “ವಾಸುದೇವೆ”.

$ ಬಾಲ್ಯೊಡು ಗೊಬ್ಬಿನ ಗೊಬ್ಬು,ತೋಜಾಯಿನ ಲೀಲೆಲು ಜೋಕುಲಾಟಿಕೆ ಅತ್ತ್ ಅವು “ದರ್ಶನ”.

$ ಪೆತ್ತ ಕೈಕಂಜಿ ಸಾಂಕಣೆ – ಸಾಗುವಳಿ ನಮ್ಮ
ಬದ್ಕ್ ಗ್ ಸಂಪೊತ್ತುದ ಬಲ ಕೊರ್ಪುಂಡು ಪನ್ಪಿನ ಸತ್ಯೊನು ಸಾಧಿತ್ ತೋಜಾಯಿನಿ ಬಲರಾಮ – ಕೃಷ್ಣೆ. (ಕೃಷ್ಣೆ ಗೋಪಾಲ ಕೃಷ್ಣೆ – ಬಲರಾಮನ ಆಯುಧನೇ ನಾಯೆರ್.)

$ ವಿದುರೆ ಕೊರಿನ ಪೇರ್ ಪರ್ದ್ ಕಡೆ ಬಾಯಿಡ್ ಒಂಜಿ ಬೊಟ್ಟ ಪೇರ್ ಭೂಮಿಗ್ ಚೆಲ್ಲ್ ದ್ ನೆಲಕ್ ಬೂರಿನ ಪೇರ್ ಸುದೆ ಆದ್ ಪರತ್ಂಡ್,ಹಸ್ತಿನಾವತಿ ಪೇರ್ ಡ್ ದಿಂಜಿಂಡ್ ; ಇಂದ್ ಕೃಷ್ಣ ತೋಜಾಯಿನ ಪವಾಡ.

$ ಕಣ್ಣ್ ಗ್ ತೋಜುನ ಭೂಮಿಡ್ ಉದಿತಿನ ಕೃಷ್ಣೆ ಭೂಮಿದ ಕಾರ್ನಿಕ.ಕೃಷ್ಣೆನೇ ಒಂಜಿ ವಿವರಿಪರೆ ಆವಂದಿ ಕಾರ್ನಿಕ.

$ ದೇವೆರ್ – ನರಮಾನಿ ನಡುತ ಗೊಣಸ್ ಕೃಷ್ಣೆ.
———————— * ಕೃಷ್ಣೆ ಕರ್ಪಿಲ್ಲ್ ಡ್ ಪುಟಿನ ದಿನ ಅಟ್ಟೆಮಿ,ಆನಿ ಅಷ್ಟಮಿ ತಿಥಿ,ರೋಹಿಣಿ ನಕ್ಷತ್ರ. * ನಂದಗೋಕುಲೊಡು ಗೊಬ್ಬಿನ ಗೊಬ್ವು,ಕಂಡಿನ ಪೇರ್,ಕೊಜಪು,ಬೊಲ್ಯನೈ ..ನೆತ್ತ ನೆನಪುಡು ನಡಪುಂಡು ಮಸುರ್ಡಿಕೆ.

• ವಿಟ್ಲ ಪಿಂಡಿ : ಕೃಷ್ಣನ ಪುದಾರ್ ವಿಟಲೆ(ವಿಠಲೆ).
  ಆಯೆ ಗೊಬ್ವರೆ ಪೋನಗ,ಪೆತ್ತ ಮೇಪರೆ ಪೋನಗ ತಿನ್ಯರೆ ಪತೊಂದು ಪೋಯಿನ – ಕೃಷ್ಣಗ್ ಕೊರಿಯರೆ ಗೊಲ್ಲ ಜೋಕುಲು ಕೊಣಾತ್ತಿನ ಗಂಟ್ (ಪಿಂಡಿ) ವಿಟ್ಲಪಿಂಡಿ.ನೆಕ್ಕ್ ಬೋಡಾದ್ ನಡಪುನ ‘ಎಂಕ್ ಎಂಕ್’ ಪನ್ಪಿನ ಗೊಬ್ಬು ವಿಟ್ಟಪಿಂಡಿ.
• ಪೇರರ್ಘ್ಯೆ : ಅಟ್ಟೆಮಿದಾನಿ ಉಪಾಸ ಇತ್ತ್ ದ್ಬ ತುಲಸಿ ಕಟ್ಟೆದ ಎದುರು ರಾತ್ರಿ ಚಂದ್ರೋದಯ ಆಯಿಬೊಕ್ಕ ದರ್ತಿನ ತಾರಾಯಿದ ಗಡಿಕ್ ಪೇರ್ ಬಡ್ಪಿನ ಕ್ರಮನೇ ಪೇರರ್ಘ್ಯೆ.ಬಹುಶ ಈ ಕ್ರಮ ಇತ್ತೆ ನೆನಪು ಮಾತ್ರ. @ ಕುಂಡಂತಾಯ. ~~~~~~~~~~~~~~</code></pre></li>