ಸುಗಿಪು ಪದೊ

ಸುಗಿಪು ಪದೊ

ಉಲ್ಲಾಯೆ

ಸುಗಿಪುವಾ ಗಣಕುಲೆ ಉಲ್ಲಾಯ
ನಟ್ಟುವಾ ಈರೆನ ಬೆರಿಸಾಯ…
ಸುರುತ ಪೂಜೆ ಈರೆಗ್ ಸಂದಾಯ
ಕಸ್ಟೊದ ಇರ್ಲ್ ಗ್ ಕೊರ್ಲೆ ಅಭಯಾ….
||ಸುಗಿಪುವಾ||

ಶಂಕರ ಪಾರ್ವತಿನ ಪಿರುತಿದ ಬಾಲೆ
ಲೋಕೊಗು ತೋಜಯರ್ ಈರೆನ ಲೀಲೆ
ಎಲಿತ ಮಿತ್ತುಡ್ ಸವಾರಿ ಮಲ್ತೊಂದು
ಬರ್ಪರ್ ಕರುಣೆಡ್ ಬಕ್ತೆರೆನ್ ಕಾತೊಂದು…
||ಸುಗಿಪುವಾ||

ಚೌತಿದ ದಿನೊತಾನಿ ಬಗೆ ಬಗೆ ತೆನಸ್
ಇರೆ ಪೊರ್ಲು ತೂಂಡ ಮರ್ಲುಂಡು ಮನಸ್
ಭಕ್ತಿ ಉರ್ಕರ್ದ್ ತರೆ ಕಂತ ಪಾಡುಂಡು
ಸರ್ರೋನೆ ಬಗ್ಗ್ ದ್ ಪಾದೊಗಡ್ಡ ಬೂರುಂಡು….
||ಸುಗಿಪುವಾ||

ವಿದ್ಯೆ ಬುದ್ದಿಗ್ ಗೇನೊನು ಕೊರುದು
ಗತಿತಾ ಮತಿತಾ ತಾದಿನ್ ತೋಜಾದ್
ಮದ ಮಚ್ಚರದ ಬಿದೆನ್ ಅಳಿತುದ್
ಒರಿಪಾವರ್ ಎಡ್ಡೆಪ್ಪುನು ಉಡಲ ಬಾಮೊಡು
||ಸುಗಿಪುವಾ||

✍️ ಸೌಮ್ಯ ಆರ್ ಶೆಟ್ಟಿ
ತುಲುವೆರೆ ಕಲ