ಶ್ರೀ ದುರ್ಗಾ ಆದಿಶಕ್ತಿ ಕ್ಷೇತ್ರ ದೊಡ್ಡಣಗುಡ್ಡೆಡ್ ವಿಷ್ಣು ಸಹಸ್ರನಾಮ ಯಾಗ ಲಕ್ಷ್ಮೀನಾರಾಯಣ ಹೋಮ..

ಶ್ರೀ ಚಕ್ರ ಪೀಠ ಸುರಪೂಜಿತೆ ಶ್ರೀ ದುರ್ಗಾ ಆದಿಶಕ್ತಿ ಕ್ಷೇತ್ರಡ್ ಆಗಸ್ಟ್ 10 ಗುರುವಾರ ಅಧಿಕ ಶ್ರಾವಣ ಮಾಸ ಆಚರಣೆ ವಿಷ್ಣು ಸಹಸ್ರನಾಮ ಯಾಗ ಲಕ್ಷ್ಮೀನಾರಾಯಣ ಹೃದಯ ಹೋಮ

ಉಡುಪಿ ದೊಡ್ಡಣ್ಣ ಗುಡ್ಡೆದ ಶ್ರೀ ಚಕ್ರ ಪೀಠ ಸುರಪೂಜಿತೆ ಶ್ರೀ ದುರ್ಗಾ ಆದಿಶಕ್ತಿ ಕಾರಣಿಕ ಕ್ಷೇತ್ರೊಡ್ ಅಧಿಕ ಶ್ರಾವಣ ಮಾಸದ ಪ್ರಯುಕ್ತ ಶ್ರೀ ವಿಷ್ಣು ಸಹಸ್ರನಾಮ ಯಾಗ ಬೊಕ್ಕ ಲಕ್ಷ್ಮೀನಾರಾಯಣ ಹೃದಯ ಹೋಮ ಕ್ಷೇತ್ರದ ಧರ್ಮದರ್ಶಿ ಶ್ರೀಯುತ ಶ್ರೀ ಶ್ರೀ ರಮಾನಂದ ಗುರೂಜಿ ಮಾರ್ಗದರ್ಶನಡ್ ವೇದಮೂರ್ತಿ ಕೃಷ್ಣಮೂರ್ತಿ ತಂತ್ರಿಲೆನ ನೇತೃತ್ವಡ್ ಅಗಸ್ಟ್ 10 ಗುರುವಾರದಾನಿ ಸಂಪನ್ನ ಆವರೆಗುಂಡ್.

ಬಾರೀ ಫಲಪ್ರದವಾಯಿನ ಅಧಿಕಮಾಸಡ್ ಸಂಪನ್ನ ಆವರೆಗುಪ್ಪುನ ಈ ಮಹಾನ್ ಯಾಗ. ಕಾಂಡೆ 8 ಗಂಟೆಡ್ದ್ ಸುರುವಾಪುಂಡ್. ಅಧಿಕ ಮಾಸಡ್ ಶ್ರೇಷ್ಠ ವಿಪ್ರರೆಗ್ ಕೊರ್ಪಿನ ವಿಶೇಷ ದಾನಾದಿಲು ಆಚರಣೆಲು ಆನಿ ನಡಪರೆಗಿತ್ತುದ್ ಮಧ್ಯಾಹ್ನ ಮಹಾ ಅನ್ನಸಂತರ್ಪಣೆಲಾ ನಡಪರೆಗುಂಡ್.

ಈ ಮಹಾನ್ ಯಾಗ ಸಾಮೂಹಿಕವಾದ್ ನಡಪುನೇಡ್ದಾವರ ಆಸಕ್ತ ಭಕ್ತೆರು ಕ್ಷೇತ್ರೊನ್ ಸಂಪರ್ಕ ಮಲ್ತುದ್ ಯಾಗಡ್ ಪಾಲ್ ಪಡೆಯೊಲಿ ಪಂಡುದು
ಕ್ಷೇತ್ರದ ಉಸ್ತುವಾರಿ ಶ್ರೀಮತಿ ಕುಸುಮ ನಾಗರಾಜ್ ತೆರಿಪಾದೆರ್…

ಹಿಂದೂ ಧರ್ಮೊಡ್ ಪ್ರತಿಯೊಂಜಿ ದೇವರೆನ್ ವಿಶಿಷ್ಟ ರೀತಿಡ್ ಪೂಜೆ ಮಲ್ಪುವೆರ್ ಬೊಕ್ಕ ಪ್ರತಿಯೊಂಜಿ ಪರ್ಬೊಡುಲಾ ದೇವರೆನ್ ತೂಪಿನ ಪದ್ಧತಿ ಉಂಡು.
ಸೂರ್ಯ ಸಂಕ್ರಾಂತಿ ಇಪ್ಪಂದಿನ ಚಂದ್ರನ ತಿಂಗೊಲುನ್ ಅಧಿಕಮಾಸ ಪಂಡುದ್ ಲೆಪ್ಪುವೆರ್. ಉಂದೆನ್ ಮಲ ಮಾಸ ಅತ್ತುಂಡ ಪುರುಷೋತ್ತಮ ಮಾಸ ಪಂಡುದುಲಾ ಲೆಪ್ಪುವೆರ್.
ಈ ತಿಂಗೊಲುಡ್ ಒವ್ವೇ ಪರ್ಬೊಲು ಉಪ್ಪುಜಿ. ಆಂಡ ಈ ತಿಂಗೊಲುಡ್ ಮಲ್ಪುನ ದಾನ ಬೊಕ್ಕ ಆಚರಣೆಲು ಬಾರೀ ಪವಿತ್ರ ಬೊಕ್ಕ ಫಲಪ್ರದವಾದುಂಡ್…
ಅಧಿಕಸ್ಯ* *ಅಧಿಕ ಫಲಂ ಪನ್ಪಿಲೆಕ್ಕ ಈ ಅಧಿಕ ಶ್ರಾವಣ ಮಾಸಡ್ ಮಲ್ತಿನಂಚಿನ ಯಜ್ಞ ಯಾಗಾದಿಲು ದಾನ ಧರ್ಮೊಲ್ ಬಾಕಿದ ಪೊರ್ತುಡ್ ಮಲ್ತಿನವ್ವೆಡ್ 10 ಪಟ್ಟು ಜಾಸ್ತಿ ಫಲೊನ್ ಕೊರ್ಪುಂಡ್…
*ಮೂವತ್ತ ಮೂರು* ಸಂಖ್ಯೆಗ್ ಅಧಿಕಮಾಸಡ್ ಹೆಚ್ಚಿಗೆ ಪ್ರಾಶಸ್ತ್ಯ ಕೊರ್ತುಂಡ್.. ನಮ ಮಲ್ಪುನ ಧಾರ್ಮಿಕ ಕಾರ್ಯ ಬೊಕ್ಕ ದಾನ ಧರ್ಮೊಲ್ 33 ಕೋಟಿ ದೇವರೆಗ್ ಸಂದುಂಡ್.. ಕೋಟಿ ಪಂಡ ಸಂಸ್ಕೃತಡ್ ವರ್ಗ ಪಂದರ್ಥ.. 33 ಕೋಟಿ ದೇವತೆಲೆನ ವರ್ಗ ಪಂಡ ಅಯಿಟ್ 8ವಸುಕುಲು 11ರುದ್ರೆರು 12ಆದಿತ್ಯೆರು ಒಂಜಿ ಪ್ರಜಾಪತಿ ಬೊಕ್ಕ ಒಂಜಿ ವಶಟ್ಕಾರ. ಇಂಚ 33 ದೇವ ಕುಟುಂಬೊಲು ನಮನ್ ಆಶೀರ್ವಾದ ಮಲ್ಪುವೆರ್ ಪಂಡುದ್ ಶಾಸ್ತ್ರದ ಉಲ್ಲೇಖ.
ಈ 33 ದೇವೆರ್ ಲೆಗ್ ಅಂತರ್ಗತವಾದ್ ಪುರುಷೋತ್ತಮೆರು ನೆಲೆ ಮಲ್ದೆರ್.
ಪುರುಷೋತ್ತಮ ಪಂಡ ಮಹಾವಿಷ್ಣು ಅಂಚಾದ್ ಅಧಿಕಮಾಸಡ್ ನಡಪುನ ಯಜ್ಞ ಯಾಗಾದಿಲು ಮುಕ್ಕೋಟಿ ದೇವರುನಕ್ಲೆಡ್ ಅಂತರ್ಗತರಾದುಪ್ಪುನ ವಿಷ್ಣುಗ್ ಸಂದುಂಡ್.ಅಧಿಕಮಾಸಡ್ ಒವ್ವೇ‌ ಪದಾರ್ಥನ್ 33 ಸಂಖ್ಯೆಡ್ ದಾನ ಮಲ್ಪುನ ಸಂಪ್ರದಾಯ ಪ್ರಾಚೀನ ಕಾಲಡ್ದುಲಾ ನಡತೊಂದ್ ಬೈದಿನ ಪದ್ಧತಿ.

ಒವ್ ದಾನ ಶ್ರೇಷ್ಠ

ಅಧಿಕಮಾಸಡ್ ಅತ್ತಿರಸ ದಾನೊಗ್ ಬಾರೀ ಮಹತ್ವ ಉಂಡು.
ಬೆಲ್ಲ ಬೊಕ್ಕ ಅರಿ ಬೊಕ್ಕ ನೈಟ್ ತಯಾರ್ ಮಲ್ತಿನ ಆತ್ತಿ ರಸನ್ 33 ಸಂಖ್ಯೆಡ್ ಒಂಜಿ ಕಂಚಿದ ಬಾಜನೊಡ್ ದೀದ್ ತಾಂಬೂಲಾದಿ ದಕ್ಷಣೆ ದೊಟ್ಟುಗ್ ವಸ್ರ ಸಹಿತವಾದ್ 33 ಶ್ರೇಷ್ಠ
ವಿಪ್ರೆರೆಗ್ ದಾನ ಮಲ್ಪೊಡ್.
ಕಂಚಿದ ಬಾಜನೊಡ್ ಅತ್ತಿರಸನ್ ದೀದ್ ದಾನ ಮಲ್ತುಂಡ ಆ ಅತ್ತಿರಸಡ್ ಏತ್ ರಂದ್ರ ಉಂಡಾ ಆತ್ ವರ್ಷ ಮುಟ್ಟ ದಾನ ಮಲ್ತಿನಕುಕು ಸ್ವರ್ಗ ಸುಖೊನ್ ಅನುಭವಿಸಾವುನೊಟ್ಟುಗ್ ಅಕ್ಲೆನ ವಂಶಲಾ ಉದ್ದಾರ ಆಪುಂಡ್ ಪನ್ಪಿನ ಉಲ್ಲೇಖ ಉಂಡು.
ಮಾಸನಿಯಾಮಕ ನಾಯಿನ ಪುರುಷೋತ್ತಮನ ಪ್ರೀತ್ಯರ್ಥ ಒಂಜಿ ತಿಂಗೊಲ್ ಕಾಲ 33 ಸಂಖ್ಯೆಡ್ ದಾನೊನ್ ಮಲ್ತುಂಡ ಅನಂತ ಫಲೊನ್ ಪಡೆಯೊಲಿ ಅಂಚ ಸಾಧ್ಯ ಆಯಿಜಿಡ ಒಂಜಿ ದಿನ ಆಂಡಲಾ ಯಜ್ಞ ಸಂಪನ್ನ ಮಲ್ತುದ್ ದಾನ ಧರ್ಮ ಮಲ್ತುಂಡ ಭಗವಂತನ ಕೃಪೆಕ್ ಪಾತ್ರರಾವೊಲಿ.
ಶ್ರೀ ಶ್ರೀ ರಮಾನಂದ ಗುರೂಜಿ ಶ್ರೀ ದುರ್ಗಾ ಆದಿಶಕ್ತಿ ಕ್ಷೇತ್ರ