*ಸೀತಾ ತುದೆತ ಮಟ್ಟೆಲುಡ್ ಕಂಗೊಳಿಸಾವೊಂದುಪ್ಪುನ ಶಕ್ತಿ ಸ್ವರೂಪಿಣಿ
ಉಂದೇ ಬರ್ಪಿನ 15-12-2024 ತಾರೀಕ್ ಐತಾರ ಧನು ಸಂಕ್ರಮಣದ ಗೆಂಡ ಸೇವೆಡ್ ಸುರುವಾದ್ 19-12-2024 ಗುರುವಾರ ಮುಟ್ಟ ಬೇತೆ ಬೇತೆ ಧಾರ್ಮಿಕ ಬೊಕ್ಕ ಸಾಂಸ್ಕೃತಿಕ ಕಾರ್ಯಕ್ರಮದೊಟ್ಟುಗ್ ನಡಪರೆಗುಂಡ್.
- ಶ್ರೀ ಕ್ಷೇತ್ರ ಬೆಣ್ಣೆಕುದ್ರು ಬಾರ್ಕೂರು ಶ್ರೀ ಕುಲ ಮಹಾಸ್ತ್ರೀ* ಅಮ್ಮನವರ ವಾರ್ಷಿಕ ಜಾತ್ರಾ ಮಹೋತ್ಸವ
ಇತಿಹಾಸ ಪ್ರಸಿದ್ಧ ಬಾರ್ಕೂರುದ ಕಲ್ಲು ಚಪ್ಪರದ ಪಡ್ಡಾಯಿ ದಿಕ್ಕುಗ್ ಸುಮಾರು ಒಂಜರೆ ಕಿಲೋ ಮೀಟರು ದೂರಡ್ ಸುತ್ತಲಾ ಜಲಾವೃತಡುಪ್ಪುನ ಪುಟ್ಟ ದ್ವೀಪನೇ ಬೆಣ್ಣೆಕುದ್ರು. ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆದ ಸಮಸ್ತ ಮೊಗವೀರ ಕುಲಬಾಂದವೆರು ನಂಬೊಂದ್ ಆರಾಧನೆ ಮಲ್ತೊಂದ್ ಬರೊಂದುಪ್ಪುನ ಮೂಲ ಸಂಸ್ಥಾನನೇ ಈ ಪುಟ್ಟ ದ್ವೀಪಡ್ ನೆಲೆ ಆಯಿನ ಶ್ರೀಕುಲ ಮಹಾಸ್ತ್ರೀ ಅಮ್ಮನವರ ದೇವಸ್ಥಾನ. ಸರಿ ಸುಮಾರು ಒಂಜಿ ಸಾವಿರ ವರ್ಷ ಇತಿಹಾಸವಿಪ್ಪುನ ಈ ದೇವಸ್ಥಾನ ಒರುಂಭ ತಲೆಮಾರುದ ಶ್ರೇಷ್ಟವಾಯಿನ ಭವ್ಯ ಗುರು ಪರಂಪರೆದ ನೆಲೆಯಾದಿತ್ತುಂಡ್..
ಪತ್ತು ಪದಿನಾಜಿ ಮಂದಿ ಭಕ್ತೆರು ಒಟ್ಟುಗ್ ಸೇರ್ದ್ ಸಾಮೂಹಿಕ ನೆಲೆಟ್ ಸಮುದಾಯದ ಎಡ್ಡೆಪ್ಪುಗ್ ಮಲ್ಪುನ ಸಾಮೂಹಿಕ ಪ್ರಾರ್ಥನೆಗ್ ಈ ಕ್ಷೇತ್ರಡ್ ವಿಶೇಷ ಪ್ರಾಶಸ್ತ್ಯ ಉಂಡು.
*#ಸ್ಥಳ #ಪುರಾಣ : *ವಿಜಯನಗರದ ಅರಸೆರೆನ ಕಾಲಡುಲಾ ಪೂರ್ವಡ್ ಬೆಣ್ಣೆಕುದ್ರು, ಬಾರ್ಕೂರು ಸಂಸ್ಥಾನದ ಸೇವಾ ಠಾಣೆಯಾದಿತ್ತುಂಡ್.. ಅಂಚೆನೆ ಸೇನಾಪತಿಕುಲು ಆರಾಧಿಸಾವೊಂದ್ ಬರೊಂದಿತ್ತಿನ ವೀರಭದ್ರ ದೇವಸ್ಥಾನಲಾ ಮೂಲಡಿತ್ತುಂಡ್. ಪನ್ಪಿನ ಮಾಹಿತಿ ಸ್ಥಳ ಪುರಾಣಡ್ದ್ * ತೆರಿದ್ ಬರ್ಪುಂಡ್.. ಉತ್ತರದಿಕ್ಕುಡ್ ಬತ್ತಿನ ಮೊಗವೀರ ಸಮಾಜದ ತಪಸ್ವಿನಿ ಪೊಂಜೊವ್ ತನ್ನ ದಿವ್ಯ ಶಕ್ತಿಡಾದ್ ಜನ ಸಾಮಾನ್ಯೆರೆನ ಬೇನೆ ದು:ಖಲೆನ್ ಸಂತೈಸಾವೊಂದ್ ಜನಪ್ರಿಯ ಲಾಯೊಲು.
ಮುಖ್ಯವಾದ್ ಸೇನಾಧಿಪತಿ ಒವ್ವಾ ಗಂಡಾಂತರಡ್ ಸಿಕ್ಕಿನಪಗ ತನ್ನ ಪವಾಡಡ್ ಆಯನ್ ಪಾರುಮಲ್ತುದ್ ರಾಜಮರ್ಯಾದೆಗ್ ಪಾತ್ರಳಾತೊಲು ಪನ್ಪಿನ ಪ್ರತೀತಿ. ಆ ತಪಸ್ವಿನಿನ ಸಹೋದರ ಗುರು ದಂಪತಿಲು ತಮ್ಮ ತಪೋಃಶಕ್ತಿಡಾದ್ ಸಿದ್ಧಿಸಾಯಿನ ಶ್ರೀದೇವಿನ ಅನುಗೃಹಡಾದ್ ಇಡೆಗ್ ಬತ್ತಿನಪಗ ಅಕ್ಲೆಗುಲಾ ರಾಜ ರಾಜಮರ್ಯಾದೆದ ಸ್ವಾಗತ ಸಿಕ್ಕುಂಡ್.. ಈ ಗುರುದಂಪತಿಲು ತಪಸ್ವಿನಿನೊಟ್ಟುಗ್ ನೆಲೆಉಂತಿನ ಮೂಲ ಇಲ್ಲೇ ಗುರುಮಠ. ಬೊಕ್ಕ ಸೇನಾಧಿಪತಿ ಬೊಕ್ಕ ಕರಾವಳಿದ ಮೊಗವೀರರ ಬೇಡಿಕೆದಂಚ ಗುರುದಂಪತಿಲು ಸ್ವತಃ ಶ್ರೀ ವೀರಭದ್ರ ದೇವೆರೆನ ಸನಿಹದ ಪೀಠಡ್ ಜ್ಯೋತಿ ಬೆಳಗಾವುನ ಮೂಲಕ ಪ್ರತಿಷ್ಠಾಪಿಸಾಯಿನ ದೇವಿಯೇ ಪಂಚಾಂಶಲೆನ ಸಂಭೂತೆಯಾಯಿನ ಶ್ರೀ ಕುಲಮಹಾಸ್ತ್ರೀ ಅಮ್ಮನವರು ಪನ್ಪಿನ ಪ್ರತೀತಿ. ಆ ತಪಸ್ವಿನಿ ಮಹಿಳೆ ಬೇತೆ ಏರ್ಲಾ ಅತ್ತ್ ಇತ್ತೆ ಪೂಜೆ ಅಜ್ಜಮ್ಮ ದೇವರು ಪನ್ಪಿನವ್ ಕೆಲವರೆಗ್ ಗೊತ್ತೇ ಇಜ್ಜಿ. ಆನಿಡ್ದ್ ಈ ದೇವಸ್ಥಾನಡ್ ಶ್ರೀ ಕುಲ ಮಹಾಸ್ತ್ರೀ ಅಮ್ಮನ್ ಪ್ರಧಾನ ದೇವಿಯಾದ್ ಮೊಗವೀರೆರು ಆರಾಧಿಸಾವೊಂದ್ ಬತ್ತೆರ್ ಪನ್ಪಿನವ್ ಸ್ಥಳಪುರಾಣದಿಂದ ತೆರಿದು ಬರ್ಪುಂಡ್.. ಶ್ರೀಕುಲ ಮಹಾಸ್ತ್ರೀ ಅಮ್ಮನಕ್ಲೆನ್ ಪ್ರತಿಷ್ಠಾಪಿಸಾಯಿನ ಗುರುಕುಲಾಯಿನ ಶ್ರೀ ಮಂಗಳ ಪೂಜಾರ್ಯೆರು ನಮ್ಮ ಸಮಾಜದ ಕುಲಗುರುಕುಲಾದಿತ್ತುದ್ ಶ್ರೇಷ್ಠ ಗುರುಪರಂಪರೆಗ್ ಕಾರಣೀಭೂತರಾಯೆರು. ಆನಿ ಬೆಳಗಿಸಾಯಿನ ಶ್ರೀಕುಲಮಹಾಸ್ತ್ರೀ ದೇವಿನ ಜ್ಯೋತಿ ನಂದಾದೀಪವಾದ್ ಬೆಳಗಾವೊಂದ್ ಪ್ರತೀ ಗುಡಿಟಾದ್ ವಾರ್ಷಿಕ ದೀಪ ಕಾಣಿಕೆ ಸಂಗ್ರಹಿಸಿವುನ ಪರಿಪಾಠ ಮೂಲಗುರುಕುಲೆನ ಕಾಲಡಿಂಚಿಲಾ ಬತ್ತಿನ ಪದ್ಧತಿ ಶ್ರೀಕುಲಮಹಾಸ್ತ್ರೀ ಪಂಚ ಶಕ್ತಿದ ಅಂಶಲೆನ ದೈವಸ್ವರೂಪಿಯಾದಿತ್ತುದ್ ಅನ್ನಪೂರ್ಣ, ಭದ್ರಕಾಳಿ, ಮಾರಿಯಮ್ಮ , ದುರ್ಗೆ ಬೊಕ್ಕ ಪ್ರತಿಬಿಂಬ ಸ್ವರೂಪಿಣಿಯರೆನ ಸಮಾಗಮವಾದುಂಡ್.. ಅಂಚೆನೇ ವೀರಭದ್ರ ದೇವರುಲಾ ನಾಗ, ಬ್ರಹ್ಮ, ರಕ್ತೇಶ್ವರಿ , ನಂದಿ ಬೊಕ್ಕ ಕ್ಷೇತ್ರಪಾಲರೆನ್ ಸೇರ್ದ್ ಪಂಚದೈವಿಕ ಸ್ಥಾನವಾದಿತ್ತುದ್ ಬಹುಕಾರಣಿಕವಾದಿತ್ತಿನ ಕಾರಣವಾದಿಪ್ಪು.. ಶ್ರೀಕುಲ ಮಹಾಸ್ತ್ರೀನ್ ಕುಲಗುರುಕುಲದೊಟ್ಟುಗ್ ಋಷಿಮುನಿಕುಲು ಆರಾಧಿಸಾವೊಂದ್ ಮುಲ್ಪ ಸಾನಿಧ್ಯ ಪಡೆತೊಂದಿನ ಕುರುಹು ಉಂಡು. .ಮುಲ್ಪದ ಪರಿವಾರ ದೈವೊಲು ಶ್ರೀಕುಲ ಮಹಾಸ್ತ್ರೀನೊಟ್ಟುಗ್ ಪ್ರತಿಷ್ಠಾಪನೆ ಆತುಂಡ್ ಪಂಡುದ್ ತೆರಿದ್ ಬೈದುಂಡ್.
ಈ ದೇವಸ್ತಾನದ ಪ್ರತಿಷ್ಠಾ ವಿಧಿ ವಿಶಿಷ್ಠ ಪರಂಪರೆಯಾದಿತ್ತುದ್ ಪೀಠ ಬೊಕ್ಕ ಬಿಂಬ ಪ್ರತಿಷ್ಠೆನ್ ತೂವೊಲಿ. ವಿಗ್ರಹಾರಾಧನೆ ಇಂಚಪ್ಪದ ಬೆಳವಣಿಗೆ ಪಂಡುದ್ ತೆರಿದ್ ಬೈದುಂಡ್..ಇತ್ತೆ ಇಪ್ಪುನ ವಿಗ್ರಹದ ಪಿರಾವುಡುಪ್ಪುನ ಬೃಹದಾಕಾರದ ಕನ್ನಡಿ ಭಕ್ತೆನ ಪ್ರತಿಬಿಂಬಡ್ ದೇವಿ ಸ್ವರೂಪನ್ ತೋಜಿದ್ ಬರ್ಪಿನ ವಿಶಿಷ್ಠ ತೆರನಾದ ಭಕ್ತಿಗಾದ್.. ಗುರುಮಠಟ್ ಕುಲಗುರುಕುಲೆನ ಪಟ್ಟದ ದೇವೆರಾಯಿನ ನಂದಿ ಅತ್ತುಂಡ ಹಾಯ್ಗುಳಿ ಪ್ರಧಾನ ದೇವರಾದಿತ್ತುದ್, ಗುರುಪತ್ನಿನ ಪಟ್ಟದ ದೇವೆರಾಯಿನ ನವದುರ್ಗೆ ಪ್ರಧಾನವಾದಿತ್ತುದ್ , ಮುಲ್ಪಲಾ ದಿನನಿತ್ಯದ ಪೂಜಾವಿಧಿ ನಡತೊಂದಿತ್ತುಂಡ್.. ಗುರುಪತ್ನಿನ್ ಸರ್ವೇಶ್ರೀ ಪನ್ಪಿನ ಗೌರವ ಸಂಭೋದನೆಡ್ ಲೆತ್ತೊಂದಿತ್ತೆರು. ನವರಾತ್ರಿದ ಕಾಲಡ್ ನವದುರ್ಗೆಗ್ ವಿಶಿಷ್ಠವಾಯಿನ ಪೂಜೆ ನಡತೊಂದಿತ್ತುದ್ ನಮ್ಮ ಸಮಾಜದ ಮಹಿಳೆಯೆರು ಸರ್ವೇಶ್ರೀ ಅಮ್ಮನವರ ನೇತೃತ್ವಡ್ ಈ ಪೂಜಾ ಕಾರ್ಯಲೆಡ್ ಶೃದ್ಧಾ ಭಕ್ತಿಡಾದ್ ಭಾಗಿಯಾವೊಂದುಲ್ಲೆರು ಶ್ರೀಕುಲಮಹಾಸ್ತ್ರೀಯ ವಾರ್ಷಿಕ ಉತ್ಸವಡ್ ಬಾಳ ಭಂಡಾರ ಗುರುಮಠಡ್ದ್ ಪಿದಡುನ ಸಂಪ್ರದಾಯ ರೂಢಿಡಿತ್ತುದ್, ಇನಿಕುಲಾ ಅನುಸರಿಸಾವೊಂದುಲ್ಲೆರ್.
ವೆಂಕಟರಮಣ ಮೂಲವಿಗ್ರಹ ಬಾರೀ ಕಾಲಡಿಂಚಿಲಾ ಇತ್ತುದ್ ಗುಡಿ ರಚನೆಯಾದಿತ್ತುದ್ , ಮಾಧವ ಪೂಜಾರ್ಯೆರೆನ ಪಿರಾವುದ ಗುರುಕುಲೆನ ಕಾಲಡ್ ಪನ್ಪಿನವ್ ತೆರಿದ್ ಬರ್ಪುಂಡ್.
ಮಲಸಾವಿರ ದೈವದ ಸಾನಿಧ್ಯಡ್ ತ್ರಿಶೂಲವಿಪ್ಪುನ ಮುಲ್ಪ ವಿಶೇಷ. ಹಸಲ ದೈವ ಪಶ್ಚಿಮ ಕರಾವಳಿಡ್ದ್ ಬತ್ತುದ್ ಅಜ್ಜಮ್ಮನ ರಕ್ಷಣೆಗ್ ಬೆಂಗಾವಲಾದಿತ್ತುದ್ ಪನ್ಪಿನವ್ ಪ್ರತೀತಿ. ಮಾತಾ ವಿಷಯೊಲೀ ಅಷ್ಠಮಂಗಲ ಪ್ರಶ್ನೆಡುಲಾ ತೆರಿದ್ ಬರ್ಪುಂಡ್. ನಮ್ಮ ಪೂರ್ವಜೆರೆನ ಮಾಹಿತಿಗ್ ಪುಷ್ಠಿ ತಿಕ್ಕಿಲೆಕ್ಕಾತುಂಡ್.
ಬಾರಕೂರು ಸಂಸ್ಥಾನದ ಹೆಚ್ಚ ದೇವಸ್ಥಾನೊಲು ಅನ್ಯೆರೆನ ಆಕ್ರಮಣಲೆಗ್ ತುತ್ತಾದ್ ಮೂಲ ಸ್ವರೂಪ ಕರಿದ್ ಪೋಂಡಲಾ ಈ ದೇವಸ್ಥಾನ ಎರೆನ ದಾಳಿಗುಲಾ ತುತ್ತಾವಂದಿನ ಒಂಜಿ ವಿಶೇಷನೇ ಸರಿ .ಗುರುಪರಂಪರೆ ಬೊಕ್ಕ ಪಟ್ಟಾಭಿಷೇಕ : ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆಡ್ ಶ್ರೇಷ್ಠ ಗುರು ಪರಂಪರೆ ಇಪ್ಪುನ ಏಕೈಕ ದೇವಸ್ಥಾನ ಪನ್ಪಿನ ನಮ್ಮ ಸಮಾಜಕ್ಕೊಂಜಿ ಪೆರ್ಮೆ.. ಗುರುಕುಲೆನ ಮಾರ್ಗದರ್ಶನಡ್ ದೇವಸ್ಥಾನಡ್ ಮಾತಾ ಧಾರ್ಮಿಕ ಚಟುವಟಿಕೆಲೆಡ್ ಸಂಘಟಿತೆರಾದ್ ಮೊಗವೀರ ಸಮಾಜ ಅನುಸರಿಸಾವೊಂದ್ ಬರೊಂದಿತ್ತುದ್ , ಸಾಮರಸ್ಯದ ಜೀವನ ಸಾಗಿಸಾವೊಂದಿತ್ತೆರ್..ಮಾತಾ ಗುರುಕುಲೆನ ಪುದರುಡ್ ದುಂಬು ಮೂಲ ಕುಲಗುರುಕುಲೆನ ಪುದರಾಯಿನ ಮಂಗಳ ಪೂಜಾರ್ಯ ಪನ್ಪಿನ ಗೌರವ ಸಂಭೋದನೆ ಇಪ್ಪುನವ್ ತೋಜಿದ್ ಬರ್ಪುಂಡ್.
ಮೂಲ ಅರ್ಚಕೆರೆನ್ ಪೂಜಾರಿ ಪಂಡುದ್ ಲೆಪ್ಪುನವ್ ರೂಢಿ. ಶ್ರೀ ಮಾಧವ ಮಂಗಳ ಪೂಜಾರ್ಯೆರು ಕಡೇತ ಗುರುಕುಲಾದಿತ್ತುದ್ ಶ್ರೀ ಭದ್ರ ಮಂಗಳ ಪೂಜಾರ್ಯ, ಶ್ರೀ ಕೃಷ್ಣ ಮಂಗಳ ಪೂಜಾರ್ಯ , ಅಣ್ಣಪ್ಪ ಮಂಗಳ ಪೂಜಾರ್ಯ, ಶ್ರೀ ಅಂತಯ್ಯ ಮಂಗಳ ಪೂಜಾರ್ಯ, ಶ್ರೀ ಅಂಗಯ್ಯ ಮಂಗಳ ಪೂಜಾರ್ಯ ಪನ್ಪಿನಕ್ಲೆನ ಪುದರುಲೆನ ಲಿಖಿತ ದಾಖಲೆಡ್ ತೂವೊಲಿ.
ಶ್ರೀ ಮಾಧವ ಮಂಗಳ ಪೂಜಾರ್ಯೆರು 1966 ಡ್ ತೀರಿನೇಡ್ ಬೊಕ್ಕ ಮೊಗವೀರ ಕುಲಗುರುಕುಲೆನ ಸ್ಥಾನ ಬರಿದಾದ್ ಒರಿದುಂಡ್.
ವೀರಭದ್ರ ದೇವೆರೆನ ಅನುಗೃಹದೊಟ್ಟುಗ್ ಗೃಹಸ್ಥಾಶ್ರಮ ಪೂರೈಸಾದ್ , ಜೀವನದ ಅನುಭವವಿಪ್ಪುನ ಗುರುಕುಟುಂಬದ ನಿಷ್ಠಾವಂತೆರೆನ ಒರಿಯನ ಜಾತಕ ಫಲನ್ ಅಭ್ಯಾಸ ಮಲ್ತುದ್ ಬಾರ್ಕೂರು, ಮಂಗಳೂರು, ಬಗ್ವಾಡಿ ಹೋಬಳಿದ ಒಪ್ಪಿಗೆದೊಟ್ಟುಗ್ ಶಾಸ್ತ್ರೋಕ್ತವಾದ್ ಗುರುಕುಲೆನ ಪಟ್ಟಾಭಿಷೇಕ ಆವೊಂದಿತ್ತುಂಡ್. ಪಟ್ಟ ಏರುನ ಪೂರ್ವಡ್ ಮಾತಾ-ಪಿತೃಲೆನ ಉತ್ತರ ಕ್ರಿಯೆನ್ ಮಲ್ತುದ್ , ಅರೆನ ಬಂಧುಲು ಗುರುನ್ ಸಮಾಜಕ್ಕಾದ್ ಬುಡ್ದ್ ಕೊರ್ಪಿನ ಸಂಪ್ರದಾಯ ಇತ್ತುಂಡ್..ಆಂಡ ಅರೆನ ಕುಟುಂಬದಕುಲು ಗುರುಕುಲೆನ ಮರಣಡ್ ಬೊಕ್ಕ ಸೂತಕ ಆಚರಿಸಾವೊಂದಿತ್ತೆರ್.. ಗುರುಕುಲೆನ ಜೀವಿತಾವಧಿಡ್ ಶಿಷ್ಯೆರೆನ್ ನೇಮಕ ಮಲ್ತೊಂದುಪ್ಪುನ ಪರಿಪಾಠ ಇಜ್ಜಿ.. ಗುರುಕುಲು ಕುಲದೇವಿನ ಪ್ರಧಾನ ಅರ್ಚಕರಾದಿತ್ತುದ್ ಸಮಾಜದ ಸರ್ವೋತ್ಕೃಷ್ಠ ನಾಯಕೆರು, ಸಮಾಜದ ಮಾತಾ ವಿವಾದಲೆನ್ ನ್ಯಾಯ ತೀರ್ಮಾನ *ಮಲ್ಪುನ ಗುರುತರ ಹೊಣೆಗಾರಿಕೆ ಗುರುಕುಲೆನಾದಿತ್ತುಂಡ್.. ಗುರುಮಠಟ್ ಜಾತಿದ ಮಾತಾ ಬೈಠಕ್ಕುಲು ನಡತೊಂದಿತ್ತುಂಡ್.. ದರ್ಬಾರ್ ಡ್ ಪ್ರಸಾದ ವಿತರಣೆ ನಡತೊಂದಿತ್ತುಂಡ್.. ಗುರುಕುಲು ಪ್ರಸಾದ ವಿತರಣೆ ಕಾಲಡ್ ರಾಜೆರೆನ ಉಡುಗೆ ತೊಡುಗೆನ್ ಪಾಡೊಂದ್ ರಾಜಗಾಂಭಿರ್ಯಡ್ ಇತ್ತೆರು. ವರ್ಷಂಪ್ರತಿ ಗುರುಕುಲು ಸಂಚಾರಗ್ ಪೋವೊಂದಿತ್ತುದ್ , ಅರೆನ ಪಿರ ಬರ್ಪಿನ ಸಮಯಡ್ ಹೇರಳವಾದ್ ಮೀನು ತಿಕ್ಕೊಂದಿತ್ತುಂಡ್. ಪನ್ಪಿನವ್ ಹಿರಿಯೆರೆನ ಅನುಭವದ ಪಾತೆರ.. ಮೀನುಗಾರಿಕೆದ
ಆರಂಭಡ್ ದುಂಬು ಗುರುಕುಲೆನ ನೇತೃತ್ವಡ್ ಮೀನುಗಾರೆರೆನ ಗುರಿಕಾರೆರೆನ , ಹೋಬಳಿ ಗುರಿಕಾರೆರೆನ ಸಹಭಾಗಿತ್ವಡ್ ಸಾಮೂಹಿಕ ಪಾರ್ಥನೆ ನಡತೊಂದಿತ್ತುಂಡ್.. ಇನಿಕುಲಾ ಈ ಸಂಪ್ರದಾಯ ಚಾಲ್ತಿಡ್ ಉಂಡು.
by 