ಚೈತನ್ಯ”ವಾದಗೊಂಜಿ ಪ್ರತ್ಯಕ್ಷ ಪ್ರಮಾಣ|| |ಪಡುಬಿದ್ರಿದ ಬ್ರಹ್ಮಸ್ಥಾನ|

|”ಚೈತನ್ಯ”ವಾದಗೊಂಜಿ ಪ್ರತ್ಯಕ್ಷ ಪ್ರಮಾಣ||

|ಪಡುಬಿದ್ರಿದ ಬ್ರಹ್ಮಸ್ಥಾನ|

ಸಹಜ ನಿಸರ್ಗ ಬೊಕ್ಕ ‌ಅಲಂಕೃತ ನಿಸರ್ಗದ ಸನ್ನಿಧಿಲೆಡ್ “ನಡುವಣಲೋಕ” ನಿರ್ಮಾಣ ಆದುಪ್ಪು . “ಪ್ರಕೃತಿ” , ನಿಜವಾದ್ಬ ಸಂಭ್ರಮಿಸಾವುನ್ ಅಲಂಕಾರಡ್ ಬೊಕ್ಕ ಅಲಂಕಾರ ರಹಿತ ಸ್ಥಿತಿಟ್ . ಇಂಚಿನ ಒಂಜಿ ಅಪೂರ್ವ ನೆಲೆಯಾಗಿ ಪಡುಬಿದ್ರಿದ ಬ್ರಹ್ಮಸ್ಥಾನ ಪ್ರಕಟ ಆಪುಂಡ್ .

[ ಆಂಡ ಮುಲ್ಪದ ನೈಜ ಸೊಬಗನಾವಡ್, ಅಲಂಕೃತ ಚಿತ್ರಣೊನಾವಡ್, ಕ್ಯಾಮರಾಲೆಡ್ ಕ್ಲಿಕ್ಕಿಸಾದ್ ಕೊನೊಪಿಲೆಕ್ಕ ಇಜ್ಜಿ, ಆ ಭವ್ಯೊನ್ ಪ್ರತ್ಯಕ್ಷ ತೂದೇ ಅನುಭವಿಸಾವೊಡ್, ಕಲಾವಿದೆರು ಬುಡ್ಪಾದಿನ ಚಿತ್ರೊಲು ಉಂಡು, ಅವ್ ಮಾತ್ರ ಮುಲ್ಪ ತಿಕ್ಕುನ ಅಭಿವ್ಯಕ್ತಿಲು . ಉಂದು ಮುಲ್ಪದ ಶಿಸ್ತು .]

ನಿಸರ್ಗ ನೈಜ ಸ್ಥಿತಿಟ್ ಪಂಡ “ಇತ್ತಿಲೆಕ್ಕನೇ” ( ಅಲಂಕಾರ ರಹಿತ ) . ಅಲಂಕೃತ ಸ್ವರೂಪ ಪಂಡ ಮಾನವ ನಿರ್ಮಿತ ಅಲಂಕರಣಡ್ ಪಂಡುದು ಅರ್ಥ ಮಲ್ತೊಂಡ ಈ ರಡ್ಡುಲಾ ಸ್ಥಿತಿಟ್ ತೋಜರೆಗ್ ಯಾವ್.ಈ ಸನ್ನಿಧಿಡ್ ಸಾಧಕೆ ತಾದಾತ್ಮ್ಯ ಸಾಧಿಸಾವುನ.
ಮುಲ್ಪದ ಅಲಂಕರಣ ಉಪ್ಪಂದಿನ ಸ್ಥಿತಿ , ಪಕ್ಕಿಲೆನ ಇಂಚರೊಡುಲಾ ಸೃಷ್ಟಿಯಾಪಿನ ಮೌನ , ಪ್ರಕೃತಿದ ರಮ್ಯಮನೋಹರ ನೋಟ ನಡುವಣ ಲೋಕೊಗ್ ಎಂಕ್ಲೆನ್ ಸುಲಭವಾದ್ ಒಯ್ಯುಪುಲೆಕ್ಕ ಉಂಡು . ಅವ್ವೇ ನಿಸರ್ಗ ಪೂ ,ಪರುಂದ್ , ಫಲವಸ್ತುಲೆಡ್ದ್ ಶೃಂಗಾರ ಆಕೆನ ಮಂದ ಬೊಲ್ಪುದ ಪಂಡ ಆರಾಧನೆ ಅತ್ತುಂಡ ವಿಧಿಯಾಚರಣೆಗ್ ಅಣಿಯಾಕಿನ ಒಂಜಿ ಅಲೌಕಿಕ ಲೋಕ ನಿರ್ಮಾಣ ಆಪುಂಡ್. ಉಂದೇ ನಡುವಣಲೋಕ . ಉಂದು ಪಡುಬಿದ್ರಿದ ಬ್ರಹ್ಮಸ್ಥಾನಡ್ ಸಾಧ್ಯ ಆಪಿನ ಅತ್ತುಂಡ ಸಿದ್ಧಿಯಾಪಿನ “ದಿವ್ಯ”ದ ಸಾಕ್ಷಾತ್ಕಾರ .
ರಡ್ಡ್ ವರ್ಷಗೊರ “ಡಕ್ಕೆಬಲಿ” ಪನ್ಪಿನ ಸೇವೆ ನಡಪುನ ಶ್ರಾಯಡ್ ಒಂಜಾತ್ ದಿನ ಪ್ರಕೃತಿ ಶೃಂಗಾರ ಆಪುಂಡ್ .ಬಾಕಿದ ದೀರ್ಘ ಅವಧಿಡ್ ಸಹಜ ಸ್ಥಿತಿ ಇಪ್ಪುಂಡ್.ಉಂದು ಏಕಾಂತಡ್ವ ನಮನ್ ನಮನೇ ಮದಪುನಂಚಿನ ಸ್ಥಿತಿ ತಲುಪರೆಗ್ ಸಾಧ್ಯ ಆಪಿನ ಪ್ರಕೃತಿದ ತಾಣ .
ಗಿಡ , ಮರ ,ಬಳ್ಳಿ ,ಕಲ್ಲು ,ಬಂಡೆ , ಮಣ್ಣು ಇಂಚ ಮಾತಾ ನಿಸರ್ಗದ ಅವಿಭಾಜ್ಯ ಅಂಗೊಲೆಡ್ ಅಗೋಚರವಾಯಿನ ಶಕ್ತಿ ಉಂಡು ಪನ್ಪಿನ ಅನುಭವ ಸಿದ್ಧವಾಯಿನ ಪ್ರಾಚೀನೆರೆನ ನಂಬಿಕೆ ಬೊಕ್ಕ ಪದ್ಧತಿಲು ಚೈತನ್ಯವಾದವನ್ನವಲಂಬಿಸಾದಿತ್ತುಂಡ್. . ಇಂಚಿನ ಚೈತನ್ಯನ್ ತಂಕ್ ಬೋಡು ಪಂಡುದ್ ಒದಗುದ್ ಬರ್ಪಿಲೆಕ್ಕ ಮಲ್ಪರೆಗ್ ಆರು ಪೂಜಾವಿಧಾನನ್ ಅನುಸರಿಸಾಯೆರ್ ‌. ಸಾನ್ನಿಧ್ಯ ಉಂಡು ಪಂಡುದ್ ಪೂಜೆ ಅತ್ತ್ ಪೂಜೆ ಆವೊಂದಿತ್ತಿಲೆಕ್ಕನೇ ಸಾನ್ಮಿಧ್ಯ ಒದಗುದ್ ಬರ್ಪಿನ ನಿಸರ್ಗಾಂತರ್ಗತವಾಯಿನ ಶಕ್ತಿನ್ ಒಪ್ಪಿನ ,ಸ್ವೀಕರಿಸಾಯಿನ ನಮ್ಮ ಪೂರ್ವಜೆರ್ ಪ್ರಕೃತಿದ ಮಟ್ಟೆಲುಡೇ ಇಂಚಿನ ಪೂಜಾಸ್ಥಾನೊಲೆನ್ ಕಲ್ಪಿಸಾಯೆರ್ .ಈ ಪರಿಕಲ್ಪನೆಡ್ ರೂಢಿಗ್ ಬರೊಂದುಪ್ಪುನ ಪ್ರಾಚೀನ ಆರಾಧನಾ ಸ್ಥಾನನೇ “ಪಡುಬಿದ್ರಿದ ಬ್ರಹ್ಮಸ್ಥಾನ”,ಅತ್ತುಂಡ
‘ಬೆರ್ಮಸ್ಥಾನ’.
ಮುಲ್ಪ ಮಾತಲಾ ಬಟ್ಟಂಬಯಲು . ಆಂಡ ದಾಲಾ ಅರ್ಥ ಆವಂದಿನ ಸಂಕೀರ್ಣ ಶ್ರದ್ಧಾಸ್ಥಾನ . ಮುಲ್ಪ ಒವ್ವೇ ಕಟ್ಟಡೊಲು ಇಜ್ಜಿ.ಆಂಡ “ಕಟ್ಟು ಕಟ್ಟಳೆ”ದಲೆಕ್ಕ ಪೂಜಾ ವಿಧಿಕುಲು ನಡತೊಂದಿತ್ತಿಲೆಕ್ಕನೇ ನಂಬುಗೆ ಒದಗಾದ್ ಬರ್ಪುಂಡ್. ಅತ್ತುಂಡ ಇಚ್ಛಿತ ಸಂಕಲ್ಪ ಸನ್ನಿಹಿತವಾದುಂಡ್ . ಪಂಡ ಮುಲ್ಪ ‘ಕಟ್ಟುಕಟ್ಟಳೆಲೇ” ಪ್ರಧಾನವಾದ್ ಸಮಗ್ರ ವಿಧಿಕುಲು ನಡಪುಂಡ್. . ಉಂದು ಮಾತಾ ವಿಧಿವಿಧಾನೊಲ್ ತಂತ್ರ ರೂಪದವ್ , ಮಂತ್ರ ಮುಖ್ಯವಾಯಿನತ್ತ್. . ದಾಯೆಗ್ ಪಂಡ ಉಂದು ಪ್ರಾಚೀನವಾಯಿನವ್ವ್ . ವೈದಿಕ ಪೂರ್ವದ ಸರಳ ,ಮುಗ್ಧ , ವಿಮರ್ಶೆ ಉಪ್ಪಂದಿನ ಉಪಾಸನಾ ಕ್ರಮ ಉಪ್ಪುನ ನಿಲೆ . ಉಂದು ಪಡುಬಿದ್ರಿದ ಬ್ರಹ್ಮಸ್ಥಾನ – ಬೆರ್ಮಸ್ಥಾನ.
ರಡ್ಡ್ ವರ್ಷಗೊರ ನಡಪುನ ಡಕ್ಕೆಬಲಿ ಪನ್ಪಿನ ಸೇವೆಡ್ ಗುರುತಿಸಾವುನ ಒಂಜಿ ನಿಸರ್ಗದ ಮಟ್ಟೆಲು . ಈ ಡಕ್ಕೆಬಲಿ ಅವಿಭಜಿತ ದಕ್ಷಿಣಕನ್ನಡ ಜಿಲ್ಲೆದ ಪ್ರಸಿದ್ಧ ಏಳು ಉಚ್ಚಯೊಲೆಡ್ ಒಂಜಿ . ದಾಯೆಗ್ ಪಂಡ ಮುಲ್ಪ ಒವ್ವೇ ವಿಕೃತಿ ಉಪ್ಪಂದಿನ ಸೊಬಗುದ ಪ್ರಕೃತಿ ಉಂಡು .ಪೊರ್ತು ಕಂತುಲೆಕ್ಕನೇ
ಅಲಂಕಾರ ಸುರು ಆಪುಂಡ್ , ನಡು ಇರ್ಲುಡ್ ನಿಸರ್ಗ ಪೂರ್ಣ ಸೊಬಗುಡ್ ವಿಜೃಂಭಿಸಾವುಂಡ್ . ಅದಗ ಕಟ್ಟು ಕಟ್ಟಳೆ’ಲು ನೆರವೇರುಂಡ್. ಬೊಲ್ಪು ಆಪಿಲೆಕ್ಕನೇ ಆರಾಧನೆ ಮುಗಿಯುಂಡ್. , ಪ್ರಕೃತಿ ಕುಡ ಅಲಂಕರಣಲೆನ್ ದೆತ್ತುದ್ ನಿಜ ಸ್ಥಿತಿಕ್ ಬರ್ಪುಂಡ್ . ಇಂಚಿನ ರೂಪಾಂತರ ಆರಾಧನಾ ಪರ್ವಡ್ ಮಾತ್ರ ತೂವರೆತಿಕ್ಕುನ ಮುಲ್ಪದ ವೈಶಿಷ್ಟ್ಯ .
ಜಗದಗಲ ಪರಡುದಿನ ಚೈತನ್ಯ ನಿರ್ದಿಷ್ಟ ಜಾಗೆಲೆಡ್ ಮಾತ್ರ ವಿಜೃಂಭಿಸಾವುಂಡ್ . ಆ ಜಾಗೊಲೇ ನಿಸರ್ಗದ ಅಚಿಂತ್ಯಾದ್ಭುತವಾಯಿನ ಸಾಮರ್ಥ್ಯಗ್ ಒದಗಿನ ಸನ್ನಿಧಾನ .ಅಂಚಾದೇ ಮುಲ್ಪ ಏಕಾಗ್ರತೆ ಸುಲಭ .ಮನೀಪಂದೆ ಎಂಚ ಅನುಸಂಧಾನ ಲೀಲಾಜಾಲವಾದ್ ಸಾಧಿಸಾವುಂಡ ಅಂಚೆನೇ ಗದ್ದಲ ಇತ್ತುಂಡಲಾ ಅವ್ಯಕ್ತ ಚೈತನ್ಯದೊಟ್ಟುಗ್ ತಾದಾತ್ಮ್ಯ ಸಾಧ್ಯ ಆಪುಂಡ್ . ಈ ಸಿದ್ಧಿ ಪಡೆಯಿನಕುಲು ಮಸ್ತ್ ಜನ , ಆಂಡ ಇತ್ತೆ ಬಿರೆಲುದ ಲೆಕ್ಕೊಗ್ ಮಾತ್ರ .
ವೈಭವಕರಣ ಆಯಿನ ನಂಬಿಕೆ , ಶ್ರದ್ಧೆ , ಸನ್ನಿಧಾನದ ದರ್ಶನ , ಸೇವಾ ಸಮರ್ಪಣೆ ಉಂದು ಮಾತಾ ಒವ್ವೇ ತಾದಾತ್ಮ್ಯನುಲಾ ಬಯಕುಜಿ ,‌ ಬದಲಾದ್ ನಡವಳಿಕೆಲೆನ್ ಮಾತ್ರ ವ್ಯಕ್ತ ಪಡಿಸಾವುಂಡ್.ಅಂಚಾದ್ ನಿಸರ್ಗದೊಟ್ಟುಗ್ ನಡಪುನ ಉಪಾಸನಾ ವಿಧಾನನೇ ಮದತ್ತಿಲೆಕ್ಕ. . ಆಂಡ ಉಂದು ಪಡುಬಿದ್ರಿದ ಬಟ್ಟಂಬಯಲುದ , ಆಂಡ ಸಾಮರ್ಥ್ಯ( ಚೈತನ್ಯ) ಸಂಭ್ರಮಿಸಾವೊಂದುಪ್ಪುನ ಬ್ರಹ್ಮಸ್ಥಾನಡ್ ಮಾತ್ರ ಜಾಗೃತ ಆತುಂಡ್ . ಏತ್ ಜನಕ್ ಸಾಕ್ಷಾತ್ಕಾರ ಆತುಂಡ್. ಗೊತ್ತುಜಿ. ಇಂಚಿನ ಧ್ಯಾನಾಸಕ್ತೆರು ಇತ್ತೆಲಾ ಉಲ್ಲೆರ್.

“ಬ್ರಹ್ಮಸ್ಥಾನ” ಪಂಡ ದಾದ ?

ಬೆಮ್ಮೆರ್ , ಬೆರ್ಮೆರ್ , ಬ್ರಹ್ಮೆರ್ ಪಂಡುದು ತುಳುವೆರು ಸ್ವೀಕಾರ ಮಲ್ದಿನ , ಪ್ರಕೃತಿಡ್ ಅಂತರ್ಗತವಾದುಪ್ಪುನ ಒಂಜಿ ಶಕ್ತಿ .ಉಂದೆನ್ ರಕ್ಷಾ ಶಕ್ತಿ ಪಂಡುದು ಪರಿಗ್ರಹಿಸಾಯಿನ ನಮ್ಮ ಪೂರ್ವ ಸೂರಿಲು ಕಾಲಾಂತರಡ್ ಬೆರ್ಮೆರ್ ಅತ್ತುಂಡ ಬ್ರಮ್ಮೆರ್ ಪ್ರಧಾನವಾದ್ ತಂಕುಲೆನ ಆರಾಧನೆಲೆನ್ ನಡಪಾವೊಂದ್ ಬತ್ತೆರ್ , ಅಯಿತ್ತಲೆಕ್ಕ ರೂಢಿಗ್ ಬತ್ತುಂಡ್ . ‘ಬ್ರಹ್ಮೆರು’ ಅತ್ತುಂಡ ‘ಬ್ರಹ್ಮೆರ್’ ಎಂದರೆ ತುಳುವಿನ ದೇವರು ಪಂಡುದ್ ವ್ಯಾಖ್ಯಾನ ಮಲ್ಪುವೆರ್. ಭಾಷಾವಿಜ್ಞಾನಿಲು.. “ಅಮ್ಮೆರ್” , “ಪೆರಿಯಮ್ಮೆರ್” ಪನ್ಪಿನ ಕುಲದ ಮೂಲಪುರುಷೆರೆನ ಪುದರುದ ಮೂಲ ಸ್ವರೂಪ ಆದುಪ್ಪು. ‘ಅಮ್ಮೆರ್’ , ‘ಪೆರಿಯಮ್ಮೆರ್’ ಪದೊಕೆಲೆಡ್ದ್ “ಬೆರ್ಮೆ” ಪದ ಉಂಡಾಂಡ್ ಪಂಡುದ್ ಪನ್ಪೆರ್. . ಉಂದೇ ಪದ ಸಂಸ್ಕೃತೀಕರಣ ಆದ್ ‘ಬ್ರಹ್ಮ’ ಪಂಡುದಾಂಡ್. (ವೈದಿಕದ ಪ್ರಭಾವ) , ತುಳುವೆರು “ಬೆರ್ಮೆರ್” ಪಂಡುದು ಉಚ್ಚಾರ ಮಲ್ತೆರ್ .
‘ಬ್ರಹ್ಮೆರ್’ ಅತ್ತುಂಡ ‘ಬೆಮ್ಮೆರ್’ ಪ್ರಧಾನವಾದುಪ್ಪುನ ನೆಲೆಕುಲೆನ್ ಬ್ರಹ್ಮಸ್ಥಾನ ಪಂಡುದ್ ಗುರುತಿಸಾವರೆಗ್ ಸುರು ಮಲ್ದಿತ್ತುದ್ ವೈದಿಕೆರೆನ ಆಗಮನೊಡ್ ಬೊಕ್ಕ ಇಪ್ಪೊಡ್ . ಅಯಿಡ್ದುಲಾ ಪೂರ್ವಡಿತ್ತಿನ ಸಮೂಹ ಪೂಜಾ ಸ್ಥಾನೊಲೇ ಬೆರ್ಮಸ್ಥಾನ ಅತ್ತುಂಡ ಬ್ರಹ್ಮಸ್ಥಾನೊಲು . ಸಮೂಹ ಪೂಜೆ ಪಂಡ ಆದಿಮ ಸಂಸ್ಕೃತಿಡ್ ಆರಾಧಿಸಾವೊಡ್ ಪಂಡುದ್ ಬಯಕಿನ ಮಾತಾ ಶಕ್ತಿಲೆಗ್ ಒಂಜಿ ವ್ಯವಸ್ಥೆದ ಅಡಿಟ್ ಸ್ಥಾನ ಕಲ್ಪಿಸಾದಿತ್ತುದ್, ವೈದಿಕದ ಆಗಮನದ ಬೊಕ್ಕ ನಿಯಮ – ನಿಬಂಧನೆಲೆಗ್ ನಮ ಇತ್ತೆ ತೂಪಿನ ಬ್ರಹ್ಮಸ್ಥಾನೊಲು ಕಲ್ಪಿಸಾದುಂಡ್.
ಒಂಜಿ ಒಪ್ಪಿಗೆದಲೆಕ್ಕ ಬ್ರಹ್ಮಸ್ಥಾನ ಪಂಡ ಪಂಚ ದೈವಸ್ಥಾನೊಲು . ಆಂಡ ಅವ್ ಐದಕ್ಕೆ ಸೀಮಿತಗೊಳ್ಳುವ ಶಕ್ತಿಲೆನ ನಿಲೆ ಅತ್ತ್ .ಬದಲಾದ್ ಒಂಜಾತ್ ದೈವೊಲು ಮುಲ್ಪ ಸ್ಥಾನ ಪಡೆತೊಂದುಂಡ್. ಬ್ರಹ್ಮ ಅತ್ತುಂಡ ಬೆರ್ಮೆರ್ ಪ್ರಧಾನವಾದ್ ಮುಲ್ಪ ಮಾತಾ ಸನ್ನಿಧಾನೊಲು ಸನ್ನಿಹಿತವಾದುಪ್ಪುಂಡ್.
ಆಂಚಾದೇ ಇಂಚಿನ ಆರಾಧನಾ ಸ್ಥಾನೊಲು ‘ಬ್ರಹ್ಮಸ್ಥಾನೊಲು ಪಂಡುದ್ ಗುರುತಿಸಾವೊಂದುಂಡ್ . ಇಂಚಪ್ಪೊಗ್ ಜಿಲ್ಲೆದ ಮಸ್ತ್ ಕಡೆಟ್ ಇಂಚಿನ ಬ್ರಹ್ಮಸ್ಥಾನೊಲ್ ‘ನಾಗಬ್ರಹ್ಮಸ್ಥಾನ’ ಆದ್ ಬದಲಾವೊಂದುಂಡ್ . ಬ್ರಹ್ಮ ಅತ್ತುಂಡ ಬೆರ್ಮೆರ್ ಬಗೆಟ್ ಸ್ಪಷ್ಟವಾಯಿನ ಕಲ್ಪನೆ ತಿಕ್ಕಂದಿನ ಕಾರಣ ಇಂಚಿನ ಬದಲಾವಣೆಲು ನಡಪುಂಡ್ ಪಂಡುದ್ ತೋಜುಂಡ್ . ಅಂಚೆನೇ ಪಡುಬಿದ್ರಿಡ್ ಇಂತಹ ಒಂಜಿ ಸ್ಥಿತ್ಯಂತರ ಸಂಭವಿಸಾದ್ , “ಖಡ್ಗೇಶ್ವರೀ ಬ್ರಹ್ಮಸ್ಥಾನ”ಪಂಡುದ್ ಪನ್ಪೆರ್ ,ಆಂಡ “ಬ್ರಹ್ಮಸ್ಥಾನ” ಪನ್ಪಿನ ಮೂಲದ‌ ಪುದರು ಬದಲಾತಿನೇ ಇಜ್ಜಿ. ಉಂದು ಮುಲ್ಪದ ಶ್ರದ್ಧೆ , ಸಂಪ್ರದಾಯ ಬದ್ಧತೆ.
ಒಂಜಿ ಕಾಲಡ್ ಪಡುಬಿದ್ರಿದ ಬ್ರಹ್ಮಸ್ಥಾನಡುಲಾ ಒರುಂಬ ಜನ ಸ್ಥಾನಿಲು ( ಪಾತ್ರಿಲು ) ಬೇತೆಬೇತೆ ಪುದರುಡ್ ಸನ್ನಿಧಾನದ ಎದುರು ಪ್ರಕಟ ಆಪಿನವ್ವೆನ್ ಸ್ಥಳೀಯ ಹಿರಿಯೆರು ನೆಂಪು ಮಲ್ಪುವೆರ್. ಒವ್ವೇ ರೀತಿಡ್ ಸನ್ನಿಧಾನದ ಆಂತರ್ಯನ್ ನಿರೂಪಿಸರೆಗಾಪುಜಾ ಅವ್ವೇ ಆ ಸನ್ನಿಧಾನದ ಮಹತ್ವ .
ಬೃಹತ್ ಶಿಲಾಯುಗಕ್ ಸಂಬಂಧ ಪಟ್ಟುದ್ ಕೆಲವು ಅವಶೇಷಲು ಏಳು – ಎಂಟು ಕಿ .ಮೀ . ವ್ಯಾಪ್ತಿಡ್ ತಿಕ್ಕುಂಡ್ . ಪ್ರತಿ ವರ್ಷ ಆಟಿ ತಿಂಗಳಲ್ಲಿ ಒಂಜಿ ದಿನ (ಪದಿನಾಜನೇ ದಿನ ) ಪೊಸ ಪೊಯ್ಯನ್ ಸಮುದ್ರತೀರಡ್ದ್ ಕನತುದ್ ಪಾಡುನ ಸಂಪ್ರದಾಯ ಉಂಡು. ಮುಲ್ಪ ನಡಪುನ ವಿಧಿಯಾಚರಣೆಲು “ಅವೈದಿಕೆರಾಂಡಲಾ ನಿರ್ವಹಣೆ ಮಲ್ಪುನಕುಲು ಮಾತ್ರ ವೈದಿಕೆರು . ಮೂಲ ದ್ರಾವಿಡ ಭಾಷೆದ ಒಂಜಾತ್ ಶಬ್ದೊಲು ವೈದಿಕೆರೆಡ್ದ್ ಬ್ರಹ್ಮಸ್ಥಾನಡ್ ಮಾತ್ರ ಉಚ್ಚರಿಸಾವುಂಡ್ . ಇಂಚಿನ ಅವ್ವೇತೊ ನಿರ್ವಹಣೆಲೆನ್ ಸಂಪ್ರದಾಯೊಲೆನ್ ಗಮನಿಸಾವನಗ ಪಡುಬಿದ್ರಿದ ಬ್ರಹ್ಮಸ್ಥಾನದ ಪ್ರಾಚೀನತೆ ಇತಿಹಾಸಕಾಲಡ್ದುಲಾ ಪಿರ ಪೋಪುಂಡ್ . ಅಂಚಾದ್ ಆ ಸನ್ನಿಧಾನಗ್ ಎಂಚ ಪುದರ್ ದೀಂಡಲಾ ಸೂಕ್ತ ಆವಂದ್. ಉಂದೇ ಮುಲ್ಪದ ಅಭೇದ್ಯವಾಯಿನ ಸನ್ನಿಧಾನ ವಿಶೇಷ . ಕಲ್ಪನೆಗ್ ನಿಲುಕಂದಿನ ಸಂಕಲ್ಪ ಉಪ್ಪುನ ಪೂಜಾಸ್ಥಾನ . ಈ ಬಗ್ಗೆ ಸತ್ಯ ಶೋಧನೆ ಅನಗತ್ಯ . ಉಂದು ಕೇವಲ ಒಂಜಿ ಗ್ರಹಿಕೆ ಮಾತ್ರ .

|ಡಕ್ಕೆಬಲಿ – ಬ್ರಹ್ಮಮಂಡಲ|

ಡಕ್ಕೆಬಲಿ ಪಂಡ ‘ಬೂತನಾಗರೆಗ್ ಮಂಡಲ ಬರೆದು ನಡಪುನ ಒಂಜಿ ಬಗೆತ್ತ ನೃತ್ಯರೂಪದ ಆರಾಧನೆ’ ಪನ್ಪುಂಡ್ ತುಳು ನಿಘಂಟು . ಉಂದೆನೇ ಬ್ರಹ್ಮಮಂಡಲ ಪನ್ಪೆರ್.
ಪಡುಬಿದ್ರಿದ ಬ್ರಹ್ಮಸ್ಥಾನಡ್ ಒಂಜಿ ಡಕ್ಕೆಬಲಿತ್ತ ವಿಧಿವಿಧಾನ ರಡ್ಡ್ ಪಾಲಾದ್ ನಡಪುಂಡ್ . ರಾತ್ರೆಗ್ ಸುಮಾರು ಪತ್ತು – ಪತ್ತೊಂಜಿ ಗಂಟೆಡ್ದ್ ನಡಪುಂಡ್. “ತಂಬಿಲ” , ಉಂದು ಸುರುತ್ತ ಭಾಗ . ತಡ ರಾತ್ರೆದ ಬೊಕ್ಕ ರಡ್ಡನೇ ಭಾಗವಾದ್ ಡಕ್ಕೆಬಲಿ ಸಂಪನ್ನ ಆಪುಂಡ್.
ರಾತ್ರೆಗ್ ತಂಬಿಲ ನವರಾತ್ರಿ ಬೊಕ್ಕ ಮಾಮೂಲು ದಿನೊಕ್ಲೆಡ್ ಸಾಂಪ್ರದಾಯಿಕವಾದ್ ಬೊಕ್ಕ ಪರಕೆದಲೆಕ್ಕ ನಡತೊಂದುಪ್ಪುಂಡ್ . ಆಂಡ ಅಯಿಕ್ ಡಕ್ಕೆದಕುಲು ಇಪ್ಪುಜಿ. ,ಆಂಡ ದ್ವೈವಾರ್ಷಿಕ ಡಕ್ಕೆಬಲಿ ಸಂದರ್ಭಡ್ ಮಾಮೂಲುದ ತಂಬಿಲ ಡಕ್ಕೆದಕ್ಲೆನ ಸಹಭಾಗಿತ್ವಡ್ ನಡಪುಂಡ್.
ತಂಬಿಲ ಮುಗಿನೇಡ್ ಬೊಕ್ಕ ನಡುಟ್ ವಿಶ್ರಾಂತಿ ಇಪ್ಪುಂಡ್ . ಆ ಪೊರ್ತುಡ್ ಗುರಿಕಾರೆರು , ಅರ್ಚಕೆರು , ಪಾತ್ರಿಲು ,ಡಕ್ಕೆದಕುಲು , ಇತರ ಕಾರ್ಯನಿರ್ವಹಣೆ ಮಲ್ಪುನಕುಲು ಉಪಾಹಾರ ಸ್ವೀಕಾರ ಮಲ್ಪುವೆರ್. ಬೊಕ್ಕ ಡಕ್ಕೆದಕುಲು ಮಂಡಲ ಬರೆಪಿನ ಚಿಟ್ಟೆಡ್ ಡಕ್ಕೆ ಬಲಿ ಮಂಡಲ ರಚಿಸಾದ್ ಅಲಂಕಾರ ಮಲ್ಪುವೆರ್ . ಈ ಮಂಡಲ ಬ್ರಹ್ಮ ಪ್ರಧಾನವಾದೇ ಇಪ್ಪುಂಡ್.
ಡಕ್ಕೆ ಬಲಿ ಸುರುಆವನಗ ಡಕ್ಕೆದಕ್ಲೆನ ಪದ , ಅರ್ಧನಾರಿ ವೇಷ ಪಾಡಿನ ವೈದ್ಯೆರು ಮಂಡಲ ಚಿಟ್ಟೆ – ಬ್ರಹ್ಮಸನ್ನಿಧಾನದ ನಡುಟ್ ನಲಿಪುವೆರ್ . ಮತ್ತೆ ಪಾತ್ರಿಲೆನ ಆವೇಶ , ಒರಿಯೊರಿಯನ್ ಮಂಡಲದಂಚಿ ಲೆತ್ತೊಂದ್ ಪೋದ್ , ಮಂಡಲ ಪ್ರದಕ್ಷಿಣೆ , ಅಲ್ಪ ಬೇತೆ ಬೇತೆ ವಿಧಿಕುಲು ನಡತಿನೇಡ್ ಬೊಕ್ಕ ,ಕುಡ ಮೂಲ ಸನ್ನಿಧಾನದ ಎದುರುಗ್ ಬತ್ತುದ್ ಪ್ರಸಾದ ವಿತರಣೆ ನಡಪುಂಡ್ .ಉಂದು ಸ್ಥೂಲವಾಯಿನ ವಿಧಿಯಾಚರಣೆದ ವಿಧಾನ ನನಲಾ ವಿಸ್ತಾರವಾದ್ ನಡಪುಂಡ್, ಅವ್ವೆನ್ ತೂದೇ ಗ್ರಹಿಸಾವೊಡ್ . ಅದಗಲಾ ಪೂರ್ಣವಾದ್ ಅರ್ಥಾವಂದ್, ಅವ್ವೇ ಪಡುಬಿದ್ರಿ ಬ್ರಹ್ಮಸ್ಥಾನದ ಸಾನ್ನಿಧ್ಯ ವಿಶೇಷ .ಉಂದೆಡ್ ಜಾಸ್ತಿ ವಿವರಣೆ ಕೊರ್ರೆಗಿಜ್ಜಿ. ಕೊರ್ರೆಗುಲಾ ಬಲ್ಲಿ . ದಾಯೆಗ್ ಪಂಡ ಉಂದು “ನಿಸರ್ಗಾಂತರ್ಗತ ಬ್ರಹ್ಮಶಕ್ತಿ” ಸನ್ನಿಹಿತವಾಯಿನ ನಿಲೆ . ಡಕ್ಕೆಬಲಿ ಸಂದರ್ಭಡ್ ಮಾತ್ರ ನಿಸರ್ಗ ಒಂದು ರಾತ್ರೆದ ಪೊರ್ತುಗ್ ಅಲಂಕಾರ ಆಪುಂಡ್ , ಬೊಲ್ಪುದ ಪೊರ್ತು ಕುಡೊರ ಸಹಜ ಸ್ಥಿತಿಕ್ ಬದಲಾಪುಂಡ್ .ಇಂಚಿನ “ದರ್ಶನ” ಮುಲ್ಪ ಮಾತ್ರ ಸಾಧ್ಯ.

ಬಚ್ಚಿರೆಡ್ ಗಂಧ,
ಮಣ್ಣೇ ಮುಲ್ಪದ ಪ್ರಸಾದ

ಆರಾಧನೆದ ಸಂದರ್ಭಲೆಡ್ ಬಚ್ಚಿರೆಡ್ ಗಂಧ ಕೊರ್ಪುನ ಕ್ರಮ,(ಬಾಕಿದ ದಿನೊಟ್ ಸನ್ನಿಧಾನಗ್ ನಮಸ್ಕಾರ ಮಲ್ಪುನಗ ಮೈಕ್ ಅಂಟುನ ಮಣ್ಣೇ ಮುಲ್ಪದ ಪ್ರಸಾದ).ಬಜ್ಜಯಿ ಮರತ್ತ ಪಾಳೆ ಬಚ್ಚಿರೆದ ಹರಿವಾಣ, ತಾರತಮ್ಯ ಉಪ್ಪಂದಿನ ಸಭಾ ವ್ಯವಸ್ಥೆ – ಪಂಡ ಆಸನ ಉಪ್ಪಂದೆ ನೆಲಟೇ ಕುಲ್ಲುನ್, ದೊಂದಿ ಬೊಲ್ಪುಗ್ ಪ್ರಾಧಾನ್ಯ, ವೈಭವದ ವಾದ್ಯೊಲೆಗ್ ಅವಕಾಶ ಉಪ್ಪಂದಿನವ್ವ್ ಒವ್ವೇ ವಿಧಿ ನಿರ್ವಹಣೆಡ್ ರಾಜಿ ಸೂತ್ರ ಇಜ್ಜಿ. ನಿಯಮದಲೆಕ್ಕ ನಡತೊಂದಿತ್ತುದ್, ಕರ್ತವ್ಯಲೋಪಡ್ ಕ್ಷಮೆ ಇಪ್ಪಂದಿನವ್ ಉಂದು ಮುಲ್ಪದ ವಿಶೇಷೊಲು.

~~~~
ಪಡುಬಿದ್ರಿದ ಬ್ರಹ್ಮಸ್ಥಾನ ಪಂಡ
ಖಡ್ಗೇಶ್ವರೀ ಬ್ರಹ್ಮಸ್ಥಾನ ಬೊಕ್ಕ ಅಲ್ಪ ನಡಪುನ ಮಾತಾ ಸೇವೆಲು ಪಡುಬಿದ್ರಿದ ಶಿವಳ್ಳಿ ಬ್ರಾಹ್ಮಣ ಪತ್ತು ಸಮಸ್ತೆರೆನ ಜವಾಬ್ದಾರಿ ಬೊಕ್ಕ ನೇತೃತ್ವಡ್ ನಡಪುಂಡ್. ಸುಗಮ ನಿರ್ವಹಣೆಗ್ ವನದುರ್ಗಾ ಟ್ರಸ್ಟ್ ಉಂಡು.

• ಕೆ.ಎಲ್.ಕುಂಡಂತಾಯ
~~~~