ಅಡ್ಡಿ ತಡೆ ಪರಿಯಾರ ಮಲ್ಪುನ ಗನಪತಿ

|”ಅಡ್ಡಿ – ತಡೆ” ಪರಿಯಾರ ಮಲ್ಪುನ ‘ಗನಪತಿ’| ನರಮಾನಿ ತೊಡಗುನ ಕೆಲಸೊಲು ಪೊರ್ಲುಡು ಕೋಡಿ ಎತ್ತೊಡು , ಬದ್ಕ್ ತಡೆದಾಂತೆ ಸಂತೋಸುಡು ನಡಪೊಡು ಇಂಚ ಎನ್ನೊಂದು ದುಂಬು ಪೋನಗ ಆ ಕಾರ್ಯ ಸಾಂಗ್ಯಂದೆ ಅಯಿಕ್ ಒಂಜಾತ್ ಅಡ್ಡಿಲು - ತೊಂದರೆಲು ಎದುರಾನಾಗ ಅಸ್ಕಿನ ನರಮಾನಿ ತರೆಕಂತ ಪಾಡ್ದ್ ಯೋಚಿಪರೆ ಸುರುಪತ್ತ್ಯೆ.ಇಂಚ ಪ್ರತಿಯೊರಿ ಯೋಚಿತಿನ ಕಾರಣವಾದ್ "ಇನಾಯಕ"ದೇವೆರ್ ಒದಗಿಯೆರ್ ಅತ್ತಡ ಮೂಡಿಯೆರ್. ನಮ್ಮ ನಂಬುಗೆ - ನಡವಳಿಕೆಡ್ ಸಂತಾನ ಸಂತೇಸಿ ಕೊರ್ಪಿನ ದೇವೆರ್ ಉಲ್ಲೆರ್,ಕಷ್ಟ ಪರಿಹರಿತ್ ದ್ ಸುಕ ಕೊರ್ಪಿನ ದೇವೆರ್ ಉಲ್ಲೆರ್, ಬುಲೆಬಾಗ್ಯ ಕೊರ್ಪಿನ‌ ದೇವೆರ್ ಉಲ್ಲೆ ,ದೊಡ್ಡು - ಬಂಗಾರ್ - ಸಂಪೊತ್ತು ಕೊರ್ಪಿನ ದೇವೆರ್ ಉಲ್ಲೆರ್, ರಾತ್ರಿ - ಪಗೆಲ್ ಉಂಡು ಮಲ್ಪುನ ದೇವೆರ್ ಉಲ್ಲೆರ್,ಬರ್ಸ್ ಕೊರ್ಪಿನ ದೇವೆರುಲ್ಲೆರ್, ಗಾಲಿ - ತೂ ಇಂಚ ನರಮಾನಿನ ಅಗತ್ಯೊಗು ಬೋಡಾಯಿನ ಸರ್ವೆನ್ಲ ಕೊರ್ಪಿನ ದೇವೆರ್ನಾಕುಲು‌ ಉಲ್ಲೆರ್.ನಮ್ಮ ಒಂಜೊಂಜಿ ಬಯಕೆನ್ ಈಡೇರಿಪರೆ ನಂಕ್ ಒಂಜೊಂಜಿ ದೇವೆರ್,ಅಂಚಾದೆ ನಂಕ್

ಮುಪ್ಪತ್ತಮೂಜಿ ಕೋಟಿ ದೇವರ್ನಾಕುಲು,
ಸಾರಮಾನಿ ದೈವೊಲು,ಗಂಡಗನೊಕುಲು ಇಂಚ ನಮ್ಮ ದಿನನಿಚ್ಚದ ಆಚಾರ – ಇಚಾರೊಡು ಈತ್ ದೈವ ದೇವೆರ್ನಾಕುಲು.”ಈ ರಾಸಿ ದೇವೆರ್ನಾಕುಲೆನ ಪುದರ್ ಕೇನ್ದ್ ಪರದೇಸದ ಜನಮಾನಿ ಇಸ್ಮಯೊಡು ಕೇನುವೆರ್ ಬಾರತ ದೇಸೊಡು,
ಆದೇಸದ ಜನಕುಲೆಗ್ ದೇವೆರ್ ಏತ್ ?”
ಈ ರಾಸಿ ದೇವೆರ್ನಕಲೆನ ನಡುಟು ಒರಿ ದೇವೆರ್ ಅಡ್ಡಿ – ತಡೆ ಪರಿಹರಿಪುನ ದೇವೆರ್ ಆರೇ ಇನಾಯಕ ದೇವೆರ್.ಮಾತ ದೇವೆರೆ ಲೆಕ್ಕೊನೇ ಗಣಪತಿ ದೇವೆರ್ನ ಕತೆ ,ಆರ್ ಎಂಚ ಪುಟ್ಯೆರ್,
ವಾ ನಮೂನೆಡ್ ನೆಗತ್ ದ್ ಬತ್ತೆರ್ ಪನ್ಪಿನೆಕ್ಕ್ ಮಸ್ತ್ ಕತೆಲು ಉಂಡು.ಕತೆಕುಲು ಎಂಚಿನನೇ ಇಪ್ಪಡ್ ಗನಪತಿ ಮಾತೆರೆಗ್ಲಾ ಎದುರಾಪುನ ಅಡ್ಡಿ – ತಡೆ ಏತ್ ಸತ್ಯನಾ ಆ ಅಡ್ಡಿ – ತಡೆಕುಲೆನ್ ಅಡೆಂಗಾವರ್ ಆತೇ ಅಗತ್ಯದ ದೇವೆರ್.
ಗನಪತಿ ದೇವೆರ್ನ ನಂಬೊಲಿಗೆ,ಪೂಜೆ ಸುರುಕ್ ತೊಡಗ್ ನಗ ಇತ್ತಿನೆಡ್ದ್ ಮಸ್ತ್ ಬದಲಾವಣೆ ಆತ್ಂಡ್ ,ಮೂಲದ ಲೆಕ್ಕ ತೋಜುಜಿ ; ಮೂಲೊದ ಏತೋ ನಂಬೊಲಿಗೆದ ರೂಪೊನು ಪತೊಂದು ಪಡೆವೊಂದೇ ಉಂಡು,ಆಂಡ ಆ ಮೂಲದ ಅಂಶೊಲೆನ್ ತೂಪಿನ ಕನ್ನ್ ಬೋಡು,
ಗ್ರಹಿಪುನ ಮನಸ್ ಬೋಡು.ಜನಪದೆರ್
ಯೋಚಿತ್ ದ್ ನಿರ್ಣಯಿತ್ ನ ಒಂಜಿ‌ ನಂಬೊಲಿಗೆನ್ ತೆರಿಯೊಡ್ಡ ಜಾನಪದ ಮನಸ್ಸ್ ಬೋಡು.ಗನಪತಿ ಜನಪದೆರ್ನ ದೇವೆರ್.ಬೆನ್ನಿದ ಪೊಲಬುಡು ಲಕ್ಕ್ ದ್ ಬತ್ತಿನ ಬೋಂಟೆದ ಸುರುತ ಪಾಡ್ ಒರ್ತೊಂದು ಮಾತೆರೆಗ್ ಲ್ ಬೋಡಾಯಿನ,
ಮಾತೆರ್ಲಾ ಒಪ್ಪುನ ದೇವೆರ್ ಗನಪತಿ.
ಬೋಂಟೆ ನಮ್ಮ ಸುರುತ ಕಸುಬು ಅತ್ತಡ ಆ ಕಾಲೊದ ನರಮಾನಿ ಬದ್ಕ್ ದಿನ ಕ್ರಮ.ಬೊಕ್ಕ ಬೆನ್ನಿ ಇಂಚ ನಮ್ಮ ಪೊಲಬು ಮುಂದುವರಿಯೊಂದು ಬತ್ತ್ಂಡ್.ಸುಲಭದ,ನಿರ್ಮಲ ಮನಸ್ ಡ್ , ಅವು ದಾಯೆ – ಅವು ಇಂಚದಾಯೆಗ್ – ಈ ಕ್ರಮೊಟು ದಾಯೆಗ್ ಮಲ್ಪರೆ ಬಲ್ಲಿ ಇಂಚಿನ ಸವಾಲ್ ಕೇನಂದೆ ಹಿರಿಯೆರ್ ನಡತೊಂದು ಬತ್ತಿನ ಪ್ರಾಕ್ ದ ನಮೂನೆಡ್ ಚೌತಿ,ಅಟ್ಟೆಮಿ,ಪರ್ಬ ಕರಿಪುನ ಜನಪದೆರ್ನ ದೇಸಿ ಆಯಿನ ನೇಮೆನಿಷ್ಟೆಡ್ ಗನಪತಿ ದೇವೆರ್ನ ಆದಿದ ರೂಪು ಸ್ವಚ್ಞವಾದ್ ತೂವೊಲಿ,ಗಳಸುನ ವಸ್ತುಲೆಡ್ ಏತ್ ಪ್ರಾಕ್ ದ ಜನಮಾನಿನ ಆಲೋಚನೆಲು ಗನಪತಿಗ್ ತಾರ್ಕಣೆ ಆದ್ ಇತ್ತ್ಂಡ್ ತೆರಿಯೊನೊಲಿ.ಮಾತ ಕಾಲೊಗುಲ,
ಮಾತ ಸಂದರ್ಬೋಗುಲ ಗನಪತಿ ಒರಿಯೆ ,ಆಂಡ ಕಾಲೊಗು ಸರಿಯಾದ್ ಬದಲಾವೊಂದು ಬತ್ತಿನವು ಮಾತ್ರ ಸತ್ಯ.
ಆದಿದ ದಿನೊಕುಲು ಕರಿದ್ ವೇದದ ಕಾಲ ಬನ್ನಗ ಗನಪತಿ,ನಾಲ್ ವೇದೊಲೆಡ್ ಬೇತೆ ಬೇತೆ ನಮೂನೆಡ್ ಬೇತೆ ಬೇತೆ ಪುದಾರ್ ಡ್ ನೆಗತ್ ದ್ ತೋಜುವೆ.ಅಡ್ಡಿ – ತಡೆ ಬನ್ನಗ ಆನಿದ ಗನಪತಿಯೇ ಆಂಡ ಬಿನ್ನವಾಯಿನ ಸುಗಿಪುಡು ಪೂಜೆ ಪಡೆವೆ.
ಸರಿಯಾಯಿನ ಅತ್ತಾಂದೆ ಒಂಜೆಕ್ಕೊಂಜಿ ಸಂಬಂದ ದಾಂತೆ ಇಪ್ಪುನ ಇಚಿತ್ರ ಗನಪತಿನ ಬಿಂಬ ಕಲ್ಪನೆಡ್ ಸ್ಪಷ್ಟ.ಎಲಿ ಗನಪತಿಗ್ ಸವಾರಿಗಾಂಡ ಬಂಜಿಗ್ ಸುಂದೊಂದಿನ್ ಸರ್ಪನ ( ಸರ್ಪೆ ಇತ್ತನಲ್ಪ ಎಲಿ ಇಪ್ಪುವಾ,ಆಂಡ ಗನಪತಿ ಮೈಟ್ ಅವು ರಡ್ಡ್ ಲಾ ಇಪ್ಪುವ). ಪತಿ ಆಯುಧೊಡು ದಾದನ ಪ್ರಾಕ್ ದ,ಆದಿದ ನೆನೆಪು ಆಪುಂಡು.
ಮಲ್ಲ ತಿನ್ಪಾಂಡಿ ಗನಪತಿ; ಐಕ್ ಗನಪತಿನ ಕೈಟ್ ತಿನ್ಪಿನ ಅತ್ತಡ ತೀಪೆದ ಅಡ್ಡೆ (ಮೋದಕ) ತಪ್ಪಂದ್. ಇಂಚ ಒಂಜೆಕ್ಕೊಂಜಿ ವಿರೋಧ ಇಪ್ಪುನೆಕ್ಕ್ ದೇಶದ ಗೇನದ ಇಚಾರ ಪಂಡ್ದ್ ವಿವರಿತೆರ್. ಆನೆದ ಮೋನೆ ,ನೇಲ್ಯ ಬಂಜಿ,ಕುಂಟೆ ಇಂಚ ಇತ್ತ್ಂಡಲಾ ಗನಪತಿ ಸುಮುಖೆಗೆ.ಅಂಚೆನೆ ದೀಪುನ ದೆಪ್ಪುನ, ವಿದ್ಯೆನ್ ಕೊರ್ಪಿನ,ಕಲೆಕ್ ಮೂಲ ದೇವೆರ್ ಪನ್ಪಿನ ನಂಬೊಲಿಗೆದ ಒಟ್ಟುಗು ಅಡ್ಡಿ ಮಜಾವುನ ದೇವೆರ್ ಪಂಡ್ ದೇ ಕೀರ್ತಿ ಪಡೆಯಿನ ಸುರುತ ಪೂಜೆ ಕೈಕೊಣುನ ದೇವೆರ್ ಗನಪತಿ.
ಚೌತಿ ಕರಿಪರೆ ಕರ್ಂಬುಡು ಗನಪತಿ,ಗೂರ್ಗ ಆದಿಡ್ ಮೂರ್ತಿ ಇತ್ತ್ ಜಿ ಸುತ್ತೆಡ್ ಗನಪತಿನ್ ಎನ್ನೊನುಗ,ಗನಪತಿ ಸಾಮಾನ್ ತಯಾರ್ ಮಲ್ತ್ ದ ತಿನಲಾತ ತೀಪೆದ ಇರೆಅಡ್ಡೆ,ದೋಸೆ ಇಂಚ
ಬಗೆಬಗೆತ ಅಡ್ಡೆ ಮಲ್ತ್ ದ್ ಚೌತಿ ಕರಿಪುಗ. • ಕೆ.ಎಲ್.ಕುಂಡಂತಾಯ ~~~~~~~~~~~~~~~~~