ತುಳುನಾಡುಡ್ ನಮ ಓಲು ತೂಂಡಲಾ ದೇವಸ್ಥಾನೊಲು, ದೈವಸ್ಥಾನೊಲು ಇತ್ತುದ್ ಭಕ್ತೆರೆನ ರಕ್ಷಣೆ ಮಲ್ತೊಂದ್, ಕಾತೊಂದ್ ಬತ್ತುದ್ ಕಲೆ ಕಾರಣಿಕ ಮೆರೆಯೊಂದುಪ್ಪುನವ್ವೆನ್ ನಮ ಕಣ್ಣಾರೆ ತೂವೊಂದುಲ್ಲ. ಇಂಚಿತ್ತಿನ ಒಂಜಿ ಕಾರಣಿಕ ಕ್ಷೇತ್ರೊಡ್ ಉಡುಪಿ ಜಿಲ್ಲೆದ ಕೊಡವೂರು ಗ್ರಾಮಡ್ ನೆಲೆಯಾತಿನ ಕಟ್ಟದ ಬುಡ ಪಂಡುದೇ ಪುಗಾರ್ತೆನ್ ಪಡೆದಿನ ಕಲ್ಮಾಡಿದ ಭಗವತಿ ಅಮ್ಮನ ಕ್ಷೇತ್ರ.. ಕೊಡವೂರು ಶಂಕರನಾರಾಯಣ ದೇವಳಡ್ ಶಂಕರನಾರಾಯಣ ದೇವೆರೆನ ಬಲತ್ತ ಮರ್ಗಿಲ್ ಡ್ ಅಪ್ಪೆ ಭಗವತಿನ ಮೂಲ ಗುಡಿ ಉಂಡು. ಮಾರಿಪೂಜೆದ ದಿನೊ ಅಪ್ಪೆನ್ ಗದ್ದುಗೆಡ್ ಅಲ್ಪಡ್ದ್ ಕಟ್ಟದ ಮುದೇಲುಗ್ ಕನತುದ್ ಮುಲ್ಪ ಆರಾಧನೆ ಮಲ್ಪುವೆರ್.ಕಲ್ಮಾಡಿದ ಕಟ್ಟದ ಮುದೇಲುಡ್ ಭಕ್ತೆರೆನ ಸಾಕಾರೊಡ್ ಬಾರೀ ಪೊರ್ಲುದ ಮಾರಿಗುಡಿನ್ ಕಟ್ಟುದೆರ್. ಸುಗ್ಗಿ ಬೊಕ್ಕ ಆಟಿ ತಿಂಗೊಲುಡ್ ಮುಲ್ಪ ಮಾರಿಪೂಜೆ ನಡಪುಂಡ್. ಈ ಭಾಗೊಡ್ ನಡಪುನ ಮಲ್ಲ ಮಾರಿಪೂಜೆ ಪಂಡಾ ಉಂದುವೇ.. ಕೊಡವೂರು ಗ್ರಾಮದ ಮಾತಾ ಊರುಗುಲಾ ಈ ಮಾರಿಯೇ ಮುಖ್ಯವಾದುಂಡ್.
ಮಲ್ಪೆದ ಮೀನುಗಾರ ಬಂದುಲು ಈ ಭಗವತಿ ಅಪ್ಪೆನ್ ನಂಬುದೇ ತನ್ನ ಪಡ್ಡಾಯಿದ ಕಸುಬುಗ್ ಪಿದಾಡುವೆರ್. ಮಾತಾ ಜಾತಿದಕುಲಾ ಭಗವತಿ ಅಪ್ಪೆನ್ ನಂಬುದು ಬರ್ಪೆರ್. ಮುಲ್ಪ ಬತ್ತುದ್ ಭಕ್ತಿಡ್ ನಟ್ಟೊನಿಯಡ ಮಾತಾ ಕಷ್ಟೊನುಲಾ ಅಪ್ಪೆ ಭಗವತಿ ದೂರ ಮಲ್ಪವೊಲು.ಮಾತಾ ಊರುದಕುಲು ಅಪ್ಪೆಗ್ ಭಕ್ತಿಡ್ ಪೂ ಪಿಂಗಾರ ಅರ್ಪಣೆ ಮಲ್ಪುವೆರ್.
ಕಾಂಡೆದ ಪೊರ್ತುಡ್ ದರ್ಶನ ಸೇವೆ ನಡಪುಂಡ್. ಈ ಪೊರ್ತುಡ್ ಅಪ್ಪೆಡ ತನ್ನ ಕಷ್ಟೊನ್ ಕೇನೊಂದ್ ಅಯಿಕ್ ಪರಿಹಾರಲಾ ಒದಗಾವರೆಗ್ ಸರಿಯಾಯಿನ ಸಾದಿ ತೋಜಾವೊಲು.. ಮಸ್ತ್ ಭಕ್ತೆರ್ ಬತ್ತುದ್ ಮುಲ್ಪ ಪರಕೆ ಸಂದಾವೆರ್. ರಾತ್ರೆಗ್ ಮಾರಿಪೂಜೆದ ಕ್ರಮ ಪ್ರಕಾರ ಮಾರಿಗಿಡಪುನ ಕ್ರಮ ಸಡಪುಂಡ್. ಅಲ್ಪ ಕೋರಿ, ಕುರಿನ್ ಬಲಿ ಕೊರ್ಪೆರ್. ಅವ್ವೆನ್ ಇಲ್ಲಗ್ ಕನತುದ್ ಇಲ್ಲಡ್ ಅವ್ವೆನ್ ಪ್ರಸಾದರೂಪಡ್ ಕುಟುಂಬದಕುಲು ಸೇರ್ದ್ ವನಸ್ ಮಲ್ಪುವೆರ್. ಒಟ್ಟಾರೆಯಾದ್ ಮಲ್ಪೆ ಕಲ್ಮಾಡಿದ ಕಟ್ಟದ ಬುಡದಲ್ಪ ನೆಲೆಯಾಯಿನ ಭಗವತಿ ಮಾರಿಯಮ್ಮ ಕಾರಣಿಕದ ಶಕ್ತಿಯಾದ್ ಮೆರೆಯೊಂದುಲ್ಲೊಲು. ಅಪ್ಪೆನ ಮಾರಿಪೂಜೆದ ಪೊರ್ಲು ತೂಯರೆಗ್ ಬಾರೀ ಪೊರ್ಲು. ನಿಕ್ಲೆನ ಕಷ್ಟ ಪರಿಹಾರಗಾದ್ ಒರ ಭೇಟಿ ಕೊರ್ಲೆ. ಅಪ್ಪೆನ ಆಶೀರ್ವಾದ ಪಡೆತೊನ್ಲೆ..
by 