ಪೆರ್ಣಂಕಿಲ ಮಹಾಗಣಪತಿ ದೇವಸ್ಥಾನ

ಹಿರಿಯಡ್ಕ
ಮುಲ್ಪದ  ಪೆರ್ಣಂಕಿಲ ಗ್ರಾಮೊಡ್, ಪೇಜಾವರ ಮಠದ ಆಡಳಿತಡುಪ್ಪುನ, ಸುಮಾರು 1500 ವರ್ಷ ಪರತಿರಿ ಉಪ್ಪುನ  ಶ್ರೀ ಮಹಾಲಿಂಗೇಶ್ವರ – ಶ್ರೀ ಮಹಾಗಣಪತಿ ದೇವಸ್ಥಾನ  ಸಂಪೂರ್ಣ ಜೀರ್ಣೋದ್ಧಾರ ಆವೊಂದಿತ್ತುದ್, ಮಾ.17ಡ್ದ್  ಬ್ರಹ್ಮಕಲಶೋತ್ಸವ ಕಾರ್ಯಕ್ರಮಲು  ಸುರುವಾದ್  ಏ. 2ಗ್  ಜಾತ್ರೋತ್ಸವದೊಟ್ಟುಗ್  ಸಂಪನ್ನ ಆಪುಂಡ್.
ಈ ಬಗೆಟ್  ಕ್ಷೇತ್ರದ ಜೀರ್ಣೋದ್ಧಾರ ಸಮಿತಿದ  ಅಧ್ಯಕ್ಷೆರಾಯಿನ  ವಿದ್ವಾನ್ ಪೆರ್ಣಂಕಿಲ ಹರಿದಾಸ್ ಭಟ್ ಬೊಕ್ಕ ಪ್ರಧಾನ ಕಾರ್ಯದರ್ಶಿ  ಶ್ರೀಶಾ ನಾಯಕ್ ಪೆರ್ಣಂಕಿಲ ಸೋಮವಾರ ಸುದ್ದಿಗೋಷ್ಠಿಡ್  ಮಾಯಿತಿ ಕೊರಿಯೆರ್.
ಪೇಜಾವರ ಮಠದ ಕೀರ್ತಿಶೇಷ ಶ್ರೀ ವಿಶ್ವೇಶತೀರ್ಥ ಶ್ರೀಪಾದೆರೆನ  ಕೆಲವು ಸಮಯದ ಆಶಯದಂಚ, ಅರೆನ ಶಿಷ್ಯೆ ಶ್ರೀ ವಿಶ್ವಪ್ರಸನ್ನ ತೀರ್ಥ ಶ್ರೀಪಾದೆರು ಈ ಕ್ಷೇತ್ರೊನ್  ಜೀರ್ಣೋದ್ಧಾರದ ಸಂಕಲ್ಪ ಮಲ್ದೆರ್. ಭಕ್ತೆರೆನ ಸಹಕಾರಡ್  10 ಕೋಟಿ ರು. ವೆಚ್ಚಡ್  ದೇವಳದ  ಜೀರ್ಣೋದ್ಧಾರ, 5 ಕೋಟಿ ರು. ವೆಚ್ಚಡ್  ಪೇಜಾವರ ಶಾಖಾ ಮಠದ ಪುನರ್ನಿರ್ಮಾಣ ಬೊಕ್ಕ  5 ಕೋಟಿ ರು. ವೆಚ್ಚಡ್  ಸಭಾಂಗಣ ಬೊಕ್ಕ  ಭೋಜನಾಲಯ ನಿರ್ಮಾಣ ಕಾರ್ಯೊಲು  ನಡತೊಂದಿತ್ತುದ್  ಅಕೇರಿದ  ಹಂತೊಡ್ ಉಂಡು.  ದುಂಬಗ್  ಶ್ರೀಕುಲು  ಗುರುಕುಲ ಬೊಕ್ಕ ಗೋಶಾಲೆದ  ನಿರ್ಮಾಣದ ಯೋಜನೆಲೆನ್  ಪಾಡೊಂದೆರ್  ಪಂಡೆರು.
ತೀರಾ ಗ್ರಾಮೀಣ ಭಾಗಡ್  ಈತ್ ಮಾತಾ  ಯೋಜನೆಲೆಗ್  ದಾನಿಲೆನ್  ನಾಡೊಂದ್ ಪೋವಂದೇ ಅಕುಲೇ  ಕ್ಷೇತ್ರಗ್  ಬತ್ತುದು ದೇಣಿಗೆ ಸಮರ್ಪಿಸಾವುನ  ಕ್ಷೇತ್ರದ ಪಾವಿತ್ರ್ಯತೆ, ಶಕ್ತಿನ್  ಸೂಚಿಸಾವುಂಡ್ ಪಂಡುದ್ ಖುಷಿಟ್  ವ್ಯಕ್ತಪಡಿಸಾಯೆರು.
ಸುದ್ದಿಗೋಷ್ಠಿಡ್ ಪೇಜಾವರ ಮಠದ ದಿವಾನೆರಾಯಿನ ಸುಬ್ರಹ್ಮಣ್ಯ ಭಟ್, ಕ್ಷೇತ್ರದ ತಂತ್ರಿಲಾಯಿನ  ಮಧುಸೂಧನ ತಂತ್ರಿ ಬೊಕ್ಕ  ವಾಸ್ತುಶಾಸ್ತ್ರಜ್ಞೆರಾಯಿನ  ಸುಬ್ರಹ್ಮಣ್ಯ ಭಟ್ ಗುಂಡಿಬೈಲು ಉಪಸ್ಥಿತರಿತ್ತೆರು.

ಪೆರ್ಣನ ಅಂಕಿಲಡ್ ಉದ್ಭವವಾಯಿನ ಗಣಪತಿ
ಪಚ್ಚ, ಪೈರುದ ಪ್ರಕೃತಿದ ನಡುಟು ಉಪ್ಪುನ  ಕ್ಷೇತ್ರಡ್  ಶಿವನ್ ಪುರಾಣಕಾಲಡ್  ಖರಾಸುರೆ  ಪ್ರತಿಷ್ಠಾಪನೆ  ಮಲ್ದೆ ಪಂಡುದು ಸ್ಥಳ ಪುರಾಣ ಪನ್ಪುಂಡ್. ಬೊಕ್ಕ ಮುಲ್ಪನೇ ಕೈತಲುಡ್ ಪೆರ್ಣ  ಪನ್ಪಿನ ರೈತೆ  ಕಂಡ ದಪ್ಪನಗ  ಆಯನ ಅಂಕಿಲ (ನೆಗಿಲ ಮೊನೆ)ಗ್  ಸಿಕ್ಕುದ್ ಗಣಪತಿ ವಿಗ್ರಹ ಉದ್ಭವ ಆಂಡ್  ಪಂಡುದು ಐತಿಹ್ಯ ಉಂಡು. ಮುಲ್ಪದ  ಶಿಲಾಶಾಸನಡ್  ಬಾರ್ಕೂರುದ  ಅಳುಪೆರೆನ ರಾಣಿ ಬಲ್ಲಮಹಾದೇವಿ  ಈ ಶಿಲಾಮಯ ಗುಡಿತ್ತ  ನಿರ್ಮಾಣಗ್ ಧನಸಹಾಯ ಮಲ್ದಿನ  ಇತಿಹಾಸ ಉಂಡು. ಕಾಲಕ್ರಮೇಣ ಕ್ಷೇತ್ರದ ಆಡಳಿತ  ಪೇಜಾವರ ಮಠಕ್ಕುಂಡ್. 1989 ಟ್  ಬ್ರಹ್ಮಕಲಶೋತ್ಸವ ನಡದಿತ್ತುದ್, ಇತ್ತೆ  ಸಂಪೂರ್ಣ ಜೀರ್ಣೋದ್ಧಾರದೊಟ್ಟುಗ್  ಕುಡೊರ  ಬ್ರಹ್ಮಕಲಶೋತ್ಸವಗ್  ಅಣಿಯಾತುಂಡ್.