ಅಯ್ಯಪ್ಪ ಮಂದಿರೊಡ್ ಪಂಚಶಕ್ತಿಲೆನ ಸಾನಿಧ್ಯ ಉಪ್ಪುನ ಕಲ್ಲುದ ರಹಸ್ಯನ್ ತೆರಿಲೆ..

ಭಾರತ ಭಗವದ್ಭಕ್ತಿದ ಆಗರ. ಪಜ್ಜೆ ಪಜ್ಜೆಗುಲಾ ತೀರ್ಥ ಕ್ಷೇತ್ರೊಲು ಉಪ್ಪುನ ನಾಡು. ವಿವಿಧ ದರ್ಶನೊಲ್ ವೇದ ಕಾವ್ಯೊಲ್ ಉಂಡಾತಿನ ಪುಣ್ಯಭೂಮಿ. ಅವ್ವೇತೊ ಮಹಾತ್ಮೆರು ಪುಣ್ಯಪುರುಷೆರು ದಾರ್ಶನಿಕೆರು ಕವಿಕುಲು ಮುಲ್ಪ ಪುಟ್ಟುದ್ ಈ ಭೂಮಿನ್ ಹಾರೈಸುದೆರ್. ಮುಲ್ಪದ ಪ್ರತಿಯೊಂಜೆಟುಲಾ ಭಗವಂತನ ಅಂಶ ಉಂಡು ಪಂಡುದ್ ನಮ ನಂಬೊಂದ್ ಬೈದ. ಭಗವಂತನ ಸಾನ್ನಿಧ್ಯ ಉಪ್ಪುನ ಅಂಚಿನ ಅಸಂಖ್ಯ ಕ್ಷೇತ್ರೊಲೆಡ್ ಮಲ್ಪೆದ ಶ್ರೀ ಅಯ್ಯಪ್ಪಸ್ವಾಮಿ ಮಂದಿರಲಾ ಒಂಜಿ.
ಕರಿನ ಐವ ವರ್ಷೊಡಿಂಚಿ ಸಾರ ಸಂಖ್ಯೆಲೆಡ್ ಅಯ್ಯಪ್ಪ ಭಕ್ತೆರೆಗ್ ಮಾಲೆದ ದೀಕ್ಷೆ ಕೊರ್ದ್ ಪುಣ್ಯ ಕ್ಷೇತ್ರ ಶಬರಿಮಲೆ ಯಾತ್ರೆ ಮಲ್ಪಾದಿನ ಶ್ರದ್ಧಾಕೇಂದ್ರ.

ಕೇರಳ ಮೂಲದ ಗುರುಸ್ವಾಮಿ ದಿವಂಗತ ಗೋಪಾಲಸ್ವಾಮಿ ಪುಟ್ಟ ಪರ್ಣ ಕುಟೀರಡ್ ಸುಮಾರು 50 ವರ್ಷ ಪಿರಾವುಡ್ ಪೂಜೆ ಮಲ್ತೊಂದ್ ಬೈದಿನ ಅಯ್ಯಪ್ಪ, ತನ್ನ ಮಹಿಮೆದ ಕಾರಣೊಡಾದ್ ಇನಿ ಭವ್ಯ ಮಂದಿರೊಡ್ ವಿರಾಜಮಾನ ಆತೆ.

ಮಸ್ತ್ ವರ್ಷದ ಪಿರಾಕುಡ್ ಈ ಅಯ್ಯಪ್ಪನ ಮಂದಿರೊಡ್ ಮಾಲೆದ ದೀಕ್ಷೆ ದೆತೊಂದ್ ಶಬರಿಮಲೆ ಯಾತ್ರೆಗ್ ಪಿದಾಡ್ದಿನ ಅಯ್ಯಪ್ಪ ಭಕ್ತೆ ಒರಿ ಅಲ್ಪದ ಅಳುದಾ ತುದೆಟ್ ಮೀದ್ “ಕಲ್ಲಿಟ್ಟು ವಂದನೆ’ ಪದ್ಧತಿದ ಪ್ರಕಾರ ತುದೆಟ್ ಕಿನ್ಯ ಮುಷ್ಟಿಗಾತ್ರದ ಕಲ್ಲುನ್ ಪೆಜ್ಜೊಂಡೆರ್. ದುಂಬು ಪೋವನಗ ಅಯ್ಯಪ್ಪಸ್ವಾಮಿ ಮಹಿಷಿನ್ ಸಂಹಾರ ಮಲ್ತಿನ ಜಾಗೆಡ್ ಆ ಕಲ್ಲುನ್ ದೀದ್ ನಮಸ್ಕಾರ ಮಲ್ಪೊಡ್. ಆಂಡ ಆ ಅಯ್ಯಪ್ಪ ಮಾಲಾಧಾರಿ ತಂಕು ಗೊತ್ತಾವಂದೆ ಆ ಕಲ್ಲುನ್ ಅಲ್ಪ ದೀಯಂದೆ ಯಾತ್ರೆ ಮುಗಿತುದ್ ಮಲ್ಪೆದ ಶ್ರೀ ಅಯ್ಯಪ್ಪ ಸ್ವಾಮಿ ಮಂದಿರೊಗ್ ಬತ್ತೆರ್. ಅಳುದಾ ತುದೆತ್ತ ಆ ಕಲ್ಲುನ್ ತನ್ನ ಜೋಳಿಗೆಡ್ ತೂದ್ ದಾದ ಮಲ್ಪುನುಂದ್ ತೆರಿಯಂದೆ ದೇವರೆನ ಪೀಠದ ಕೈತಲ್ ಕಲ್ಲುನ್ ದೀದ್ ಪಿದಾಡಿಯೆರ್. ಅವ್ವೆಡ್ದ್ ಒಂತೆ ದಿನೊಡ್ ಬೊಕ್ಕ ಆ ಕಲ್ಲುದ ಕೈತಲ್ ಒಂಜಿ ಸರ್ಪ ಅಪಗಪಗ ತೋಜಿದ್ ಬತ್ತುಂಡ್. ದಾದಂದ್ ತೆರಿಯಂದೆ ಮಂದಿರದ ಸದಸ್ಯೆರು ಪ್ರಶ್ನಾ ಚಿಂತನೆ ದೀಯೆರ್ “ಆ ಮುಷ್ಟಿಗಾತ್ರದ ಕಲ್ಲುಡ್ ಶ್ರೀದೇವಿ ಗಣಪತಿ ಶಿವ ವಿಷ್ಣು ಬೊಕ್ಕ ಸುಬ್ರಹ್ಮಣ್ಯ ದೇವರೆನ ಪಂಚ ಶಕ್ತಿದ ಸಾನ್ನಿಧ್ಯ ಉಂಡು ಅಯ್ಯಪ್ಪನ ಮುಖ್ಯ ಪೀಠದ ದುಂಬುಡೇ ಈ ಲಿಂಗೊನ್ ಪ್ರತಿಷ್ಠಾಪನೆ ಮಲ್ತುದ್, ಅಯ್ಯಪ್ಪಸ್ವಾಮಿಗ್ ಮಲ್ಪುನ ಪೂಜೆದಲೆಕ್ಕನೇ ಈ ಕಿನ್ಯ ಲಿಂಗೊಗ್ ನಿತ್ಯ ಪೂಜೆ ಆವೊಡ್ ಪಂಡುದ್ ” ಪ್ರಶ್ನಾ ಚಿಂತನೆಡ್ ತೋಜಿದ್ ಬತ್ತುಂಡ್. ”ನ ಬುತೋ ನ ಭವಿಷ್ಯತಿ”ಪನ್ಪಿಲೆಕ್ಕನೇ ಸಂಕಲ್ಪ ಮಾತ್ರೊಡೇ ಎನ್ನಂದಿನ ರೀತಿಡ್ ಕೆಲವೇ ತಿಂಗಳೊಡ್ ಪೊಸ ಮಂದಿರ ನಿರ್ಮಾಣವಾದ್ ನುಡಿತ್ತಲೆಕ್ಕನೇ ಪೂಜೆ ಮಲ್ಪರೆಗ್ ಸುರುವಾಂಡ್. ಆಶ್ಚರ್ಯ ಪಂಡ ಮುಷ್ಟಿ ಗಾತ್ರದ ಕಲ್ಲು ಬುಲೆವೆರೆಗ್ ಸುರುವಾಂಡ್.
ಆನಿ ಮುಷ್ಟಿಗಾತ್ರದಾತೇ ಇತ್ತಿನ ಕಲ್ಲು ಇತ್ತೆ ಸುಮಾರು 10 ಕಿಲೋ ತೂಕದಾತ್ ಬುಲೆದುಂಡ್. ಪಂಚಶಕ್ತಿದ ಸಾನ್ನಿಧ್ಯೊನ್ ಪ್ರಕಟ ಮಲ್ತೊಂದುಂಡ್.
ಭಕ್ತಿಡ್ ಪ್ರಾರ್ಥನೆ ಸಲ್ಲಿಸಾಯಿನ ಭಕ್ತೆರೆನ ಕಷ್ಟ ಸಂಕಟೊಲ್ ಕ್ಷಣಾರ್ಧೊಡ್ ದೂರ ಆದ್ ಭಕ್ತಿನ್ ನಂಬಿಕೆನ್ ಸ್ತಿರ ಮಲ್ದಿನ ಸಾರ ಸಾರ ಭಕ್ತೆರೆನ ಪರಮ ಪುಣ್ಯ ಕಾರಣಿಕ ಕ್ಷೇತ್ರ ಪಂಡುದೇ ಖ್ಯಾತಿನ್ ಪಡೆದುಪ್ಪುನ…
ಶ್ರೀ ಅಯ್ಯಪ್ಪ ಸ್ವಾಮಿ ಬೊಕ್ಕ ಪಂಚಶಕ್ತಿಲೆನ ವಿಶೇಷ ಸಾನಿಧ್ಯ ಉಪ್ಪುನ ಈ ಪುಣ್ಯಕ್ಷೇತ್ರದ ಬ್ರಹ್ಮ ಕಲಶೋತ್ಸವದ ಸಂಭ್ರಮ ಬರ್ಪಿನ ಜನವರಿ 2 ತಾರೀಕುಡ್ದ್ ಜನವರಿ 7‌ ಮುಟ್ಟ ಗೌಜಿಡ್ ನಡಪರೆಗುಂಡ್. ಭಗವದ್ಭಕ್ತೆರ್ ಮಾತಾ ಶ್ರೀಕ್ಷೇತ್ರೊಗ್ ಬತ್ತುದ್,ಅಯ್ಯಪ್ಪ ಸ್ವಾಮಿ ಬೊಕ್ಕ ಪಂಚಶಕ್ತಿಲೆನ ಅನುಗ್ರಹೊಗ್ ಪಾತ್ರರಾವೊಡ್ ಪಂಡುದ್ ಮಂದಿರದ ಅಧ್ಯಕ್ಷೆರಾಯಿನ ಧನಂಜಯ್ ಕಾಂಚಾನ್,ಗುರುಸ್ವಾಮಿ ಬೊಕ್ಕ ಸರ್ವಸದಸ್ಯೆರ್ ಮೋಕೆಡ್ ಎದ್ಕೊಂದೆರ್.