ದಿಗ್ವಿಜಯ ರಥಯಾತ್ರೆ ಸ್ವಾಗತ ಸಮಿತಿ ಉಡುಪಿ ಜಿಲ್ಲೆದ ವತಿಡ್ದ್ ಪತ್ರಿಕಾ ಗೋಷ್ಠಿ.

*ದಿಗ್ವಿಜಯ ರಥಯಾತ್ರೆ ಸ್ವಾಗತ ಸಮಿತಿ ಉಡುಪಿ ಜಿಲ್ಲೆದ ವತಿಡ್ದ್ ಪತ್ರಿಕಾ ಗೋಷ್ಠಿ.

ಸಂತ ಸಮಿತಿದ ನೇತ್ರತ್ವಡ್ ಪಿದಾಡುನ ಅಯೋಧ್ಯೆ ಪ್ರಭು ಶ್ರೀ ರಾಮ ಚಂದ್ರ ದೇವೆರೆನ ದಿಗ್ವಿಜಯ ಯಾತ್ರೆ ಅಕ್ಟೋಬರ್‌ 5ನೇ ತಾರೀಖುದಾನಿ ಯೋಗಿ ಆದಿತ್ಯ ನಾಥೆರ್ ಚಾಲನೆ ಕೊರ್ತೆರ್.27 ರಾಜ್ಯ,15,000 ಕಿ.ಮೀ.60 ದಿನೊಟ್ ಕ್ರಮಿಸಾದ್ ಹಿಂದೂ ಸಮಾಜನ್ ಜಾಗ್ರತಿ ಮೂಡಿಸಾವುನ ಉದ್ದೇಶಡ್ ,ರಾಮರಾಜ್ಯ ನಿರ್ಮಾಣದ ಕಲ್ಪನೆದೊಟ್ಟುಗ್ ನ.7 ತಾರೀಕುಡ್ದ್ ಉಡುಪಿ ಜಿಲ್ಲೆಗ್ ಪ್ರವೇಶ ಆಪುಂಡ್.ಈ ದಿಗ್ವಿಜಯ ಯಾತ್ರೆನ್ ಸ್ವಾಗತ ಮಲ್ಪುನ ನಿಟ್ಟುಡ್ ಉಡುಪಿಡ್ ಪ್ರಮುಖರೆನ್ ಒಟ್ಟು ಮಲ್ತೊಂದ್ ಸ್ವಾಗತ ಸಮಿತಿ ರಚನೆಯಾದಿತ್ತುದ್,ನವೆಂಬರ್ 7 ತಾರೀಖುದಾನಿ ಭಕ್ತಿಪೂರ್ವಕವಾದ್ ಅಯೋಧ್ಯೆ ಪ್ರಭು ಶ್ರೀ ರಾಮಚಂದ್ರ ರಥಯಾತ್ತೆನ್ ಸ್ವಾಗತ ಮಲ್ಪರೆಗ್ ಪೂರ್ವತಯಾರಿ ಬಾರೀ ಪೊರ್ಲುಡ್ ನಡತೊಂದುಂಡ್. ಜಿಲ್ಲೆದ ಬೇತೆ ಬೇತೆ ಧಾರ್ಮಿಕ ಕೇಂದ್ರೊಲು,ಸಂಘಸಂಸ್ಥೆಲೆಡ್ ಪೂರ್ವಭಾವಿ ಸಭೆ ನಡತುದಿತ್ತುದ್,ಸಮಸ್ತ ಹಿಂದೂ ಬಾಂಧವೆರು ಈ ಒಂಜಿ ಕಾರ್ಯಕ್ರಮಡ್ ಪಾಲ್ ಪಡೆಯರೆಗ್ ಉತ್ಸುಹಕರಾದುಲ್ಲೆರ್.
ನವೆಂಬರ್ 7 ತಾರೀಖುದಾನಿ ಕಾಂಡೆ 9ಗಂಟೆಗ್ ದಿಗ್ವಿಜಯ ರಥಯಾತ್ರೆ ಉಡುಪಿಗ್ ಬರ್ರೆಗಿತ್ತುದ್,ಆನಿ ಕಾಂಡೆ 10 ಗಂಟೆಗ್ ಸಂತೆಕಟ್ಟೆ ಜಂಕ್ಷನ್ ಡ್ ಪೂರ್ಣಕುಂಭದೊಟ್ಟುಗ್ ಸ್ವಾಗತ ಮಲ್ಪುಂಡ್.10 ಗಂಟೆಗ್ ಸಂತೆಕಟ್ಟೆ ಜಂಕ್ಷನ್ ಡ್ ಧಾರ್ಮಿಕ ಸಭಾಕಾರ್ಯಕ್ರಮ ನಡಪರೆಗುಂಡ್.ಈ ಸಭಾಕಾರ್ಯಕ್ರಮಡ್ ಸಂತಸಮಿತಿದ ರಾಷ್ಟ್ರೀಯ ಅಧ್ಯಕ್ಷೆರಾಯಿನ ಶ್ರೀ ಶ್ರೀ ಶ್ರೀ ಶಕ್ತಿ ಶಾಂತಾನಂದ ಸ್ವಾಮೀಜಿ ಬೊಕ್ಕ ,ಉಡುಪಿ ಪೇಜಾವರ ಮಠದ ಮಠಾಧೀಶೆರೂ,ರಾಮಮಂದಿರದ ವಿಶ್ವಸ್ಥೆರೂ ಆಯಿನ ಶ್ರೀ ಶ್ರೀ ಶ್ರೀ ವಿಶ್ವಪ್ರಸನ್ನ ತೀರ್ಥೆರು ಉಪಸ್ಥಿತರಿತ್ತುದ್,ಆಶೀರ್ವಚನ ಕೊರ್ರೆಗುಲ್ಲೆರ್.ಅಂಚೆನೇ ನಾಡುದ ಗಣ್ಯಾತಿಗಣ್ಯೆರೆನ ಉಪಸ್ಥಿತಿ ಉಪ್ಪುಂಡ್.ಧಾರ್ಮಿಕ ಸಭಾಕಾರ್ಯಕ್ರಮಡ್ ಬೊಕ್ಕ ಅಯೋಧ್ಯೆಡ್ದ್ ದಿಗ್ವಿಜಯ ರಥಯಾತ್ರೆಡ್ ಬರ್ಪಿನ ಶ್ರೀರಾಮನ ವಿಗ್ರಹಗ್ ಪೇರುದ ಅಭಿಷೇಕ ಮಲ್ಪರೆಗ್ ಭಕ್ತಾಭಿಮಾನಿಲೆಗ್ ಅವಕಾಶ ಉಪ್ಪುಂಡ್.
ಆಯಿಬೊಕ್ಕ ಸಂತೆಕಟ್ಟೆಡ್ದ್ ಉಚ್ಚಿಲ ಮಹಾಲಕ್ಷ್ಮೀ ದೇವಸ್ಥಾನಮುಟ್ಟ ಬ್ರಹತ್ ವಾಹನ ಜಾಥಾದ ಮುಖೇನ ಕಾರು ಬೊಕ್ಕ ಬೈಕ್ ಡ್ ಸಾಗೊಂದ್ ಯಾತ್ರೆ ಸಮಾಪನ ಆವರೆಗುಂಡ್.ಉಚ್ಚಿಲ ಮಹಾಲಕ್ಷ್ಮೀ ದೇವಸ್ಥಾನಡ್ ಭಕ್ತಾಭಿಮಾನಿಲೆಗ್ ನಾಡೋಜ ಡಾ.ಜಿ.ಶಂಕರ್ ಮೆರೆನ ಸಹಕಾರಡ್ದ್ ಅನ್ನಪ್ರಸಾದದ ವ್ಯವಸ್ಥೆನ್ ಮಲ್ದೆರ್.
ಅಯೋಧ್ಯೆಡ್ ರಾಮಮಂದಿರದ ನಿರ್ಮಾಣ ಆವಡು ಪನ್ಪಿನ ಹಿಂದೂಲೆನ ಮಲ್ಲ ಕನ ನಿಜ ಆವರೆಗುಪ್ಪುನ ಈ ಒಂಜಿ ಸುಸಂದರ್ಭಡ್ ಉಡುಪಿದ ಭಕ್ತಾಭಿಮಾನಿಲೆಗ್ ಅಯೋಧ್ಯೆಗ್ ಪೋದ್ ರಾಮನಸೇವೆನ್ ಮಲ್ಪರೆಗಾಯಿಜಿಡಲಾ ಅಯೋಧ್ಯೆಡ್ದ್ ಬರ್ಪಿನ ಈ ಒಂಜಿ ದಿಗ್ವಿಜಯ ರಥಯಾತ್ರೆಡ್ ಪಾಲ್ ಪಡೆದ್ ಪುನೀತೆರಾಪಿನ ಅವಕಾಶ ಸಿಕ್ಕುದುಂಡ್.ಈ ಅವಕಾಶನ್ ಮಾತೆರ್ಲಾ ಸದುಪಯೋಗ ಮಲ್ತೊಂದ್ ಉಡುಪಿದ ಜನತೆ ಹೆಚ್ಚಿಗೆ ಸಂಖ್ಯೆಡ್ ಈ ಒಂಜಿ ಪುಣ್ಯಕಾರ್ಯೊಲೆಡ್ ,ಧರ್ಮಕಾರ್ಯಡ್ ಪಾಲ್ ಪಡೆಯೊಡ್ ಪಂಡುದ್ ದಿಗ್ವಿಜಯ ಯಾತ್ರೆ ಉಡುಪಿ ಸಮಿತಿದ ಪ್ರಧಾನ ಕಾರ್ಯದರ್ಶಿ ವಿಜಯ ಕೊಡವೂರು ಪತ್ರಿಕಾ ಗೋಷ್ಠಿಡ್ ತೆರಿಪಾಯೆರ್.
.
ಪತ್ರಿಕಾ ಗೋಷ್ಠಿಡ್ .
ಆನಂದ ಶೆಟ್ಟಿ
ಅಧ್ಯಕ್ಷರು,
ವಿಜಯ ಕೊಡವೂರು
ಪ್ರಧಾನ ಕಾರ್ಯದರ್ಶಿ

ಮನೋಹರ್ ಶೆಟ್ಟಿ ತೋನ್ಸೆ
ಉಪಾಧ್ಯಕ್ಷರು
ತಾರಾ ಉಮೇಶ್ ಆಚಾರ್ಯ
ಮಹಿಳಾ ಪ್ರಮುಖರು. ರಾಮ ಪೂಜಾರಿ ಸಂತೆಕಟ್ಟೆ ಉಪಸ್ಥಿತರಿತ್ತೆರ್.