ನರಮಾನಿನ ಜನ್ಮೊಡ್ ಒಂಜತ್ತ್ ಒಂಜಿ ಕಷ್ಟೊಲ್ ಬರೊಂದೇ ಉಪ್ಪುಂಡ್.ಕಾಸಿತ್ತಿನಾಯಗ್ ಮಾನಸಿಕ ನೆಮ್ಮದಿ ಉಪ್ಪುಜಿ.ಕೆಲವೆರೆಗ್ ಆರೋಗ್ಯದ ಸಮಸ್ಯೆಲು,ಸಾಂಸಾರಿಕ ಸಮಸ್ಯೆಲು,ಉದ್ಯೋಗ ಸಮಸ್ಯೆಲು,ಇಂಚ ನಾನಾ ರೀತಿದ ಸಮಸ್ಯೆಲೆನ್ ಎದುರಿಸಾವೊಡಾಪುಂಡ್.ಸಮಸ್ಯೆಲು ಬರ್ಪುಂಡುಂದ್ ಮನೀಪಂದೆ ಕುಲ್ಲುಂಡ ಸಮಸ್ಯೆಲೆಗ್ ಪರಿಹಾರ ತಿಕ್ಕಂದ್.ದಾದಾಂಡಲಾ ಪರಿಹಾರ ಸಾದಿನ್ ನಾಡೊಡಾಪುಂಡ್.
ನರಮಾನಿಗ್ ಒವ್ವೇ ಸಮಸ್ಯೆ ಬತ್ತುಂಡಲಾ ಐಕ್ ಪರಿಹಾರ ಕೊರ್ಪಿನಾರ್ ಆ ದೇವೆರ್ ಮಾತ್ರ.ನಮ ನಂಬಿಕೆ ದೀಯಡ ದೇವೆರ್ ಏಪೊಗ್ಲಾ ಕೈ ಬುಡಯೆರ್.
ಈ ನಿಟ್ಟುಡ್ ಭಕ್ತೆರೆನ ಕಷ್ಟೊಲೆನ್ ದೂರ ಮಲ್ಪರೆಗಾದ್ ಕರಿನ 7 ವರ್ಸೊಡಿಂಚಿ ಸೇವೆ ನಡತೊಂದ್ ಬರ್ಪಿನ ಒಂಜಿ ಮಂದಿರ ಒಡಿಪುದ ಶಂಕರಪುರಡ್ ಉಂಡು.ಅವ್ವೇ ದ್ವಾರಕಾಮಾಯಿ ಸಾಯಿ ಸಾಂತ್ವನ ಮಂದಿರ.ಮುಲ್ಪ ಪ್ರತೀ ಗುರುವಾರ ವಿಶೇಷ ಸೇವೆಲು ಭಕ್ತೆರೆಗಾದೇ ನಡಪುಂಡ್.ಐಟ್ ವಿಶೇಷವಾಯಿನವ್ವ್ ಈ “ರಕ್ಷಾಧಾರ” ಸೇವೆ.
ಕರಿನ 4ವರ್ಸೊಡಿಂಚಿ ಈ ರಕ್ಷಾಧಾರ ಸೇವೆ ನಿರಂತರ ವಾದ್ ನಡತೊಂದ್ ಬರೊಂದುಂಡ್.ಅಂಚಾಂಡ ನೆತ್ತ ಮಹಿಮೆ ದಾದ ಪಂಡ ಈ “ರಕ್ಷಾಧಾರ” ನ್ ನಮ ಕೈಟ್ ಕಟ್ಡೊಂಡ ಸಾಯಿಬಾಬೆರೆನ ಪ್ರೇರಣೆ ನಮಕ್ ತಿಕ್ಕುಂಡ್.ನಮ್ಮ ಮನಸ್ಸಿಡಿತ್ತಿನ ನಕಾರಾತ್ಮಕ ಚಿಂತೆಲು ದೂರ ಆದ್ ನಮ ಏಪೊಲಾ ಸಕಾರಾತ್ಮಕವಾಯಿನ ಚಿಂತನೆಡ್ ನಮ ತೊಡಗಿಸಾವೊನರೆಗ್ ಮನಸ್ಸಾಪುಂಡ್.ನಮ್ಮ ಬದುಕುದ ಸಮಸ್ಯೆಲು ದೂರ ಆಪುಂಡ್.
ಈ ರಕ್ಷಾಧಾರ ಸೇವೆ ಧರ್ಮಾರ್ಥವಾದಿತ್ತುದ್ ಭಕ್ತೆರ್ ನೆಕ್ ಕಾಸ್ ಕೊರ್ಪಿನ ಅಗತ್ಯ ಇಜ್ಜಿ.ಪ್ರತೀ ವರ್ಷ ತುಡರ್ ಪರ್ಬೊದ ದುಂಬುದ ಗುರುವಾರ ಈ ರಕ್ಷಾಧಾರ ಸೇವೆ ಸಾಯಿ ಮಂದಿರೊಡ್ ನಡಪುಂಡ್.
ಸುರುತ್ತ ವರ್ಸ 50ಜನ ಭಕ್ತೆರ್ ಈ ಸೇವೆಡ್ ಪಾಲ್ ಪಡೆದೆರ್.ರಡ್ಡನೇ ವರ್ಷ 100 ಜನ,ಮೂಜನೇ ವರ್ಷ 500 ಜನ,ಅಂಚ ನಾಲನೇ ವರ್ಷ ಪಂಡ ಈ ಸರ್ತಿದ ಸೇವೆಡ್ ಸುಮಾರ್ 700ಜನ ಪಾಲ್ ಪಡೆದೆರ್ .ಊರುಡ್ ಮಾತ್ರ ಅತ್ತಾವಂದೆ ಪರಜಿಲ್ಲೆದಕುಲಾ ಈ ರಕ್ಷಾಧಾರೊನ್ ಅಂಚೆದ ಮುಖೇನ ಕಡಪುಡ್ರೆಗ್ ಕೇನೊಂದುಲ್ಲೆರ್ ಪಂಡುದ್ ಮಂದಿರದ ಧರ್ಮದರ್ಶಿ ಗುರೂಜಿ ಸಾಯಿ ಈಶ್ವರ್ ತೆರಿಪಾದೆರ್.ಭಕ್ತೆರೆಡ್ದ್ ಬರ್ಪಿನ ಕಾಣಿಕೆನ್ ಜನಸೇವೆಗಾದೇ ಮೀಸಲು ದೀಪಿನ ಈ ಮಂದಿರೊಡ್ ಅವ್ವೇತೊ ಕಾರ್ಣಿಕೊಲ್ ನಡತೊಂದ್ ಬರೊಂದುಂಡ್.ಸತ್ಯ,ಧರ್ಮ,ನಿಷ್ಠೆ ಡ್ ಬರ್ಪಿನ ಭಕ್ತರೆನ್ ಬಾಬಾ ಕೈ ಬುಡ್ಪುಜೆರ್ ಪಂಡುದ್ ಗುರೂಜಿ ಪನ್ಪೆರ್.
ಇನಿತ್ತ ದಿನ ನಡತಿನ ನಡತಿನ ರಕ್ಷಾಧಾರ ಸೇವೆಡ್ ಸುಮಾರ್ 700 ಜನ ಪಾಲ್ ಪಡೆದ್ ಸಾಯಿಬಾಬಾ ನ ಕ್ರಪೆಕ್ ಪಾತ್ರರಾಯೆರ್.ಗುರೂಜಿ ಸಾಯಿಈಶ್ವರ್ ಬತ್ತಿನ ಮಾತಾ ಭಕ್ತಾದಿಲೆಗ್ ಸಾಯಿಕ್ರಪೆ ಇತ್ತಿನ ಈ ರಕ್ಷಾಧಾರೊನ್ ಕೊರ್ದ್ ಆಶೀರ್ವಾದ ಮಲ್ತೆರ್.
by 