ಮಾಣಾಯಿ ಮಠಟ್ ರಾಮಭದ್ರಕ ಪೂಜೆ..

ಮಾಣಾಯಿ ಮಠದಲ್ಲಿ ರಾಮಭದ್ರಕ ಪೂಜೆ

ಮತ್ತೊಮ್ಮೆ ರಾಜ್ಯದಲ್ಲಿ ಬಿಜೆಪಿಗೆ ಗದ್ದುಗೆಗೆ , ಮೋದಿಗೆ ರಾಮನ‌ ರಕ್ಷೆಗೆ ಪ್ರಾರ್ಥನೆ

ಪಲಿಮಾರು ಶ್ರೀ‌, ಬಿ ಎಲ್ ಸಂತೋಷ್ , ಶಾಸಕರು ಅಭ್ಯರ್ಥಿಗಳು ಭಾಗಿ

ಉಡುಪಿ ಜಿಲ್ಲೆ ಹಿರಿಯಡಕ ಕೈತಲುದ ಮಾಣಾಯಿದ ಪ್ರಾಚೀನವಾಯಿನ ಶ್ರೀ ಮುಖ್ಯಪ್ರಾಣದೇವೆರೆನ ಮಠಟ್ ಅಕ್ಷಯ ತೃತೀಯಾ ಪರ್ವದಿನ ಐತಾರದಾನಿ ವಿಶೇಷ ಫಲಪ್ರದವಾಯಿನ ಶ್ರೀ ರಾಮಭದ್ರಕ ಪೂಜೆ ನಡತುಂಡ್. .

ಭಾರತನ್ ವಿಶ್ವದ ಶ್ರೇಷ್ಠ ರಾಷ್ಟ್ರ ಮಲ್ಪರೆಗ್ ಬೊಕ್ಕ ದೇಶೊಡ್ ಸುಭಿಕ್ಷೆ ಸಮೃದ್ಧ ರಾಮರಾಜ್ಯ ನಿರ್ಮಾಣ ಇವರ ಗ್ ಶ್ರಮಿಸೊಂದುಪ್ಪುನ ಪ್ರಧಾನಿ ಶ್ರೀ ನರೇಂದ್ರ ಮೋದಿಜಿಗ್ ಶ್ರೀ ರಾಮದೇವೆರೆನ ಪೂರ್ಣ ರಕ್ಷೆ ಬೊಕ್ಕ ಅರೆಗ್ ಬಲ ದಿಂಜಾವುನ ನಿಟ್ಟುಡ್ ರಾಜ್ಯಡ್ ಈ ಚುನಾವಣೆಡ್ ಅಭೂತಪೂರ್ವ ಜನಬೆಂಬಲ ಒದಗುದ್ ವಿಜಯ ಪ್ರಾಪ್ತ ಆವೊಡ್ ಪನ್ಪಿನ ಸಂಕಲ್ಪದೊಟ್ಟುಗ್ ಸಮಾನ ಮನಸ್ಕ ವೈದಿಕೆರು ಸ್ವಯಂಸ್ಫೂರ್ತಿಡ್ ಪೂಜಾವಿಧಿನ್ ಮಲ್ತೆರ್..

ಕಾಂಡೆ ಸೂರ್ಯೋದಯಡ್ದ್ ಸೂರ್ಯಾಸ್ತ ಮುಟ್ಟ ನಡತಿನ ಈ ವಿಶೇಷ ಪೂಜೆಡ್ ಪದಿನಾಜಿ ಸರ್ತಿ ಶ್ರೀರಾಮನ ಪುದರುನ್ ಸಂಸ್ಕೃತ ಭಾಷೆಡ್ ಬೊಕ್ಕ ಶ್ರೀ ರುದ್ರದೇವೆರೆನ ಲಿಂಗೊನ್ ಚಿತ್ರಿಸಾದ್ ಬೃಹದಾಕಾರದ ರಾಮಭದ್ರಕ ಮಂಡಲಡ್ ಶ್ರೀ ರಾಮಚಂದ್ರದೇವೆರೆನ್ ಮೂಜಿ ಪೊರ್ತು ವಿಧಿಪೂರ್ವಕವಾದ್ ಅರ್ಚನೆ ಮಲ್ತುದ್ ಪೂಜೆ ಮಲ್ತೆರ್. .

ಪ್ರಧಾನಿ ನರೇಂದ್ರ ಮೋದಿ , ಮುಖ್ಯಮಂತ್ರಿ ಬೊಮ್ಮಾಯಿ ಬೊಕ್ಕ ಉಡುಪಿ ಜಿಲ್ಲೆದ ಮಾತಾ ಬಿಜೆಪಿ ಅಭ್ಯರ್ಥಿಲು ಬೊಕ್ಕ ಹಾಲಿ ಶಾಸಕೆರೆನ ಜನ್ಮ ನಕ್ಷತ್ರ ಜನ್ಮ ರಾಶಿನ್ ಉಲ್ಲೇಖದೊಟ್ಟುಗ್ ಜಿಲ್ಲಾ ಬಿಜೆಪಿ ಅಧ್ಯಕ್ಷ ಕುಯಿಲಾಡಿ ಸುರೇಶ್ ನಾಯಕ್ ಬೊಕ್ಕ ಪೂರ್ಣಿಮಾ ನಾಯಕ್ ದಂಪತಿ ಸಂಕಲ್ಪ ಮಲ್ತೆರ್. .‌
ಶಾಸಕೆರಾಯಿನ ರಘುಪತಿ ಭಟ್ ಲಾಲಾಜಿ ಆರ್ ಮೆಂಡನ್, ಅಭ್ಯರ್ಥಿಲಾಯಿನ ಗುರ್ಮೆ ಸುರೇಶ್ ಶೆಟ್ಟಿ ಯಶ್ಪಾಲ್ ಎ ಸುವರ್ಣ , ರಾ ಸ್ವ ಸಂಘದ ಹಿರಿಯೆರಾಯಿನ ಟಿ ಶಂಭು ಶೆಟ್ಟಿ ಮೊಕುಲು ಭಾಗವಹಿಸಾದ್ ಪ್ರಾರ್ಥನೆ ಮಲ್ತೆರ್ .
ಶ್ರೀ ಪಲಿಮಾರು ಮಠಾಧೀಶ ಶ್ರೀ ಶ್ರೀ ವಿದ್ಯಾಧೀಶತೀರ್ಥ ಶ್ರೀಪಾದರು ಭಾಗವಹಿಸಾದ್ ಗುರುಪೂಜೆನ್ ಸ್ವೀಕರಿಸಾದ್ ಅನುಗ್ರಹ ಸಂದೇಶ ಕೊರ್ದ್ ಅಕ್ಷಯ ತದಿಗೆದ ಪರ್ವದಿನ ರಾಮದಾಸ ಹನುಂಮತನ ಸನ್ನಿಧಿಡ್ ನಡತಿನ ಈ ಸತ್ಕರ್ಮದ ಫಲ ಪ್ರಧಾನಿ ಮೋದಿಗ್ ಬೊಕ್ಕ ಅರೆನ ಅನುಯಾಯಿಲೆಗ್ ಅಕ್ಷಯವಾದ್ ತಿಕ್ಕಡ್ ಪಂಡೆರ್. ;

ವಿದ್ವಾನ್ ಹೆರ್ಗ ಹರಿಪ್ರಸಾದ್ ಭಟ್ಟೆರೆನ ನೇತೃತ್ವಡ್ ವೈದಿಕ ವಿದ್ವಾಂಸೆರಾಯಿನ ಸುಬ್ರಹ್ಮಣ್ಯ ಭಟ್ ಗುಂಡಿಬೈಲು ಹೆರ್ಗ ರವೀಂದ್ರ ಭಟ್ ಬೊಕ್ಕ ಇತರೆ ಅನೇಕ ವೈದಿಕೆರು , ಶ್ರೀ ಮಠದ ಪ್ರಧಾನ ಅರ್ಚಕ ಮಾಧವ ಉಪಾಧ್ಯಾಯೆರು ಈ ಪೂಜೆನ್ ಸಂಯೋಜನೆ ಮಲ್ದಿತ್ತೆರ್..