ಸರಳ ಪರ್ಯಾಯೋತ್ಸವ , ದರ್ಬಾರ್ ಸಭೆ : ಸಮಿತಿ ಘೋಷಣೆ .
ಬಹುನಿರೀಕ್ಷೆದ ಧಾರ್ಮಿಕ ಉತ್ಸವ ನಾಡಹಬ್ಬ ಉಡುಪಿ ಪರ್ಯಾಯೋತ್ಸವನ್ ಕೋವಿಡ್ ಹಿನ್ನೆಲೆಡಾದ್ ಅತೀ ಸರಳವಾದ್ ನಡಪಾವರೆಗ್ ತೀರ್ಮಾನ ಮಲ್ದುಂಡುಂದ್ ಸಮಿತಿ ಕಾರ್ಯಾಧ್ಯಕ್ಷೆರಾಯಿನ ಕೆ ರಘುಪತಿ ಭಟ್ ಘೋಷಣೆ ಮಲ್ದೆರ್.
ಸಮಿತಿ ಗೌರವಾಧ್ಯಕ್ಷ ಕೆ ಸೂರ್ಯನಾರಾಯಣ ಉಪಾಧ್ಯಾಯೆರು ಬೊಕ್ಕ ಶಾಸಕೆರೆನ ಉಪಸ್ಥಿತಿಡ್
ನಡತಿನ ಶ್ರೀ ಕೃಷ್ಣಾಪುರ ಪರ್ಯಾಯೋತ್ಸವ ಸಮಿತಿದ ಪ್ರಮುಖೆರೆನ ಸಭೆಟ್ ಈ ಮಹತ್ವದ ತೀರ್ಮಾನ ದೆತೊಂದೆರ್.
ಕೋವಿಡ್ ಪರಿಸ್ಥಿತಿ ಜಾಸ್ತಿ ಆವೊಂದುಪ್ಪುನ ದಿಟ್ಟಿಡ್ ಸರ್ಕಾರದ ಮುನ್ನೆಚ್ಚರಿಕಾ ಕ್ರಮ ದೆತೊಂಬಿನ ಹಿನ್ನೆಲೆಡ್ ಪೂರ್ಣವಾದ್ ಸಹಕಾರ ಮಲ್ಪೊಡುಂದ್ ಭಾವೀ ಪರ್ಯಾಯ ಶ್ರೀ ಕೃಷ್ಣಾಪುರ ಶ್ರೀಪಾದೆರೆನ ಆಶಯದ ಪ್ರಕಾರ ಜನವರಿ 17 ನಡುರಾತ್ರೆಗ್ ನಡೊಪೊಡಾಯಿನ ( 18 ರ ನಸುಕಿನ ವೇಳೆ) ಬಹುನಿರೀಕ್ಷೆದ ಪರ್ಯಾಯೋತ್ಸವ ಮೆರವಣಿಗೆ ಬೊಕ್ಕ ರಾಜಾಂಗಣಡ್ ನಡಪುನ ಪರ್ಯಾಯ ದರ್ಬಾರ್ ಸಭೆನ್ ತೀರಾ ಸಾಂಪ್ರದಾಯಿಕತೆಗ್ ಆದ್ಯತೆ ಕೊರ್ದ್ ತೀರಾ ಸರಳವಾದ್ ನಡಪಾವರೆಗ್ ನಿರ್ಧಾರ ಮಲ್ದೆರ್. .
ಈ ಕಾರ್ಯಕ್ರಮೊಲೆನ್ ಬೇತೆ ಬೇತೆ ಟಿ ವಿ ವಾಹಿನಿಲೆಡ್ ನೇರಪ್ರಸಾರ ಮಲ್ಪುವ, ಅಂಚ ಭಕ್ತಾದಿಲು ಈ ವ್ಯವಸ್ಥೆದ ಸದುಪಯೋಗ ಮಲ್ತೊಂದ್ ಸಹಕರಿಸಾವೊಡ್ ಪಂಡುದ್ ಭಕ್ತೆರು ಬೊಕ್ಕ ನಾಗರಿಕರೆಡ ನಮ್ರತೆಡ್ ವಿನಂತಿ ಮಲ್ತುದೆರ್ .
ಆ ಹಿನ್ನೆಲೆಡ್ ಪರ್ಯಾಯೋತ್ಸವ ಮೆರವಣಿಗೆಡ್ ಉತ್ಸವ ಸಮಿತಿ ಬೊಕ್ಕ ಕನ್ನಡ ಸಂಸ್ಕೃತಿ ಇಲಾಖೆ ಸಹಯೋಗಡ್ ಆಯೋಜನೆ ಮಲ್ದಿನ ಜಾನಪದ ತಂಡೊಲೆನ್ ಬೊಕ್ಕ ಕೆಲವು ಟ್ಯಾಬ್ಲೋಲೆನ್ ರದ್ದು ಮಲ್ತುದ. ಅಷ್ಟ ಮಠಾಧೀಶೆರು ಕುಲ್ಲುನ ಮೇನೆನ್ ತುಂಬೊಂದಿನ ವಾಹನೊಲು , ವಾದ್ಯ ಚಂಡೆ , ಡೋಲು , ಬಿರುದಾವಳಿ ಬೊಕ್ಕ ಕೇವಲ ಪೌರಾಣಿಕ ದೃಶ್ಯಾವಳಿಲಿತ್ತಿನ ಟ್ಯಾಬ್ಲೊ ಮಾತ್ರ ಮೆರಣಿಗೆಡ್ ಉಪ್ಪುಂಡ್ . ಪರ್ಯಾಯ ದರ್ಬಾರ್ ಸಭೆಟ್ ಸೀಮಿತ ಸಂಖ್ಯೆದ ಆಸನ ವ್ಯವಸ್ಥೆ ಇಪ್ಪುಂಡ್. ಜನತೆ ಅಗತ್ಯವಾದ್ ಗಮನಿಸಾವೊಡ್ .
ರಡ್ಡ್ ಕೋವಿಡ್ ಲಸಿಕೆ ದೆತೊಂದಿನಕಲೆಗ್ ಮಾತ್ರ ಉತ್ಸವಡ್ ಪಾಲ್ ಪಡೆಯೆರೆಗ್ ಆದ್ಯತೆ ಕೊರ್ತೆರ್ . ಕಡ್ಡಾಯವಾದ್ ಮಾಸ್ಕ್ ಪಾಡೊಡ್ ಬೊಕ್ಕ ಸಾಮಾಜಿಕ ಅಂತರೊನ್ ಕಾತೊನೊಡ್ ಪಂಡುದ್ ಕಡ್ಡಾಯ ಮಲ್ದೆರ್. ಈ ನಿಟ್ಟುಡ್ ಸಮಿತಿ ಜಿಲ್ಲಾಡಳಿತದೊಟ್ಟುಗ್ ಪೂರ್ಣ ಸಹಕಾರ ಮಲ್ಪರೆಗ್ ಜನಕುಲ್ ಸಹಕಾರ ಮಲ್ಪೊಡುಂದ್ ಕುಡೊರ ವಿನಂತಿ ಮಲ್ಪುವಾ ಪಂಡುದ್ ಶಾಸಕೆರಾಯಿನ ರಘುಪತಿ ಭಟ್ ತೆರಿಪಾದೆರ್ .
by 