ವಿಷಯ: ಅಖಿಲ ಭಾರತೀಯ ವಿದ್ಯಾರ್ಥಿ ಪರಿಷತ್ ಕಾರ್ಕಳ ತಾಲೂಕು ವತಿಡ್ದ್ ಉಡುಪಿ ಜಿಲ್ಲೆಗ್ ಸರಕಾರಿ ತಾಂತ್ರಿಕ ಬೊಕ್ಕ ವೈದ್ಯಕೀಯ ಕಾಲೇಜು ಸ್ಥಾಪನೆ ಮಲ್ಪರೆಗ್ ಆಗ್ರಹ.
ಬುದ್ದಿವಂತೆರೆನ ಜಿಲ್ಲೆ ಪಂಡುದೇ ಪುಗಾರ್ತೆನ್ ಪಡೆದಿನ ಶಿಕ್ಷಣ ಕಾಶಿಯಾದುಪ್ಪುನ, ಐತಿಹಾಸಿಕವಾದ್ ಜ್ಞಾನ ಪರಂಪರೆನ್ ವೈಭವಕ್ಕೇರಿಸಾಯಿನ ಶ್ರೀಕೃಷ್ಣನ ನೆಲೆಬೀಡಾಯಿನ ಉಡುಪಿ ಜಿಲ್ಲೆಡ್ ಒಂಜಿ ಸರಕಾರಿ ತಾಂತ್ರಿಕ ಕಾಲೇಜು ಬೊಕ್ಕ ವೈದ್ಯಕೀಯ ಕಾಲೇಜು ಇಪ್ಪಂದಿನವ್ ಬಾರೀ ಬೇಜಾರುದ ವಿಷಯವಾದುಂಡ್. ಉಡುಪಿ ಜಿಲ್ಲೆಡ್ ಪ್ರತೀ ವರ್ಷ ಸಾರ ಸಾರ ಸಂಖ್ಯೆಡ್ ವಿದ್ಯಾರ್ಥಿಲು CET ಬೊಕ್ಕ NEET ಪರೀಕ್ಷೆನ್ ಬರೆದು, ವೈದ್ಯಕೀಯ ಬೊಕ್ಕ ತಾಂತ್ರಿಕ ಶಿಕ್ಷಣದ ಅಪೇಕ್ಷಿಯಾದುಲ್ಲೆರ್.
ಮಾತಾ ನಿಟ್ಟುಡ್ ಪ್ರತಿಯೊಂಜಿ ವ್ಯವಸ್ಥೆ ಉಪ್ಪುನ ಜಿಲ್ಲೆದ ಜನ ಸಾಮಾನ್ಯವಾದ್ ಪರ ಜಿಲ್ಲೆಲೆಗ್ ತಂಕ್ಲೆನ ಜೋಕ್ಲೆನ್ ಶಿಕ್ಷಣಗಾದ್ ಕಡಪುಡನಾವಡ್ ಅತ್ತುಂಡ ಪ್ರೋತ್ಸಾಹ ಮಲ್ಪುನಾವಡ್. ತುಲನಾತ್ಮಕವಾದ್ ಕಡಿಮೆಯಾದುಂಡ್. ಈ ಕಾರಣಡಾದ್ ಅವ್ವೇತೊ ಬಡ ಪ್ರತಿಭಾವಂತ ತಾಂತ್ರಿಕ ಬೊಕ್ಕ ವೈದ್ಯಕೀಯ ಶಿಕ್ಷಣನ್ ಪಡೆತೊನರೆಗ್ ಅಪೇಕ್ಷೆ ಉಪ್ಪುನ ವಿದ್ಯಾರ್ಥಲು ತಾನ್ ಇಚ್ಚೆದ ಶಿಕ್ಷಣಡಾದ್ ವಂಚಿತರಾವೊಂದುಲ್ಲೆರ್.ಬೊಕ್ಕ ಉಂದೆಟಾದ್ ಜಿಲ್ಲೆದ ಪ್ರತಿಭೆಗ್ ಸರಿಯಾಯಿನ ವೇದಿಕೆ ಒದಗಿಸಾವರೆಗ್ ಸರಕಾರ ವಿಫಲ ಆವೊಂದುಂಡ್. ಪನ್ಪಿನವ್ ಬಾರಿ ಸ್ಪಷ್ಟವಾದ್ ಗೋಚರಿಸಾವುಂಡ್.
ಅವ್ವೇತೊ ವರ್ಷಡಿಂಚಿ ಎಬಿವಿಪಿ ಈ ವಿಚಾರವಾದ್ ಸಂಬಂಧಪಟ್ಟ ಇಲಾಖೆಗ್ ಆಗ್ರಹ ದೀಯೊಂದ್ ಬರೊಂದುಂಡ್. ಕರಿನ ಸರಕಾರ ಇಪ್ಪನಗ ಆನಿದ ವೈದ್ಯಕೀಯ ಸಚಿವ ಡಾ| ಸುಧಾಕರ್ ಮೇರು ಎಬಿವಿಪಿ ಮನವಿಗ್ ಸ್ಪಂದಿಸಾದ್ ಪೂರಕವಾದ್ ಸರಕಾರಡ್ದ್ ಉಪ್ಪೂರು ಭಾಗಡ್ ವೈದ್ಯಕೀಯ ಕಾಲೇಜು ನಿರ್ಮಿಸಾವರೆಗ್ 30 ಎಕರೆ ಜಮೀನುನ್ ಮಂಜೂರಾತಿ ಮಲ್ಪುಂಡ್ ಪಂಡುದ್ ಭರವಸೆನ್ ಕೊರ್ದಿತ್ತೆರು ಆಂಡ ಇದಮುಟ್ಟ ಆ ವಿಷಯವಾದ್ ಒವ್ವೇ ರೀತಿದ ಬೆಳವಣಿಗೆ ಆವಂದೆ ಇಪ್ಪುನವ್ ಬಾರೀ ಖಂಡನಾರ್ಹ ವಿಷಯವಾದುಂಡ್. ಇತ್ತೆನೇ ಕರ್ನಾಟಕದ ಕೆಲವ್ ಜಿಲ್ಲೆಲೆಡ್ ಇಂಚಿನ ಕಾಲೇಜು ಇತ್ತುದ್ ಉಡುಪಿದ ವಿದ್ಯಾರ್ಥಿಲೆಗಾದ್ ಸರಕಾರ ಶೀಘ್ರವಾದ್ ದುಂಬು ಬರ್ಪಿನ ಅಧಿವೇಶನದ ಸಂದರ್ಭಡ್ ಈ ವಿಷಯದ ಬಗೆಟ್ ಸೂಕ್ತ ಜಮೀನುದ ವ್ಯವಸ್ಥೆ ಬೊಕ್ಕ ಹಣಕಾಸುದ ಬುಡುಗಡೆ ಮಲ್ಪೊಡ್ ಪಂಡುದು ಎಬಿವಿಪಿ ಆಗ್ರಹ ಮಲ್ಪುಂಡ್ ಒಂಜಿ ವೇಳೆ ತತ್ತುಂಡ ದುಂಬಗ್ ಬರ್ಪಿನ ದಿನಕ್ಲೆಡ್ ಜಿಲ್ಲೆಯಾದ್ಯಂತ ಬೃಹತ್ ಪ್ರತಿಭಟನೆ ಮಲ್ಪುಂಡ್ ಪಂಡುದ್ ಎಚ್ಚರಿಕೆ ಕೊರ್ಪ ಪಂಡುದು ಮನವಿ ಕೊರಿಯೆರ್.
ಈ ಸಂದರ್ಭಡ್ ತಾಲೂಕು ಸಂಚಾಲಕೆರಾಯಿನ ಶ್ರೇಯಸ್ ಅಂಚನ್, ರಾಜ್ಯ ಕಾರ್ಯಕಾರಿಣಿ ಸದಸ್ಯ ಪವನ್ ಕುಲಾಲ್, ತಾಲೂಕು ವಿದ್ಯಾರ್ಥಿನಿ ಪ್ರಮುಖ್ ಸೌಮ್ಯ ಜಿ ನಾಯಕ್, ತಾಲೂಕು ಸಹ ವಿದ್ಯಾರ್ಥಿನಿ ಪ್ರಮುಖ್ ಮನ್ವಿತಾ ಕುಲಾಲ್, ನಗರ ಸಹ ಕಾರ್ಯದರ್ಶಿ ಯಾದ ದೀಕ್ಷಿತ್ ಬೊಕ್ಕ ಪ್ರಮುಖ ಕಾರ್ಯಕರ್ತೆರಾಯಿನ ಮನೋಜ್,ವಿಜೇಂದ್ರ, ಯುವರಾಜ್, ಸುದೀಪ್, ತನುಶ್ರೀ, ಪ್ರಜ್ವಲ್, ಶಿವಪ್ರಸಾದ್,ಶ್ರೀಧರ್, ಮನ್ವಿತ್, ಶಿವಾನಂದ ಮೊಕುಲು ಉಪಸ್ಥಿತರಿತ್ತೆರು.
by 