ತುಳುವ ತಿರಿತ ಸಿರಿ ಪಜಿತೊಂದು ಪೋಯಿಲೆಕೊನೇ ಒಂಜೆತ ಬೆರಿಕ್ಕೊಂಜಿ ದಿಂಜಿ ಪೊಸತನ ಅರಲೊಂದು ನೆಗತೊಂದು ಬರ್ಪುಂಡು. ಅರಲಿ ಸಿರಿಮುಡಿತುಲಯಿಡ್ದ್ ಪಸರು ಕಮ್ಮೆನ ನಾಲೂರ ಮೂಂಕುಗೆಡ್ತ್‌ದ್, ಕೆಬಿ ಅರಲಾದ್, ತುಳುವ ಸೀಮೆದಂಚೊರ ಕಣ್ಣ್ ಹಾಸ್‌ದ್, ಕಾರ್ ಒಯ್ತೊಂದು ಬರ್ಪಿಲೆಕ ಮಲ್ಪುಂಡು. ಅತ್ತಂದೆ ಮರಪಂದಿ ನೆಂಪುದ ಮಾಲೆನ್ ಕೋತ್ ಕಡಪುಡುಂಡು ಪನ್ಪಿನೆಕ್ ಸಾಕ್ಷಿಯಾದ್ ಪಿದಯಿ ಊರುದಕ್ಲ್ ನಮ್ಮಾಡೆ ಬಿನ್ನೆರಾದ್ ಬತ್ತ್, ಬಿಕ್ಕೆರಾದ್ ಇತ್ತ್, ಮುಲ್ತ ಸಿರಿ ಸೊಬಗ್‌ನ್ ಅನುಭವಿತ್, ನೆಲಮೂಲೊದ ಐಸ್ರೊನು ತೆರಿದ್, ಅಕ್ಲೆಕ್ಲೆನ ದೇಸೊಡು, ಅಕ್ಲಕ್ಲೆನ ಬಾಸೆಡ್ ಮುಲ್ತ ಐಸಿರಿ ಐಭೋಗೊನು ಪುಗರ್‌ದ್ ವರ್ಣಿತ್‌ದ್ ಬರೆದ್ ಒರಿತ್‌ನವೇ ನೆಗತ್ ತೋಜುಂಡು.
ಪರದೇಸೊ ಪರ ಊರುದಕ್ಲೆನ್ ಮರ್ಲ್ ಮಲ್ಪಿ ತುಳುವ ಪೋಕುಡು ಒಂಜಾತ್ ಆಚರಿಪುಲು, ಒಂಜಾತ್ ಪರ್ಬೊಲುಲಾ ಉಲ್ಲೊ. ಪಗ್ಗುದ ಬಿಸುಕಣಿಡ್ದ್ ಸುಗ್ಗಿದ ಕಡೆಮುಟ್ಟ ಒಂಜೆಕ್ಕೊಂಜಿ ಒತ್ತು ಕೊರೊಂದು ಬರ್ಪಿ ಪರ್ಬೊಲೆನ ಆಚರಿಪುದೊಟ್ಟು ಅಯಿಕ್ಕ್ ಸರಿಯಾಯಿ ತೆನಸಮಾಲಿಕೆಲಾ ಉಂಡು. ಪತ್ತನಾಜೆ ಪರ್ಬೊಲೆಗ್ ಗಿಡ್ಕ್ ಅಡೆತ್ತ್ ಬೆನ್ನಿ ಬೇಲೆದಂಚಿ ಮೋನೆ ಪಾಡ್ದ್ ಬೆನ್ನಿದ ಒಂಜಿ ಮೊಟ್ಟುದ ಬೇಲೆ ಮುಗಿತ್ ಸೌಕಸೊಡು ಕುಲ್ಲುನ ಪೊರ್ತು ಪಂಡ ಅವು ಆಟಿ ತಿಂಗೊಲು. ಬೇಲೆ ದಾಂತಿ ಪೊರ್ತು ತಿಂದಿ ತೆನಸ್ ಕರಪೆರೆಗ್ ಆವಂದೆ ಕಾಡ್ ಬೈಲ್ ಅಲೆವೊಂದು ಚೇವು, ತಜಂಕ್, ಕೇನೆ, ಕೆರೆಂಗ್, ನರೆ, ಈಯ್ಯೆರ್‌ದಂಚಿ ಕಾಡಸೊತ್ತುಲೆನ್ ಪಜಿಯೋ, ಅಡ್‌ದೋ ತಿಂದ್‌ದ್ ಬದ್ಕಿ ಪೆರಿಯತರೆಮುಂದೆಲ್ ಆಟಿ ಕರಿನಗ ಪರ್ಬೊಲೆ ಸಾಲ್‌ಗ್ ಅಡಿ ದೀಪಿ ಅಟ್ಟಣೆ ಮಲ್ತ್‌ದ್ ದೀತೆರ್. ಅವೆನ್ನ್ ನಮ್ಮ ಕಾಲೊದ ತರೆ ಮುಟ್ಟಲಾ ಒರಿತೊಂದು ಬೈದೆರ್.
*ಪರ್ಬೊಲೆ ಆನೆ ಬಾಕಿಲ್ ಆಟಿದ ಅಮಾಸೆ:*
ಆಟಿ ತಿಂಗೊಲುದ ಅಮಾಸೆ ತುಳುವೆರೆಗ್ ಪರ್ಬೊಲಾ ಅಂದ್. ಒಂಜಿ ಇಸೇಸೊ ದಿನೊಲಾ ಅಂದ್. ಆಟಿ ಅಮಾಸೆದ ದುಂಬುನಾನಿ ಪೊರ್ತು ಕಂತುನ ಪೊರ್ತುಗು ಇಲ್ಲದ ಯಜಮಾನಿ ಪಾಲೆದ ಮರತ ಮುದೆಲ್‌ಡ್ ಗುರ್ತೊದ ಬೊಲ್ಲುಕಲ್ಲ್ ದೀದ್, “ಎಲ್ಲೆ ನಿನ್ನ ಮರ್ದ್ ಕೊನೊಯೆರೆ ಬರ್ಪೆ. ನಿನ್ನ ಪೇರ್‌ಡ್ ಮರ್ದಾಯಿ ಮರ್ದ್ ದಿಂಜದ್ ದೀವೊನು” ಪಂದ್ ಕೈ ಮುಗಿದ್ ಬತ್ತ್‌ದ್, ಆಟಿ ಅಮಾಸೆದ ಪುಲ್ಯಕಾಂಡೆ ನೇಸರುದಿಪುಗು ದುಂಬು ಬೆತ್ತಲೆ ಪೋದು ಪಾಲೆದ ಮರತ ಮುದೆಲ್‌ಡ್ ದೀತಿ ಕಲ್ಲ್‌ಡ್ ಕೆತ್ತೆ ಗುದ್ದ್‌ದ್ ಕನತ್ ಬೊಳ್ಳುಳ್ಳಿ, ಜೀರಿಗೆ, ಎಡ್ಡೆಮುಂಚಿ ಪಾಡ್ದ್ ಕಡೆದ್ ಬೊಲ್ಲುಕಲ್ಲ್‌ದ ಒಗರ್ನೆ ಪಾಡ್ದ್, ಚೀಯೊತ ನೆಯಿ ಮೈತ್ ಬಜಿಬಂಜಿಗ್ ಪರ್ಂಡ ಒರ್ಸೊಗಾಪಿ ಮರ್ದ್ ಮೆಯಿ ಸೇರ್ಲೆಕ. ಅಯಿನ್ನ ಬೆರಿಕ್ ತಾರಾಯಿದನೋ, ಮೆತ್ತೆದನೋ, ಕೊತ್ತಂಬರಿದನೋ ಗಂಜಿ ಉಂಡ್‌ದ್, ಬಯ್ಯಡ್ ಗುಳಿಗಗ್ ಕೋರಿ ಕೊಯ್ಪುನ, ಕುಲೆಕ್ಲೆಗ್ ಬಳಸುನ ಕ್ರಮಲಾ ತುಳುನಾಡೊರ್ಮೆ ನಡಪುಂಡು. ಪರಪಿ ನೀರ್‌ಡ್ ಕೊಡಿ ಇರೆಟ್ ದಾಸನ್ ಪೂ, ಧಾನ್ಯೊ ದೀದ್ ದಾನೊ ಬುಡ್ದ್, ಕಡಲ್ ಮೀಪುನ, ಸೀರ್ತೊ ಮೀಪುನ ಕಟ್ಟ್‌ಲಾ ಅವುಲವುಲು ಉಂಡು.
ಆಟಿ ಅಮಾಸೆ ಕರಿಂಡ ಪರ್ಬೊಲು ಸುರು ಆಂಡ್ ಪಂದೇ ಅರ್ಥ. ಆಟಿ ಅಮಾಸೆ ಕರಿದ್ ಐನೆನಾನಿ ನಾಗರಪಂಚಮಿದ ಗೌಜಿ. ಊರುದ ನಾಗಗ್, ಕುಟುಮೊದ ನಾಗಗ್, ಜಾಗೆದ ನಾಗಗ್, ಬನೊತ್ತ ನಾಗಗ್ ಪೇರ್ ಮೈತ್ ಪುಡ್ಡಿದ್, ಸುಗಿತ್, ಮದಿಪು ಸಂದದ್, ಪೇರ್ ಮಂಜಾಲ್ ಸ್ವೀಕಾರ ಮಲ್ಪುನ ತುಳುವೆರೆಗ್ ಆನಿ ಇಲ್ಲಿಲ್ಲಡ್ ಬೆಲ್ಲ ತಾರಾಯಿ ಪಾಡಿ ಮಂಜೊಲ್ದಿರೆತ್ತ ಗಟ್ಟಿ ಇಪ್ಪೊಡೇ. ಮಂಜಲ್ ಶೀತಗ್ ಬೆಪ್ಪು ಕೊರ್‌ದ್ ಬರ್ಸೊಡು ಬರ್ಪಿ ಸೀಕ್‌ಲೆಗ್ ಪಡಿ ಪಾಡುಂಡು. ಒಗ್ಗರಣೆದಟ್ಟಿಲ್, ಜಿಡ್ಡ್‌ದಂಶ, ಎಣ್ಣೆದ ಪಸೆಕ್ ನಾಗನಪಂಚೆಮಿದಾನಿ ಉಲಯಿ ಪೊಗ್ಗೆರೆಗಿಜ್ಜಿ.
*ಪರ್ಬೊಲೆ ತಿಂಗೊಲು ಸೋಣೊ:*
ನಾಗರ ಪಂಚೆಮಿ ಕರಿದ್ ಸೋಣೊ ಸಂಕ್ರಾಂತಿ ಬತ್ತ್ಂಡ ಸುರುವಾಪುಂಡು ಪರ್ಬೊಲೆನ ದಿಬ್ಬನೊ. ವಾಮನ ದೇವೆರೆಗ್ ಮೂಜಿನೆ ಪಾದೊ ಊರ್ಯರ ತರೆ ಕೊರಿ ಬಲಿಯೇಂದ್ರೆ ಅಪ್ಪೆನ್ ಕಡಪುಡ್ದ್ ತುಳು ಜನೊಕ್ಲೆ ಐಸಿರ ಕೇಂದ್ ಪಿನ್ಪೆ ಪನ್ಪಿ ನಂಬೊಲಿಗೆ ಇಪ್ಪುನ್ ತುಳುವೆರ್ ತಿಂಗೊಲಿಡೀ ಸೇಡಿಡ್ ತಡ್ಯ ಗೆರೆ ಬರೆದ್, ಚೂಡಿ ಪೂ, ಪೆರದನೆ ಪೂ, ಕುಡುತ್ತ ಪೂ ಸೇರಿನಂಚ ಬಗೆಬಗೆತ ಪೂ ಪಾಡ್ದ್ ಕೈ ಮುಗಿದ್, ಚಿತ್ರವಲ್ಲಿದ ದೈ ಪೂ ಇರಿದಯಿತ್ತ ಮೈಟ್ ಬೊಟ್ಟು ಪಾಡುನ ಕ್ರಮ ತುಳುವೆರೆಡ ಉಂಡು. ಉಂದು ಸೋಣೊ ತಿಂಗೊಲು ಇಡೀ ನಡಪುನ ಆಚರಣೆ ಆಂಡಲಾ ಇತ್ತೆ ತೂಯೆರೆ ಅಪ್ರೂಪೊ. ತಡ್ಯದಜ್ಜಿನ್ ಗಿಡರುನ ಕ್ರಮಲಾ ಕೆಲವು ಕೋಡಿ ನಡಪುಂಡುಗೆ.
ಸೋಣೊದ ಅಮಾಸೆಗ್ ತೀರ್ತೊದ ಅಮಾಸೆ ಪಂದೇ ಪನ್ಪೆರ್. ಆನಿ ಕಡಲ್ ಮೀಪುನು, ತೀರ್ತೊದ ಗುಂಡಿ, ಸೀರ್ತೊದ ಕೆರೆಕ್ಲೆಡ್ ಮೀದ್ ದೇವಸ್ಥಾನಲೆಗ್ ಪುಡ್ಯೆ ಪಾಡುನ ಕ್ರಮಲಾ ಅವುಲವುಲು ಉಂಡು. ಸೋನೊ ಸನಿಯಾರ ಉನ್ಪುನ ಕ್ರಮಲಾ ತುಳುವೆರೆಡ ಉಂಡು. ಸನಿವಾರ ಋತೊ ಪತ್ತ್‌ದ್ ದೇವಲ್ಯೊಗು ಪೋದು ಒಪ್ಪೊತ್ತು ಒನಸ್ ರಾತ್ರೆ ಪಲಾರ ಮಲ್ಪುನ ಕೆರಮ್ಮೊದ ಆಚರಿಪುಲಾ, ಅಯಿನ್ನ ಒಟ್ಟುಗು ಇಂಚಿಪ ವರಲಕ್ಷ್ಮೀ ಪೂಜೆ, ಋತೊಕುಲುಲಾ ಅವುಲವುಲು ನೆಗಪುಂಡು.
ಕಡಲಪ್ಪೆನ್ ನಂಬ್‌ದ್ ಬದ್ಕ್ ಕಟ್ಟೊನ್ನ ಮರಕಲ ಜನಾಂಗದಕ್ಲ್ ಸೋಣೊಡು ಕಡಲ್‌ಗ್ ಪೇರ್ ಮೈತ್ ತನ್ಕುಲೆ ಬದ್ಕ್‌ದ ಪಡಿ ಕಟ್ಟುನ ಓಡೊನು ಕಡಲ್‌ಗ್ ಜಪ್ಪಪೆರ್. ಆಟಿದ ಬೊಲ್ಲೊಗು ಕಡಲ್‌ಡ್ದ್ ದೂರೊ ಉಂತಿ ಕಡಲ ಜೋಕ್ಲು ಸೋಣೊಡು ಪಿರ ಆಲೆನ್ ಸುಗಿತ್ ಕಡಲ್‌ಗ್ ಮೋನೆ ಪಾಡ್ಪೆರ್. ಆ ಅಪ್ಪೆಲಾ ತನ್ನ ಉಗ್ರತೆ ಬರಿಕ್ ದೀದ್ ಶಾಂತರೂಪಿಣಿಯಾದ್ ತನ್ನ ಜೋಕ್ಲೆನ್ ಎದ್ಕೊಂದು ಅಕ್ಲೆನ ಓಡೊ ದಿಂಜದ್ ಕಡಪುಡ್ವಲ್.
ನಾಗರಪಂಚಮಿ ಕರಿದ್ ಪದಿನೆಣ್ಮೊ ದಿನೊಕ್ಕು ಬರ್ಪಿ ಪರ್ಬ ಅಷ್ಟೆಮಿ. ಶ್ರೀ ಕೃಷ್ಣ ದೇವೆರ್ ಪುಟ್ಟಿ ಪರ್ಬೊ ಪನ್ಪಿ ನಿಲೆಟ್ ಆಚರಿಪಿ ಪರ್ಬ ಅಷ್ಟೆಮಿ. ಈ ದಿನೊ ಕೆಲವೆರ್ ಋತೊ ಮಲ್ಪುನು, ಉಪಾಸ ಮಲ್ಪುನು ಮಲ್ಪುವೆರ್. ಇಡೀ ದಿನ ಮುಸುಲುಡ್ಕೆ, ತಾರಾಯಿ ಕುಟ್ಟುನಂಚಿನ ಗೊಬ್ಬುಲೆನ ಒಟ್ಟುಗು ಜೋಕ್ಲೆಗ್ ರಾಧಾಕೃಷ್ಣವೇಷದ ಪಂತಲುಲಾ ಅವುಲವುಲು ನಡಪುಂಡು. ಋತೊ ಪತ್ತಿನಕ್ಲ್ ರಾತ್ರೆ ಚಂದ್ರೆ ಉದಿತಿ ಬೊಕ್ಕ ಕೃಷ್ಣಗ್ ಪೇರ್ ಮೈತ್ ಉರ್ದು ದೋಸೆ ಬಲಸ್‌ದ್ ಕೈ ಮುಗಿದ್ ಋತೊ ಬುಡ್ಪೆರ್.
ಅಷ್ಟೆಮಿ ಪಂಡ ಮೂಡೆ ಬೋಡೇ ಬೋಡು. ಬಾರೆದ ಇರೆಟ್ ಮಲ್ತಿ ಕೊಟ್ಟಿಗೆ, ಕೇದಯಿದ ಇರೆ ಎಟ್ಟ್‌ದ್ ಮಲ್ತಿ ಮೂಡೆ, ಪೆಲತ್ತ ಇರೆಟ್ ಮಲ್ತಿ ಗುಂಡೊ, ಗೋಲಿದ ಇರೆತ್ತ ಕಡುಂಬು, ಚಿಲ್ಮೆತಡ್ಯೆ ಪಂದ್ ಬಗೆ ಬಗೆತ ಅಡ್ಯೆ ಮಲ್ಪುವೆರ್. ಅಷ್ಟೆಮಿಗ್ ಮಲ್ತಿ ಮೂಡೆ ಅಟ್ಟೊ ಏರ್ದ್ ಕುಲ್ಲ್ಂಡ ಚೌತಿ ಮುಟ್ಟ ಗಡ್ದ್ ಗಮ್ಮತ್ತ್.
ಅಷ್ಟೆಮಿದ ಮನದಾನಿ ನವಮಿ. ಆಂಡ ಕುಡ್ಲದಾ ಮರ್ಗಿಲ್‌ಲೆಡ್ ದ್ವಾದಶಿ. ಅಷ್ಟೆಮಿಗ್ ಚೇವುದ ದಂಡ್, ಪದ್ಪೆ ಪಾಡಿ ಬಗೆ ಬಗೆ ತರಕಾರಿದ ಒನಸ್ ಆಂಡ, ಮನದಾನಿ ದ್ವಾದಶಿಗ್ ಕೋರಿ, ಮೀನ್, ಮಾಸೊದ ತಮ್ಮನ. ಅಲ್ಪಲ್ಪ ಮುಸುಲುಡ್ಕೆ, ಕರ ದರಿಪುನ ಪಂತೊಲು. ಸಾಂಸ್ಕೃತಿಕ ಲೇಸ್‌ಲ್ ನಡಪುಂಡು.
ಕುಡ್ಲದ ಕತೆ ಒಂಜಾಂಡ ಒಡಿಪುದ ಕತೆ ಬೇತೆನೇ. ತುಳುನಾಡ್ ಅತಂಡ ಕರ್ನಾಟಕಡ್ ಬಾರೀ ಪುದರ್ ಪಡೆಯಿ ಕೃಷ್ಣೆ ಪಂಡ ಅವು ಒಡಿಪು ಕೃಷ್ಣೆ. ಕನಕದಾಸೆರೆಗ್ ಮೋನೆ ತೋಜಾಯೆರೆ ತಿರ್ಗ್‌ದ್ ಉಂತಿ ಭಗವಂತೆ ಒಡಿಪುದುಲ್ಲಾಯೆ. ಆಯನ ಅಬ್ಬರದ ಜಾತ್ರೆ ಪಂಡ ಅವು ಅಷ್ಟೆಮಿ. ಅಷ್ಟೆಮಿದ ತೇರ್, ಪೂಜೆಲ್ ಆಯಿ ಬೆರಿಕ್ ವಿಟ್ಲಪಿಂಡಿ ಪನ್ಪಿ ಗೌಜಿದ ಲೇಸ್. ಧಾರ್ಮಿಕ, ಸಾಂಸ್ಕೃತಿಕ, ಸಾಮಾಜಿಕ ಸೇರಿನಂಚ ಬಗೆಬಗೆತ ಗೊಬ್ಬುಲು ವಾರಗಟ್ಲೆ ಅವುಲು ನಡಪುಂಡು.
ಅಷ್ಟೆಮಿದ ಬೆರಿಕ್ ಬರ್ಪುನ್ನೇ ಚೌತಿ. ಅಷ್ಟೆಮಿ ಕರಿದ್ ಪದ್ರಾಡ್ ದಿನೊಕು ಈಸರ ದೇಬೆರೆ ಮಗೆ ಬಾಮಾಕುಮಾರನ ಸುಗಿಪು ಮದಿಪುದ ಪರ್ಬ ಚೌತಿ. ಚೌತಿದ ದುಂಬುನಾನಿ ಗಣಪತಿನ ಅಪ್ಪೆ ಬತ್ತ್ ಪೂಜೆ ಪಡೆಪಲ್ ಪಂದ್ ಗೌರಿ ಪರ್ಬ ಮಲ್ಪುವೆರ್. ಪೊಣ್ಣು ಜೋಕುಲು, ಪೊಂಜೋವುಲು ಕೈ ನಿಲಿಕೆ ಕಪ್ಪು ಕಾಜಿ ದೀದ್ ಗೌರಿ ಪೂಜೆ ಮಲ್ತುಂಡ ಆನ್ ಅಂಜೋವುಲು ಮನದಾನಿ ಗಣಪತಿನ ಪೂಜೆದ ಅಟ್ಟಣೆ ಮಲ್ಪುವೆರ್. ಕರ್ಂಬು, ಕಜ್ಜಾಯೊ, ಉಂಡ್ಲುಂಗ, ತೆಲ್ಲಾವು, ಕಡುಂಬು, ಮೋದಕ ಗಣಪತಿಗ್ ಮೋಕೆದ ತೆನಸ್‌ಲ್. ದುಂಬು ಸೇರ್ ಅರಿ, ಮುಗುಡುಲ್ಲ ತಾರಾಯಿ, ಪಂಚೋಲಿ ಬಚ್ಚಿರೆ, ಒಂಟಿಕಣ್ಣ ಬಜ್ಜೆಯಿ, ಕೆಂಪು ದಾಸಾನ್ ಪೂಟು ಸುತ್ಯೆ ದೀದ್, ಕರ್ಂಬು, ಪೂ ಬಿತ್ತ್, ಸೇಮಂತಿಗೆ, ಕಾಲ್ ದೀಪೊ, ಚಪ್ಪೆ ತೆಲ್ಲಾವು, ಬಗೆಬಗೆ ತೆನಸ್ ಬಲಸ್‌ದ್ ಇನಕೆ ದೀದ್ ನಂಬೊಂದು ಇತ್ತಿ ಗಣಪತಿಗ್ ಇನಿ ಮೂರ್ತಿ ದೀದ್ ಸಾರ್ವಜನಿಕ ಪೂಜೆ. ಮೂಜಿಯೋ, ಏಳೋ, ಒರ್ಂಬೊನೋ ದಿನೊ ತರೊ ತರೊಟು ಪೂಜೆ ಮಲ್ತ್ ಗಡ್ದ್ ಗೌಜಿದ ಮೆರೋನಿಗೆ ಮಲ್ತ್ ಪಾಪೆನ್ ನೀರ್‌ಡ್ ಮುರ್ಕಯಿನಾಡೆ ಚೌತಿ ಮುಗಿದಾಂಡ್.
ಚೌತಿದಾನಿ ಕೆಲವು ಕೋಡಿ ಕುರಲ್ ಕಟ್ಟುನ ಕ್ರಮೊಲಾ ಪುದ್ವಾರ್ ಉನ್ಪಿನವುಲಾ ಉಂಡು. ಚೌತಿಡ್ದ್ ಬೊಕ್ಕ ಕಾವೇರಿ ಸಂಕ್ರಾಂತಿಯಾ ತುಡರ್ ಪರ್ಬೊ ಮುಟ್ಟನಾ ಒಂಜೊಂಜಿ ಕೋಡಿ ಒಂಜೊಂಜಿ ರೀತಿ ಕುರಲ್ ಕಟ್ಟುನ ಪುದ್ವಾರ್ ಉನ್ಪುನ ಆಚರಣೆ ಮಲ್ಪುವೆರ್. ಪುರು ಬಾಲೆಗ್ ಪೊಸ ಅರಿತ ನುಪ್ಪು ಕೊರ್ಪುನ, ಪೊಸ ಮದ್ಮಯ ಮದ್ಮಲೆಗ್ ಪುದ್ವಾರ್ ಉನ್ಪವುನ, ದೈವೊಲೆಗ್ ಪುದ್ವಾರ್ ಬಲಸುನವು, ದೇವೆರೆಗ್ ಪೊಸ ಅರಿತ ಬಜಿಲ್ ಅಲಪ್ಪುನ ಕುಟುಮೊದ ಇಲ್ಲಡ್, ಗುತ್ತು, ಬಾರಿಕೆ, ತರವಾಡ್, ದೈವೊ ಸಾನೊ, ದೇವಾಲ್ಯೊಲೆಡ್ ನಡಪುಂಡು.
ದಿನ ದಿನ ಪರ್ಬೊದ ಗೌಜಿ ಮುಗಿತ್ ಕಂಡೊದ ಬೆನ್ನಿದ ಮರ್ಗಿಲ್ ಮೋನೆ ಪಾಡುನ ತುಳುಜನಕ್ ಬೊಕ್ಕಲಾ ಪರ್ಬೊಲೆಗ್ ದಾಲಾ ಕಮ್ಮಿ ಇಜ್ಜಿ. ಮಾರ್ನೆಮಿ, ಕಾಯೇರಿ ಸಂಕ್ರಾಂತಿ, ತುಡರ ಪರ್ಬೊಲು ಸಾಲಾದ್ ಉಂತ್‌ದಿಪ್ಪುವೊ. ಪ್ರತಿ ಆಚರಣೆದ ಪಿರವು ಆರೋಗ್ಯ ಕಾತೊನುನ ಆಲೋಚನೆ, ಬದ್ಕ್ ಬಂಗಾರಾದ್, ಬಾಲೆಲ್ ಸಿಂಗಾರಾದ್ ಬೆಳಗುನ ಎಡ್ಡೆ ಮದಿಪು ದಿಂಜಿದ್ ಇಪ್ಪುನವು ನೆಗತ್ತ್ ತೋಜುಂಡು. ಆಂಡ ಇನಿ ಪಾಶ್ಚಾತ್ಯ ಅನುಕರಣೆ, ಅನುಸರಣೆಡ್ ನಮ್ಮತನ ಮಾಜೊಂದು, ಆಜೊಂದು ಒಟ್ಟುಗು ಬದ್ಕ್ ಬರಪತ್ತ್, ಲೋಕೊನು ಪೊದಿ ಮಾರಿಸೀಕ್ ತುಳುವ ನೆಲನ್ ಜೋರುಡು ಗದ್ದವುನಾಡೆ ಮುಟ್ಟ ಎತ್ತೀಂಡ್ ಪಂಡ ನಮ ಪೆರಿಯಕ್ಲ್ ಮಲ್ತಿ ರಾಜಬೀದಿ ಬುಡ್ದ್ ಒವ್ವೋ ಕಾಡ ಸಾದಿ ಪತ್ತ್‌ದ ಪನ್ಪಿನವು ಸೊಸ್ಟವಾದ್ ಗ್ರೇಯಿಪೊಲಿ. ಅಕ್ಲೆನ ಮದಿಪುಡು ನಮ್ಮ ಬದ್ಕ ಉದಿಪು ಉಂಡು ಪಂದ್ ಮದತಿನವೇ ನಮ್ಮ ಬದ್ಕ್‌ಗ್ ಉದಲ್ ಪತ್ತದ್ಂಡ್ ಪನ್ಪಿನವೇ ಸತ್ಯ. ನನ ಆಂಡಲಾ ಪೆರಿಯಕ್ಲೆ ಪಜ್ಜೆ ನಮಕ್ ತಾದಿ ತುಡರಾದ್ ದುಂಬು ಕೊನೊವಡ್.
-ಶ್ರೀಶಾ ವಾಸವಿ ತುಳುನಾಡ್
by 