ದೀಪೊಲಿ ತಿಂಗೊಲ್ಡ್ ಬರ್ಪುನ ಪರ್ಬನೇ ತುಡರ ಪರ್ಬ.ತುಳುನಾಡುಡ್ ತುಡರ ಪರ್ಬೊಗ್ ತನ್ನನೇ ಆಯಿನ ವಿಶೇಷತೆ ಉಂಡು.ಸುರುತ್ತ ದಿನತ್ತಾನಿ ತುಳುನಾಡುಡ್ “ತೈತಿನಕಲೆ ಪರ್ಬ” ಆಚರಣೆ ಮಲ್ಪುವೆರ್.ತುಳುನಾಡುಡ್ ತೀರುಪೋಯಿನಕುಲು ಇಲ್ಲು ಬುಡ್ದ್ ಪೋಪುಜೆರ್ ಪನ್ಪಿನ ನಂಬೊಲುಗೆ ಉಂಡು.ಅಂಚಾದ್ ತೀರುಪೋಯಿನ ಪೆರಿಯಕ್ಲೆನ ನೆಂಪುಗಾದ್ ತೈತಿನಕಲೆ ಪರ್ಬ ಮಲ್ಪುವೆರ್.
ಇಲ್ಲಡ್ ಇತ್ತಿನಕುಲೆಗ್ ಎಂಚ ಪೊಸ ಕುಂಟು,ಸೀರೆ ದೆತೊನುವೆರಾ ಅಂಚೆನೇ ತೈತಿನಕ್ಲೆಗ್ಲಾ ಪೊಂಜೊವುನಕ್ಲೆಗ್ ಪೊಸ ಸೀರೆ,ಆಂಜೊವುನಕ್ಲೆಗ್ ಲುಂಗಿ,ಅಂಗಿ ದೆತೊಂದ್ ತೈತಿನಕಲ್ನ ಪರ್ಬದಾನಿ ದೀಪಿನ ಕ್ರಮ ಉಂಡು.ಅಂಚೆನೇ ವನಸ್ ಗ್ ಲಾ ಮೀನುದ ಕಜಿಪು,ಕರುಕುಂಬುಡದ ಕಜಿಪು,ಮಂಜೊಲ್ದ ಇರೆತ್ತ ಗಟ್ಟಿ ಮಲ್ತುದ್ ಆನಿ ಬಲಸುದೀಪಿನ ಕ್ರಮಲಾ ಉಂಡು.ಇತ್ತೆ ಬದಲಾತಿನ ಕಾಲಘಟ್ಟೊಡ್ ಅವ್ವೆನ್ ಮಾತಾ ನಂಬುನಕುಲು ಇಜ್ಜೆರುಡಲಾ ಹೆಚ್ಚಿನ ಕಡೆಟ್ ಈ ಆಚರಣೆನ್ ಸಾಂಪ್ರದಾಯಿಕ ವಾದ್ ಮಲ್ತೊಂದುಲ್ಲೆರ್.
ಬೈಯದ ವನಸುಗ್ ಮೀನುದ ಕಜಿಪು,ಮಂಜೊಲ್ದ ಇರೆತ್ತ ಗಟ್ಟಿ,ಕುಂಬುಡದ ಕಜಿಪು ಮಲ್ತುದ್ ಮಿಸೆಲ್ (ಅಗೆಲ್) ಬಲಸುವೆರ್.ಒಟ್ಟುಡ್ ಪೊಸ ಸೀರೆ,ಪೊಸ ಲುಂಗಿ ಕುಂಟು ಮಾತಾ ದೀಪೆರ್.ವನಸ್ ಆಯಿ ಬೊಕ್ಕ ದುಂಬುದಕ್ಲೆಗ್ ಬಚ್ಚಿರೆ ಪೂಲು ತಿನ್ಪುನ ಕ್ರಮ ಇತ್ತಿನೆಡ್ದಾವರ ಬಲಸಿನ ಇರೆತ್ತ ಎದುರುಡ್ ಬಚ್ಚಿರೆ ಪೂಲು ದೀಪೆರ್.ಬಲಸುದ್ ಆಯಿಬೊಕ್ಕ ಇಲ್ಲದ ಹಿರಿಯೆರ್ ಬೊಕ್ಕ ಜೋಕುಲು ಸೇರ್ದ್ ತೀರುಪೋಯಿನ ಹಿರಿಯೆರೆಗ್ ಭಕ್ತಿಡ್ ಕೈ ಮುಗ್ಗಿದ್ ಆಶೀರ್ವಾದ ನಟ್ಟುವೆರ್.ಕೈ ಮುಗ್ಗಿದ್ ಪಿದಾಯಿ ಬರ್ಪೆರ್.ಅದಗ ತೀರುಪೋಯಿನ ಕುಲೆಕುಲು ಬತ್ತುದ್ ವನಸ್ ಮಲ್ತುದ್ ಪೋಪೆರ್ ಪನ್ಪಿನ ನಂಬಿಕೆ ಉಂಡು.
ಆನಿ ಮಲ್ತಿನ ಮಂಜೊಲ್ದ ಇರೆತ್ತ ಗಟ್ಟಿ ನಮ್ಮ ಆರೋಗ್ಯದ ದಿಟ್ಟಿಡ್ ಬಾರೀ ಎಡ್ಡೆ ಪನ್ಪಿನವ್ವೆನ್ ವೈಜ್ಞಾನಿಕವಾದುಲಾ ತೆರಿದು ಬೈದುಂಡ್.ಒಟ್ಟಾರೆ ಪನೊಡಾಂಡ ನಮ್ಮ‌ತುಳುನಾಡುದ ಆಚರಣೆಲೆಡ್ ಪ್ರಕ್ರತಿಡ್ ಬುಲೆಯುನ ತೆನಸುಲೆನ್ ಒಂಜತ್ತ್ ಒಂಜಿ ಪರ್ಬೊಲೆಡ್ ಗಳಸುದ್ ಆರೋಗ್ಯ ಕಾಪುನಂಚಿನ ಬೇಲೆನ್ ನಮ್ಮ ಹಿರಿಯೆರ್ ಮಲ್ತೊಂದಿತ್ತೆರ್.ಆಂಡ ಇತ್ತೆದ ಆಧುನಿಕತೆಡಾದ್ ನಮ ತಿನ್ಪುನ ಆಹಾರನೇ ನಮ್ಮ ಜೀವೊಗ್ ವಿಷ ಆತುಂಡ್.ಅಂಚಾದ್ ನಮ ಹಿರಿಯಕುಲು ಮಲ್ತೊಂದಿತ್ತಿನ ಆಚರಣೆದ ಪಿರಾವುಡಿತ್ತಿನ ಗುಟ್ಟುನ್ ತೆರಿದ್ ನಮ್ಮ ಬದುಕುಡ್ ಅವ್ವೆನ್ ಗಲಸೊನೊಂದ್ ದುಂಬುದ ಪೀಳಿಗೆಗ್ ಬರ್ಪಿನ ಗಂಡಾಂತೊರೆಲೆನ್ ತಪ್ಪಾವುನ ಬೇಲೆ ಮಲ್ಪುಗ..
by 