ಎಬಿವಿಪಿಡ್ದ್ ಸರ್ಕಾರಿ ಪಾಲಿಟೆಕ್ನಿಕ್ ಬಸ್ ಸಮಸ್ಯೆ ಪರಿಹಾರ ಮಲ್ಪೊಡುಂದ್ ಮನವಿ..

ಅಖಿಲ ಭಾರತೀಯ ವಿದ್ಯಾರ್ಥಿ ಪರಿಷತ್ ಉಡುಪಿ ವತಿಡ್ದ್ ಸರ್ಕಾರಿ ಪಾಲಿಟೆಕ್ನಿಕ್ ವಿದ್ಯಾರ್ಥಿಲು ಕಾಲೇಜಿಗ್ ಪೋವರೆಗುಪ್ಪುನ ಬಸ್ ಸಮಸ್ಯೆನ್ ಪರಿಹಾರ ಮಲ್ಪೊಡ್ ಪಂಡುದ್ ಅಪರ ಜಿಲ್ಲಾಧಿಕಾರಿ ಮಮತಾ ದೇವಿ ಮೆರೆಡ ಸಂಬಂಧಪಟ್ಟಿನ ಅಧಿಕಾರಿಲೆಡ ಮನವಿ ಕೊರಿಯೆರ್.

ಮಣಿಪಾಲ ಅನಂತನಗರೆಡುಪ್ಪುನ ಸರಕಾರಿ ಪಾಲಿಟೆಕ್ನಿಕ್ ಕಾಲೇಜಿಡ್ ಸುಮಾರು 400ಕುಲಾ ಜಾಸ್ತಿ ವಿದ್ಯಾರ್ಥಿಲು ಕಲ್ತೊಂದಿತ್ತುದ್ ಹೆಚ್ಚಿನ ವಿದ್ಯಾರ್ಥಿಲು ಬಡ ಕುಟುಂಬಡ್ದ್ ಬೈದೆರ್. ಈ ಕಾಲೇಜಿಗ್ ಪೋವರೆಗ್ ನೇರವಾದ್ ಒವ್ವೇ ಬಸ್ ವ್ಯವಸ್ಥೆ ಇಜ್ಜಿ. ಪ್ರತಿದಿನ ದೂರಡ್ದ್ ಬರ್ಪಿನ ವಿದ್ಯಾರ್ಥಿಲು ರಾಷ್ಟ್ರೀಯ ಮುಖ್ಯ ರಸ್ತೆಡ್ದ್ ಬಸ್ ಡ್ ಜತ್ತುದ್ ಸುಮಾರು 2 ಕಿಲೋಮೀಟರ್ ನಡತೊಂದ್ ಪೋವೊಡಾಪುಂಡ್.. ಅಂಚಾದ್ ಜಿಲ್ಲೆದ ಬೇತೆ ಬೇತೆ ಭಾಗೊಲೆಡ್ದ್ ಬರ್ಪಿನ ವಿದ್ಯಾರ್ಥಿಲೆಗ್ ಸರಿಯಾಯಿನ ಪೊರ್ತುಗ್ ಕ್ಲಾಸ್ ಗ್ ಪೋವರೆಗ್ ಕಷ್ಟ ಆವೊಂದುಂಡ್..

ಈ ಬಗೆಟ್ ಮಾನ್ಯ ಅಪರ ಜಿಲ್ಲಾಧಿಕಾರಿ ಮಮತಾ ದೇವಿ ಜಿಎಸ್ ಅರೆನ ಮೂಲಕ ರಾಜ್ಯ ಸಾರಿಗೆ ಸಚಿವೆರು ಬೊಕ್ಕ ಮಂಗಳೂರು ವಿಭಾಗ ಡಿಪೋ ಡಿಸಿ ಗ್ ಮನವಿನ್ ಕೊರಿಯೆರ್.

ಕಾಲೇಜಿಗ್ ಮುಖ್ಯ ರಸ್ತೆಡ್ದ್ 9:30 ಗ್ ಮುಟ್ಟುಲೆಕ್ಕ ಬೊಕ್ಕ ಕಾಲೇಜಿಡ್ದ್ ಮುಖ್ಯರಸ್ತೆಗ್ 1:30 ಬೊಕ್ಕ 4:30 ಕ್ ಪಿದಾಡುನಂಚ ಬಸ್ ವ್ಯವಸ್ಥೆ ಕಲ್ಪಿಸಾದ್ ಕೊರ್ರೆಗ್ ಮನವಿ ಕೊರಿಯೆರ್.

ಈ ಪೊರ್ತುಡ್ ನಗರ ಕಾರ್ಯದರ್ಶಿ ಶ್ರೀವತ್ಸ ಡಿ ಗಾಂವ್ಸ್‌ಕರ್ ಸಹ ಕಾರ್ಯದರ್ಶಿ ಭಾವನಾ ಪ್ರಮುಖೆರಾಯಿನ ಶಿಶಿರ್,ಅನೀಶ್, ಪ್ರಸನ್ನ, ಆಕಾಶ್ ಇತ್ತೆರು.