ನಿಟ್ಟೆಯ ವಿದ್ಯಾ ಸಂಸ್ಥೆಡ್ ತನ್ನ 2ನೇ ವರ್ಷದ ಬಿಎಸ್ಸಿ ಪದವಿಡ್ ಕಲ್ತೊಂದಿತ್ತಿನ ವಿದ್ಯಾರ್ಥಿ ಜನಿತ್ ಶೆಟ್ಟಿ ಮೇರು 21-08-2024 ದಾನಿ ಕಾಂಡೆ ಸಾರ್ವಜನಿಕ ಬಸ್ ಮುಖಾಂತರ ಕಾಲೇಜಿಗ್ ಬರ್ಪಿನ ಸಂದರ್ಭಡ್ ಬೇತೆ ಒವ್ವೇ ಆಯ್ಕೆಯಿಪ್ಪಂದೆ ಬಸ್ಸುದ ಫ್ಯೂಟ್ಬೋರ್ಡ್ ಡ್ ಉಂತೊಂದ್ ಪೋವನಗ ಕೈ ಜಾರ್ದ್ ಬೂರದ್ ಅವ್ವೇ ಬಸ್ಸುದ ಟಯರುಗ್ ಸಿಕ್ಕುದ್ ದುರ್ಮರಣ ಪಡೆದ್ ಸುಮಾರು ಒಂಜಿ ತಿಂಗೊಳು ಕರಿದುಂಡ್..
ಈ ಘಟನೆ ನಡತಿನ ತಕ್ಷಣನೇ ಎಬಿವಿಪಿ ಘಟನೆನ್ ಖಂಡಿಸಾದ್ ಈ ಮಾರ್ಗವಾದ್ ಹೆಚ್ಚುವರಿ ಬಸ್ ವ್ಯವಸ್ಥೆ ಕಲ್ಪಿಸಾವುನ ಬಗೆಟ್ ಸ್ಥಳೀಯಾಡಳಿತಗ್ ಆಗ್ರಹ ಮಲ್ದಿತ್ತುಂಡ್.. ಬೊಕ್ಕ ಎಬಿವಿಪಿ ನಿಯೋಗ ಉಡುಪಿ ಜಿಲ್ಲಾಧಿಕಾರಿ, ಪೊಲೀಸ್ ಅಧೀಕ್ಷಕೆರು, ಕೆಎಸ್ಆರ್ಟಿಸಿ ಮಂಗಳೂರು ವಿಭಾಗೀಯ ನಿರ್ವಹಣಾಧಿಕಾರಿ ಬೊಕ್ಕ ಆರ್.ಟಿ.ಓ ಜಿಲ್ಲಾ ಅಧಿಕಾರಿನ್ ಭೇಟಿ ಮಲ್ತುದ್ ಸಮಸ್ಯೆನ್ ಬಗೆಹರಿಸಾವರೆಗ್ ಚರ್ಚೆ ಮಲ್ತುದ್ ಕಾರ್ಕಳ ತಹಶೀಲ್ದಾರೆಡ ಈ ಬಗೆಟ್ ಒಂಜಿ ಸಮನ್ವಯ ಸಭೆನ್ ನಡಪಾವರೆಗ್ ಆಗ್ರಹ ಮಲ್ದಿತ್ತುಂಡ್.
ಇನಿ 18-09-2024 ಗ್ ಕಾರ್ಕಳ ತಾಲೂಕು ಕಚೇರಿಡ್ ಈ ಸಭೆ ನಡತುಂಡ್. ಕಾರ್ಕಳ ತಹಶೀಲ್ದಾರೆರು, ತಾಲೂಕು ಪಂಚಾಯತ್ ಸದಸ್ಯೆರು, ಸಿಸಿಟಿ ಉಪಾಧ್ಯಕ್ಷೆರು, ವಿಶಾಲ್ ಮೋಟಾರ್ಸ್, ದುರ್ಗಾ ಮೋಟಾರ್ಸ್, ಶ್ರೀದೇವಿ, ರಶ್ಮಿ, ನವೀನ್ ಸೇರಿನಂಚ ಬಸ್ ಮಾಲೀಕೆರು, ಕೆಎಸ್ಆರ್ಟಿಸಿ ಮಂಗಳೂರು ವಿಭಾಗೀಯ ನಿರ್ವಹಣಾಧಿಕಾರಿ, ನಿಟ್ಟೆ ಕಾಲೇಜು ಆಡಳಿತ ಮಂಡಳಿ, ಆರ್.ಟಿ.ಓ ಅಧಿಕಾರಿ, ಪೊಲೀಸ್ ಉಪಾಧಿಕ್ಷಕೆರು ಬೊಕ್ಕ ನಿರೀಕ್ಷಕೆರು ಉಪಸ್ಥಿತರಿತ್ತೆರು.
ಎಬಿವಿಪಿ ಮಂಗಳೂರು ವಿಭಾಗ ಸಂಚಾಲಕೆರಾಯಿನ ಗಣೇಶ್ ಪೂಜಾರಿ ಸಭೆಟ್ ಪ್ರತಿನಿಧಿಸಾದ್ ಉಡುಪಿ ಕಾರ್ಕಳ ಮಂಗಳೂರುಡ್ದ್ ನಿಟ್ಟೆಗ್ ಸಂಪರ್ಕ ಮಲ್ಪುನ ಮಾರ್ಗಡ್ ಕೆಎಸ್ಆರ್ಟಿಸಿ ಬಸ್ ಸಂಚಾರ ಮಲ್ಪೊಡ್ ಪಂಡುದು ಬೇಡಿಕೆನ್ ದೀಯೆರು ಅಯಿಕ್ ಮನ್ನಣೆಲಾ ಸಿಕ್ಕುಂಡ್.. ಬೊಕ್ಕ ಪ್ರತಿಯೊಂಜಿ ಖಾಸಗಿ ಬಸ್ ಲೆಡ್ ಸಿಸಿಟಿವಿ ಕಡ್ಡಾಯವಾದ್ ಪಾಡೊಡು ಪಂಡುದು ಆಗ್ರಹ ಮಲ್ತೆರು. ಪ್ರಮುಖೆರಾಯಿನ ಶ್ರೇಯಸ್ ಅಂಚನ್ ಬೊಕ್ಕ ಧನುಷ್ ಉಪಸ್ಥಿತರಿತ್ತೆರು.
by 