ಒವ್ವೇ ಒಂಜಿ ಸಂಘಟನೆಡ್ ಪದಾಧಿಕಾರಿಯಾದುಪ್ಪಂದೆ,ಒವ್ವೇ ಮುಖಂಡೆರಾದುಪ್ಪಂದೆ,. ಒವ್ವೇ ರಾಜಕೀಯ ಪಕ್ಷಡ್ ಸ್ಥಾನ ಮಾನಲಾ ಉಪ್ಪಂದೆ, . ಒವ್ವೇ ಸಮಿತಿಡಾವಡ್ ಪ್ರಮುಖ ಜವಾಬ್ದಾರಿ ಸ್ಥಾನೊಲುಪ್ಪಂದೆ, . ಸಂಚಾಲಕತ್ವ ಪದಾಧಿಕಾರಿಲು ಮಲ್ಪುನೇಡ್ದ್ ಜಾಸ್ತಿ ಪಟ್ಟು ಬೇಲೆ ಮಲ್ತುದ್ ಒವ್ವೇ ಪ್ರಚಾರ ಸನ್ಮಾನದ ಹಂಗು ನಿರೀಕ್ಷೆಲುಪ್ಪಂದೆ ಶ್ರದ್ಧೆಡ್ ಕೆಲಸ ಮಲ್ಪುನ ವ್ಯಕ್ತಿ ಮೇರ್ ಒರಿ ಅಸಾಮಾನ್ಯ ಸಾಮಾಜಿಕ ಕಾರ್ಯಕರ್ತೆರಾದುಲ್ಲೆರ್ .
ಸತೀಶ್ ಕುಮಾರ್ ಮೇರ್, ಮೂಲತಃ ಕೇರಳದ ಮಂಜೇಶ್ವರದಾರ್ . ಕರಿನ ಮಸ್ತ್ ವರ್ಷೊಡಿಂಚಿ ಉಡುಪಿಡ್ ಕಿನ್ನ ಮಟ್ಟುದ ಬ್ಯಾರೊನ್ ಸುವ್ಯವಸ್ಥಿತವಾದ್ ಮಲ್ತೊಂದ್ ಬರೊಂದುಪ್ಪುನ ವ್ಯಕ್ತಿ .
ಪ್ರವೃತ್ತಿಡ್ ಓರ್ವ ಅಪ್ರತಿಮ ಸಾಮಾಜಿಕ ಕಾರ್ಯಕರ್ತೆರಾದುಲ್ಲೆರ್ . ಹಿಂದೂ ವಿಚಾರಲೆಡ್ ನಿಷ್ಠೆ ಡುಪ್ಪುನ ಮೇರು ಕರಿನ 15-20 ವರ್ಷೊಡಚಿ ಉಡುಪಿಡ್ ನಡಪುಜ ಪರ್ಯಾಯೋತ್ಸವ , ಕೃಷ್ಣ ಜನ್ಮಾಷ್ಟಮಿ , ಗಣೇಶ ಚತುರ್ಥೀ ಶಾರದಾ ಪೂಜೆ , ಹಿಂದೂ ಸಮಾಜೋತ್ಸವ , ಧರ್ಮಸಂಸತ್ , ಬಾಬಾ ರಾಮ್ ದೇವ್ ಯೋಗ ಶಿಬಿರ , ಅಯೋಧ್ಯೆ ನಿಧಿ ಸಂಗ್ರಹ ಅಭಿಯಾನ , ಗೋರಕ್ಷಾ , ಗೋಭಿಕ್ಷೆ , ಗೋವಿಗಾಗಿ ಮೇವು ಅಭಿಯಾನೊಲ್, ವಿಶ್ವ ಗೋಸಮ್ಮೇಳನ , ಭಾರತೀಯ ಗೋಯಾತ್ರೆ , ದೇವಳದ ಬ್ರಹ್ಮಕಲಶೋತ್ಸವ ಶ್ರೀನಿವಾಸ ಕಲ್ಯಾಣೋತ್ಸವ , ವಿಶ್ವ ತುಳು ಸಮ್ಮೇಳನ , ಇಂಚ ಒಂಜಿ ರಡ್ಡತ್ತ್ ಅವ್ವೇತೊ ಉತ್ಸವ ಬೊಕ್ಕ ಧಾರ್ಮಿಕ, ಸಾಂಸ್ಕೃತಿಕ ಕಾರ್ಯಕ್ರಮೊಲೆಡ್ ಒವ್ವೇ ಫಲಾಪೇಕ್ಷೆ ಇಪ್ಪಂದೆ ಆತ್ಯಂತಿಕವಾಯಿನ ಶ್ರದ್ಧೆಡ್ ಸ್ವಯಂಸೇವಕೆರಾದ್ ಬೆನೊಂದುಪ್ಪುನ ಒರಿ ಅಪರೂಪದ ವ್ಯಕ್ತಿ . ಈ ಉತ್ಸವೊಲ್ ಮುಗಿನೇಡ್ ಬೊಕ್ಕ ಅಲ್ಪಡ್ದ್ ಮಾಯ ಆಪಿನ ಮೇರು ತಾನು ಮಲ್ತಿನ ಕರ್ತವ್ಯಗ್ ಪ್ರತಿಯಾದ್ ಒವ್ವೇ ಸನ್ಮಾನ ಬೊಕ್ಕ ಕನಿಷ್ಠ ಒಂಜಿ ಶಾಲು ಪಾಡುದ್ ಗೌರವ ಮಲ್ಪುವ ಪಂಡಲಾ ತೀರಾ ಸಂಕೋಚ ಮಲ್ಪುನ ಸ್ವಭಾವದಾರ್ .
ತನ್ನ ಬ್ಯಾರದ ಕೆಲಸ ಮುಗಿತುದ್ ಇಂಚಿನ ಉತ್ಸವಲೆಡ್ ಪಾಲ್ ಪಡೆಯುನ ಮೇರು ನಡು ರಾತ್ರೆ, ಅರ್ಧರಾತ್ರೆಮುಟ್ಡಲಾ ನಗರಾಲಂಕಾರ ಸ್ವಚ್ಛತೆ ಇಂಚಿತ್ತಿನ ಬೇಲೆಲೆಡ್ ಪಾಲ್ ಪಡೆವೆರ್ . ಇಂಚಿನ ಸಮಿತಿದ ಸಂಚಾಲಕತ್ವಡಿತ್ತಿನಕುಲಾ ಕೆಲವು ಸರ್ತಿ ಪತ್ತೆನೇ ಇಪ್ಪುಜೆರ್. ಆಂಡ ಅಕುಲು ಏರೇ ಬರಡ್ ಬರಂದನೇ ಉಪ್ಪಡ್ ತಾನೊಂಜಿ ಕಿನ್ನ ಏಣಿ ಪಸೊಂದ್ ಒಂಜಾತ್ ಪತಾಕೆ , ಬಂಟಿಂಗ್ಸ್ ಲೆನ್ ಪಸೊಂದ್ ತನ್ನ ಪಾಡುಗ್ ತಾನ್ ಶಿಸ್ತುಡ್‌ ಕೆಲಸ. ಮಲ್ತೊಂದ್ ಒವ್ವೇ ಉದಾಸೀನ ಉಪ್ಪಂದೆ ಕಂಬ ಕಂಬೊಗ್ ಮಿತ್ತದ್ ಬೇಲೆ ಮುಗಿಪಾವೆರ್ .ಅಂಚೆನೇ ವನಸುದ ವ್ಯವಸ್ಥೆಲೆಡ್ ಬಲಸುನ್ , ಮಡೆ ಇರೆ ದೆಪ್ಪುನ್ , ಸ್ವಚ್ಛತೆದ ಕೆಲಸೊಲೆನ್ ನಿರ್ವಹಣೆ ಮಲ್ಪುನ್ , ಇಲ್ಲ್ ,ಅಂಗಡಿಲೆಗ್ ಪೋದ್ ಲೆಪ್ಪೋಲೆ ಪಟ್ಟುನ್ , ಲಕ್ಷದೀಪೋತ್ಸವದ ಪೊರ್ತುಡ್ ಸಾಲು ದೀಪ ಪೊತ್ತಾವುನ್ , , ಪ್ರಚಾರ ಬ್ಯಾನರ್ ಲೆನ್ ಕಟ್ಟುನ್ , ಉತ್ಸವದ ವಸತಿ ವ್ಯವಸ್ಥೆ , ಅತಿಥಿ ಅಭ್ಯಾಗತೆರೆನ ಆತಿಥ್ಯ ನಿರ್ವಹಣೆ . , ವೇದಿಕೆ ಸಭಾಂಗಣೊಲೆನ್ ತಯಾರ್ ಮಲ್ಪುನ್ ಇಂಚ ಸತೀಶ್ ಕುಮಾರ್ ನಿರ್ವಹಣೆ ಮಲ್ಪುನ ಬೇಲೆಲು ಒಂಜಿ ರಡ್ಡತ್ತ್ . ಉತ್ಸವದ ಯಶಸ್ಸುಡ್ ಬಹುಮುಖ್ಯ ಪಾತ್ರೊಡುಪ್ಪುನ ಸೂಕ್ಷ್ಮಾತಿಸೂಕ್ಷ್ಮ ಕೆಲಸೊಲೆನ್ ನಿರ್ವಂಚನೆಡ್ ಮಲ್ಪುನ ಮೌನವಾದ್ ನಿರ್ವಹಣೆ ಮಲ್ಪುನ ಸತೀಶ್ ಕುಮಾರ್ ಒರಿ ಶ್ರೇಷ್ಠ ಸಾಮಾಜಿಕ ಕಾರ್ಯಕರ್ತೆ ಪಂಡುಂಡ ತಪ್ಪಾವಂದ್.
ಮೆರೆನ್ ಶುಕ್ರವಾರ ರಾಜಾಂಗಣಡ್ ಪರ್ಯಾಯ ಶ್ರೀ ಅದಮಾರು ಮಠದ ಶ್ರೀ ಶ್ರೀ ಈಶಪ್ರಿಯ ತೀರ್ಥ ಶ್ರೀಪಾದೆರು ರಾಜಾಂಂಗಣದ ಸಭೆಟ್ ಅಭಿನಂದಿಸಾದ್ ಸನ್ಮಾನ ಮಲ್ದಿನವ್ ಖುಷಿತ್ತ ಸಂಗತಿ . ಬೊಕ್ಕ ನಿಜವಾದುಲಾ ನಿಸ್ಪೃಹ ಸಾಮಾಜಿಕ ಕಾರ್ಯಕರ್ತಗ್ ಸಂದುದಿನ. ಮಾನಾದಿಗೆ.
ಮೆರೆನ ಪತ್ನಿ ಮಂಜೇಶ್ವರ ವ್ಯಾಪ್ತಿದ ವರ್ಕಾಡಿ ಗ್ರಾಮ ಪಂಚಾಯತ್ ಅಧ್ಯಕ್ಷೆ ಆದ್ ಕರ್ತವ್ಯ ಮಲ್ತೊಂದುಲ್ಲೆರ್.
by 