ಅಸ್ಟ್ರೋ ಮೋಹನ್.

ಆಸ್ಟ್ರೋ ಮೋಹನ್ ಅರೆನ ಉಡುಪಿ ಮಣಿಪಾಲ ಅಂದು-ಇಂದು ಕಾಪಿಟೇಬಲ್ ಬೂಕ್ ಬುಡುಗಡೆ

ಉಡುಪಿ: ಕರಿನ  ಐನ್  ದಶಕಲೆಡ್ ಉಡುಪಿ ಮಣಿಪಾಲಡ್ ಆಯಿನಾತ್ ಬದಲಾವಣೆ ಬೇತೆ ಒವ್ವ್ ಜಿಲ್ಲೆೆಡುಲಾ  ಆತುಜಿ. ಉಡುಪಿ ಮಣಿಪಾಲದ ನಡುಟ್ ಇತ್ತೆ  ಅಂತರನೇ ಇಜ್ಜಾಂದಿಲೆಕ್ಕಾತುಂಡ್. ಈ ಬದಲಾವಣೆಡ್ ಡಾ. ಟಿಎಂಎ ಪೈ ಅರೆನ ಕೊಡುಗೆಲಾ ಉಂಡು ಪಂಡುದು ಮಾಹೆ ವಿ.ವಿ. ಸಹಕುಲಾಧಿಪತಿ ಡಾ. ಎಚ್.ಎಸ್.ಬಲ್ಲಾಳ್ ಆರು ಪಂಡೆರು.

ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ತು ತಾಲೂಕು ಘಟಕದ ಸಹಕಾರಡ್  ಯಕ್ಷಗಾನ ಕಲಾರಂಗದ ಐವೈಸಿ ಸಭಾಂಗಣಡ್ ನಡತಿನ  ಕಾರ್ಯಕ್ರಮಡ್ ಉದಯವಾಣಿದ ಹಿರಿಯ ಛಾಯಚಿತ್ರಗಾಹಕ ಆಸ್ಟ್ರೋ ಮೋಹನ್ ಅರೆನ ಉಡುಪಿ-ಮಣಿಪಾಲ ಅಂದು ಇಂದು ಮಿನಿ ಕಾಫಿಟೇಬಲ್ ಪುಸ್ತಕ ಲೋಕಾರ್ಪಣೆ ಮಲ್ತುದ್ ಆರು ಪಾತೆರಿಯೆರು.

ಶಿಕ್ಷಣ, ಆರೋಗ್ಯ ಸೇರಿನಂಚ ಮಾತಾ ಕ್ಷೇತ್ರಡುಲಾ ಉಡುಪಿ ಮಣಿಪಾಲ ಬೋಡಾಯಿನಾತ್  ಬದಲಾವಣೆ ತೂತುಂಡ್. ಜಾಗತಿಕ ಮಟ್ಟಡುಲಾ ಖ್ಯಾಾತಿ ಪಡೆದುಂಡ್. ವನ್ಯಜೀವಲು  ಸೇರಿನಂಚ ಗುಡ್ಡ ಪ್ರದೇಶವಾದಿತ್ತಿನ ಮಣಿಪಾಲಡ್ 1953ಟ್  ವೈದ್ಯಕೀಯ ಕಾಲೇಜು ಸ್ಥಾಪನೆ ಮಲ್ಪುನ  ಮೂಲಕ ಡಾ ಟಿ.ಎಂ.ಎ ಪೈ ಮೇರು ಬೆಳವಣಿಗೆದ  ಬದಲಾವಣೆಗ್  ಚಾಲನೆ ಕೊರಿಯೆರು. ಬೊಕ್ಕ ಹಂತ ಹಂತವಾದ್  ಅಭಿವೃದ್ಧಿ ಆವೊಂದುಂಡ್  ಪಂಡೆರು.

ಕಂಬುಲ ತುಳುನಾಡುದದ  ಪ್ರತಿಷ್ಠೆೆದ  ಸಂಕೇತವಾದುಂಡ್. ಮಣಿಪಾಲಡ್  ಕಂಬುಲ  ಆಯೋಜನೆ ಆವೊಡ್  ಪಂಡುದು ಸುದ್ದಿ ಕೇನೊಂದುಂಡ್. ನೇಕ್  ಮಾಹೆ ಪೂರ್ಣ ಸಹಕಾರ ಕೊರ್ಪುಂಡ್. ಆಸ್ಟ್ರೋ ಮೋಹನ್ ಅರೆನ ಚಿತ್ರೊಲು ಕ್ವಾಲಿಟಿಗ್ ಪುಗಾರ್ತೆನ್ ಪಡೆದುಂಡ್. ಅರೆನ ಈ ಪುಸ್ತಕನ್  ಮಾಹೆ ವಿ.ವಿ.ಡುಲಾ  ದೀಪುಂಡ್ ಪಂಡೆರು.

ಮಣಿಪಾಲ ಮೀಡಿಯಾ ನೆಟ್‌ವರ್ಕ್ ಲಿಮಿಟೆಡ್‌ ದ ಕಾರ್ಯನಿರ್ವಾಹಕ ಅಧ್ಯಕ್ಷೆರಾಯಿನ ಟಿ. ಸತೀಶ್ ಯು.ಪೈ ಮೇರು ಅಧ್ಯಕ್ಷತೆಡಿತ್ತೆರು.

ಶಾಸಕ ಯಶ್‌ಪಾಲ್ ಸುವರ್ಣ ಪಾತೆರ್ದ್ , ಮಣಿಪಾಲದ ಮಣ್ಣಪಳ್ಳಡ್  ಕಂಬುಲ  ಆಯೋಜನೆ ಮಲ್ಪರೆಗ್ ಚಿಂತನೆ ಮಲ್ತುದ. ಯುವ ಜನತೆ ಅಭಿವೃದ್ಧಿಗ್ ಕೊಡುಗೆ ಕೊರ್ರೆಗ್ ಈ ಪುಸ್ತಕ ಸಹಕಾರಿಯಾಪುಂಡ್. ವಿಶ್ವಡೇ ವಿಶಿಷ್ಟ ಸ್ಥಾನ ಪಡೆದಿನ  ಉಡುಪಿ, ಮಣಿಪಾಲ ದುಂಬುದ 20, 25 ವರ್ಷಡಾಪಿನ  ಅಭಿವೃದ್ಧಿಡ್  ಯುವಜನತೆ  ಕೈ ಜೋಡಿಸಾವೊಡ್. ಕೃಷ್ಣ ಕಾರಿಡಾರ್ ಸೇರಿನಂಚ ಕೆಲವು ಯೋಜನೆಲೆನ್  ಪಾಡೊಂದ. ಉಂದೆಕ್ ಮಣಿಪಾಲ ವಿವಿ ನೆರವು ಅಗತ್ಯವಾದುಂಡ್ ಪಂಡೆರು.

ಅದಾನಿ ಸಮೂಹದ ಕಾರ್ಯನಿರ್ವಾಹಕ ಅಧ್ಯಕ್ಷ ಕಿಶೋರ್ ಆಳ್ವ, ಹಿರಿಯ ಛಾಯಾಗ್ರಾಹಕ ಯಜ್ಞ ಮಂಗಳೂರು, ಕಸಾಪ ತಾಲೂಕು ಅಧ್ಯಕ್ಷ ರವಿರಾಜ್ ಎಚ್.ಪಿ. ಪಾತೆರಿಯೆರು. ಪ್ರಾಧ್ಯಾಪಿಕೆ ಡಾ. ನಿಕೇತನಾ ಕೃತಿ ಪರಿಚಯ ಮಲ್ತೆರು. ಭೂತರಾಜ ಪಬ್ಲಿಕೇಶನ್ ಸಂಸ್ಥೆೆದ ಪ್ರವೀಣಾ ಮೋಹನ್ ಉಪಸ್ಥಿತರಿತ್ತೆರು. ಆಸ್ಟ್ರೋ ಮೋಹನ್ ಸ್ವಾಗತ ಮಲ್ತುದ್, ಪೂರ್ಣಿಮಾ ಜನಾರ್ದನ ನಿರೂಪಣೆ , ಜನಾರ್ದನ ಕೊಡವೂರು ಸೊಲ್ಮೆ ಸಂದಾಯ್ತ ಮಲ್ತೆರು.