ಬಿರುವೆರ್ ಕಾಪು ಸೇವಾ ಸಮಿತಿ : ವಿದ್ಯಾರ್ಥಿ ವೇತನ ವಿತರಣೆ, ಸಾಧಕೆರೆಗ್ ಸಮ್ಮಾನ
ಕಾಪು, ನ. ೨೧ : ಬಿರುವೆರ್ ಕಾಪು ಸೇವಾ ಸಮಿತಿದ ವತಿಡ್ದ್ ಕಾಪು ಬಿರುವೆರೆನ ಸಹಾಯಕ ಸಂಘದ ಸಭಾಭವನಡ್ ಆಯೋಜನೆ ಮಲ್ದಿನ ದೀವಿಗೆ ಮೂಜನೇ ವರ್ಷದ ವಿದ್ಯಾರ್ಥಿ ವೇತನ ವಿತರಣೆ ಬೊಕ್ಕ ಸಾಧಕೆರೆಗ್ ಸಮ್ಮಾನ ಕಾರ್ಯಕ್ರಮನ್ ಕಾಪು ಬಿರುವೆರೆನ ಸಹಾಯಕ ಸಂಘದ ಗೌರವಾಧ್ಯಕ್ಷೆರಾಯಿನ ಪ್ರಭಾಕರ ಪೂಜಾರಿ ಮೇರು ನ. ೨೦ತಾರೀಕುದಾನಿ ಉದಿಪನ ಮಲ್ತೆರ್.
ದಿಕ್ಸೂಚಿ ಭಾಷಣಕಾರೆರಾದ್ ಪಾಲ್ ಪಡೆಯಿನ ನ್ಯಾಯವಾದಿ ಗಿರೀಶ್ ಎಸ್.ಪಿ. ಪಾತೆರ್ದ್ , ಯುವ ಜನತೆದ ಅಭ್ಯುದಯಡ್ ಸಮಾಜ ಬೊಕ್ಕ ಸಂಘಟನೆಲೆನ ಪಾತ್ರ ಮಹತ್ವದ್ದಾದುಂಡ್. ವಿದ್ಯಾರ್ಥಿ ಜೀವನಡ್ ವಿವಿಧ ಮೂಲೊಡ್ದ್ ನೆರವು ಪಡೆಪಿನ ವಿದ್ಯಾರ್ಥಿಲು ತಮ್ಮ ಭವಿಷ್ಯದ ದಿನೊಕ್ಲೆಡ್ ಅಕುಲಾ ಒಂಜಾತ್ ಜನಕ್ಲೆಗ್ ನೆರವಾಪಿನ ಮುಖೇನ ಸಮಾಜದ ಋಣೊನ್ ತೀರಿಸಾವರೆಗ್ ಪ್ರಯತ್ನಿಸಾವೊಡ್ ಪಂಡೆರು.
ಮುಖ್ಯ ಅತಿಥಿಯಾದ್ ಪಾಲ್ ಪಡೆಯಿನ ಸಮಿತಿದ ಕಾನೂನು ಸಲಹೆಗಾರ, ವಕೀಲೆರಾಯಿನ ಸಂಕಪ್ಪ ಅಮೀನ್ ಪಾತೆರ್ದ್ ಬಿರುವೆರ್ ಕಾಪು ಸೇವಾ ಸಮಿತಿ ನಡಪಾವೊಂದ್ ಬರೊಂದುಪ್ಪುನ ಸಾಂತ್ವನ ಯೋಜನೆದ ಕಾರ್ಯಕ್ರಮ ಮಾತೆರೆಗ್ ಸಹಕಾರಿಯಾಪಿನ ಕಾರ್ಯಕ್ರಮವಾದುಂಡ್. ಇಂಚಿನ ಸೇವೆ, ಸಾಧನೆ ಬೊಕ್ಕ ಕಾರ್ಯಕ್ರಮ ನಿರಂತರವಾದ್ ದುಂಬರಿಯಡ್ ಪಂಡುದು ಹಾರೈಸಿಯೆರ್.
ಮಾಜಿ ಜಿ.ಪಂ. ಸದಸ್ಯೆ ಗೀತಾಂಜಲಿ ಸುವರ್ಣ, ಓಮನ್ ಬಿಲ್ಲವಾಸ್‌ನ ಉಪಾಧ್ಯಕ್ಷ ಸುಜಿತ್ ಅಂಚನ್ ಪಾಂಗಾಳ ಮಸ್ಕತ್, ಯುವವಾಹಿನಿ ಕಾಪು ಘಟಕದ ಅಧ್ಯಕ್ಷ ಸಚಿನ್ ಉಚ್ಚಿಲ, ಉದ್ಯಮಿ ದೀಪಕ್ ಕುಮಾರ್ ಎರ್ಮಾಳು,ಕಾರ್ತಿಕ್ ಪೂಜಾರಿ ಉಪಸ್ಥಿತರಿತ್ತೆರ್.
ವಿದ್ಯಾರ್ಥಿ ವೇತನ ವಿತರಣೆ, ಸಮ್ಮಾನ : ಆರ್ಥಿಕವಾದ್ ಪಿರ ಉಪ್ಪುನ ಸಮಾಜದ ಪ್ರತಿಭಾವಂತ ೩೩ ಮಂದಿ ವಿದ್ಯಾರ್ಥಿಲೆಗ್ ಸುಮಾರು ೧ ಲಕ್ಷ ರೂ. ಮುಟ್ಟ ವಿದ್ಯಾರ್ಥಿ ವೇತನ ವಿತರಣೆ ಮಲ್ತೆರ್. ಶೈಕ್ಷಣಿಕ ಸಾಧಕ ವಿದ್ಯಾರ್ಥಿಲಾಯಿನ ಸ್ನೇಹಾ ಜೆ. ಪಡುಬಿದ್ರಿ, ದೀಪಾಲಿ ಪಿ. ಕೋಟ್ಯಾನ್, ಕ್ರೀಡಾ ಸಾಧಕರಾದ ಹರ್ಷಿತಾ ವಿ. ಪೂಜಾರಿ, ಶಮಿತಾ ಪೂಜಾರಿ ಶಿರ್ವ ಮೊಕ್ಲೆನ್ ಮಾನಾದಿಗೆ ಮಲ್ತೆರ್. ಸಂಘಟನಾ ಕಾರ್ಯದರ್ಶಿ ಅನಿಲ್ ಅಮೀನ್ ದಂಪತಿಲೆನ್ ಮಾನಾದಿಗೆ ಮಲ್ತೆರ್.
ಸಮಾರಂಭದ ಅಧ್ಯಕ್ಷತೆಡಿತ್ತಿನ ಬಿರುವೆರ್ ಕಾಪು ಸೇವಾ ಸಮಿತಿದ ಉಪಾಧ್ಯಕ್ಷ ಸುಧಾಕರ್ ಸಾಲ್ಯಾನ್ ಸ್ವಾಗತ ಮಲ್ತುದ್. ಕಾರ್ಯಕಾರಿ ಸಮಿತಿ ಸದಸ್ಯ ರಾಕೇಶ್ ಕೆ. ಪ್ರಸ್ತಾವನೆ ಮಲ್ತೆರ್. ಅಶ್ವಿನಿ ನವೀನ್, ಮನೋಹರ್ ಕಲ್ಲುಗುಡ್ಡೆ ಸಮ್ಮಾನಿತೆರೆನ್ ಪರಿಚಯ ಮಲ್ತೆರ್. ಕಾರ್ಯದರ್ಶಿ ವಿಕ್ಕಿ ಪೂಜಾರಿ ಮಡುಂಬು ವಂದಿಸಾಯೆರ್. ಜೊತೆ ಕಾರ್ಯದರ್ಶಿ ಅತಿಥ್ ಸುವರ್ಣ ಪಾಲಮೆ ಕಾರ್ಯಕ್ರಮ ನಿರೂಪಣೆ ಮಲ್ತೆರ್.
by 