ನೆತ್ತೆರ್ ಅವ್ವ್ ನೆತ್ತೆರ್ ಮಾತ್ರ ಅತ್ತ್, ಅವ್ ಜೀವ ಕೊರ್ಪಿನ ಅಮೂಲ್ಯವಾಯಿನ ದೃವ:
ಪ್ರತಿ ದಿನ, ಪ್ರತಿ ಕ್ಷಣ ಸಾರ ಜನಕುಲ್ ನೆತ್ತೆರುದ ಮಸ್ತ್ ಅಗತ್ಯ ಇತ್ತಿನಕುಲುಪ್ಪುವೆರ್ .ಅಂಚೆನೇ ಕೆಲವೆರ್ ತಂಕ್ಲೆನ ಸಂಬಂಧಿಕೆರೆಗಾದ್ ಬೊಕ್ಕ ತಂಕುಲೆಗ್ ಬೋಡಾಪಿನಕ್ಲೆಗಾದ್ ನೆತ್ತೆರ್ ಕೊರ್ಪಾವುನ ನಿಟ್ಟುಡ್ ಆತಂಕೊಡ್ ಉಪ್ಪುನವ್ವೆನ್ ತೂವೊಂದುಪ್ಪುವ. ಅತ್ತಾವಂದೆ ಬದುಕುನ ಸಾಧ್ಯತೆ ಇತ್ತುಂಡಲಾ ಸೂಕ್ತ ಸಮಯೊಡ್ ನೆತ್ತೆರ್ ತಿಕ್ಕಂದೆ ಸಾವು ಆಪಿನ ಘಟನೆಲು ನಡತೊಂದುಪ್ಪುಂಡ್. ಇಂಚಿನ ಪೊರ್ತುಡ್ ನೆತ್ತೆರ್ ದಾನ ಜೀವ ಒರಿಪಾವುನ ನಿಟ್ಟುಡ್ ಶ್ರೇಷ್ಠ ಮಾನವೀಯ ಕೆಲಸವಾದುಂಡ್ ಪಂಡುದ್ ರೋ. ಶಂಭು ಶಂಕರ್ ಮೇರ್ ಇಂಚಪ್ಪೊಗ್ ಮಿಲಾಗ್ರಿಸ್ ಕಾಲೇಜು ಕಲ್ಯಾಣಪುರಡ್ ವಿವಿಧ ಸಂಸ್ಥೆಲು ಜಂಟಿಯಾದ್ ನಡಪಾಯಿನ ನೆತ್ತೆರ್ ದಾನ ಶಿಬಿರೊನ್ ಉದಿಪನ ಮಲ್ತುದ್ ಪಾತೆರಿಯೆರ್. ಬೊಕ್ಕ ಈ ಶಿಕ್ಷಣ ಸಂಸ್ಥೆ ಮಸ್ತ್ ವರ್ಷೊಡಿಂಚಿ ಪ್ರತಿ ವರ್ಷೊಗ್ ಒಂಜಿ ಸರ್ತಿ ತಪ್ಪಂದೆ ನೆತ್ತೆರ್ ದಾನ ಶಿಬಿರನ್ ಆಯೋಜನೆ ಮಲ್ತೊಂದುಪ್ಪುನವ್ ಶ್ಲಾಘನೀಯ ಬೊಕ್ಕ ಕಾಳಜಿದ ಕಾರ್ಯಕ್ರಮ ಪಂಡೆರ್.
ಮಿಲಾಗ್ರಿಸ್ ಕಾಲೇಜಿದ ಎನ್ಎಸ್ಎಸ್ ಘಟಕ, ಯೂತ್ ರೆಡ್ ಕ್ರಾಸ್ ಘಟಕ, ರೋಟರಿ ಕ್ಲಬ್, ಲಯನ್ಸ್ ಕ್ಲಬ್ ಕಲ್ಯಾಣಪುರ, ಅಭಯ ಸಹಾಯವಾಣಿ, ಹಳೆ ವಿದ್ಯಾರ್ಥಿ ಸಂಘ ಬೊಕ್ಕ ಕೆ.ಎಂ.ಸಿ.ಬ್ಲಡ್ ಬ್ಯಾಂಕ್ ಲು ಸಂಯುಕ್ತವಾದ್ ಆಯೋಜನೆ ಮಲ್ದಿನ ಈ ಶಿಬಿರೊಡ್ 89 ಯುನಿಟ್ ರಕ್ತ ದಾನಿಲೆಡ್ದ್ ಸಂಗ್ರಹ ಮಲ್ತುದ್ ಕೆ.ಎಂ.ಸಿ.ಬ್ಲಡ್ ಬ್ಯಾಂಕ್ ಗ್ ದಾನ ಮಲ್ತೆರ್.
ಕಾಲೇಜಿದ ಪ್ರಾಂಶುಪಾಲ ರಾಯಿನ ವಿನ್ಸೆಂಟ್ ಆಳ್ವ, ರೋಟರಿ ಕಲ್ಯಾಣಪುರದ ಕಾರ್ಯದರ್ಶಿ ರೋ ಪ್ರಕಾಶ್ ಕುಮಾರ್, ವಿಜಯ್ ಮಯ್ಯಾಡಿ, ಹಳೆ ವಿದ್ಯಾರ್ಥಿ ಸಂಘದ ನವೀನ್ ಕುಮಾರ್, ಅಂಚೆನೆ ಗಣ್ಯೆರು ವೇದಿಕೆಡ್ ಉಪಸ್ಥಿತರಿತ್ತೆರ್. ಕಾಲೇಜಿದ ಪ್ರಾಧ್ಯಾಪಕರಾಯಿನ ರವಿನಂದನ್ ಸಭಾ ಕಾರ್ಯಕ್ರಮ ನಿರೂಪಣೆ ಮಲ್ತೆರ್.
by 