ಬಂಟ ಸಮಾಗಮ

.
ಬಂಟರ ಸಂಘ, ಉಪ್ಪೂರು
ಬಂಟ ಸಮಾಗಮ-2024
ಬಂಟರ ಸಂಘ, ಉಪ್ಪೂರುದ ಆಶ್ರಯಡ್   ಆಗಸ್ಟ್ 4 ಗ್  ಬಂಟರ ಸಮಾವೇಶ “ಬಂಟ ಸಮಾಗಮ-2024” ಸ್ಥಳೀಯ ಜ್ಞಾನೇಶ್ವರೀ ಸಭಾಭವನಡ್  ನಡತುಂಡ್.
ಕಾರ್ಯಕ್ರಮನ್  ತುಡರ್ ಅರ್ಲಾದ್ ಉದಿಪನ ಮಲ್ತಿನ ಮಾಜಿ ರೋಟರಿ ಗವರ್ನರ್ ಜ್ಞಾನ ವಸಂತ ಶೆಟ್ಟಿ ಮೇರು ತನ್ನ  ಬಂಟೆರೆನ ಮೂಲ ಬೊಕ್ಕ ಇತಿಹಾಸದ ಮಿತ್ತ್  ಬೊಲ್ಪು ಚೆಲ್ಲುದ್ , ಸಂಘಟನೆಲು ತಮ್ಮ ಕರ್ತವ್ಯದ ಕಡೆಕುಲಾ ಗಮನ ಕೊರೊಡುಂದ್ ಎಚ್ಚರಿಕೆ ಕೊರಿಯೆರು.
ಸಂಘದ ಅಧ್ಯಕ್ಷ ಡಾ. ಪ್ರಶಾಂತ್ ಶೆಟ್ಟಿ ನರ್ನಾಡು ಪ್ರಾಸ್ತಾವಿಕವಾದ್ ಪಾತೆರ್ದ್ “ದೃಷ್ಟಿಡ್ ದೂರ ಆಯಿನಕುಲು ಮನಸ್ಸುಡುಲಾ  ದೂರ ಆಪೆರ್” ಪನ್ಪಿನ ಗಾದೆ ಉಂಡು. ಅಂಚಾದ್ ಪರಸ್ಪರ ಅನ್ಯೋನ್ಯತೆ ಒರಿಪಾದ್ ಬುಲೆಪಾವರೆಗ್  ಸಹಕಾರಿಯಾವಡ್ ಪನ್ಪಿನ ಸದುದ್ದೇಶಡ್  ಈ ಸಮಾವೇಶ ಆಯೋಜನೆ ಮಲ್ದ. ಒಟ್ಟುಗ್ ಸ್ಥಳೀಯ ಪ್ರತಿಭೆಲೆನ್, ಸಾಧಕೆರೆನ್ ಗುರುತಿಸಾದ್ ಗೌರವಿಸುನ ಮೂಲಕ ಅಕ್ಲೆನ ಸಾಧನೆನ್  ಪ್ರೋತ್ಸಾಹಿಸಾವುನತ್ತಾವಂದೆ, ಆರ್ಥಿಕವಾದ್ ಪಿರ ಇತ್ತಿನ ವಿದ್ಯಾರ್ಥಿಲೆಗ್  ವಿದ್ಯಾರ್ಥಿವೇತನ ಕೊರ್ಪಿನ ಮೂಲಕ ಅಕ್ಲೆನ ವಿದ್ಯಾಭ್ಯಾಸಗ್  ನಿರಂತರ ಸಹಾಯ ಮಲ್ತೊಂದುಲ್ಲ  ಪಂಡೆರು. ಕಾರ್ಯಕ್ರಮಗ್  ಬತ್ತಿನ ಮಾತೆರೆನ್  ಆತ್ಮೀಯವಾದ್  ಎದ್ಕೊಂಡೆರು.
ಮಲ್ಲ ಬಿನ್ನೆರಾದ್ಷ ಧನಪಾಲ್ ಶೆಟ್ಟಿ ನರ್ನಾಡು, ಅನಿಲ್ ಶೆಟ್ಟಿ ತೆಂಕಬೆಟ್ಟು, ಹಾವಂಜೆ ಬಂಟರ ಸಂಘದ ಅಧ್ಯಕ್ಷ ಸೀತಾರಾಮ ಶೆಟ್ಟಿ ಉಜಂಗಾರು, ಕುಕ್ಕೆಹಳ್ಳಿ ಬಂಟರ ಸಂಘದ ಅಧ್ಯಕ್ಷ ಪ್ರಸಾದ್ ಹೆಗ್ಡೆ, ಕೊಡವೂರು ಬಂಟರ ಸಂಘದ ಅಧ್ಯಕ್ಷ ಶಿವಪ್ರಸಾದ್ ಶೆಟ್ಟಿ, ನಿವೃತ್ತ ಮುಖ್ಯೋಪಾಧ್ಯಾಯಿನಿ ಶಕುಂತಳಾ ಹೆಗ್ಡೆ ಸಮಯೋಚಿತವಾದ್  ಪಾತೆರಿಯೆರು. ಸಂಘದ ಗೌರವಾಧ್ಯಕ್ಷ ರೋಯಲ್ ರತ್ನಾಕರ ಶೆಟ್ಟಿ, ಕಾರ್ಯಕಾರೀ ಸಮಿತಿದ  ಮಾತಾ  ಸದಸ್ಯೆರು ಉಪಸ್ಥಿತರಿತ್ತೆರು.
ಉದ್ಯಮ ಕ್ಷೇತ್ರಡ್  ವಿಶಿಷ್ಟ ಸಾಧನೆ ಮಲ್ತಿನ ನರ್ನಾಡು ಅಜಿತ್ ಶೆಟ್ಟಿ ದಂಪತಿ, ಕೃಷಿಕ ಉಗ್ಗೆಲ್ ಬೆಟ್ಟು ಪ್ರಕಾಶ್ ಶೆಟ್ಟಿ ದಂಪತಿ ಬೊಕ್ಕ  ಬಿ.ಸಿ.ಎ. ಪದವಿಡ್  6ನೇ ರ್ಯಾಂಕ್ ಪಡೆಯಿನ  ಕುಮಾರಿ ನಿಶಾ ಶೆಟ್ಟಿ ಮೆರೆಗ್ ಮಾನಾದಿಗೆ ಮಲ್ತೆರ್. ಸಂದೀಪ್ ಶೆಟ್ಟಿ ಅಮ್ಮುಂಜೆ ಮಾನಾದಿಗೆದ ಓಲೆ ಓದಿಯೆರು.
ಶೈಕ್ಷಣಿಕ ಕ್ಷೇತ್ರಡ್  ಅಮೋಘ ಸಾಧನೆ ಮಲ್ತಿನ ವಿದ್ಯಾರ್ಥಿಲೆನ್  ಶಾಲು ಪುದೆತುದ್, ಪೂ  ಕೊರ್ದ್  ಅಕ್ಲೆನ ಸಾಧನೆನ್  ಪುಗಾರಿಯೆರ್.. ಆರ್ಥಿಕವಾದ್  ಪಿರ ಇತ್ತಿನ ವಿದ್ಯಾರ್ಥಿಲೆಗ್ ತಲಾ ರೂಪಾಯಿ ಐನ್ ಸಾವಿರದಂಚ ವಿದ್ಯಾರ್ಥಿವೇತನ ವಿತರಣೆ ಮಲ್ತೆರ್.
ಪ್ರಶಾಂತ್ ಶೆಟ್ಟಿ ಹಾವಂಜೆ ಕಾರ್ಯಕ್ರಮ ನಿರೂಪಣೆ ಮಲ್ತೆರು. ಪ್ರಧಾನ ಕಾರ್ಯದರ್ಶಿ ದಿನೇಶ್ ಶೆಟ್ಟಿ ಅಮ್ಮುಂಜೆ ಮೇರ್ ಸೊಲ್ಮೆ ಸಂದಾಯ್ತ ಮಲ್ತೆರ್.