ಉಡುಪಿ: ಅಂತರಾಷ್ಟ್ರೀಯ ಮಟ್ಟದ ಕ್ರಿಡಾಕೂಟಗ್ ಆಯ್ಕೆಯಾದುಪ್ಪುನ ಉಡುಪಿ ಜಿಲ್ಲೆದ ಗ್ರಾಮೀಣ ಪ್ರತಿಭೆ ಮಾಧುರ್ಯಾ ಶೆಟ್ಟಿ ಮೆರೆಗ್ ಫ್ರಾನ್ಸ್ ಡ್ ನಡಪುನ ಕ್ರೀಡಾಕೂಟಗ್ ಪಾಲ್‌ ಪಡೆಯುನ ನಿಟ್ಟುಡ್ ಬಂಟೆರೆನ ಸಂಘದ ವತಿಡ್ದ್ ಪಣವುದ ಸಹಕಾರ ವಿತರಣಾ ಕಾರ್ಯಕ್ರಮ ಉಡುಪಿ ಜಿಲ್ಲಾ ಕ್ರಿಡಾಂಗಣಡ್ ನಡತುಂಡ್.
ಈ ಸಂಧರ್ಭಡ್ ಪಾತೆರಿನ ಉಡುಪಿ ಜಿಲ್ಲಾ ಬಂಟೆರೆನ ಸಂಘದ ಗೌರವಧ್ಯಕ್ಷೆರಾಯಿನ ಜಯಕರ ಶೆಟ್ಟಿ ಇಂದ್ರಾಳಿ “ಮಾಧುರ್ಯ ಶೆಟ್ಟಿ ಅಪ್ಪಟ ಗ್ರಾಮೀಣ ಪ್ರತಿಭೆ ಆಂಡಲಾ ಅಂತರಾಷ್ಟ್ರೀಯ ಮಟ್ಟದ ಕ್ರೀಡಾಕೂಟಗ್ ಆಯ್ಕೆಯಾತಿನವ್ವ್ ನಮಕ್‌ ಮಾತೆರೆಗ್ಲಾ ಪೆರ್ಮೆದ ವಿಚಾರ.ಅರು ಸ್ವಂತ ಶ್ರಮಟ್‌ ಈ ಮಟ್ಟೊಗ್ ಬುಲದೆರ್. ವಿದ್ಯಾರ್ಥಿಲು ನಿರಂತರವಾದ್ ತನ್ನ ಪ್ರಯತ್ನೊನ್‌ ಮಲ್ತೊಂದ್‌ ಉಪ್ಪೊಡ್. . ಮಾಧುರ್ಯ ಗ್ ಶಾಲೆದ ಅಧ್ಯಾಪಕೆರ್ ಬೊಕ್ಕ ಮುಖ್ಯೋಪಾಧ್ಯಾಯೆರು ಮಸ್ತ್‌ ಸಹಕಾರ ಕೊರ್ತೆರ್ .ಅಕಲೆಗ್ಲಾ ಅಭಿನಂಧನೆಲು. ಉಡುಪಿದ ಕ್ರೀಡಾ ತರಬೇತುದಾರೆರು ವಿದ್ಯಾರ್ಥಿಲೆನ ಪ್ರತಿಭೆನ್‌ ಗುರುತಿಸಾದ್ ಅಕಲೆಗ್ ಸೂಕ್ತ ತರಬೇತಿನ್ ಕೊರ್ದ್ ಕ್ರೀಡೆಡ್ ಎಡ್ಡೆ ಸಾಧನೆ ಮಲ್ಪರೆಗ್ ಸಂಪೂರ್ಣ ಸಹಕಾರ ಕೊರೊಂದುಲ್ಲೆರ್ ಪಂಡೆರ್.
ಈ ಸಂಧರ್ಭಡ್ ಜಾಗತಿಕ ಬಂಟೆರೆನ ಸಂಘದ ವತಿಢ್ದ್ ೫೦ ಸಾವಿರ ರುಪಾಯಿ, ಬೊಕ್ಕ ಉಡುಪಿ ಬಂಟೆರೆನ ಸಂಘದ ೨೫ ಸಾವಿರ ರುಪಾಯಿಲೆನ್ ಕ್ರೀಡಾಪಟು ಮಾಧುರ್ಯ ಶೆಟ್ಟಿ ಮೆರೆಗ್ ಹಸ್ತಾಂತರ ಮಲ್ತೆರ್.
ಕಾರ್ಯಕ್ರಮಡ್ ಉಡುಪಿ ಬಂಟೆರೆನ ಸಂಘದ ಅಧ್ಯಕ್ಷೆರಾಯಿನ ಪುರುಷೋತ್ತಮ ಶೆಟ್ಟಿ, ಕಾರ್ಯದರ್ಶಿ ಅಮಿತ್ ಕುಮಾರ್ ಶೆಟ್ಟಿ, ಕೋಶಾಧಿಕಾರಿ ಮನೋಹರ್ ಶೆಟ್ಟಿ ತೋನ್ಸೆ, ಉಪಾಧ್ಯಕ್ಷೆರಾಯಿನ ಮೋಹನ್ ಶೆಟ್ಟಿ ಉಡುಪಿ ಕ್ರೀಡಾ ಇಲಾಖೆದ ಸಹಾಯಕ ನಿರ್ದೇಶಕೆರಾಯಿನ ಡಾಕ್ಟರ್ ರೋಶನ್ ಕುಮಾರ್ ಶೆಟ್ಟಿ, ಮುಖ್ಯೋಪಾಧ್ಯಾಯೆರಾಯಿನ ಲಿಂಗರಾಜು ಉಪಸ್ಥಿತರಿತ್ತೆರ್.
by 