ಡಾ.ಸಂಧ್ಯಾ ಎಸ್.ಪೈ ಮೆರೆಗ್ ವಿಶ್ವಪ್ರಭಾ ಪುರಸ್ಕಾರ..

ಶ್ರೀಮತಿ ಪ್ರಭಾ ವಿಶ್ವನಾಥ್ ಶೆಣೈ ಬೊಕ್ಕ ಉಡುಪಿ ವಿಶ್ವನಾಥ್ ಶೆಣೈ ಪ್ರಾಯೋಜಕತ್ವದ
ವಿಶ್ವಪ್ರಭಾ ಪುರಸ್ಕಾರ – 2023

ಡಾ| ಸಂಧ್ಯಾ ಎಸ್. ಪೈ

ಬಂಟ್ವಾಳಡ್ ಪುಟ್ಟುದ್ , ಚಿಕ್ಕಮಂಗಳೂರುಡ್ ಬುಲೆದ್ , ಎಲ್ಯ ಪ್ರಾಯೊಡೇ ತನ್ನ ಕುಟುಂಬದ ಜವಾಬ್ಧಾರಿನ್ ಸಮರ್ಥವಾದ್ ನೆರವೇರಿಸಾದ್, ಮಣಿಪಾಲದ ಪ್ರತಿಷ್ಠಿತ ಪೈ ಕುಟುಂಬದ ಮರ್ಮಾಲಾದ್ , ಸಮಾಜಡ್ ಗುರುತರವಾಯಿನ ಸ್ಥಾನೊನ್ ಪಡೆಯಿನಾರ್ ಕರ್ನಾಟಕದ ತುಳುನಾಡುದ ಪೆರ್ಮೆದ ಜನಪ್ರಿಯ ಪತ್ರಿಕೋದ್ಯಮಿ ಶ್ರೀಮತಿ ಸಂಧ್ಯಾ ಎಸ್.ಪೈ ಮೇರು.

‘ಮಣಿಪಾಲ ಮೀಡಿಯಾ’ ಪನ್ಪಿನ ಮನೋರಂಜನಾ ನೆಟ್ವರ್ಕ್ ದ ಗೌರವ ನಿರ್ದೇಶಕಿಯಾದ್ ಮೇರು ಮೀಡಿಯಾ ನೆಟ್ವರ್ಕ್ ದ ಸರ್ವಾಂಗೀಣ ಬೆಳವಣಿಗೆಡ್ ಕೊರ್ತಿನ ಕೊಡುಗೆ ಅಪಾರ.

ಪತ್ರಿಕೋದ್ಯಮ
ತರಂಗ , ರೂಪತಾರ, ತುಂತುರು , ತುಷಾರ ಈ ನಾಲ್ ಜನಪ್ರಿಯ ಕನ್ನಡ ಪತ್ರಿಕೆಲೆನ ಸಂಪಾದಕತ್ವ ಹೊಂದಿನ ಮೇರು ಸಮರ್ಥ ಆಡಳಿತಗಾರೆರ್ ಬೊಕ್ಕ ಉತ್ತಮ ಲೇಖಕಿಲಾ ಅಂದ್..
ಮೆರೆನ ಆಡಳಿತ ಅವಧಿಡ್ ಪೊಸತನನ್ ಆಳವಡಿಸಾವೊಂದ್ ಪತ್ರಿಕೋದ್ಯಮಡ್ ಮೀಡಿಯಾ ನೆಟ್ವರ್ಕ್ ಅಭಿವೃದ್ಧಿದ ಮೈಲುಗಲ್ಲುನೇ ಸ್ಥಾಪನೆ ಮಲ್ದುಂಡ್.

ಕೃತಿಕುಲು
‘ಇದು ಈಜಿಪ್ಟ್‌’, ‘ಉಂದು ಇಸ್ರೇಲ್’ (ಪ್ರವಾಸ ಕಥನ) : ಸಂಪಾದಕೀಯ ಅಂಕಣೊಲಾಯಿನ ’ಪ್ರಿಯ ಓದುಗರೇ’ ಬರಹದ 10 ಸಂಪುಟೊಲು ; ‘ಕೊಂಕಣಿ ರಾಂದಪ'(ಕನ್ನಡ, ಇಂಗ್ಲಿಷ್ ಆವೃತ್ತಿ).; ‘ಯಕ್ಷಪ್ರಶ್ನೆ’, ‘ಪರಂಪರೆದ ಪುಟೊಕುಲೆಡ್ ‘ (ಭಾರತೀಯ ಧಾರ್ಮಿಕ-ಸಾಂಸ್ಕೃತಿಕ ಮೌಲ್ಯಗಳ ಸಂವಾದ ಮಾಲೆ); ‘ಭಜಗೋವಿಂದಂ ‘ , ‘ಜೋಕ್ಲೆನ ಕಥಾ ಮಾಲಿಕೆ-38’ (ಜೋಕ್ಲೆನ ಸಾಹಿತ್ಯ) – ಮೆರೆನ ಪ್ರಕಟಿತ ಕೃತಿಕುಲು.
ಮೇರು ಕಥೆ ಬರೆಪಿನೇಟ್ ಜೋಕ್ಲೆನ ಪ್ರೀತಿದ ‘ಸಂಧ್ಯಾಮಾಮಿ’ ಪಂಡುದೇ ಚಿರಪರಿಚಿತೆರು.

ಪ್ರಶಸ್ತಿ ಪುರಸ್ಕಾರಲು:

ಕರ್ನಾಟಕ ಮಾಧ್ಯಮ ಅಕಾಡೆಮಿ ಪ್ರಶಸ್ತಿ (2006); ‘ಸಾರ್ವಜನಿಕ ಸಂಪರ್ಕ ವ್ಯಕ್ತಿ ಪ್ರಶಸ್ತಿ'(2004); ‘ಎಚ್.ಕೆ.ವೀರಣ್ಣಗೌಡ ಪತ್ರಿಕೋದ್ಯಮ ಪ್ರಶಸ್ತಿ'(2008) ; ‘ಸಾಧನಾ’ ಪ್ರಶಸ್ತಿ (ಶ್ರವಣಬೆಳಗೊಳ); ‘ ಶ್ರೀಮಾತಾ ಪ್ರಶಸ್ತಿ’ (2007) ಇಂಚ ಶ್ರೇಷ್ಠ ಪ್ರಶಸ್ತಿಲೆಗ್ ಮೇರು ಪಾತ್ರರಾತೆರ್.

ಟಿವಿ ಮಾಧ್ಯಮ
ಕನ್ನಡದ ಜನ ಮೆಚ್ಚಿದ್ ಹೆಚ್ಚಾದ್ ವೀಕ್ಷಣೆ ಮಲ್ಪುನ ‘ಈ ಟಿವಿ’ ಡ್ ಶ್ರೀಮತಿ ಸಂಧ್ಯಾ ಪೈ ಆರು ಬರೆದು ನಿರ್ದೇಶನ ಮಲ್ದಿನ ಧಾರವಾಹಿ ” ಬಿದಿಗೆ ಚಂದ್ರಮ ” 252 ಕಂತುಲೆಡ್ ಯಶಸ್ವಿಯಾದ್ ತೆರೆಟ್ ತೋಜಿದುಂಡ್ . ಮೆರೆನ ಕುಡೊಂಜಿ ಧಾರವಾಹಿ “ಗುಪ್ತಗಾಮಿನಿ ” ಆರ್ಯಭಟ ಸಾಂಸ್ಕೃತಿಕ ಸಂಸ್ಥೆ ಕೊರ್ಪಿನ 8 ಪ್ರಶಸ್ತಿಲೆನ್ ತನ್ನ ತೆಕ್ಕೆಗೆ ಪಾಡೊಂದಿನ ಏಕೈಕ ಧಾರಾವಾಹಿಯಾದಿತ್ತುಂಡ್.

*ವಿಶೇಷ ಆಸಕ್ತಿಲು:
ತನ್ನ ವಿಭಿನ್ನ ಬೊಕ್ಕ ವಿಶಿಷ್ಟವಾದ ಅಭಿರುಚಿಡ್ದ್ , ನಾಯಕತ್ವದ ಗುಣ ಉಪ್ಪುನ ಮೆರೆಗ್ ಎಂಬ್ರಾಯ್ಡರಿ’, ‘ಭಾರತೀಯ ಅಡುಗೆ-ಕಲೆ’ಟ್ ಅಪಾರವಾಯಿನ ಆಸಕ್ತಿ . ವೈಚಾರಿಕ ಮನೋಭಾವ, ವೈಜ್ಞಾನಿಕ ದೃಷ್ಟಿಕೋನ ಹೊಸವಿಚಾರೊಲೆನ್ ತೂಪಿನ ಗುಣ ಇತ್ತಿನ ಮೇರು ‘ವೇದಾಂತ’, ‘ಉಪನಿಷದ್’,’ ‘ಭಗವದ್ಗೀತೆ’ ಯೋಗ’,’ ತಂತ್ರ’, ‘ಜೆನ್’ – ಇಂಚ‌ ಪ್ರಕಾರೊಲೆಗ್ ಸೇರಿನ ಲೇಖನೊಲೆನ್ ಬರೆದು ಪ್ರಕಟಣೆ ಮಲ್ತುದೆರ್.

ಸಾಮಾಜಿಕ ಕಳಕಳಿ
ಮೇರು ಮಣಿಪಾಲದ ‘ಮಹಿಳಾ ಸಮಾಜ’ ದ ಅಧ್ಯಕ್ಷೆಯಾದ್ ಸೇವೆಸಲ್ಲಿಸಾದೆರ್.
ಮೆರೆನ ಮಾತಾ ಸಾಮಾಜಿಕ ಕೊಡುಗೆನ್ ಪರಿಗಣಿಸಾದ್ ಮೆರೆಗ್ , ‘ಕರ್ನಾಟಕ ರಾಜ್ಯ ಮಹಿಳಾ ವಿಶ್ವವಿದ್ಯಾಲಯ’ದ ಕುಲಪತಿಲಾಯಿನ ಡಾ. ಮೀನಾ ಚಂದಾವರ್ಕರೆರು ಗುಲ್ಬರ್ಗಾಡ್ ನಡತಿನ ನಾಲನೇ ಘಟಿಕೋತ್ಸವದ ಪದವಿ ಪ್ರದಾನ ಸಮಾರಂಭಡ್ 2013 ನೇ ಸಾಲುದ ‘ಗೌರವ ಡಾಕ್ಟರೇಟ್’ ಪದವಿನ್ ಪ್ರಧಾನ ಮಲ್ತುದ್ ಗೌರವಿಸಾದೆರ್.

*ಸಂಸ್ಕೃತಿ ವಿಶ್ವ ಪ್ರತಿಷ್ಠಾನ (ರಿ) ಉಡುಪಿ ಸಂಸ್ಥೆದ ಪ್ರತಿಷ್ಠಿತ ‘ವಿಶ್ವಪ್ರಭಾ ಪುರಸ್ಕಾರ – 2023 ‘ ಗ್ ಮೇರು ಆಯ್ಕೆಯಾದಿತ್ತುದ್,ಉಂದುವೇ ಬರ್ಪಿನ ಜನವರಿ 15 , 2023 ತಾರೀಕುದಾನಿ ಉಡುಪಿದ ಎಂಜಿಎಂ ಕಾಲೇಜಿದ ಮುದ್ದಣ ಮಂಟಪಡ್ ನಡಪುನ ಸಮಾರಂಭಡ್ ಪ್ರಶಸ್ತಿ ಪ್ರಧಾನ ಸಮಾರಂಭ ನಡಪರೆಗುಂಡ್ ಪಂಡುದ್ ಸಂಸ್ಕೃತಿ ವಿಶ್ವ ಪ್ರತಿಷ್ಠಾನ ದ ಕಾರ್ಯದರ್ಶಿ ಶಿಲ್ಪಾ ಜೋಶಿ ತೆರಿಪಾದೆರ್.