ಆಪತ್ಭಾಂದವ ಈಶ್ವರ್ ಮಲ್ಪೆ ಸೇವೆಗ್ ರಾಜ್ಯ ಸರ್ಕಾರ ರಾಜ್ಯೋತ್ಸವ ಪ್ರಶಸ್ತಿ ಕೊರ್ದ್ ಗೌರವ ಮಲ್ಪಡ್: ಯಶ್ ಪಾಲ್ ಸುವರ್ಣ ಆಗ್ರಹ

ತುರ್ತು ಪೊರ್ತುಡ್ ತನ್ನ ಜೀವದ ಹಂಗುನ್ ಬುಡ್ದ್ ಪ್ರಾಕೃತಿಕ ವಿಕೋಪದ ಕಠಿಣ ಸಂದರ್ಭಡುಲಾ ರಕ್ಷಣೆಗ್ ಬರ್ಪಿನ ಖ್ಯಾತ ಮುಳುಗು ತಜ್ಞೆರಾಯಿನ ಈಶ್ವರ್ ಮಲ್ಪೆ ಮೆರೆನ ಸೇವೆಗ್ ಬೆಲೆ ಕಟ್ಟರೆಗ್ ಸಾಧ್ಯ ಇಜ್ಜಿ. ಅರೆನ ಈ ಸೇವೆನ್ ಪರಿಗಣಿಸಾದ್ ರಾಜ್ಯ ಸರ್ಕಾರ ಈ ಸರ್ತಿದ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಕೊರ್ದ್ ಗೌರವಿಸಾವೊಡು ಪಂಡುದ್ ಉಡುಪಿ ಶಾಸಕ ಯಶ್ ಪಾಲ್ ಸುವರ್ಣ ಆಗ್ರಹ ಮಲ್ದೆರ್.

ಉತ್ತರ ಕನ್ನಡ ಜಿಲ್ಲೆದ ಶೀರೂರು ಗುಡ್ಡ ಕುಸಿತದ ರಕ್ಷಣಾ ಕಾರ್ಯೊಡ್ ಉತ್ತರ ಕನ್ನಡ ಜಿಲ್ಲಾಡಳಿತದ ಮನವಿದ ಮೇರೆಗ್ ಕಾರ್ಯಾಚರಣೆಡ್ ಭಾಗಿಯಾದ್ ನಾಪತ್ತೆಯಾತಿನ ಚಾಲಕ ಅರ್ಜುನ್ ಲಾರಿನ್ ಗುರುತಿಸಾವರೆಗ್ ಈಶ್ವರ್ ಮಲ್ಪೆ ಪ್ರಮುಖ ಪಾತ್ರ ವಹಿಸಾದೆರ್.

ಕಾರ್ಯಾಚರಣೆದ ಕಡೇತ್ತ ಹಂತೊಡ್ ಉತ್ತರ ಕನ್ನಡ ಜಿಲ್ಲಾಡಳಿತ ಈಶ್ವರ್ ಮಲ್ಪೆ ಮೆರೆನ್ ಅವಮಾನ ಮಲ್ತುದ್ ಕಾರ್ಯಾಚರಣೆಗ್ ಅವಕಾಶ ಕೊರಂದಿನ ದುರದೃಷ್ಟಕರ.

ರಾಜ್ಯದಾದ್ಯಂತ ಒಲ್ಪನೇ ಲೆಪ್ಪು ಬತ್ತುಂಡಲಾ ಪ್ರತಿಫಲಾಪೇಕ್ಷೆ ಇಪ್ಪಂದೆ ರಕ್ಷಣಾ ಕಾರ್ಯೊಡ್ ತೊಡುಗುನ ಈಶ್ವರ್ ಮಲ್ಪೆ ಮೆರೆನ ಸೇವೆನ್ ಮಾತೆರ್ಲ ಗೌರವಿಸಾವೊಡು.

ಈಶ್ವರ್ ಮಲ್ಪೆ ಅರೆನ ಕೌಟುಂಬಿಕ ಸಮಸ್ಯೆದ ನಡುಟುಲಾ
ಸಾರ ಸಾರ ಪುಣಕ್ಲೆನ್ ಕಠಿಣ ಸಂದರ್ಭಡುಲಾ ಪತ್ತೆಮಲ್ತುದ್ ಸಂಬಂಧಿಕೆರೆಗ್ ಹಸ್ತಾಂತರ ಮಲ್ತುದ್, ಕೆಲವಾರು ಜೀವನ್ ರಕ್ಷಿಣೆ ಮಲ್ದಿನ ಅತ್ಯಮೂಲ್ಯ ಸೇವೆಗ್ ರಾಜ್ಯೋತ್ಸವ ಪ್ರಶಸ್ತಿ ಕೊರ್ದ್ ಗೌರವ ಮಲ್ತುಂಡ ಪ್ರಶಸ್ತಿಗುಲಾ ಘನತೆ ಹೆಚ್ಚಾಪುಂಡ್.

ಆಪತ್ಭಾಂದವೆರಾದ್ ಸೇವೆ ಸಲ್ಲಿಸಾವುನ ಈಶ್ವರ್ ಮಲ್ಪೆ ನಮಕ್ ಮಾತೆರೆಗುಲಾ ಸದಾ ಸ್ಪೂರ್ತಿಯಾದಿತ್ತುದ್, ಸ್ವಾರ್ಥರಹಿತ ಸೇವೆಗ್ ರಾಜ್ಯ ಸರ್ಕಾರ ಈ ಸರ್ತಿ ರಾಜ್ಯೋತ್ಸವ ಪ್ರಶಸ್ತಿ ಕೊರ್ದ್ಷ ಗೌರವಿಸಾವರೆಗ್ ನಾಡುದ ಸಮಸ್ತ ಜನತೆದ ಪರವಾದ್ ವಿನಂತಿ ಮಲ್ಪುವೆ ಪಂಡುದು ಪ್ರಕಟಣೆಡ್ ತೆರಿಪಾದೆರ್.