ಸಾಧಕಿ ಗೌರಮ್ಮಗ್ ಮಾನಾದಿಗೆ.

ಆದಿಗ್ರಾಮೋತ್ಸವ ಬೊಳ್ಳಿ ಪರ್ಬದ ಸರಣಿ ಆರಂಭ ಅಜೆಕಾರು: ಸದ್ದು ಮಲ್ಪಂದೆ ಸುದ್ದಿ ಆಯಿನ ಸಾಧಕಿ,ಜ್ಯೋತಿಷಿ, ಸಮಾಜ ಮುಖಿ ಚಿಂತಕಿ ಶಿರ್ತಾಡಿದ ಗಂಗಮ್ಮ ಸುಬ್ಬರಾವ್ ಅರೆಗ್ ಅಜೆಕಾರುದ ಆದಿಗ್ರಾಮೋತ್ಸವ ಬೊಳ್ಳಿ ಪರ್ಬದ ತುಳುವ ಸಾಧಕೆರೆಗ್ ನಮ್ಮ ನಮನ ಸರಣಿದ ಪ್ರತಿಷ್ಠಿತ ಗೌರವನ್ ಶಿರ್ತಾಡಿದ ಅರೆನ ನಿವಾಸ ಆಂಗಿರಸಡ್ ಶನಿವಾರ ಪ್ರದಾನ ಮಲ್ತೆರ್. ಹಿರಿಯ ಸಾಧಕೆರೆನ್ ನಾಡ್ದ್ ಮಲ್ಪುನ ಇಂಚಿನ ಕಾರ್ಯಕ್ರಮೊಲು ಪ್ರಶಂಸಾರ್ಹ ಪಂಡುದು ಪುನರೂರು ಪ್ರತಿಷ್ಠಾನದ ಅಧ್ಯಕ್ಷ ದೇವಪ್ರಸಾದ್ ಪಂಡೆರು. ಸಂಕಷ್ಟಡ್ ಬದುಕು ಕಟ್ಟೊಂಡೆ ತನ್ನ ಜೋಕುಲು ಬೊಕ್ಕ ಬಾಕಿದಕ್ಲೆನ ಜೋಕುಲು ಪಂಡುದು ಬೇಧ ಎಣ್ಣಂದೆ. ಸರ್ವೆರೆನ ಎಡ್ಡೆಗಾದ್ ಯೋಚನೆ ಮಲ್ತುಂಡ ನೆಮ್ಮದಿದ ಬದುಕು ಬದುಕರೆಗ್ ಸಾಧ್ಯ ಪಂಡುದು ಗಂಗಮ್ಮ ಪಂಡೆರು. ಆರು ತಮ್ಮ ಬದುಕುದ ಅಮೂಲ್ಯ ಕ್ಷಣಕುಲೆನ್ ಪಟ್ಟೊಂಡೆರ್. ವಿನೂತನ ಕಾರ್ಯಕ್ರಮಲೆನ್ ಮಲ್ಪುನೇಟ್ ಅಜೆಕಾರು ಸಾಧನೆ ಮಲ್ದೆರ್ ಪಂಡುದು ಯುಗಪುರುಷ ಸಂಪಾದಕ ಭುವನಾಭಿರಾಮ ಉಡುಪ ಅಭಿಪ್ರಾಯ ಪಟ್ಟೊಂಡೆರ್. ನಮ್ಮ ಗ್ರಾಮದ ಹಿರಿಯರೆನ್ ಆದಿಗ್ರಾಮೋತ್ಸವ ಸಮಿತಿ ಗುರುತಿಸಾದ್ ಪೊಸ ಯೋಚನೆಲೆಗ್ ಸ್ಪೂರ್ತಿ ಕೊರಿಲೆಕ್ಕ ಆತುಂಡ್ ಪಂಡುದು ಶಿರ್ತಾಡಿ ಗ್ರಾಮ ಪಂಚಾಯತ್ ಅಧ್ಯಕ್ಷ ಸಂತೋಷ್ ಕೋಟ್ಯಾನ್ ಪಂಡೆರ್. ಬೊಳ್ಳಿ ಪರ್ಬ ಸಂಚಾಲಕ, ಆದಿಗ್ರಾಮೋತ್ಸವ ದ ರೂವಾರಿ ಡಾ.ಶೇಖರ ಅಜೆಕಾರು ಅಧ್ಯಕ್ಷತೆಡಿತ್ತೆರು. ಮಂದಾರ ಪ್ರತಿಷ್ಠಾನದ ಕಾರ್ಯದರ್ಶಿ ಮಂದಾರ ರಾಜೇಶ ಭಟ್, ಗ್ರಾಮೋತ್ಸವ ಸಮಿತಿದ ಗೌರವಾಧ್ಯಕ್ಷ ಸಾಣೂರು ಅರುಣ್ ಶೆಟ್ಟಿಗಾರ್, ವಾಲ್ಪಾಡಿ ಕ್ರಿಕೆಟರ್ಸ್ ಅಧ್ಯಕ್ಷ, ಪತ್ರಕರ್ತ ಅಶ್ರಫ್ ವಾಲ್ಪಾಡಿ ಉಪಸ್ಥಿತರಿತ್ತೆರು. ಉಪನ್ಯಾಸಕ ಶ್ರೀಕಾಂತ್ ಹೊಳ್ಳ ಆರು ಕುಟುಂಬದ ಪರವಾದ್ ಸಂಘಟಕೆರೆಗ್ ಕೃತಜ್ಞತೆ ಮಲ್ತೆರ್. ಡಾ.ಸೋಮಶೇಖರ ಮಯ್ಯ ಸ್ವಾಗತ ಮಲ್ತೆರು. ಅರ್ಚಿತ್ ಕಶ್ಯಪ್,ಅನನ್ಯ ಉಡುಪ, ಶ್ರೀವಾಣಿ ಮಯ್ಯ,ಶಿವಾನಿ, ಶರ್ವಾಣಿ ಕಾರ್ತಿಕ್,ಪ್ರದ್ಯುಮ್ನ ಪದ ಪಂಡುದ್ ರಂಜಿಸಾಯೆರ್. ಶಿಕ್ಷಕಿ ಶರಣ್ಯ ಬೆಳುವಾಯಿ ಕಾರ್ಯಕ್ರಮ ನಿರೂಪಣೆ ಮಲ್ತೆರ್. ಕವಯತ್ರಿ ಮಾನಸ ಪ್ರವೀಣ್ ಭಟ್ ವಂದಿಸಾಯೆರ್.