ಬಂಗಾರ್ ತಯಾರಾಪಿನಲ್ಪ ವಿಷತ್ತ ಪುಗೆ ಪೋಡಿಗೆದ ವಾತಾವರಣ…

ಉಡುಪಿ: ಉಡುಪಿ ನಗರದ ಮಧ್ಯ ಭಾಗಡುಪ್ಪುನ ಬಂಗಾರ್ ತಯಾರಿಕಾ ಘಟಕವೊಂಜಿ ಪಿದಾಯಿಪಾಡುನ ಪುಗೆ ಡಾದ್ ಪರಿಸರೊಡ್ ಪೋಡಿಗೆದ ವಾತಾವರಣ ಸೃಷ್ಟಿ ಮಲ್ತೊಂದುಂಡ್.

ನಗರದ ಪರತ್ತ್ ಕಾರ್ಪೊರೇಷನ್ ಬ್ಯಾಂಕ್(ಇತ್ತೆದ ಯೂನಿಯನ್ ಬ್ಯಾಂಕ್) ರಸ್ತೆಡುಪ್ಪುನ ಈ ಘಟಕದ ಸುತ್ತಮುತ್ತ ಅಂಗಡಿಲು,ದೇವಸ್ಥಾನ, ಮಸೀದಿ, ಸರಕಾರಿ ಶಾಲೆ, ವಸತಿ ಸಮುಚ್ಛಯೊಲಿತ್ತುದ್ ಪರಿಸರ ದಟ್ಟವಾದುಂಡ್.

ಈ ರಾಸಾಯನಿಕಯುಕ್ತ ಈ ಪುಗೆ ಮೂಕು ಕಣ್ಣು ಉರಿ, ಕೆಮ್ಮ ಬರೊಂದಿತ್ತುದ್ . ಅಲ್ಪ ನಡತೊಂದ್ ಪೋಪಿನಕುಲು ಮೂಕು ಮುಚ್ಚೊಂದ್ ನಡಪುನ ಪರಿಸ್ಥಿತಿ ಎದುರಾತುಂಡ್.

ಇಂಚೆನೇ ಬಂಗಾರದ ಘಟಕವೊಂಜಿ ಕೇರಳದ ವಸತಿ ಪ್ರದೇಶಡಿತ್ತಿನೆಡ್ದಾವರ ಅಲ್ಪದ ಸ್ಥಳಿಯ ಆಡಳಿತ ಅಯಿತ್ತ ಅನುಮತಿನ್ ರದ್ದು ಮಲ್ದಿತ್ತುಂಡ್. ಇತ್ತೆ ಈ ರೀತಿ ರಾಸಾಯನಯುಕ್ತ ಪುಗೆನು ಪಿದಾಯಿ ಪಾಡುಂಡ ಆರೋಗ್ಯ ಹಾಳಾಪಿನ ಪರಿಸ್ಥಿತಿ ಉಂಡು.

ಅಂಚಾದ್ ಜಿಲ್ಲಾಡಳಿತ ಬೊಕ್ಕ ಸಂಬಂಧಪಟ್ಡಿನ ಇಲಾಖೆ ಕೂಡಲೆ ಕ್ರಮ ದೆತೊನೊಡ್ ಪಂಡುದ್ ಅಲ್ಪದ ಕೈತಲುದಕುಲ್ ಒತ್ತಾಯ ಮಲ್ದೆರ್.