ಜಮಾಅತೆ ಇಸ್ಲಾಮಿ ಹಿಂದ್ ಉಡುಪಿ ವತಿಡ್ದ್ ಸುಧೃಡ ಕುಟುಂಬ-ಸುಧೃಡ ಸಮಾಜ ವಿಚಾರ ಸಂಕಿರಣ ಕಾರ್ಯಕ್ರಮ

ಜಮಾಅತೆ ಇಸ್ಲಾಮಿ ಹಿಂದ್ ಉಡುಪಿ ವತಿಡ್ದ್ ಸುಧೃಡ ಕುಟುಂಬ-ಸುಧೃಡ ಸಮಾಜ ವಿಚಾರ ಸಂಕಿರಣ ಕಾರ್ಯಕ್ರಮ
: ಸುಧೃಡ ಕುಟುಂಬ-ಸುಧೃಡ ಸಮಾಜ ಪನ್ಪಿನ ವಿಚಾರೊಡ್ ಶುಕ್ರವಾರ ಉಡುಪಿದ ದುರ್ಗಾ ಇಂಟರ್ನ್ಯಾಷನಲ್ ಹೊಟೇಲ್ ಡ್ ವಿಚಾರ ಸಂಕೀರ್ಣ ಆಯೋಜನೆ ಮಲ್ದಿತ್ತೆರ್.

ವಿಚಾರ ಸಂಕೀರ್ಣನ್ ಉದ್ದೇಶಿಸಾದ್ ಪಾತೆರಿನ ಹಿರಿಯ ಸಿವಿಲ್ ನ್ಯಾಯಾಧೀಶೆರಾಯಿನ ಶರ್ಮಿಳಾ ಎಸ್ ಮೇರ್, ಕುಟುಂಬೊಲು ಜೋಕ್ಲೆನ ಬೆಳವಣಿಗೆದ ಕೇಂದ್ರ ಆದುಂಡ್. ಕುಟುಂಬ ಪರಸ್ಪರ ಪ್ರೀತಿಸಾವರೆಗ್, ಸ್ಪಂದನೆ ಮಲ್ಪರೆಗ್ ಕಲ್ಪಾವುಂಡ್. ನಮ್ಮ ಕುಟುಂಬನ್ ಪರಸ್ಪರ ಗೌರಾವಧಾರಡ್ ತೂವೊಂಡ ಸುಧೃಡ ಕುಟುಂಬ ಕಟ್ಟರೆಗ್ ಸಾಧ್ಯ ಆಪುಂಡ್ ಪಂಡುದ್ ಪಂಡೆರ್.

ಹಿರಿಯ ವಕೀಲೆರು ಬೊಕ್ಕ ಚೈಲ್ಡ್ ವೆಲ್ಫೇರ್ ಕಮಿಟಿದ ಚಯರ್ ಮೆನ್ ರೋನಾಲ್ಡ್ ಫುರ್ಟಾಡೊ ಪಾತೆರ್ದ್,ಸಾಮಾಜಿಕ ಸುಧಾರಣೆಗ್ ಕುಟುಂಬ ಅತೀ ಅಗತ್ಯ. ಭಾರತೀಯ ಸಮಾಜಡ್ ವಿಭಕ್ತ, ಅವಿಭಕ್ತ ಕುಟುಂಬೊಲುಂಡ್. ಕುಟುಂಬೊಲೆಡ್ ಇಂಚಪ್ಪುದ ದಿನಕ್ಲೆಡ್ ಮೌಲ್ಯನ್ ಮದತ್ತಿಲೆಕ್ಕ ತೋಜುಂಡ್. ಸುಧೃಡ ಕುಟುಂಬಡುಪ್ಪುನ ಜೋಕುಲು ಹಿರಿಯರೆಡ್ದ್ ಪ್ರೀತಿ, ವಿಶ್ವಾಸ ಪಡೆತೊಂದ್ ಬಲಾಢ್ಯೆರಾದ್ ಬುಲೆವೆರ್. ಇಂಚಪ್ಪೊಗ್ ವಿಭಕ್ತ ಕುಟುಂಬೊಲೆಡ್ ಜೋಕ್ಲೆಗ್ ಈ ಅವಕಾಶಲ್ ಕಡಮೆ.

ಅವಿಭಕ್ತ ಕುಟುಂಬಡ್ ಮಾತೆರ್ನೊಟ್ಟುಗ್ ಜೋಕುಲು ಬೆರೆಯುನೆಡ್ದಾವರ ಅಕ್ಲೆನ ಜ್ಞಾನ ಜಾಸ್ತಿ ಆಪುಂಡ್. ಸಾಮಾಜಿಕ ಕುಟುಂಬಗ್ ಮಸ್ತ್ ಪ್ರಾಮುಖ್ಯತೆ ಉಂಡು ಪಂಡೆರ್. ಬಾಲೆ ಪುಟ್ಟಿನಪಗ ಐಕ್ ಮಾನವೀಯ ಗುಣ ಕೊರ್ದ್ ಬುಲೆಪಾವುನವ್ವ್ ಮಾನವ ಬೆಳವಣಿಗೆಗ್ ಕುಟುಂಬ ಅತೀ ಅಗತ್ಯವಾದುಂಡ್. ಪೋಷಕೆರು ಜೋಕ್ಲೆನೊಟ್ಟುಗ್ ಸಮಯ ಕೊರ್ರೆಗ್ ಪ್ರಯತ್ನ ಮಲ್ಪೊಡ್ ಪಂಡುದ್ ಪಂಡೆರ್.

ಅಧ್ಯಕ್ಷೀಯ ಭಾಷಣ ಮಲ್ತಿನ ಶಾಂತಿ ಪ್ರಕಾಶನದ ವ್ಯವಸ್ಥಾಪಕೆರಾಯಿನ ಮುಹಮ್ಮದ್ ಕುಂಞ ಪಾತೆರ್ದ್, ಸಮಾಜದ ಪ್ರಬಲ ಸಂಸ್ಥೆ ಕುಟುಂಬ. ಆಂಚಾದ್ ಕುರಾನ್ ಡ್ ಕುಟುಂಬ ಸಂಬಂಧೊಲೆನ್ ಹಾಳು ಮಲ್ಪೊಡ್ಚಿ ಪಂಡುದ್ ಪಂತುಂಡ್. ಕುಟುಂಬ ಶಿಥಿಲವಾಂಡ ಸಮಾಜ ಹಾಳಾಪುಂಡ್.

ಸಮಾಜಡುಪ್ಪುನ ಎಡ್ಡೆ ವ್ಯಕ್ತಿಲೆನ ಪಿರಾವುಡ್ ಒಂಜಿ ಎಡ್ಡೆ ಕುಟುಂಬ ಇಪ್ಪುಂಡ್. ಅವ್ವೇ ರೀತಿ ಕೆಟ್ಟ ವ್ಯಕ್ತಿನ ಪಿರಾವುಡ್ ಕೆಟ್ಟ ಕುಟುಂಬ ಇಪ್ಪುಂಡ್.ಕುಟುಂಬಡ್ ನಿಗೂಢತೆಲು ಇಪ್ಪಂದೆ ಪಾರದರ್ಶಕತೆ ಇತ್ತುಂಡ ಸುಧೃಡ ಕುಟುಂಬ ನಿರ್ಮಾಣ ಸಾಧ್ಯ ಆಪುಂಡ್. ದಂಪತಿಲೆನ ನಡುಟ್ ಒವ್ವೇ ನಿಗೂಢತೆ ಇಪ್ಪರೆ ಬಲ್ಲಿ ಇಂಚ ಇತ್ತುಂಡ ಮಾತ್ರ ಕುಟುಂಬ ಸುಧಾರಣೆ ಆಪುಂಡ್ ಪಂಡೆರು.

ಉಡುಪಿದ ಮಹಿಳಾ ಪೊಲೀಸ್ ಠಾಣೆದ ಸಬ್ ಇನ್ಸ್ ಪೆಕ್ಟರ್ ವೈಲೆಟ್ ಫೆಮಿನಾ ಮೇರ್ ಕಜ್ಜೊಗ್ ಶುಭಕೋರಿಯೆರ್. ಕಾರ್ಯಕ್ರಮಡ್ ಜಮಾಅತೆ ಇಸ್ಲಾಮಿ ಹಿಂದ್ ಉಡುಪಿ ಘಟಕದ ಅಧ್ಯಕ್ಷೆರಾಯಿನ ನಿಸಾರ್ ಉಡುಪಿ ಪ್ರಸ್ತಾವಿಕ ಬೊಕ್ಕ ಸ್ವಾಗತ ಭಾಷಣ ಮಲ್ತೆರ್.ವಜಿದಾ ಉಡುಪಿ ಧನ್ಯವಾದ ಕೊರಿಯೆರ್. ಅಬ್ದುಲ್ ಅಝೀಝ್ ಉದ್ಯಾವರ ಕಾರ್ಯಕ್ರಮ ನಿರೂಪಣೆ ಮಲ್ತೆರ್.