ರಾಜ್ಯ ಬಜೆಟ್: ಸಮುದಾಯ ಬಾನುಲುಗುಲಾ ಪಾಲ್ ಉಪ್ಪಡ್.

ಸಮುದಾಯದ ಅಭಿವೃದ್ಧಿಗಾದ್ ಶ್ರಮಿಸಾವೊಂದ್ ಧ್ವನಿ ಉಪ್ಪಂದಿನ ಸಮುದಾಯಲೆಗ್ ಧ್ವನಿ ಒದಗಿಸಾವುನ ಪರಿಣಾಮಕಾರಿ ಮಾಧ್ಯಮ ಆತುಂಡ್ ಸಮುದಾಯ ಬಾನುಲಿ. ಉಂದು ನಿಜವಾಯಿನ ಅರ್ಥಡ್ ಜನಕ್ಲೆಗಾದ್ ಜನಕ್ಲೆಡ್ದೇ ನಡಪುನ ಜನಕ್ಲೆನ ಬಾನುಲಿ. ಸಮಾಜದ ಮುಖ್ಯವಾಹಿನಿಡ್ದ್ ದೂರ ಒರಿದಿನ ಸಮುದಾಯಲೆಗುಲಾ ಒಂಜಿ ಧ್ವನಿ ಉಂಡು, ಅನುಭವ ಉಂಡು. ಅವ್ವೆನ್ ಬಾಕಿದಕ್ಲೆನೊಟ್ಟುಗ್ ಸಮರ್ಥವಾದ್ ಪಟ್ಟೊನರೆಗ್ ಸಮುದಾಯ ಬಾನುಲಿ ಸಹಕಾರಿ.

ಕೇಂದ್ರ ಸರ್ಕಾರ ಇಂಚಪ್ಪೊಗ್ ವರ್ಷಡ್ ಆಕಾಶವಾಣಿ & ದೂರದರ್ಶನ ಕೇಂದ್ರೊಲೆನ್ ಪೊಸತಾದ್ ಆರಂಭ ಮಲ್ತೊಂದಿಜ್ಜಿ. ಈ ರಡ್ಡ್ ಮಾಧ್ಯಮೊಲು ಮಲ್ಪೊಡಾಯಿನ ಕೆಲಸಲೆನ್ ಖಾಸಗಿ ಬಾನುಲಿ & ಟಿವಿ ಚಾನೆಲ್‌ ಲೆಗ್ ಕೊರ್ಪಿನೇತ್ತೊಟ್ಟುಗ್ ಹೆಚ್ಚಿಗೆ ಜವಾಬ್ದಾರಿ ಕೊರ್ತುಂಡ್. ಅತ್ತಾವಂದೆ , ಬಾನುಲಿ ಕ್ಷೇತ್ರಡ್ ಸಮುದಾಯ ಬಾನುಲಿಲು ಬೊಕ್ಕ ಮೆಟ್ರೋ ಮಹಾನಗರ ಗ್ ಕಮರ್ಷಿಯಲ್ ಎಫ್ ಎಂ ಕೇಂದ್ರಲೆನ್ ಆರಂಭ ಮಲ್ತುದ್ ಜನಕ್ಲೆನ ಬೇಡಿಕೆಲೆನ್ ಪೂರೈಸಾವರೆಗ್ ಕೇಂದ್ರ ಸರ್ಕಾರ ಅನುಮತಿ ಕೊರೊಂದ್ ಬರೊಂದುಂಡ್.

ಇಂಚಪ್ಪದ ವರ್ಷಲೆಡ್ ಬಹುತೇಕ ಜಿಲ್ಲೆಲೆಡ್ ಶಿಕ್ಷಣ ಸಂಸ್ಥೆಲು ಬೊಕ್ಕ ಸರ್ಕಾರೇತರ ಸಂಸ್ಥೆಲು (ಎನ್.ಜಿ.ಒ) ಜಿಲ್ಲಾ ಬೊಕ್ಕ ತಾಲ್ಲೂಕು ಕೇಂದ್ರಲೆಡ್ ಸಮುದಾಯ ಬಾನುಲಿಲೆನ್ ಆರಂಭ ಮಲ್ದುಂಡ್. ಇಡೀ ದೇಶಡ್ 439ಕ್ ಲಾ ಜಾಸ್ತಿ ಸಮುದಾಯ ಬಾನುಲಿಲು ಇತ್ತುಂಡ ಕರ್ನಾಟಕಡ್ ಸುಮಾರು 24 ಸಮುದಾಯ ಬಾನುಲಿಲು ಕಾರ್ಯನಿರ್ವಹಣೆ ಮಲ್ರೊಂದುಂಡ್.

ಸ್ವತಃ ಸುದ್ದಿ ಸಂಗ್ರಹ ಮಲ್ತುದ್ ಮಲ್ಪೊಡಾಯಿನ ವಾರ್ತೆದ ಪ್ರಸಾರ ಒಂಜಿ ಬುಡುದ್ ಬಿಟ್ಟು ಬಾಕಿದ ಮಾತಾ ವಿಷಯಲೆನ್ ಸಮುದಾಯ ಬಾನುಲಿಲು ಪ್ರಸಾರ ಮಲ್ಪುವಾ. ಸ್ಥಳೀಯೆರೆನ ಸಹಭಾಗಿತ್ವಡ್ ಮಾಹಿತಿ ಬೊಕ್ಕ ಪ್ರಸಾರ ಸಚಿವಾಲಯದಜ ನಿಯಮಾವಳಿ ಅನುಸಾರ ಶಿಕ್ಷಣ, ಆರೋಗ್ಯ, ಕೃಷಿ, ಕಲೆ, ಸಾಹಿತ್ಯ, ಕ್ರೀಡೆ, ಸಾಂಸ್ಕೃತಿಕ ಬೊಕ್ಕ ಮನರಂಜನೆದ ಕಾರ್ಯಕ್ರಮಲೆನ್ ಪ್ರಸಾರ ಮಲ್ತೊಂದುಂಡ್ ವಿಶೇಷವಾದ್ ಸರ್ಕಾರದ ಬೇತೆ ಬೇತೆ ಇಲಾಖೆದ ಅಭಿವೃದ್ಧಿ ಕಾರ್ಯಕ್ರಮಲೆನ್ ಪ್ರಸಾರ ಮಲ್ಪರೆಗ್ ಒತ್ತುಕೊರೊಂದ್ ಬರೊಂದುಂಡ್. ಕರ್ನಾಟಕ ಸರಕಾರದ ಪ್ರಾಯೋಜಕತ್ವಡ್ ಗ್ರಾಮೀಣ ಪರ್ಪಿನ ನೀರು & ನೈರ್ಮಲ್ಯ ಇಲಾಖೆಧ ಯೋಜನೆಲೆನ ಬಗ್ಗೆ ಕಾರ್ಯಕ್ರಮಲೆನ್ ನಿರಂತರವಾದ್ ಕೆಲವ್ ವರ್ಷಡಿಂಚಿ ಪ್ರಸಾರ ಮಲ್ತುದುಂಡ್.. ಆಂಡ ದುರದೃಷ್ಟಕರ ಸಂಗತಿ ಪಂಡ ಪ್ರಾದೇಶಿಕ ಮಟ್ಟೊಡ್ ಮಲ್ಪುನ ಸಮುದಾಯದ ಅಭಿವೃದ್ಧಿಪರವಾದುಪ್ಪುನ ಸಮುದಾಯ ಬಾನುಲಿದ ಕಾರ್ಯೊಲೆಗ್ ಸರಕಾರದ ನೆರವು ನಿರಂತರವಾದ್ ಸಿಕ್ಕೊಂದಿಜ್ಜಿ.
ಸಮುದಾಯ ಬಾನುಲಿಲೆನ್ ಬುಲೆಪಾವೊಡ್ ಪಂಡುದ್ ಕೇಂದ್ರ ಸರ್ಕಾರದ ಆಶಯ. ಮಸ್ತ್ ಸಲ ಕೇಂದ್ರ ಸರ್ಕಾರ ರಾಜ್ಯ ಸರ್ಕಾರಲೆಗ್ ಪತ್ರ ಬರೆದ್ ಸ್ಥಳೀಯ ಸಮುದಾಯ ಬಾನುಲಿಲೆನ್ ಉತ್ತೇಜಿಸಾವರೆಗ್ ಆರ್ಥಿಕ ಬಲ ತುಂಬುನ ವಿಶೇಷ ಪ್ರಾಜೆಕ್ಟ್ಗ್ ಲೆನ್ ಕೊರೊಡುಂದ್ ಸೂಚಿಸಾದುಂಡ್. ಆಂಡ ಕೇಂದ್ರ ಸರ್ಕಾರದ ಈ ಮನವಿಗ್ ರಾಜ್ಯ ಸರ್ಕಾರೊಲು ನನಲಾ ಮಾನ್ಯ ಮಲ್ಪಂದಿನವ್ ವಿಷಾದದ ಸಂಗತಿ. ರಾಜ್ಯದ ಗ್ರಾಮೀಣ ಪ್ರದೇಶಲೆನ ಸಮುದಾಯ ಅಭಿವೃದ್ಧಿ ಕಾರ್ಯಲೆಗ್ ಮಾಹಿತಿನ್ ಒದಗಿಸಾವುನ ಉದ್ದೇಶಡ್ ಆರಂಭ ಮಲ್ದಿನ ‘ನಮ್ಮ ಬಾನುಲಿ’ ಯೋಜನೆನ್ ಇಂಚಪ್ಪದ ವರ್ಷೊಲೆಡ್ ಸ್ಥಗಿತ ಮಲ್ದಿತ್ತುದ್ ಉಂದೆನ್ ಮರುಪರಿಶೀಲನೆ ಮಲ್ಪುನ ಅಗತ್ಯ ಉಂಡು. ವಾರ್ಷಿಕ ಮಾಧ್ಯಮ ಯೋಜನೆಡ್ ಸಮುದಾಯ ಬಾನುಲಿಲೆನ್ ಸೇರ್ಪಾವುನ ಮುಖೇನ ಅಯಿತ್ತ ಸೇವೆನ್ ಸದ್ಬಳಕೆ ಮಲ್ತೊನರೆಗ್ ರಾಜ್ಯದ ವಾರ್ತಾ ಬೊಕ್ಕಸಾರ್ವಜನಿಕ ಸಂಪರ್ಕ ಇಲಾಖೆಗ್ ಕೇಂದ್ರ ಮಾಹಿತಿ ಬೊಕ್ಕ ಪ್ರಸಾರ ಸಚಿವಾಲಯಡ್ದ್ ಆದೇಶ ಬತ್ತುದ್ ಒಂಜಿ ವರ್ಷ ಕರಿಂಡಲಾ ರಾಜ್ಯ ಸರಕಾರ ಒವ್ವೇ ಕ್ರಮ ದೆತೊನುಜಿ. ಬಾಕಿದ ಮಾಧ್ಯಮಲೆಗ್ ಕೊರ್ಪಿನ ಸರಕಾರಿ ಜಾಹೀರಾತುಲೆನ್ ಕೊರೊಂದಿಜ್ಜಿ., ಈ ಸರ್ತಿಯಾಂಡಲಾ ರಾಜ್ಯ ಸರಕಾರ ಧ್ವನಿ ಉಪ್ಪಂದಿನಕ್ಲೆಗ್ ಧ್ವನಿ ಕೊರ್ಪಿನ ಸಮುದಾಯ ಬಾನುಲಿಲೆಗಾದ್ ಸೂಕ್ತ ಯೋಜನೆಲೆನ್ ರೂಪಿಸಾವುನ ಅಗತ್ಯ ಉಂಡು. ಆಂಚಾದ್ ರಾಜ್ಯ ಸರ್ಕಾರ ತನ್ನ ಬಜೆಟ್‌ ಡ್ ಒತ್ತು ಕೊರ್ದ್ ಸಮುದಾಯ ಬಾನುಲಿಲರನ ಕಾರ್ಯೊನ್ ಉತ್ತೇಜಿಸಾವೊತುಂಡ್. ಸರಕಾರದ ಮಾತಾ ಯೋಜನೆಲೆನ್ ಸ್ಥಳೀಯ ಸಮುದಾಯಗ್ ತಲುಪಿಸಾವುನ ಸಮುದಾಯ ಬಾನುಲಿಲೆನ ಸೇವೆನ್ ಪರಿಗಣಿಸಾದ್ ಅಭಿವೃದ್ಧಿದ ಕನಸುನ್ ನನಸು ಮಲ್ಪೊಡಾತುಂಡ್.

ಡಾ.ರಶ್ಮಿ ಅಮ್ಮೆಂಬಳ
ಸ್ಥಾಪಕಾಧ್ಯಕ್ಷರು,
ಕರ್ನಾಟಕ ಸಮುದಾಯ ಬಾನುಲಿ ಕೇಂದ್ರಗಳ ಸಂಘ