ನರಮಾನಿ ಬದುಕ್ ಏತ್ ವರ್ಷ ಬದುಕಿಯೇ ಪನ್ಪಿನೇಡ್ದ್ ಎಂಚ ಬದುಕುಯೇ ಪನ್ಪಿನವ್ ಬಾರೀ ಮುಖ್ಯವಾಯಿನವ್ವ್ ಪಂಡುದ್ ಸಿರಿ ತುಳುವ ಚಾವಡಿದ ಮಾನಾದಿಗೆದ ಗುರ್ಕಾರೆರಾಯಿನ ಡಾ.ವೈ. ಎನ್. ಶೆಟ್ಟಿ ಪಂಡೆರ್. ಆರು ಒಡಿಪುದ ರೆಡ್ ಕ್ರಾಸ್ ಡ್ ನಡತಿನ ಇಂಚಪ್ಪೊಗ್ ಈ ಲೋಕ ಬುಡುದ್ ಪರಲೋಕಗ್ ಸಂದಿನ ಸಿರಿ ತುಳುವ ಚಾವಡಿದ ಸ್ಥಾಪಕ ಗುರ್ಕಾರೆರಾಯಿನ ಕುದಿ ವಸಂತ ಶೆಟ್ಟಿ ಮೆರೆಗ್ ನುಡಿನಮನ ಸಲ್ಲಿಸಾದ್ ಪಾತೆರಿಯೆರ್.
ಸಮಾಜಡ್ ಶಿಕ್ಷಣ ಕೊರ್ಪಿನವ್ ಮಹಾಮಲ್ಲ ಬೇಲೆ, ಗ್ರಾಮಮಟ್ಟಡ್ ಶಾಲೆನ್ ಕಟ್ಟಾದ್, ಸಾರಗಟ್ಟಲೆ ಜೋಕುಲೆಗ್ ಶಿಕ್ಷಣ ಕೊರ್ಪಾವುನ ಮೂಲಕ ಅಕ್ಲೆಗೊಂಜಿ ಬದುಕ್ ಕೊರ್ಪಾದಿನಿ ಮಾತ್ರ ಅತ್ತಾವಂದೆ, ಗ್ರಾಮಮಟ್ಟದ ಶಾಲೆನ್ ರಾಷ್ಟ್ರಮಟ್ಟಗ್ ಕೊನೊದ್, ರಾಷ್ಟ್ರಮಟ್ಟದ ಮಾನಾದಿಗೆನ್ ಪಡೆಯಿನಾರ್ ಕುದಿವಸಂತಶೆಟ್ರು. ಸೂರ್ಯದೇವೆರ್ ಕಾಂಡೆ ಉದಿತುದ್ ಬಯ್ಯಗ್ ಕಂತುನವ್ ಲೋಕನಿಯಮ. ಆಂಡ ಮಧ್ಯಾನದ ಪೊರ್ತುಗೇ ಕಂತಿಯೆರೆಡ ಏತ್ ಮಲ್ಲ ಆಘಾತ ಆಪುಂಡ, ಅಂಚೆನೇ ವಸಂತಶೆಟ್ರು ಅಗತಿನವ್ ಅರೆನ ಸಂಸಾರೊಗ್ ಮಾತ್ರ ಅತ್ತ್, ಇಡೀ ಸಮಾಜೊಗೇ ಒಂಜಿ ರೀತಿದ ನಷ್ಟ ಆತುಂಡ್. ನರಮಾನಿನ ಆಯುಷ್ಯ ಎರೆಗ್ ಏತ್ ಪನ್ಪಿನವ್ ಪೂರ್ವನಿರ್ಧರಿತ ಅಂಚಾದ್ ನಮ ಅವ್ವೆನ್ ಒತ್ತೊನೊಡಾಪುಂಡ್ ಪಂಡುದ್ ಅಗತಿನ ದಿವ್ಯಚೇತನಗ್ ನುಡಿಪುರ್ಪದ ನಮನ ಸಲ್ಲಿಸಾದ್, ಅಕ್ಲೆನ ಕುಟುಂಬಗ್ ಅರೆನ್ ಅಗತಿನ ಬೇನೆನ್ ಮದಪುನ ಶಕ್ತಿ ಕೊರಡ್ ಪಂಡುದ್ ದೇವೆರೆಡ ಸುಗಿತೊಂಡೆರ್.
ಈ ಪೊರ್ತುಡ್ ರೆಡ್ ಕ್ರಾಸ್ ಸಂಸ್ಥೆದ ಉಡುಪಿದ ಮುಖ್ಯಸ್ಥೆರಾಯಿನ ರಾಜೀವ ಶೆಟ್ಟಿ, ಸಿರಿ ತುಳುವ ಚಾವಡಿ ಒಡಿಪುದ ಗುರ್ಕಾರೆ ಡಾ. ಗಣನಾಥ ಎಕ್ಕಾರ್, ಸಿರಿ ತುಳುವ ಚಾವಡಿದ ಗೈಮೆದ ಗುರ್ಕಾರೆರಾಯಿನ ಈಶ್ವರ್ ಶೆಟ್ಟಿ ಚಿಟ್ಪಾಡಿ, ಡಾ. ನಿಕೇತನ, ಲಯನ್ಸ್ ದ ಮಾಜಿ ಗವರ್ನರ್ ವಿ. ಜಿ. ಶೆಟ್ಟಿ ಮೊಕುಲು ವಸಂತ ಶೆಟ್ರೆನ ಬದುಕುದ ಆದರ್ಶೊನ್ ಕೊಂಡಾಡುದ್ ನುಡಿನಮನ ಸಲ್ಲಿಸಾಯೆರ್
.
by 