ಮಲ್ಪೆ ಬೀಚ್ ಗ್ ಬರ್ಪಿನ ಪ್ರವಾಸಿಗೆರೆಗ್ ಅಗತ್ಯ ಮೂಲಭೂತ ಸೌಕರ್ಯ ಕೊರ್ಲೆ.

ಮಲ್ಪೆ ಕಡಲ ತೀರಗ್  ಬರ್ಪಿನ  ಪ್ರವಾಸಿಗೆರೆಗ್  ಅಗತ್ಯ ಮೂಲಭೂತ ಸೌಕರ್ಯಲೆನ್  ಕಲ್ಪಿಸಾಲೆ::ಜಿಲ್ಲಾಧಿಕಾರಿ ಡಾ.ಕೆ.ವಿದ್ಯಾಕುಮಾರಿ
ಉಡುಪಿ, ನವೆಂಬರ್ 09 (ಕವಾ): ಮಲ್ಪೆ ಕಡಲ ತೀರಗ್ ಬರ್ಪಿನ  ಪ್ರವಾಸಿಗೆರೆನ ಸಂಖ್ಯೆ   ದಿನಡ್ದ್  ದಿನ ಜಾಸ್ತಿ ಆವೊಂದುಂಡ್.. ಪ್ರವಾಸಿಗೆರೆನ  ಅನುಕೂಲಗ್ ಅಗತ್ಯವಿಪ್ಪುನ  ಮೂಲ ಸೌಕರ್ಯಲೆನ  ಕಾಮಗಾರಿಲೆನ್ ಮಲ್ಪರೆಗ್ , ದುಂಬು ಬರೊಡ್  ಪಂಡುದು ಅಧಿಕಾರಿಲೆಗ್  ಜಿಲ್ಲಾಧಿಕಾರಿ ಡಾ. ಕೆ ವಿದ್ಯಾಕುಮಾರಿ ಸೂಚನೆಕೊರಿಯೆರು.
ಆರು ಶುಕ್ರವಾರ ಬಯ್ಯಗ್  ನಗರದ ಮಣಿಪಾಲದ ರಜತಾದ್ರಿದ  ಜಿಲ್ಲಾಧಿಕಾರಿ ಕಚೇರಿ ಸಭಾಂಗಣಡ್  ನಡತಿನ ಮಲ್ಪೆ ಅಭಿವೃದ್ಧಿ ಸಮಿತಿ ಸಭೆತ್ತ  ಅಧ್ಯಕ್ಷತೆಡಿತ್ತುದ್  ಪಾತೆರಿಯೆರು.
ಮಲ್ಪೆ, ಪಡುಕೆರೆ ಬೀಚ್ ಪ್ರದೇಶದ ಸ್ವಚ್ಚತಾ ನಿರ್ವಹಣೆ, ಫುಡ್‌ಕೋರ್ಟ್ , ಶೌಚಾಲಯ, ಪಾರ್ಕಿಂಗ್ ವ್ಯವಸ್ಥೆ ಸೇರಿನಂಚ ಮಾತಾ  ಸೌಲಭ್ಯಲೆನ್   ಬೀಚ್ ಪ್ರದೇಶದ ಮಾಸ್ಟರ್ ಪ್ಲಾನ್ ವರದಿನ್  ಪ್ರವಾಸಿಗೆರೆಗ್ ಅನುಕೂಲ ಆಪಿನ  ರೀತಿಡ್  ಬಂದರು ಬೊಕ್ಕ  ಮೀನುಗಾರಿಕೆ ಚಟುವಟಿಕೆ ಪ್ರದೇಶಲೆನ  ಜಾಗ  ಮೀಸಲು ದೀದ್, ಸಮಗ್ರವಾಯಿನ  ವರದಿನ್  ಶೀಘ್ರವಾದ್  ತಯಾರ್ ಮಲ್ಪೊಡು  ಪಂಡುದು ಅಧಿಕಾರಿಲೆಗ್  ಸೂಚನೆ ಕೊರಿಯೆರು.
ಮಲ್ಪೆ ಕಡಲ ತೀರಡ್  ಪ್ರವಾಸಿಗೆರೆಗ್ ಅನುಕೂಲ ಆಪಿಲೆಕ್ಕ  ಒವ್ವೇ  ಅಭಿವೃದ್ಧಿ ಕಾಮಗಾರಿಲೆನ್ ದೆತೊನಗ ಸುರಕ್ಷತೆಗ್ ಸುರುತ  ಆದ್ಯತೆನ್  ಕೊರ್ಪಿನ ಮೂಲಕ ಕಾಮಗಾರಿಲೆನ್ ಮಲ್ಪೊಡು.. ಇಂಚಪ್ಪದ  ದಿನೊಟ್ ವಾರದ ಕಡೇತ್ತ  ದಿನಟ್  ನಿರೀಕ್ಷೆಗುಲಾ  ಮೀರುದ್ ಜಾಸ್ತಿ ಪ್ರವಾಸಿಗೆರು ರಾಜ್ಯ ಬೊಕ್ಕ  ಪರ ರಾಜ್ಯಲೆಡ್ದ್ ಬರೊಂದುಲ್ಲೆರ್.. ಅಕ್ಲೆಗ್  ಸ್ಥಳೀಯ ಕಡಲ ತೀರದ ಮಾಹಿತಿ ಇಪ್ಪುಜಿ.. ಅಕ್ಲೆಗ್  ಮಾಹಿತಿ ಕೊರ್ರೆಗ್  ಒತ್ತು ಕೊರೊಡು. ಉಂದೆಟಾದ್  ಒವ್ವೇ  ಅವಘಡಕುಲು ಆವಂದಿಲೆಕ್ಕ  ತಪ್ಪಿಸಾವರೆಗ್  ಸಾಧ್ಯ ಪಂಡೆರು.
ಬೀಚ್ ಪ್ರದೇಶಲೆಡ್  ಪ್ರವಾಸಿಗೆರೆನ  ಸುರಕ್ಷತೆ ಬೊಕ್ಕ ಭದ್ರತೆಗಾದ್ ಅಗತ್ಯವಿಪ್ಪುನ  ಜೀವ ರಕ್ಷಕ ಸಿಬ್ಬಂದಿಲೆನ್ ಆಯ್ಕೆ ಮಲ್ತುದ್ , ಅಕ್ಲೆಗ್  ಅಗತ್ಯವಿಪ್ಪುನ  ತರಬೇತಿ ಕೊರ್ದ್  ಅಕ್ಲೆನ್  ಹೊರಗುತ್ತಿಗೆ ಆದಾರದ ಮಿತ್ತ್ ನೇಮಕ ಮಲ್ಪೊಡ್  ಪಂಡುದ್ , ಸೆಂಟ್ ಮೇರೀಸ್ ದ್ವೀಪಗ್ ಅಗತ್ಯವಿಪ್ಪುನ ಜೀವ ರಕ್ಷಕ ಸಿಬ್ಬಂದಿಲೆನ್  ನಿಯೋಜನೆ ಮಲ್ಪೊಡ್  ಪಂಡೆರು .
ಬೀಚ್ ಪ್ರದೇಶಲೆಡ್  ಹೈ ಮಾಸ್ಟ ಬೀದಿ ದೀಪಲೆನ್ ಅಳವಡಿಸಾವೊಡ್  ಅಯಿತ್ತ  ನಿರ್ವಹಣೆನ್  ಅಪಗಪಗ ಮಲ್ಪುನೊಟ್ಟುಗ್  ಬೊಲ್ಪುದ ಅಭಾವ ಆವಂದಿಲೆಕ್ಕ ಎಚ್ಚರ ಮಲ್ಪೊಡ್  ಪಂಡೆರು .

ಮಲ್ಪೆ ಬೀಚ್ ಪ್ರದೇಶಡ್  ಜಲ ಸಾಹಸ ಚಟುವಟಿಕೆಲು ನಡತೊಂದುಪ್ಪನಗ  ಗುತ್ತಿಗೆದಾರೆರು ಬೋಟ್ ನ ಸಾಮರ್ಥ್ಯ ಮೀರುದ್ ಹೆಚ್ಚಿಗೆ  ಪ್ರವಾಸಿಗೆರೆನ್ ಲೆತೊಂದ್ ಪೋಪಿನ   ಬಗ್ಗೆ ದೂರುಲು  ಕೇಂದ್ ಬರ್ಪುಂಡ್. ಗುತ್ತಿಗೆದಾರೆರು ನಿಯಮ ಮೀರುದ್  ಬೊಕ್ಕ  ಸಾಮರ್ಥ್ಯ ಮೀರುದ್  ಪ್ರವಾಸಿಗೆರೆನ್  ಬೋಟ್ ಡ್  ಲೆಸೊಂದ್  ಬತ್ತುಂಡ  ದಂಡ ವಿಧಿಸಾವುನೊಟ್ಟುಗ್   ನೋಟಿಸ್ ಕೊರೊಡು ಪಂಡುದ್  ಸೂಚನೆ ಕೊರಿಯೆರು.
ಸಭೆಟ್  ಶಾಸಕ ಯಶ್‌ ಪಾಲ್ ಎ ಸುವರ್ಣ, ನಗರಸಭಾ ಅಧ್ಯಕ್ಷ ಪ್ರಭಾಕರ ಪೂಜಾರಿ, ನಗರಸಭೆ  ಸದಸ್ಯರಾಯಿನ ಯೋಗೀಶ್ ಸಾಲಿಯಾನ್, ಲಕ್ಷ್ಮಿ ಮಂಜುನಾಥ್, ವಿಜಯ ಕೊಡವೂರು, ಜಿಲ್ಲಾ ಪಂಚಾಯತ್ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಪ್ರತೀಕ್ ಬಾಯಲ್, ಜಿಲ್ಲಾ ಪೊಲೀಸ್ ಅಧೀಕ್ಷಕ ಡಾ. ಅರುಣ್ ಕೆ, ಪೌರಾಯುಕ್ತ ಉದಯ್ ಕುಮಾರ್ ಶೆಟ್ಟಿ,  ಜಿಲ್ಲಾ ಮಟ್ಟದ ಅಧಿಕಾರಿಲು ಉಪಸ್ಥಿತರಿತ್ತೆರು.