ಸ್ವಾವಲಂಬಿ ಭಾರತದ ಬಗ್ಗೆ ಯೋಚನೆ ಮಲ್ಪುನವ್ವೆಡ್ ದುಂಬು ನಮ ಸ್ವಾವಲಂಬಿಯಾದ್ ಬದುಕರೆಗ್ ಕಲ್ಪೊಡ್..ವಿನಾಯಕ್ ರಾವ್ ಕನ್ಯಾಡಿ

ಬದುಕುಡ್ ನಂಬಿಕೆ ದೀದ್ ಬದುಕೊಡ್.ಸಮಾಜೊಡಿತ್ತಿನ ಕುಂದು ಕೊರತೆಲೆನ್ ದೂರ ಮಲ್ತುದ್ ಎಡ್ಡೆ ಸಮಾಜನ್ ಕಟ್ಟರೆಗ್ ನಿಕ್ಲೆನ್ ತೊಡಗಿಸಾವೊನ್ಲೆ ಪಂಡುದ್ ಸೇವಾಭಾರತಿ ಕನ್ಯಾಡಿದ ಅಧ್ಯಕ್ಷೆರಾಯಿನ ಶ್ರೀ ವಿನಾಯಕ್ ರಾವ್ ಕನ್ಯಾಡಿ ಮೇರ್ ಕಾಲೇಜಿದ ಜೋಕ್ಲೆಗ್ ಉಪನ್ಯಾಸ ಕೊರಿಯೆರ್.ಆರು ಡಿಸೆಂಬರ್ 13 ತಾರೀಕುದಾನಿ ಶ್ರೀಮತಿ ರುಕ್ಮಿಣಿ ಶೆಡ್ತಿ ಸ್ಮಾರಕ ನ್ಯಾಷನಲ್ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜು ಬಾರ್ಕೂರುಡ್ ರಾಷ್ಟ್ರೀಯ ಸೇವಾ ಯೋಜನೆದ ಜೋಕುಲೆಗ್ ನಡತಿನ ವಿಶೇಷ ಉಪನ್ಯಾಸ ಕಾರ್ಯಕ್ರಮನ್ ಬೊಲ್ಪು ಪೊತ್ತಾದ್ ಉದಿಪನ ಮಲ್ತುದ್ ಪಾತೆರಿಯೆರ್.
ಸ್ವಾವಲಂಬಿ ಭಾರತದ ಬಗ್ಗೆ ಯೋಚನೆ ಮಲ್ಪುನವ್ವೆಡ್ ದುಂಬು ನಮ ಸ್ವಾವಲಂಬಿಯಾದ್ ಬದುಕರೆಗ್ ಕಲ್ಪೊಡ್ ಪಂಡೆರ್.
ಕಾರ್ಯಕ್ರಮಡ್ ಮಲ್ಲ ಬಿನ್ನೆರಾದಿತ್ತಿನ ಉಡುಪಿ ನಗರಸಭಾ ಸದಸ್ಯೆರಾಯಿನ ವಿಜಯ ಕೊಡವೂರು ಪಾತೆರ್ದ್ ಇಂಚಪ್ಪೊಗ್ ಕಾಲೇಜು ಜೋಕುಲು ಅಪ್ಪೆ ಅಮ್ಮೆರೆನ ಪಾತೆರ ಕೇನಂದೆ ಸಾದಿ ತತ್ತುದ್ ಪೋವೊಂದುಲ್ಲೆರ್.ಹಿರಿಯೆರೆನ್ ಗೌರವಿಸಾವುನ ಬದಲಾದ್ ಕೆಟ್ಟ ಚಟೊಕ್ ಬಲಿಯಾದ್ ತಾನು ಹಾಳಾಪಿನತ್ತಾವಂದೆ ದೇಶೊನುಲಾ ಹಾಳು ಮಲ್ಪುನ ಕೆಲಸ ಮಲ್ತೊಂದುಲ್ಲೆರ್.ಅಂಚಿನ ಜೋಕ್ಲೆನ್ ಸರಿ ಸಾದಿಗ್ ಕನತುದ್, ರಾಷ್ಟ್ರೀಯ ಸೇವಾ ಯೋಜನೆದ ಜವನೆರ್ ದೇಶ ಕಟ್ಟುನ ಬೇಲೆನ್ ಮಲ್ಪೊಡಾಪುಂಡ್ ಪಂಡೆರ್.
ಕಾಲೇಜಿದ ಉಪಪ್ರಾಂಶುಪಾಲೆರಾಯಿನ ಮಧು ಎನ್.ಅಧ್ಯಕ್ಷತೆಡಿತ್ತೆರ್.ಎನ್.ಎಸ್.ಎಸ್.ಯೋಜನಾಧಿಕಾರಿ ಶ್ರುತಿ ಆಚಾರ್ಯ, ರಾಧಕ್ರಷ್ಣ ನಾಯಕ್,ಮೋಹನ್ ದಾಸ್ ಬೊಕ್ಕ ಎನ್.ಎಸ್.ಎಸ್.ದ ನಾಯಕೆರಾಯಿನ ವೀಣಾ,ಸೌಜನ್ಯ,ಚೇತನ್,ಪುನೀತ್ ವೇದಿಕೆಡ್ ಉಪಸ್ಥಿತರಿತ್ತೆರ್.ರಾಷ್ಟ್ರೀಯ ಸೇವಾ ಯೋಜನೆದ ಸಂಯೋಜಕೆರಾಯಿನ ಮಂಜುನಾಥ್ ಸ್ವಾಗತ ಮಲ್ತುದ್,ಚೇತನ್ ಕುಮಾರ್ ವಂದನಾರ್ಪಣೆ ಮಲ್ತೆರ್.