ಫೆ.7ಡ್ದ್ ಉಡುಪಿಡ್ ಮಹಿಳಾ ಉದ್ಯಮಿಲೆನ ‘ಪವರ್ ಪರ್ಬ’
ಉಡುಪಿ: ಉಡುಪಿಯ ಮಹಿಳಾ ಉದ್ದಿಮೆದಾರೆರೆನ ಸಂಘಟನೆ ‘ಪವರ್’ ವತಿಡ್ದ್ ಮಹಿಳಾ ಉದ್ಯಮಿಲೆನ ಉತ್ಪನ್ನಲು ಬೊಕ್ಕ ಕೌಶಲ್ಯಗ್ ವೇದಿಕೆಯಾಯಿನ ‘ಪವರ್ ಪರ್ಬ’ ಉಂದುವೇ ಫೆ. 7, 8 ಬೊಕ್ಕ 9ಗ್ ಉಡುಪಿದ ಕ್ರಿಶ್ಚಿಯನ್ ಪಿಯು ಕಾಲೇಜು ಮೈದಾನಡ್ ನಡಪರೆಗುಂಡ್ ಪಂಡುದು ಪವರ್ ಸಂಸ್ಥೆದ ಅಧ್ಯಕ್ಷೆ ತನುಜಾ ಮಾಬೆನ್ ತೆರಿಪಾಯೆರು.
ಈ ಬಗೆಟ್ ಸುದ್ದಿಗೋಷ್ಠಿಡ್ ಮಾಹಿತಿ ಕೊರಿನ ಆರು, ಉಡುಪಿ ಜಿಲ್ಲೆದ ಗ್ರಾಮೀಣ ಬೊಕ್ಕ ನಗರ ಪ್ರದೇಶಲೆನ ಮಹಿಳಾ ಉದ್ಯಮಿಲು ತಯಾರ್ ಮಲ್ತಿನ ವಸ್ತುಲು, ಅಕಲೆನ ಸಂಸ್ಥೆದ ಸೇವೆ, ಕೌಶಲ್ಯ, ಪಾಂಡಿತ್ಯನ್ ಗ್ರಾಹಕರೆನ ಎದುರು ಪ್ರದರ್ಶನ ಮಲ್ತುದ್ ಅಕ್ಲೆನ್ ಒಂಜಿ ಮಲ್ಪುನವ್ವೇ ಪವರ್ ಪರ್ಬದ ಕಲ್ಪನೆಯಾದುಂಡ್ ಪಂಡೆರು.
ಫೆ. 7 ಬಯ್ಯಗ್ 4.30ಕ್ ಜಿಲ್ಲಾಧಿಕಾರಿ ಡಾ.ವಿದ್ಯಾಕುಮಾರಿ ಪವರ್ ಪರ್ಬಗ್ ಚಾಲನೆ ಕೊರ್ರೆಗುಲ್ಲೆರ್. ಪ್ರಗತಿಪರ ರೈತ ಮಹಿಳೆ ಕವಿತಾ ಮಿಶ್ರಾ ಮುಖ್ಯ ಅತಿಥಿಯಾದ್ ಪಾಲ್ ಪಡೆಯರೆಗುಲ್ಲೆರ್. ಎಮ್‌ಎಸ್‌ಎಮ್‌ಇ ಜಂಟಿ ನಿರ್ದೇಶಕ ಕೆ. ಸಾಕ್ರೊಟೀಸ್ ಮಳಿಗೆಲೆನ್ ಉದಿಪನ ಮಲ್ಪರೆಗುಲ್ಲೆರ್. ಕೌಶಲಾಭಿವೃದ್ದಿ ಮಳಿಗೆನ್ ಶಾಸಕ ಯಶ್ಪಾಲ್ ಸುವರ್ಣ ಉದಿಪನ ಮಲ್ಪರೆಗುಲ್ಲೆರ್ .
ಪವರ್ ಪರ್ಬದ ಸಂಯೋಜಕಿ ಸುಗುಣಾ ಸುವರ್ಣ ಪಾತೆರ್ದ್, ಕೇಂದ್ರ ಸರಕಾರದ ಪಿಎಂಎಸ್ ಸ್ಕೀಮ್ ಆಫ್ ಎಂಎಸ್‌ಎಂಇ ಸಹಯೋಗದೊಟ್ಟುಗ್ ಈ ಪವರ್ ಪರ್ಬನ್ ಆಯೋಜನೆ ಮಲ್ತೊಂದಿತ್ತುದ್, ಒಟ್ಟು 150ಕ್ ಲಾ ಜಾಸ್ತಿ ಮಳಿಗೆಲೆನ್ ಮಹಿಳಾ ಉದ್ಯಮಿಲೆಗಾದ್ ವ್ಯವಸ್ಥೆ ಮಲ್ದುಂಡ್. ನೆಟ್ 60 ಮಳಿಗೆಲು ಪಿಎಂಎಸ್ ಸ್ಕೀಮ್ ಆಫ್ ಎಂಎಸ್‌ಎಂಇ ಮಳಿಗೆ.
ಆಭರಣ, ಆಹಾರ, ಚಿತ್ರಕಲೆ, ಕರಕೌಶಲ್ಯ, ವಸ್ತ್ರ ವಿನ್ಯಾಸ, ಗೃಹಾಲಂಕಾರ, ಸೌಂದರ್ಯ ವರ್ಧಕಗಳು, ಕ್ರಿಯಾತ್ಮಕ ವಸ್ತುಲು ಇಂಚಿತ್ತಿನ ವಸ್ತುಲೆನ ಮಳಿಗೆ ಇಪ್ಪುಂಡ್. ಈ ಪವರ್ ಪರ್ಬದ ಪ್ರಚಾರದ ಭಾಗವಾದ್ ಫೆ.5ಗ್ ಬಯ್ಯಗ್ 4.30ಕ್ ರಜತಾದ್ರಿ ಮಣಿಪಾಲಡ್ದ್ ಉಡುಪಿಮುಟ್ಟ ಕಾರು ಬೊಕ್ಕ ಬೈಕ್‌ ರ್ಯಾಲಿ ಆಯೋಜನೆ ಮಲ್ದುಂಡ್. ಪವರ್ ನ ಸದಸ್ಯೆರು ಬೊಕ್ಕ ಪ್ರದರ್ಶಕೆರು ಈ ರ‌್ಯಾಲಿಡ್ ಪಾಲ್ ಪಡೆಯರೆಗುಲ್ಲೆರು.
ಸುದ್ದಿಗೋಷ್ಠಿಡ್ ಸಂಸ್ಥೆದ ಸಂಘಟನಾ ಕಾರ್ಯದರ್ಶಿ ಪ್ರಿಯಾ ಕಾಮತ್, ಕೋಶಾಧಿಕಾರಿ ಪುಷ್ಪಾ ಜಿ.ರಾವ್, ನೋಂದಣಿ ಸಂಯೋಜಕಿ ಸುಪ್ರಿಯಾ ಕಾಮತ್, ಸ್ಥಾಪಕ ಅಧ್ಯಕ್ಷೆ ರೇಣು ಜಯರಾಮ್, ನಿಕಟ ಪೂರ್ವ ಅಧ್ಯಕ್ಷೆರಾಯಿನ ತಾರಾ ತಿಮ್ಮಯ್ಯ, ಸುವರ್ಷಾ ಮಿಂಚ್, ಶೃತಿ ಶೆಣೈ ಉಪಸ್ಥಿತರಿತ್ತೆರು.
by 