ಪದ್ಮಶಾಲಿ ನೇಕಾರ ಪ್ರತಿಷ್ಠಾನಡ್ದ್ ಪತ್ರಿಕಾಗೋಷ್ಠಿ

ಪ್ರಧಾನ ಮಂತ್ರಿ ಶ್ರೀ ನರೇಂದ್ರ ಮೋದಿಜಿ ಅವರ ಆಶಯದಂಚ 2015ಡ್ದ್ ಆಗಸ್ಟ್ 7ತಾರೀಕುದಾನಿ ರಾಷ್ಟ್ರೀಯ ಕೈಮಗ್ಗ ದಿನಾಚರಣೆನ್ ದೇಶದಾದ್ಯಂತ ಆಚರಣೆ ಮಲ್ತೊಂದುಂಡ್. ರಾಜ್ಯ ಸರಕಾರದ ಆಶ್ರಯಡ್ ಬೆಂಗಳೂರುಡ್ ರಾಜ್ಯ ಮಟ್ಟದ ರಾಷ್ಟ್ರೀಯ ಕೈಮಗ್ಗ ದಿನಾಚರಣೆನ್ ಆಚರಿಸಾವುನ ಬುಡ್ದ್ ಜಿಲ್ಲಾ ಕೇಂದ್ರೊಲೆಡ್ ಸರಕಾರದ ಆಶ್ರಯಡ್ ಈ ಕಾರ್ಯಕ್ರಮ ನಡತೊಂದಿಜ್ಜಿ.

ಪದ್ಮಶಾಲಿ / ಶೆಟ್ಟಿಗಾರ ಸಮಾಜದ ಕುಲಕಸುಬು ಕೈಮಗ್ಗ ನೇಕಾರಿಕೆನ್ ಪುನರುಜ್ಜೀವನ ಮಲ್ಪರೆಗ್ ಕಂಕಣ ಬದ್ಧವಾದುಪ್ಪುನ *ಪದ್ಮಶಾಲಿ ನೇಕಾರ ಪ್ರತಿಷ್ಠಾನ
07.08.2022 ತಾರೀಕು ಐತಾರದಾನಿ ಕಲ್ಯಾಣಪುರ ಶ್ರೀ ಆದಿಶಕ್ತಿ ಬ್ರಹ್ಮಲಿಂಗ ವೀರಭದ್ರ ದೇವಸ್ಥಾನಡ್ ಕಾಂಡೆ 8 ಗಂಟೆಡ್ದ್ ಕಾರ್ಯಕ್ರಮ ಬೈಯಮುಟ್ಟ ನಡಪರೆಗುಂಡ್.

ಕಾಂಡೆ 8.00 ಗಂಟೆಗ್ ಉಪಹಾರದೊಟ್ಟುಗ್ ಕಾರ್ಯಕ್ರಮ ಸುರು ಆಪುಂಡ್. 9.00 ಗಂಟೆಗ್ ಪತ್ತನೇ ಕ್ಲಾಸ್ ಬೊಕ್ಕ ಪಿಯುಸಿ ವಿದ್ಯಾರ್ಥಿಲೆನ ಭವಿಷ್ಯ ನಿರ್ಮಾಣಗಾದ್ ಅಕ್ಲೆನ ಬೊಕ್ಕ ಅಕ್ಲೆನ ಪೋಷಕೆರೆನಿಟ್ಟುಗ್ ಸಂವಾದ ಕಾರ್ಯಕ್ರಮ ಆಯೋಜನೆ ಮಲ್ಪೆರ್. ಶಿಕ್ಷಣ ತಜ್ಞೆರಾಯಿನ ಶ್ರೀ ನಾಗರಾಜ್ ಕಟೀಲ್, ದಿನೇಶ್ ಶೆಟ್ಟಿಗಾರ್ ಪರ್ಕಳ, ಸದಾಶಿವ ಗೋಳಿಜೋರಾ ಸಂಪನ್ಮೂಲ ವ್ಯಕ್ತಿಯಾದ್ ಪಾಲ್ ಪಡೆಯರೆಗುಲ್ಲೆರ್. ಜೆಸಿಐ ಇಂಡಿಯಾ ದ ವಲಯ ತರಬೇತುದಾರ ಶಿವಾನಂದ ಶೆಟ್ಟಿಗಾರ್ ಈ ಸಂವಾದನ್ ನಿರೂಪಣೆ ಮಲ್ಪರೆಗುಲ್ಲೆರ್.

ಕಾಂಡೆ 11 ಗಂಟೆಗ್ ಕಾರ್ಯಕ್ರಮದ ಪ್ರಮುಖ ಭಾಗ ರಾಷ್ಟ್ರೀಯ ಕೈಮಗ್ಗ ದಿನಾಚರಣೆ. ಈ ಕಾರ್ಯಕ್ರಮನ್ ಕಲ್ಯಾಣಪುರ ಶ್ರೀ ಆದಿಶಕ್ತಿ ಬ್ರಹ್ಮಲಿಂಗ ವೀರಭದ್ರ ದೇವಸ್ಥಾನದ ಪ್ರಧಾನ ಮೊಕ್ತೇಸರೆರಾಯಿನ ಶ್ರೀ ಜ್ಯೋತಿಪ್ರಸಾದ್ ಶೆಟ್ಟಿಗಾರ್ ಬೊಕ್ಕ ದೇವಸ್ಥಾನದ ಮಹಿಳಾ ವೇದಿಕೆ ಅಧ್ಯಕ್ಷೆರಾಯಿನ ಶ್ರೀಮತಿ ಶೋಭಾ ಜ್ಯೋತಿಪ್ರಸಾದ್ ಶೆಟ್ಟಿಗಾರ್ ಮೇರ್ ದೀಪಪ್ರಜ್ವಲನೆ ಮಲ್ಪುನ ಮುಖೇನ ಉದಿಪನ ಮಲ್ಪರೆಗುಲ್ಲೆರ್. ಜಿಲ್ಲಾ ಪಂಚಾಯತ್ ಮುಖ್ಯ ಕಾರ್ಯ ನಿರ್ವಹಣಾಧಿಕಾರಿ ಶ್ರೀ ಪ್ರಸನ್ನ ಎಚ್, ಉಡುಪಿ ಜಿಲ್ಲಾ ಅಪರ ಜಿಲ್ಲಾಧಿಕಾರಿ ಶ್ರೀಮತಿ ವೀಣಾ ಬಿ ಎನ್, ಉಡುಪಿ ನಗರಸಭೆತ್ತ ಅಧ್ಯಕ್ಷೆರಾಯಿನ ಸುಮಿತ್ರಾ ಆರ್ ನಾಯಕ್, ಉಪಾಧ್ಯಕ್ಷೆರಾಯಿನ ಲಕ್ಷ್ಮಿ ಮಂಜು ಕೊಳ, ನಗರಸಭಾ ಸದಸ್ಯೆರಾಯಿನ ಮಂಜುಳಾ ವಿ ನಾಯಕ್, ನಾಮನಿರ್ದೇಶಿತ ಸದಸ್ಯ ಶ್ರೀ ದಿನೇಶ್ ಪೈ, ಕಲ್ಯಾಣಪುರ ಗ್ರಾಮ ಪಂಚಾಯತ್ ಅಧ್ಯಕ್ಷೆರಾಯಿನ ಶ್ರೀ ಕೃಷ್ಣ ದೇವಾಡಿಗ,, ಕರ್ನಾಟಕ ರಾಜ್ಯ ನೇಕಾರ ಸಮುದಾಯದ ಒಕ್ಕೂಟದ ಕಾರ್ಯಾಧ್ಯಕ್ಷರಾದ ಶ್ರೀ ರಘು ಎಸ್ ಶೆಟ್ಟಿಗಾರ್, ಬೊಕ್ಕ ನೇಕಾರ ಸಮುದಾಯದ ಪ್ರಮುಖೆರ್. ಶೆಟ್ಟಿಗಾರ ಸಮುದಾಯದ ಕೂಡುಕಟ್ಟುದ ಪದಿನಾಜಿ ದೇವಸ್ಥಾನದ ಆಡಳಿತ ಮೊಕ್ತೇಸರೆರು/ಅಧ್ಯಕ್ಷೆರು ಮುಖ್ಯ ಅತಿಥಿಲಾದ್ ಸಮಾರಂಭಡ್ ಪಾಲ್ ಪಡೆಯರೆಗುಲ್ಲೆರ್.

ಈ ಸಮಾರಂಭಡ್ ಹಿರಿಯ ನೇಕಾರೆರೆಗ್ ಬೊಕ್ಕ ಸಾಧಕೆರೆಗ್ ಸನ್ಮಾನ ಕಾರ್ಯಕ್ರಮ, ವಿದ್ಯಾರ್ಥಿಲೆಗ್ ಅಭಿನಂದನೆ ಬೊಕ್ಕ ಪ್ರತಿಭಾ ಪುರಸ್ಕಾರ ಕಾರ್ಯಕ್ರಮೊಲ್ ನಡಪರೆಗುಂಡ್.
ವಿಶೇಷವಾದ್ ಜಿಲ್ಲೆಡ್ ನೂದು ಕೈಮಗ್ಗ ನೇಕಾರೆರೆನ್ ನೇಕಾರ ವೃತ್ತಿಗ್ ಸೇರ್ಪಾವುನ ಸಂಕಲ್ಪವಾದ್ ಪ್ರತಿಜ್ಞಾ ಸ್ವೀಕಾರ ಕಾರ್ಯಕ್ರಮನ್ ಆಯೋಜನೆ ಮಲ್ತುದೆರ್.

ಪದ್ಮಶಾಲಿ ನೇಕಾರ ಪ್ರತಿಷ್ಠಾನ ಪಿದಾಯಿ ಕನಪಿನ ವಿಶಿಷ್ಟ, ವಿನೂತನ ಇ-ವಾರ್ತಾ ಪತ್ರಿಕೆ “ನೇಕಾರ ಬಿಂಬ” ದ ಸುರುತ್ತ ಸಂಚಿಕೆ ಈ ಸಮಾರಂಭಡ್ ಲೋಕಾರ್ಪಣೆ ಆವರೆಗುಂಡ್.

ಮಧ್ಯಾಹ್ನ 12.30 ಗಂಟೆಗ್ ನೇಕಾರ ಪದ್ಮಶಾಲಿ ಬಂಧುಲೆಗ್ ಕೈಮಗ್ಗದ ಉಡುಗೆ ತೊಡುಗೆಡ್ ಸೌಂದರ್ಯ ಸ್ಪರ್ಧೆ ನೇಕಾರ ಸಿರಿ, ನೇಕಾರ ಸಿರಿ ವರ, ನೇಕಾರ ಕುಟುಂಬ ಸಿರಿ ಇಂಚ ಮೂಜಿ ವಿಭಾಗೊಲೆಡ್ ಆಯೋಜನೆ ಮಲ್ತುದೆರ್. ನಮ್ಮ ಕೈಮಗ್ಗ ಸೀರೆ ನಮ್ಮ ಹೆಮ್ಮೆ ಪನ್ಪಿನ ಘೋಷಣೆದೊಟ್ಟುಗ್ ನಡಪುನ ಈ ಕಾರ್ಯಕ್ರಮ ಸಮುದಾಯದ ಪೊಂಜೊವುನಕುಲು ಕೈಮಗ್ಗದ ಸೀರೆಲೆನ್ ತುತ್ತಾದ್ ಶೃಂಗಾರ ಆದ್ ಮದಿಮಾಲೆಲೆಕ್ಕ ಶೋಭಿಸಾವುನ ಕಾರ್ಯಕ್ರಮ ಉಂದಾತುಂಡ್. ಈ ಮುಖೇನ ಕೈಮಗ್ಗದ ಸೀರೆದ ಸೌಂದರ್ಯನ್, ಅವ್ವೆನ್ ತುತೈತ ಮಲ್ತಿನಪಗ ತಿಕ್ಕುನ ಆಹ್ಲಾದಕರ ಅನುಭವನ್ ನಮ್ಮ ಸಮಾಜಗ್ ಬೊಕ್ಕ ಪಿದಾಯಿದ ಜಗತ್ತ್ ಗ್ ತೆರಿಪಾವುನ ಪದ್ಮಶಾಲಿ ಸೇವಾ ಪ್ರತಿಷ್ಠಾನದ ಪ್ರಯತ್ನ ಉಂಡು.

ನೇಕಾರ ಸಮುದಾಯದ ಕೈಮಗ್ಗದ ಸೀರೆಲೆಗ್ ಪೊಸ ಆಯಾಮ ಕೊರ್ಪಿನ , ಬಹುಬೇಡಿಕೆಯ ಸೀರೆಲಾದ್ ಪರಿವರ್ತನೆ ಮಲ್ಪುನ , ಜಿಲ್ಲೆಡ್ 100 ಜನ ಕೈಮಗ್ಗದ ನೇಕಾರೆರೆನ್ ಪುನರ್ ಸ್ರಷ್ಟಿ ಮಲ್ಪುನ ಮಹತ್ವಾಕಾಂಕ್ಷೆನ್ ದೀದ್ ಪದ್ಮಶಾಲಿ ಸೇವಾ ಪ್ರತಿಷ್ಠಾನ, ಉಡುಪಿ ರಾಷ್ಟ್ರೀಯ ಕೈಮಗ್ಗ ದಿನಾಚರಣೆನ್ ಅರ್ಥಪೂರ್ಣವಾದ್ ಆಚರಿಸಾವೊಂದುಂಡ್. ಈ ಕಾರ್ಯಕ್ರಮಗ್ ಸರ್ವೆರೆನ ಸಹಕಾರ ಅಪೇಕ್ಷೆ ಕೇನೊಂದುಲ್ಲೆರ್.

ಪತ್ರಿಕಾಗೋಷ್ಠಿದ ಅಧ್ಯಕ್ಷತೆನ್ ಪ್ರತಿಷ್ಠಾನದ ಅಧ್ಯಕ್ಷೆರಾಯಿನ ರತ್ನಾಕರ್ ಇಂದ್ರಾಳಿ ಮೇರ್ ಇತ್ತೆರ್. ನಗರಸಭಾ ಸದಸ್ಯೆರಾಯಿನ ಮಂಜುನಾಥ್ ಮಣಿಪಾಲ, ಸಂಸ್ಥೆದ ಪ್ರಧಾನ ಕಾರ್ಯದರ್ಶಿ ನರೇಂದ್ರ ಶೆಟ್ಟಿಗಾರ್ ಹೆರ್ಗ ಉಪಾಧ್ಯಕ್ಷೆರಾಯಿನ ಸದಾಶಿವ ಗೋಳಿಜೋರಾ, ದತ್ತರಾಜ್ ಶೆಟ್ಟಿಗಾರ್, ಸರೋಜಾ ಶೆಟ್ಟಿಗಾರ್, ಉಪಸ್ಥಿತರಿತ್ತೆರ್.