ರಾಯಪ್ಪಗ್ ಬೀಳ್ಕೊಡುಗೆ

ಉಡುಪಿ ನಗರಸಭೆ ಪೌರಾಯುಕ್ತ ರಾಯಪ್ಪಗ್ ಬೀಳ್ಕೊಡುಗೆ

ಉಡುಪಿ, ಅ.29: ಉಡುಪಿ ನಗರಸಭಾ ಪೌರ ನೌಕರರ ಸಂಘದ ವತಿಡ್ದ್ ನಿವೃತ್ತರಾಪಿನ ಪೌರಾಯುಕ್ತ ರಾಯಪ್ಪ ಅರೆಗ್ ಬೀಳ್ಕೊಡುಗೆ ಸಮಾರಂಭ  ಮಂಗಳವಾರ ನಗರಸಭೆ ಸಭಾಂಗಣಡ್  ಆಯೋಜನೆ ಮಲ್ದುಂಡ್.
ಸನ್ಮಾನ ಸ್ವೀಕರಿಸಾಯಿನ ಪೌರಾಯುಕ್ತ ರಾಯಪ್ಪ ಪಾತೆರ್ದ್, ಸುರುಟು ನಮ  ಸರಿಯಾದುಪ್ಪೊಡು ಬೊಕ್ಕ ನಮನ್ ತೂದು ಬಾಕಿದಕುಲ ಕಲ್ಪುವೆರು. ಆ ಮನೋಭಾವನೆ ಅಧಿಕಾರಿಲೆಡ ಮುಖ್ಯವಾದ್ ಉಪ್ಪೊಡು. ಅಧಿಕಾರ ತಿಕ್ಕಿನ ಕೂಡಲೇ ದರ್ಪ ತೋಜಾವುನ ಬದಲು, ಸಮಸ್ಯೆ ಪರಿಹಾರಗ್ ಬರ್ಪಿನ ಜನಕ್ಲೆನ್  ಕುಲ್ಲಾದ್, ಗೌರವ ಕೊರೊಡು.ಅದಗ ಆ ಗೌರವ ನಮಕುಲಾ  ಸಿಕ್ಕುಂಡ್ ಪಂಡುದು ಅಭಿಪ್ರಾಯ ಪಟ್ಟೊಂಡೆರ್.

ಅಧಿಕಾರಿಲು ಬೊಕ್ಕ   ಜನಪ್ರತಿನಿಧಿಲು ಒಂಜಿ ಗಾಡಿದ  ಚಕ್ರ ಇತ್ತಿಲೆಕ್ಕ . ಇರುವೆರ್ಲಾ  ಒಂಜೇ ರೀತಿ ಪೋಂಡ ಮಾತ್ರ ಆಡಳಿತನ್  ಎಡ್ಡೆ ರೀತಿಡ್ ನಡಪಾವರೆಗ್ ಸಾಧ್ಯ ಪಂಡಿನ  ಆರು, ಉಡುಪಿಡ್  ಕಸ ವಿಲೇವಾರಿ ಬೊಕ್ಕ ನೀರುದ ಸಮಸ್ಯೆ ಬಗೆಹರಿಸಾದ್  ಎಂಕ್ ಮಸ್ತ್  ತೃಪ್ತಿ ಕನದುಂಡ್  ಪಂಡೆರು.

ಮುಖ್ಯ ಅತಿಥಿಲಾದ್  ನಗರಸಭೆ ಅಧ್ಯಕ್ಷ ಪ್ರಭಾಕರ ಪೂಜಾರಿ, ಉಪಾಧ್ಯಕ್ಷೆ ರಜನಿ ಹೆಬ್ಬಾರ್, ಸ್ಥಾಯಿ ಸಮಿತಿ ಅಧ್ಯಕ್ಷ ಸುಂದರ ಕಲ್ಮಾಡಿ, ಸಂಘದ ಅಧ್ಯಕ್ಷ ಸುಧಾಕರ್ ಕೋಟ್ಯಾನ್, ಉಪಾಧ್ಯಕ್ಷ ಮಹೇಶ್ ಶೆಟ್ಟಿ, ಕಾರ್ಯದರ್ಶಿ ಬೇಬಿ, ಕೋಶಾಧಿಕಾರಿ ಗಾಯತ್ರಿ ಉಪಸ್ಥಿತರಿತ್ತೆರು.
ವಿಪಕ್ಷ ನಾಯಕ ರಮೇಶ್ ಕಾಂಚನ್, ನಗರಸಭೆ ಸದಸ್ಯರಾಯಿನ ವಿಜಯ ಕೊಡವೂರು, ಗಿರೀಶ್ ಅಂಚನ್, ಅಮೃತಾ ಕೃಷ್ಣಮೂರ್ತಿ, ಯೋಗೀಶ್ ಸಾಲ್ಯಾನ್, ಮಾಜಿ ಅಧ್ಯಕ್ಷ ಯುವರಾಜ್, ಗಣೇಶ್ ಕೊರಗ, ಅಧಿಕಾರಿಲು ಪಾತೆರಿಯೆರು. ಪ್ರಕಾಶ್ ಪ್ರಭು ಸ್ವಾಗತ ಮಲ್ತುದ್ ಕಾರ್ಯಕ್ರಮ ನಿರೂಪಣೆ ಮಲ್ತೆರು.