ರಂಗಭೂಮಿ ಪ್ರಶಸ್ತಿ

‘ರಂಗಭೂಮಿ ಪ್ರಶಸ್ತಿ 2025’

ರಂಗಭೂಮಿ (ರಿ.) ಉಡುಪಿದ 2025ನೇ  ವಾರ್ಷಿಕ ಪ್ರಶಸ್ತಿನ್  ಈ ಸರ್ತಿ ಡಾ. ಭಾಸ್ಕರಾನಂದಕುಮಾ‌ರ್ ಮೆರೆಗ್ ಕೊರ್ಪುಂಡ್.

1965ಡ್  ಆರಂಭವಾಯಿನ  ರಾಜ್ಯದ ಹಿರಿಯ ಹವ್ಯಾಸಿ ನಾಟಕ ಬೊಕ್ಕ ಸಾಂಸ್ಕೃತಿಕ ಸಂಸ್ಥೆಯಾಯಿನ ರಂಗಭೂಮಿ (ರಿ.) ಉಡುಪಿ ಸಂಸ್ಥೆ 1967ಡ್ದ್ , ಬೇತೆ ಬೇತೆ ಕ್ಷೇತ್ರೊಲೆಡ್  ಅಭೂತಪೂರ್ವ ಸಾಧನೆ ಮಲ್ದಿನ ಕೆಲವಾರು ಗಣ್ಯೆರೆಗ್ ಬಿರುದುದೊಟ್ಟುಗ್   ಮಾನಾದಿಗೆ ಮಲ್ತೊಂದುಂಡ್.

ಖ್ಯಾತ ವೈದ್ಯೆರು, ನಾಟಕಕಾರೆರು ಬೊಕ್ಕ ಯಕ್ಷಗಾನ ಬೊಕ್ಕ ನಾಟಕ ರಂಗದ ಹಿರಿಯ ಕಲಾವಿದೆರು, ಸಂಘಟಕೆರಾಯಿನ ಡಾ. ಭಾಸ್ಕರಾನಂದಕುಮಾರ್ ಅರೆನ್  ಈ ಸರ್ತಿ ರಂಗಭೂಮಿ (ರಿ.) ಉಡುಪಿ ಸಂಸ್ಥೆದ ‘ರಂಗಭೂಮಿ ಪ್ರಶಸ್ತಿ 2025’ ನ್  ಕೊರ್ದ್ ಮಾನಾದಿಗೆ ಮಲ್ಪುಂಡ್. ಫೆಬ್ರವರಿ 2 ಗ್  ಉಡುಪಿ ಎಂಜಿಎಂ ಕಾಲೇಜಿದ ಮುದ್ದಣ ಮಂಟಪಡ್  ನಡಪುನ  ಈ ಸಮಾರಂಭಡ್  ಶ್ರೀ ಕೋಟ ಶ್ರೀನಿವಾಸ ಪೂಜಾರಿ, ಮಾನ್ಯ ಲೋಕಸಭಾ ಸದಸ್ಯೆರು, ಡಾ. ಹೆಚ್ .ಎಸ್. ಬಲ್ಲಾಳ್ ಸಹಕುಲಾಧಿಪತಿಲು ಮಾಹೆ ಬೊಕ್ಕ ಮಂಗಳೂರುದ  ಶಾರದಾ ಸಮೂಹ ಸಂಸ್ಥೆಲೆನ ಅಧ್ಯಕ್ಷೆರಾಯಿನ  ಡಾ. ಎಂ.ಬಿ. ಪುರಾಣಿಕ್, ಉಡುಪಿದ ಯಕ್ಷಗಾನ ಕೇಂದ್ರದ ಸಲಹಾ ಸಮಿತಿದ ಅಧ್ಯಕ್ಷೆರಾಯಿನ ಶ್ರೀ ಪಳ್ಳಿ ಕಿಶನ್ ಹೆಗ್ಡೆ, ಎಂ.ಜಿ.ಎಂ. ಕಾಲೇಜಿದ ಪ್ರಾಂಶುಪಾಲೆರಾಯಿನ ಪ್ರೊ. ಲಕ್ಷ್ಮೀನಾರಾಯಣ ಕಾರಂತ್, ಉಡುಪಿ ಕೋ-ಆಪರೇಟಿವ್ ಟೌನ್ ಬ್ಯಾಂಕ್ ಲಿ. ದ  ಅಧ್ಯಕ್ಷೆರಾಯಿನ  ಶ್ರೀ ಹೆಚ್. ಜಯಪ್ರಕಾಶ್ ಕೆದ್ಲಾಯ ಬೊಕ್ಕ ಕೆಲವಾರು ಗಣ್ಯೆರೆನ ಸಮಕ್ಷಮಡ್ ಸನ್ಮಾನ ಮಲ್ಪುಂಡ್  ಪಂಡುದು “ರಂಗಭೂಮಿ (ರಿ.) ಉಡುಪಿ” ದ  ಅಧ್ಯಕ್ಷೆರಾಯಿನ ಡಾ. ತಲ್ಲೂರು ಶಿವರಾಮ ಶೆಟ್ಟಿ ಮೇರು ಪತ್ರಿಕಾ ಪ್ರಕಟಣೆಡ್  ತೆರಿಪಾದೆರ್.