ಜೆಸಿಬಿದ ಎದುರುಡ್ ಜೆತ್ತುದ್ ಪ್ರತಿಭಟನೆ ಮಲ್ತಿನ ನಿತ್ಯಾನಂದ ಒಳಕಾಡು..

ಜೆಸಿಬಿದ ಎದುರುಡ್ ಜೆತ್ತುದ್ ಪ್ರತಿಭಟನೆ ಮಲ್ತಿನ ನಿತ್ಯಾನಂದ ಒಳಕಾಡು..

ಶಾರದ ಮಂಟಪಡ್ದ್ ಬೂಡುದ ಗುಡ್ಡೆ ರಸ್ತೆ ಸುಸ್ಥಿತಿಡಿತ್ತುಂಡಲಾ ಅವ್ವೆನ್ ಗರ್ತುದ್ ಕಾಂಕ್ರೀಟೀಕರಣ ಮಲ್ತೊಂದುಲ್ಲೆರ್ ಪಂಡುದ್ ಆರೋಪ ಮಲ್ತುದ್ ಉಡುಪಿ ಜಿಲ್ಲಾ ನಾಗರಿಕ ಸಮಿತಿದ ಪ್ರಧಾನ ಕಾರ್ಯದರ್ಶಿ ನಿತ್ಯಾನಂದ ಒಳಕಾಡು ರಸ್ತೆಡ್ ಕುಲ್ಲುದ್ ಪ್ರತಿಭಟನೆ ಮಲ್ದೆರ್. ವಾಹನ ಸಂಚಾರೊಗ್ ಸದೃಢವಾದುಪ್ಪುನ ರಸ್ತೆನ್ ಗರ್ತುದು ಕುಡೊರ ಕಾಂಕ್ರೀಟೀಕರಣ ಮಲ್ಪುನ ಸರಿಯತ್ತ್ ಪಂಡುದು ನಗರ ಸಭೆ ಮಾಜಿ ಸದಸ್ಯ ನಿತ್ಯಾನಂದ ವಳಕಾಡು ಜೆಸಿಬಿಗ್ ಅಡ್ಡ ಕುಲ್ಲುದ್ ಪ್ರತಿಭಟನೆ ಮಲ್ತೆರು.

ಸ್ಥಳೀಯ ನಗರಸಭೆ ಸದಸ್ಯ ಗಿರೀಶ್ ಅಂಚನ್, ಬಿಜೆಪಿ ಸದಸ್ಯರೆನ ನಡುಟು ನಿತ್ಯಾನಂದ ವಳಕಾಡು ಕೆಲಕಾಲ ವಾದ ಪ್ರತಿವಾದ ನಡತುಂಡ್. ಐನ್ ದಿನೊಡಿಂಚಿ ಕಾಂಕ್ರೀಟ್ ರಸ್ತೆನ್ ಗರ್ತೊಂದಿತ್ತುದ್ ನಿತ್ಯಾನಂದ ಒಳಕಾಡು ರಡ್ಡ್ ದಿನ ಪಿರ ಆಕ್ಷೇಪ ಮಲ್ದಿತ್ತೆರ್.. ನಗರ ಸಭೆತ್ತ ಅಧಿಕಾರಿಲೆಗ್ ಈ ಬಗ್ಗೆ ಗಮನೊಗ್ ಕೊರ್ದಿತ್ತೆರ್. ಜನಕ್ಲೆನ ತೆರಿಗೆ ದುಡ್ಡುನ್ ದುರ್ಬಳಕೆ ಮಲ್ತೊಂದುಲ್ಲೆರ್ ಉಂದು ದುಂದು ವೆಚ್ಚದ ಕಾಮಗಾರಿ ಪಂಡುದ್ ನಿತ್ಯಾನಂದ ಒಳಕಾಡು ಆಕ್ಷೇಪ. 27 ವರ್ಷಡಿಂಚಿ ಕಾಂಕ್ರೀಟ್ ರಸ್ತೆ ಗುಣಮಟ್ಟ ಕಳೆಯೊಂದುಂಡ್. ಹೆದ್ದಾರಿಡ್ದ್ ಶಾರದ ಮಂಟಪಮುಟ್ಟ ಪೊಸ ರಸ್ತೆ ನಿರ್ಮಾಣ ಆತುಂಡ್. ಒಳಚರಂಡಿ ನಿರ್ಮಾಣ ಮಲ್ಪುನ ಸಂದರ್ಭ ಅಲ್ಪಲ್ಪ ರಸ್ತೆ ಹಾಳಾದಿತ್ತುದ್ ಪೊಸ ರಸ್ತೆ ನಿರ್ಮಾಣ ಆವೊಡಾತುಂಡ್ ಪಂಡುದ್ ನಗರಸಭಾ ಸದಸ್ಯ ಗಿರೀಶ್ ಅಂಚನ್ ವಾದ. ಈತಾವನಗ ಸ್ಥಳೀಯೆರು ಪ್ರತಿಭಟನ ಜಾಗಗ್ ಬತ್ತುದ್ ಪೊಸ ರಸ್ತೆನ್ ಎಂಕ್ಲೆಗ್ ನಿರ್ಮಾಣ ಮಲ್ತ್ ಕೊರ್ಲೆ ಪರತ್ ರಸ್ತೆ ಬೊಕ್ಕ ಪೊಸ ರಸ್ತೆ ಅಗೆಲ ಎತ್ತರ ವ್ಯತ್ಯಾಸ ಬರ್ಪುಂಡ್. ಬರ್ಪಿನ ಮರಿಯಾಲಗ್ ಗುರಿ ಆಪಿನ ಸಾಧ್ಯತೆ ಉಂಡು ಪಂಡುದ್ ಅಭಿಪ್ರಾಯ ಪಂಡೆರ್. ಈ ಬಗ್ಗೆ ನಿತ್ಯಾನಂದ ಒಳಕಾಡು ನಗರಸಭೆ ಕಮಿಷನರ್ ಗಮನೊಗ್ ಕನದಿತ್ತುದ್ ಈ ಬಗ್ಗೆ ಕ್ರಮ ದೆತೊಂಜರಡ ಲೋಕಾಯುಕ್ತಗ್ ದೂರು ಕೊರ್ಪುಂಡ್ ಪಂಡುದ್ ಎಚ್ಚರಿಕೆ ಕೊರ್ತೆರ್. ಸದ್ಯೊಗ್ ಕಾಂಕ್ರೀಟ್ ರಸ್ತೆ ಗರ್ಪುನ ಪ್ರಕ್ರಿಯೆನ್ ಸ್ಥಗಿತ ಮಲ್ದೆರ್.