ಪೊಂಜೊವುನಕುಲ್ ಸ್ವಾವಲಂಬಿಯಾದ್ ಬದುಕರೆಗ್ ವರದಾನ ಆಯಿನ “ಸಂಜೀವಿನಿ”

ಕೇಂದ್ರ ಸರಕಾರದ ಮಹತ್ವಾಕಾಂಕ್ಷಿ ಯೋಜನೆ “ಸಂಜೀವಿನಿ”. ಆರ್ಥಿಕವಾದ್ ಪಿರ ಒರಿದಿನ ಗ್ರಾಮೀಣ ಮಟ್ಟದ ಪೊಂಜೊವುನಕ್ಲೆನ್ ಸಮಾಜದ ಮುಖ್ಯವಾಹಿನಿಗ್ ಕನತುದ್ ಅಕುಲ್ ಸ್ವಾವಲಂಬಿಯಾದ್ ಬದುಕರೆಗ್ ಸಾದಿ ಮಲ್ತ್ ಕೊರ್ರೆಗ್ ತಯಾರಾತುಂಡ್ ಈ “ಸಂಜೀವಿನಿ”.
ಕರಿನ 1ವರ್ಸೊಡಿಂಚಿ   ಉಡುಪಿ ಜಿಲ್ಲಾಪಂಚಾಯತ್ ದ ಅಡಿಟ್ ಗ್ರಾಮ ಪಂಚಾಯತ್ ದ ಮುತಾಲಿಕೆಡ್ ಗ್ರಾಮದ ಪೊಂಜೊವುನಕ್ಲೆಗ್ ಸಂಜೀವಿನಿ ಸ್ವಸಹಾಯ ಸಂಘೊನ್ ಕಟ್ಟುದ್ ಕೊರ್ದ್ ಪೊಂಜೊವುನಕುಲು ಸ್ವಾವಲಂಬಿಯಾದ್ ಬದುಕರೆಗ್ ವರದಾನ ಆತುಂಡ್ “ಸಂಜೀವಿನಿ”.ಸರಕಾರದ ಯೋಜನೆಲೆನ್ ಈ ಸಂಜೀವಿನಿ ಸ್ವಸಹಾಯ ಸಂಘೊಲೆಗ್ ಪರಿಚಯ ಮಲ್ತುಕೊರ್ದ್,ಅವ್ವೆನ್ ಸದುಪಯೋಗ ಮಲ್ತೊನರೆಗ್ ಸಹಕಾರ ಕೊರ್ದ್  ಆರ್ಥಿಕವಾದ್ ಬುಲೆಯರೆಗ್ ಸಹಕಾರಿಯಾದುಂಡ್.
ಸ್ವಸಹಾಯ ಸಂಘದ ಪೊಂಜೊವುನಕುಲು ಅಕುಲು ಇಲ್ಲಡೇ ತಯಾರ್ ಮಲ್ಪುನ ಅಲಂಕಾರಿಕ ವಸ್ತುಲು,ತಿಂಡಿತೆನಸುಲ್,ಗೃಹಬಳಕೆ ವಸ್ತುಲೆಗ್ ಮಾರುಕಟ್ಟೆಡ್ ಎಡ್ಡೆ ಬೇಡಿಕೆ ತಿಕ್ಕೊಡ ಪನ್ಪಿನ ಉದ್ದೇಶೊಡ್ ಉಡುಪಿದ ತೆಂಕನಿಡಿಯೂರುಡ್ ಪೊಸತಾದ್ “ವಾರದ ಸಂತೆ”ನ್ ಆಯೋಜನೆ ಮಲ್ದುಂಡ್.ಈ ಸಂತೆಡ್ ಉಡುಪಿ ಜಿಲ್ಲಾಪಂಚಾಯತ್ ಅಡಿಟ್ ಬರ್ಪಿನ ತೆಂಕನಿಡಿಯೂರು,ಬಡಾನಿಡಿಯೂರು,ಕೆಮ್ಮಣ್ಣು ಬೊಕ್ಕ ಕಲ್ಯಾಣಪುರ ಗ್ರಾಮದ ಸಂಜೀವಿನಿ ಸ್ವಸಹಾಯ ಸಂಘದ ಪೊಂಜೊವುನಕ್ಲೆಗ್ ಅಕುಲು ಇಲ್ಲಡೇ ತಯಾರ್ ಮಲ್ತಿನ ವಸ್ತುಲೆನ ಮಾರಾಟೊಗ್ ಅವಕಾಶ ಮಲ್ತ್ ಕೊರ್ತುಂಡ್.

ಸೆಪ್ಟೆಂಬರ್ 21 ತಾರೀಕುದಾನಿ ತೆಂಕನಿಡಿಯೂರು ಗ್ರಾಮಪಂಚಾಯತ್ ಸಭಾಭವನೊಡ್ ಈ ವಾರದ ಸಂತೆನ್ ಉಡುಪಿ ಜಿಲ್ಲಾ ಪಂಚಾಯತ್ ದ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಡಾ| ವೈ.ನವೀನ್ ಭಟ್ ಉದಿಪನ ಮಲ್ತುದ್ ಪೊಂಜೊವುನಕುಲು ಇಲ್ಲಡೇ ತಯಾರ್ ಮಲ್ತಿನ ವಸ್ತುಲೆನ್ ಒಂಜಿ ಬ್ರಾಂಡ್ ಮಲ್ತುದ್ ಮಾರಾಟ ಮಲ್ತುಂಡ ಕುಡಲಾತ್ ಹೆಚ್ಚಿಗೆ ಬೇಡಿಕೆ ತಿಕ್ಕುಂಡ್.ಈ ನಿಟ್ಟುಡ್ ಜಿಲ್ಲಾಪಂಚಾಯತ್ ಆರ್ಥಿಕವಾದ್ ದುಂಬು ಬರ್ರೆಗ್ ಸಂಪೂರ್ಣ ಸಹಕಾರ ಕೊರ್ಪುಂಡ್ ಪಂಡುದ್ ಪಂಡೆರ್.
ಸಭಾವೇದಿಕೆಡ್ ಜಿ.ಪ.ಯೋಜನಾ ನಿದರ್ೇಶಕೆರಾಯಿನ ಶ್ರೀ ಬಾಬು,ಸಹಾಯಕ ಯೋಜನಾಧಿಕಾರಿ ಜೇಮ್ಸ್ ಡಿಸಿಲ್ವಾ,ಬಡಾನಿಡಿಯೂರು ಗ್ರಾ.ಪ.ಅಧ್ಯಕ್ಷೆರಾಯಿನ ಪ್ರಭಾಕರ ತಿಂಗಳಾಯ,ತೆಂಕನಿಡಿಯೂರು ಗ್ರಾ.ಪ. ಅಧ್ಯಕೆರಾಯಿನ ಗಾಯತ್ರಿ,ಉಪಾಧ್ಯಕ್ಷೆರಾಯಿನ ಅರುಣ್ ಜತ್ತನ್,ತೋನ್ಸೆ ಕೆಮ್ಮಣ್ಣು ಗ್ರಾ.ಪ.ಅಧ್ಯಕ್ಷೆರಾಯಿನ ಲತಾ, ತಾಲೂಕು ಪಂಚಾಯತ್ ಪ್ರಭಾರ ಕಾರ್ಯನಿರ್ವಹಣಾಧಿಕಾರಿ ವಿಜಯ ಕೆ.ಉಪಸ್ಥಿತರಿತ್ತೆರ್.

ತೆಂಕನಿಡಿಯೂರು ಪಿ.ಡಿ.ಓ.ಸುರೇಶ್ ಕೆಮ್ಮಣ್ಣು ಸ್ವಾಗತ ಮಲ್ತೆರ್.ಸಂಜೀವಿನಿ ಒಕ್ಕೂಟದ ಕೋಶಾಧಿಕಾರಿ ರಾಧ ಧನ್ಯವಾದ ಕೊರಿಯೆರ್.ಪ್ರಭಾಕರ ಆಚಾರ್ಯ ಕಾರ್ಯಕ್ರಮದ ನಿರೂಪಣೆ ಮಲ್ತೆರ್.
4 ಗ್ರಾಮದ ಸಂಜೀವಿನಿ ಸ್ವಸಹಾಯ ಸಂಘದಕುಲು ಇಲ್ಲಡೇ ತಯಾರ್ ಮಲ್ದಿನ ವಸ್ತುಲ್,ಅಲಂಕಾರಿಕ ವಸ್ತುಲು,ನುಂಗೆಲ್ ಮೀನ್,ಮೈಪುಸೂಡಿ,ತಿಂಡಿ ತೆನಸುಲ್,ತಾರಾಯಿ,ಮ್ಯಾಟ್,ಕುಂಟುಲು ಇಂಚ ಬೇತೆ ಬೇತೆ ಬಗೆತ್ತ ಇಲ್ಲಗ್ ಬೋಡಾಪಿನ ವಸ್ತಲೆನ ಮಾರಾಟ ಸಂತೆಡ್ ನಡತುಂಡ್.

4 ಗ್ರಾಮದ ಪಿಡಿಓ ನಕುಲು ಗ್ರಾಮ ಪಂಚಾಯತ್ ಸದಸ್ಯೆರ್ ಈ ಸಂತೆಗ್ ಸಂಪೂರ್ಣ ಬೆಂಬಲ ಕೊರ್ತೆರ್.ಪ್ರತೀ ಮಂಗಳವಾರ ಕಾಂಡೆ 10 ಗಂಟೆಡ್ದ್ ಬೈಯಮುಟ್ಟ ಸಂತೆ ನಡಪುಂಡ್.ಗ್ರಾಮದಕುಲೆನ ಸಹಕಾರ ಕೊರೊಡ್ ಪಂಡುದ್ ಸಂಜೀವಿನಿ ಸದಸ್ಯೆರ್ ಬಿನ್ನಪ ಮಲ್ದೆರ್.