ವಿಕಲಚೇತನನ ಸಾಧನೆಗೊಲಿನ ರಾಜ್ಯ ಪ್ರಶಸ್ತಿ

ವಿಕಲಚೇತನನ ಸಾಧನೆಗೊಲಿ ರಾಜ್ಯ ಪ್ರಶಸ್ತಿ. ಡಿಸೆಂಬರ್ 3 ವಿಶ್ವ ವಿಕಲಚೇತನರ ದಿನಾಚರಣೆ 2022 ಬೆಂಗಳೂರು ಕಂಠೀರವ ಉಲಾಯಿದ ಕ್ರೀಡಾಂಗಣಡ್ ನಡತಿನ ಕಾರ್ಯಕ್ರಮಡ್ ರಾಜಶೇಖರ್ ಪಿ ಶಾಮರಾವ್ ಮೆರೆಗ್ ವಿಕಲಚೇತನ ಕ್ಷೇತ್ರೊಡ್ ವೈಯಕ್ತಿಕ ಸಾಧನೆಗಾದ್ ರಾಜ್ಯ ಪ್ರಶಸ್ತಿನ್ ಮಾನ್ಯ ಮಹಿಳಾ ಬೊಕ್ಕ ಮಕ್ಕಳ ಕಲ್ಯಾಣ ಇಲಾಖೆದ ಸಚಿವೆರಾಯಿನ ಶ್ರೀ ಹಾಲಪ್ಪ ಬಸಪ್ಪ ಆಚಾರ್ ಮೇರ್ ಕೊರ್ದ್ ಮಾನಾದಿಗೆ ಮಲ್ತೆರ್. ವಿಕಲಚೇತನರ ಬೊಕ್ಕ ಹಿರಿಯ ನಾಗರಿಕರ ಸಬಲೀಕರಣ ಇಲಾಖೆದ ನಿರ್ದೇಶಕೆರು ಲತಾ ಕುಮಾರಿ, ಡಾ. ಎನ್ ಮಂಜುಳಾ ಸರ್ಕಾರದ ಪ್ರಧಾನ ಕಾರ್ಯದರ್ಶಿ, ಮಹಿಳಾ ಬೊಕ್ಕ ಮಕ್ಕಳ ಕಲ್ಯಾಣ ಇಲಾಖೆ ಬೊಕ್ಕ ಕೆಲವು ಅಧಿಕಾರಿಲು ಈ ಸಂದರ್ಭಡ್ ಉಪಸ್ಥಿತರಿತ್ತೆರ್.
ರಾಜಶೇಖರ್ ಪಿ ಶಾಮರಾವ್ ಮೇರ್ ಉಡುಪಿ ಜಿಲ್ಲೆದ ಕುಂದಾಪುರ ತಾಲೂಕುದ ಮೊಳಹಳ್ಳಿ ಗ್ರಾಮದ ಶ್ರೀ ಪ್ರಕಾಶ್ ಬೊಕ್ಕ ಶ್ರೀಮತಿ ಚಂದಾಬಾಯಿ ದಂಪತಿಲೆನ ಸುರುತ್ತ ಮಗೆ ಆದ್ 12-10-1994 ದಾನಿ ವಿಕಲಚೇತನೆರಾದ್ ಪುಟ್ಟುದಿನಾರ್.
ಬಾಲ್ಯೊಡೇ ಮಸ್ತ್ ಕಷ್ಟೊಲೆನ್ ಅನುಭವಿಸಾವೊಂದ್ ಶಿಕ್ಷಣ ಪಡೆತೊಂದ್ ಉಡುಪಿದ ವೈಕುಂಠ ಬಾಳಿಗ ಕಾನೂನು ಮಹಾವಿದ್ಯಾಲಯಡ್ ಕಾನೂನು ಪದವಿನ್ ಪಡೆತುದ್ ಪ್ರಸ್ತುತ ಕಾರ್ಕಳದ ರಡ್ಡನೇ ಹೆಚ್ಚುವರಿ ಸಿವಿಲ್ ಬೊಕ್ಕ ಜೆ ಎಂ ಎಫ್ ಸಿ ನ್ಯಾಯಾಲಯಡ್ ಸರ್ಕಾರಿ ವಕೀಲೆರಾದ್ ಕರ್ತವ್ಯ ಮಲ್ತೊಂದುಲ್ಲೆರ್.
ವಿಕಲಚೇತನರಾದಿತ್ತುಂಡಲಾ ಬದುಕುಡ್ ಅಂಗವಿಕಲತೆನ್ ಸವಲಾದ್ ಸ್ವೀಕಾರ ಮಲ್ತೊಂದ್ ದಾದಾಂಡಲಾ ಸಾಧನೆ‌ ಮಲ್ಪೊಡ್ ಪನ್ಪಿನ ಹಟೊಟ್ 14 ಫೆಬ್ರವರಿ 2021 ದಾನಿ ಮಲ್ಪೆದ ಸೈಂಟ್ ಮೇರಿಸ್ ದ್ವೀಪಡ್ದ್ ಮಲ್ಪೆದ ಕಡಲ ಬರಿಮುಟ್ಟ ಅರಬ್ಬೀ ಸಮುದ್ರದ ತೆರೆಕ್ ಎದುರಾದ್ ಸರಿಸುಮಾರು 4 ಕಿಲೋಮೀಟರ್ ಗುಲಾ ಜಾಸ್ತಿ ದೂರನ್ ಯಶಸ್ವಿಯಾದ್ ನೀಂದೊಂದ್ ಬಾಕಿದಕ್ಲೆಗ್ ನೀಂದುನ ಬಗ್ಗೆ ಜಾಗ್ರತಿ ಪುಟ್ಟಾದೆರ್. ಅತ್ತಾವಂದೆ ರಾಜಕೀಯ,ಧಾರ್ಮಿಕ,ಸಾಂಸ್ಕೃತಿಕ ಕ್ರೀಡಾಕ್ಷೇತ್ರದ ನಿರೂಪಕೆ ಆದ್, ವೀಕ್ಷಕ ವಿವರಣೆಗಾರೆ ಆದ್, ಭಾಷಣಕಾರೆರಾದ್, ಸಂಗೀತಗಾರೆ ಆದ್, ಕೀಬೋರ್ಡ್ ವಾದಕೆರಾದ್ ಕರ್ನಾಟಕದ ರಾಜ್ಯದ ಉದ್ದಗಲಗುಲಾ ಸಂಚಾರ ಮಲ್ತುದ್ 3,000 ಮೀರ್ದ್ ಕಾರ್ಯಕ್ರಮಲೆನ್ ಕೊರ್ದ್ ಜನ ಮೆಚ್ಚುಗೆನ್ ಪಡೆತುದೆರ್. ಮೆರೆನ ಈ ವೈಯಕ್ತಿಕ ಸಾಧನೆನ್ ಪರಿಗಣಿಸಾದ್ 3ಡಿಸೆಂಬರ್ 2022 ದಾನಿ ಕಂಠೀರವ ಒಳಾಂಗಣ ಕ್ರೀಡಾಂಗಣಡ್ ನಡತಿನ ವಿಶ್ವ ವಿಕಲಚೇತನರ ದಿನಾಚರಣೆದ ಕಾರ್ಯಕ್ರಮಡ್ ವಿಕಲಚೇತನರ ವೈಯಕ್ತಿಕ ಸಾಧನೆಗಾದ್ ರಾಜ್ಯ ಪ್ರಶಸ್ತಿನ್ ಕೊರ್ದ್ ಮಾನಾದಿಗೆ ಮಲ್ತುದೆರ್. ಅತ್ತಾವಂದೆ ಬೇತೆ ಬೇತೆ ಸಂಘ-ಸಂಸ್ಥೆಲೆಡ್ದ್ ಸನ್ಮಾನನ್ ಶ್ರೀಯುತೆರು ಸ್ವೀಕಾರ ಮಲ್ದೆರ್.
ಕರ್ನಾಟಕ ರಾಜ್ಯ ಅಂಗವಿಕಲರ ಬೊಕ್ಕ ಪಾಲಕರ ಒಕ್ಕೂಟ ಉಡುಪಿ ಜಿಲ್ಲೆ, ಜಿಲ್ಲಾ ಮಟ್ಟದ ಸಮಗ್ರ ವಿಕಲಚೇತನರ ಪುನರ್ವಸತಿ ಕಾರ್ಯಕರ್ತರ ಒಕ್ಕೂಟ ಉಡುಪಿ ಜಿಲ್ಲೆ ಬೊಕ್ಕ ದಿವ್ಯಂಗರ ರಕ್ಷಣಾ ಸಮಿತಿ ಕೊಡವೂರು ಆಶ್ರಯಡ್ ಉಡುಪಿ ಶ್ರೀ ಕೃಷ್ಣ ಮಠದ ರಾಜಾಂಗಣಡ್ ನಡತಿನ ಜಿಲ್ಲಾಮಟ್ಟದ ದಿವ್ಯಂಗರ ಸಮಾವೇಶಡ್ ವಿಕಲಚೇತನೆರಾದ್ ವೈಯಕ್ತಿಕ ಸಾಧನೆಗಾದ್ ರಾಜ್ಯ ಪ್ರಶಸ್ತಿ ದೆತೊಂದಿನ ರಾಜಶೇಖರ್ ಪಿ ಶಾಮರಾವ್ ಮೆರೆನ್ ಮಾನಾದಿಗೆ ಮಲ್ತೆರ್.