ತುಳುನಾಡ್ದ ಪೊಣ್ಣು ಸಂಸ್ಕ್ರತಿದ ಪ್ರತಿಬಿಂಬ : ಅರ್ಪಿತಾ ಶೆಟ್ಟಿ.

ತುಳುನಾಡುಡ್ ಪೊಣ್ಣುಲೆಗ್ ವಿಶೇಷವಾಯಿನ ಮಾನಾದಿಗೆ ಉಂಡು..ಎಂಚಂದ್ ಪಂಡ ಕುಟುಂಬಡ್ ಒವ್ವೇ ಒಂಜಿ ಎಡ್ಡೆ ಕಜ್ಜೊಲು ನಡಪುನಗ ಇಲ್ಲದ ಪೊಣ್ಣಗ್ ಮಲ್ಲ ಜವಾಬ್ದಾರಿ ಉಂಡು.ಕುಟುಂಬದ ಇಲ್ಲಡ್ ದೈವಾರಾಧನೆದ ಪೊರ್ತುಡ್ ದೈವಗ್ ಒಂಜಿ ಗಿಂಡೆ ಪೇರ್ ಕೊರೊಡಾಂಡ ಇಲ್ಲದ ಪೊಣ್ಣು ಮಗಲ್ ಬೋಡು…ಆಂಜೊವುನಕುಲು ಕೊರಿಯರೆಗಾವಂದ್.ಇಂಚ ಕುಟುಂಬಡ್ ನಡಪುನಂಚಿನ ಒವ್ವೇ ಎಡ್ಡೆಮಿಲ್ಲಿ ದಾನಿ ಪೊಣ್ಣನ ಪಾತ್ರ ಮುಖ್ಯವಾದುಂಡ್.
ಪಂಡುದ್ ಗೇನದ ಗುರು ವಾಗ್ಮಿಲಾಯಿನ ಶ್ರೀಮತಿ ಅರ್ಪಿತಾ ಶೆಟ್ಟಿ ಮೇರ್ ಪಂಡೆರ್.ಸಿರಿ ತುಳುವ ಚಾವಡಿ ಒಡಿಪುದ ವತಿಡ್ದ್ ಕಲ್ಯಾಣಪುರಡ್ ನಡತಿನ 104 ನೇ ಮುಂದಿಲ್ಲದ ಕೂಟಡ್ ತುಳುನಾಡ್ದ ಪೊಣ್ಣು ಪೊಂಜೊವು ಈ ವಿಚಾರೊಡ್ ಮಲ್ಲ ಬಿನ್ನೆರಾದ್ ಪಾತೆರಿಯೆರ್.ಕಾಲ ಬದಲಾಯಿಲೆಕ್ಕನೇ ಸಂಸ್ಕ್ರತಿಲಾ ಬದಲಾವೊಂದುಂಡ್. ದುಂಬುದ ಕಾಲೊಡ್ ಪೊಣ್ಣು ಪಂಡ ಅಲೆನ ಆರೋಗ್ಯದ ನಿಟ್ಟುಡ್ ಇಂಚೆನೇ ಉಪ್ಪೊಡ್ ಪಂಡುದ್ ಹಿರಿಯಕುಲು ಕಟ್ಟುಪಾಡು ಮಲ್ದಿತ್ತೆರ್.ತಿಂಗೊಲಾಪಿನ ಪೊರ್ತುಡ್ ಮೂಜಿ ದಿನ ಆಲ್ ಬಾಕಿದಕ್ಲೆನ್ ಮುಟ್ಟುಲೆಕ್ಕ ಇಜ್ಜಿ..ಇಲ್ಲದ ಒಂಜಿ ಮೂಲೆದ ಕೋಣೆಡ್ ಕುಲ್ಲೊಡ್ ಪನ್ಪಿನವ್ವ್.ಉಂದು ದಾಯೆಗ್ ಪಂಡುಂದಾಂಡ ಅಲೆಗ್ ಆ ಮೂಜಿ ದಿನ ಆರೋಗ್ಯಡ್ ಏರುತಗ್ಗು ಆಪಿನೆಡ್ದಾವರ ಬೇಲೆ ಮಲ್ಪರೆಗ್ ಕಷ್ಟ ಆಪುಂಡ್ ಅಂಚಾದ್ ಒಂತೆ ಆರಾಮ್ ತಿಕ್ಕಡ್ ಪನ್ಪಿನ ಉದ್ದೇಶಲಾ ಆದುಪ್ಪು.ಆಂಡ ಇತ್ತೆದ ಕಾಲೊಡ್ ಅವ್ವೆನ್ ಏರ್ಲಾ ಗಣನೆಗ್ ಕೊನೊಪುಜೆರ್..ತೆನಸುದ ವಿಷಯೊಡ್ಲಾ ಪೊಣ್ಣು ಪೋದು ಮದಿಮಾಲಾವನಗ ಅತ್ತುಂಡ ಬಾಲೆ ಪೆದ್ದಿನ ಪೊರ್ತುಡ್ ಅಲೆಗ್ ಇಲ್ಲಡೇ ತಯಾರ್ ಮಲ್ದಿನ ಮರ್ದ್ ನ್ ಹಿರಿಯಕ್ಲು ತಯಾರ್ ಮಲ್ತೊಂದಿತ್ತೆರ್.ಆ ಪೊರ್ತುಡ್ ಬೋಡಾಪಿನವ್ವೆನ್ ಅಲೆಗ್ ಕೊರ್ಪಿನ ಕ್ರಮ ಇತ್ತುಂಡ್.ಅಲೆನ ಆರೋಗ್ಯಗ್ ಒವ್ವೇ ರೀತಿದ ತೊಂದರೆಲು ಆವೊಂದಿತ್ತುಜಿ.ಅಂಚಾದ್ ದುಂಬುದಕುಲು ಏತ್ ಪೆದ್ದಿಯೆರುಡಲಾ ಅಕಲು ನೂದು ವರ್ಷ ಮುಟ್ಟಲಾ ಗಟ್ಟಿ ಮುಟ್ಟು ಇತ್ತೆರ್.ಇತ್ತೆದಕ್ಲೆಗ್ 40‌ವರ್ಷ ಕರಿನಗನೇ ಗರ್ಭಕೋಶದ ತೊಂದರೆ ಬತ್ತುದ್ ಅವ್ವೇ ತೋ ಪೊಂಜೊವುನಕುಲು ಗರ್ಭಕೋಶನ್ ದೆಪ್ಪಾವೆರ್.ಬದಲಾವಣೆದ ಕಾಲಘಟ್ಟೊಡ್ ನಮ ಇತ್ತುಂಡಲಾ ನಮ್ಮ ತುಳುನಾಡ್ದ್ ದುಂಬುದ ಸಂಸ್ಕ್ರತಿ ಸಂಪ್ರದಾಯೊಲೆನ್ ಒಂತೆ ಆಂಡಲಾ ಒರಿಪಾವರೆಗ್ ನಮ ಪ್ರಯತ್ನ ಬರೊಡ್ ಪಂಡುದ್ ಈ ಪೊರ್ತುಡ್ ಆರು ತೆರಿಪಾಯೆರ್.
ಕಜ್ಜೊಡ್ ಸಿರಿತುಳುವ ಚಾವಡಿದ ಗೈಮೆದ ಗುರ್ಕಾರೆರಾಯಿನ ಈಶ್ವರ್ ಶೆಟ್ಟಿ ಚಿಟ್ಪಾಡಿ ಗುರ್ಕಾರ್ಮೆಡಿತ್ತೆರ್.ಕಲ್ಯಾಣಪುರ ಗ್ರಾಮ ಪಂಚಾಯತ್ ದ ಅಧ್ಯಕ್ಷೆರಾಯಿನ ಕ್ರಷ್ಣ ದೇವಾಡಿಗ,ಸಮಾಜಸೇವಕೆರಾಯಿನ ಸ್ಟೀವನ್ ಸೋನ್ಸ್ ಮಿತ್ತರ್ಮೆಡಿತ್ತೆರ್. ಸಂಚಾಲಕಿ ಯಶೋದ ಕೇಶವ್ ಕಜ್ಜೊದ ಮದಿಪು ಕೊರಿಯೆರ್.ಕವಿತಾ ನವೀನ್ ಸುಗಿತೆರ್.