AATA ದ ಬಿಸು ಪರ್ಬ..

ಐತಾರದಾನಿ (16-4-2023)ಆಲ್ ಅಮೇರಿಕಾ ತುಳು ಅಸೋಸಿಯೇಷನ್ AATA ದ ಬಿಸು ಪರ್ಬ

ಅಮೇರಿಕಾ ಬೊಕ್ಕ ಕೆನಡಾ ದೇಶದ ತುಳು ಸಂಘಟನಾ ಒಕ್ಕೂಟ ಆಲ್ ಅಮೇರಿಕಾ ತುಳು ಅಸೋಸಿಯೇಷನ್ (AATA) ತನ್ನ ಮೂಜನೆ ವರ್ಷದ ಸಂಭ್ರಮ ಅಂಚನೆ ತುಳುವೆರೆ ಪೊಸ ವರ್ಷ ಬಿಸು ಪರ್ಬ ಆಚರಣೆ ಅಂತರ್ಜಾಲ ಮುಕಾಂತ್ರ ಬರ್ಪಿ ಏಪ್ರಿಲ್ ತಿಂಗೊಲ್ದ ಪದಿನಾಜೆನೆ ತಾರೀಖ್ ಐತಾರದಾನಿ ತುಳುವ ಮಿನದನದೊಟ್ಟುಗು ನಡಪರೆ ಉಂಡು.
ಅಮೇರಿಕಾ ದೇಶೊಡು ತುಳು ಭಾಸೆ ಸಂಸ್ಕೃತಿ ಒರಿಪಾವೊಡು ಪನ್ಪಿ ಅಂಗಲಾಪುಡು ಪುಟುದಿನ ಆಟ ಸಂಸ್ಥೆ ರಡ್ಡ್ ಸಾವಿರದ ಇರ್ವತ್ತೊಂಜೆಡಿಂಚಿ
ವರ್ಷಲಾ ಬಿಸು ಪರ್ಬ ಮಲ್ತೊಂದು ಬೈದ್ಂಡ್.

ತುಳುನಾಡ್ದ ಬೊಕ್ಕ ಅಮೇರಿಕಾ ,ಕೆನಡಾ ದೇಶದ ಪೆರ್ಮೆದ ತುಳುವ ಬಿರ್ಸೆರೆನ್ ಲೆಪ್ಡಾದ್ ಅಕಲ ಸಾಧನೆನ್ ಪೊಸ ಜವನರೆಗ್ ತೆರಿಪಾಕೊರ್ದು,ಅಕಲ ಮಾರ್ಗದರ್ಶನ ತಿಕ್ಕುಲಕ್ಕ ಮಲ್ಪುನು ಈ ಕಾರ್ಯಕ್ರಮದ ಮೂಲ ಉದ್ದೇಶ.
ಅಂತರ್ಜಾಲೊಡು ನಡಪುನ ಈ ಸಲತ ಕಜ್ಜೊಗು ತುಳು ವಿದ್ವಾಂಸೆರಾಯಿನ ನಿಟ್ಟೆ ವಿಶ್ವ ವಿದ್ಯಾಲಯದ ತುಳು ಸಂಶೋಧಕಿ
ಡಾ.ಸಾಯಿಗೀತಾ , ಟೆಕ್ ಉದ್ಯಮಿ ಎಂರಿಸಲ್ಟ್ ಕನೆಕ್ಟಿಕಟ್ ಯು ಎಸ್ ಎ ಸಂಸ್ಥೆದ ಶ್ರೀ ಶೇಖರ್ ನಾಯ್ಕ್,ಅಮೇರಿಕಾದ ಇಂಡಿಯಾನಾದ ಪುಗಾರ್ತೆದ ಸಂಶೋಧಕೆ, ಯಕ್ಷಕಲಾವಿದೆ ಡಾ. ರಾಜೇಂದ್ರ ಕೆದ್ಲಾಯ, ಹಾಲಿವುಡ್ ನಿರ್ದೇಶಕೆ,ನಟೆ,ಸಾಹಿತಿ ಶ್ರಿ.ರಘುರಾಮ್ ಶೆಟ್ಟಿ ಅಂಚನೆ ಆಟದ ಗುರ್ಕಾರೆ ಶ್ರೀ ಭಾಸ್ಕರ ಶೇರಿಗಾರ್ ಪಾಲ್ ಪಡೆದ್ ಪೊರ್ಲು ದಿಂಜಾಯೆರೆ ಉಲ್ಲೆರ್.

ಸುಮಾರ್ ರಡ್ಡ್ ಸಾವಿರ ವರ್ಷೊಡ್ ಲಾ ಪಿರಾಕ್ ದ ಭಾಸೆ ತುಳುಕ್ಕು ಸರ್ಕಾರೊಡು ಮಾನ್ಯತೆ ತಿಕಿಜಿಡಲಾ ಅಮೇರಿಕಾದ ಆಟ ಸಂಸ್ಥೆ ತುಳು ಭಾಸೆ ಸಾಹಿತ್ಯ, ಅಂಚನೆ ಸಂಸ್ಕೃತಿ ಒರಿಪಾವರೆಗಾದ್ ”ರಾಣಿ ಅಬ್ಬಕ್ಕ ಗೇನದ ಚಾವಡಿ” ಪನ್ಪಿನ ಅಂತರ್ಜಾಲ ತುಳು ಗ್ರಂಥಾಲಯ ಸ್ಥಾಪನೆ ಮಲ್ತ್ ಅವೆನ್ ತುಳುವ ವೀರರಾಣಿ ಅಬ್ಬಕ್ಕನ ಪುದರ್ಡ್ ಆನಿ ಡಾ.ಸಾಯಿಗೀತಾ ಲೋಕಾರ್ಪಣೆ ಮಲ್ಪರೆ ಉಲ್ಲೆರ್.

ತುಳು ಅಕಾಡಮಿ ಈ ಗ್ರಂಥಾಲಯೊಗು ಸಂಪೂರ್ಣ ಸಹಕಾರ ಕೊರ್ದು ತನ್ನ ಭಂಢಾರದ ಮಾತಾ ಸಾಹಿತ್ಯ ಬರವುಲೆನ್ ಕೊರ್ದು ಬೆರಿಸಾಯ ಮಲ್ದೆರ್
ಆಟ ಸಂಸ್ಥೆ ಸಾಹಿತ್ಯ ಅಕಾಡಮಿಗ್ ಈ‌ ಬೆರಿಸಾಯೊಗು ಈ ಪೊರ್ತುಡು ಸೊಲ್ಮೆ ಸಂದಾಯ್ತ ಮಲ್ಪುಂಡು.

ಆಟ ಸಂಸ್ಥೆದ ವರ್ಚುವಲ್ ವೇದಿಕೆದ ಈ ಬಿಸು ಪರ್ಬೊಗು ಲೋಕೊರ್ಮೆದ ತುಳುವ ಬಂಧುಲೆಗ್ ಉಡಲ್ ದಿಂಜಿದಿ ಮೋಕೆದ ಲೆಪ್ಪು ಕೊರೊಂದುಂಡು. ಅಮೇರಿಕಾ ಬೊಕ್ಕ ಕೆನಡಾದ ತುಳುವೆರ್ ಒಟ್ಟು ಸೇರ್ದ್ ಸಭಾ ಕಾರ್ಯಕ್ರಮ ಬೊಕ್ಕ ಸಾಂಸ್ಕೃತಿಕ ಕಾರ್ಯಕ್ರಮ ಕೊರೊಂದುಲ್ಲೆರ್. ಆಟದ ಯೂಟ್ಯೂಬ್ ಚಾನೆಲ್ಡ್ ಪ್ರೀಮಿಯರ್ ಪ್ರದರ್ಶನ ಆಪಿನೀ ಕಾರ್ಯಕ್ರಮೊನು ತಿರ್ತ್ ಕೊರ್ತೊನ ಕೊಂಡಿಡ್ ಐತಾರ ತುಳುನಾಡುದ ಕಾಲಮಾನ ರಾತ್ರಿ 9:30 ಗಂಟೆಗ್ ಸುರುವಾಪಿನ ಮಾತಾ ತುಳುವೆರ್ ತೂದು ಎಂಕಲ ಬೇಲೆಗ್ ಬೆರಿ ತಟ್ಟೊಡು ಪಂಡ್ದ್ ಮೋಕೆದ ಬಿನ್ನಾಪು!
ಕೊಂಡಿ:
www.aatana.org/bisu_parba_2023