ಜ್ಞಾನಜ್ಯೋತಿಡ್ ಆಟಿಕೂಟ

ಅಗಸ್ಟ್ 11 ತಾರೀಕುದಾನಿ ಮಲ್ಪೆ ಬೀಚ್ ದ ಜ್ಞಾನಜ್ಯೋತಿ ಭಜನಾಮಂದಿರಡ್ ಆಟಿಡೊಂಜಿ ದಿನ ಕಜ್ಜೊ ನಡತುಂಡ್.ತುಳುನಾಡಧ್ವನಿ ಅಂತರ್ಜಾಲ ಪತ್ರಿಕೆದ ಮುಖ್ಯಸ್ಥೆರಾಯಿನ ಶ್ರೀಮತಿ ಯಶೋದ ಕೇಶವ್ ಕಜ್ಜೊನ್  ತುಡರ್ ಅರ್ಲಾದ್ ಉದಿಪನ ಮಲ್ತುದ್ ಆಟಿದ ತಿರ್ಲ್ ದ ಬಗೆಟ್ ಮಾಯಿತಿ ಕೊರಿಯೆರ್.ಈ ಪೊರ್ತುಡ್ ಪಾತೆರಿನ ಆರು ತುಳುನಾಡುಡ್ ನಮ್ಮ ಪೆರಿಯಕ್ಲು ಬದುಕೊಂದಿತ್ತಿನ ಬದುಕುನ್ ನಮ ಇನಿ ವೇದಿಕೆಡ್ ಆಚರಣೆ ಮಲ್ತೊಂದುಪ್ಪುನ ಬೇಜಾರುದ ಸಂಗತಿಯಾಂಡಲಾ ಇಂಚಿತ್ತಿನ ಕಜ್ಜೊಡಾದ್ ನಮ್ಮ ತುಳುನಾಡುಡ್ ಎಂಚ ಬದುಕೊಂದಿತ್ತೆರ್ ಪಂಡುದ್ ದುಂಬುದ ಪೀಳಿಗೆಗ್ ತೆರಿಯುಲೆಕ್ಕಾಪುಂಡ್ ಪಂಡೆರ್. ತುಳುನಾಡುದ ಸಂಸ್ಕ್ರತಿ, ಸಂಪ್ರದಾಯೊಲು ನಮ ಹಿರಿಯೆರ್ ನಮಕ್ ಬುಡುದ್ ಪೋತಿನ ಆಸ್ತಿ,ಆ ನಿಟ್ಟುಡ್ ವೇದಿಕೆಡ್ ನಮ ಪಾತೆರುನಗ ತುಳುನಾಡುದ ಬಗೆಟ್ ತಪ್ಪು ಸಂದೇಶ ಕೊರಿಯರೆ ಬಲ್ಲಿ ಪಂಡೆರ್.ಜ್ಞಾನಜ್ಯೋತಿ ಭಜನಾಮಂದಿರದ ಗುರ್ಕಾರೆರಾಯಿನ ಶ್ರಿ ಜ್ಞಾನೇಶ್ ಕೋಟ್ಯಾನ್ ಕಜ್ಜೊದ ಗುರ್ಕಾರ್ಮೆಡಿತ್ತೆರ್.ವೇದಿಕೆಡ್ ಉಪಸ್ಥಿತರಿತ್ತಿನ ಭಜನಾ ಮಂದಿರದ ಗೌರವ ಸಲಹೆಗಾರೆರಾಯಿನ ಶ್ರೀ ಪಾಂಡುರಂಗ ಮಲ್ಪೆ ಪಾತೆರ್ದ್ ಅಡ್ಪಿಲ್ಲ್ ಡ್ ನಮ ಗಲಸುನ ಎಡ್ಡೆಮುಂಚಿ,ಸಾಸೆಮಿ,ಓಮ,ಕೊತ್ತಂಬರಿ,ಜೀರಿಗೆ ಉಂದು ಮಾತಾ ಮರ್ದ್ ದ ಅಂಶೊಲು ಉಂಡು.ಉಂದೆನ್ ನಮ ಸರಿಯಾದ್ ಗಲಸುಂಡ ನಮ್ಮ ಆರೋಗ್ಯವಾದುಪ್ಪೊಲಿ.ಉಂದು ನಮ ಹಿರಿಯೆರ್ ನಾಡುಪಸುದಿನ ಆರೋಗ್ಯದ ಗುಟ್ಟು ಪಂಡೆರ್.