ಆಟಿಡೊಂಜಿ ದಿನ

ಇನಿಡ್ದಿಂಚಿ ತುಳುವೆರೆನ ನಾಲನೇ ತಿಂಗೊಲಾಯಿನ ಆಟಿ ಶುರುವಾತುಂಡು.ಪಗ್ಗು ಬೇಸ,ಕಾರ್ತೆಲ್ ಆಯಿನೇಟ್ ಬೊಕ್ಕ ಬರ್ಪಿನ ಆಟಿ ತಿಂಗೊಲು ನಮ್ಮ ಪಿರಾಕುದಕಲೆನ ಬಂಗದ ಕಾಲ ಆದಿತ್ತುಂಡು.ದಾಯೆಗ್ ಪಂಡ ಬರ್ಸ ಬತ್ತುದು ಭೂಮಿಡು ನೀರು ಉಂತುನ ಕಾಲ.ಕಂಡದ ಬೇಲೆಗ್ ಪೋವರೆ ಆಪುಜಿ.ಚಿರಿ ಚಿರಿ ಬರ್ಸ.ಬೊಲ್ಲೊಡಾದ್ ಪಿದಯಿ ಪೋವರೆ ಆವಂದ್.ಐಕಾದ್ ನೀರ್ ಡ್ ಪಾಡ್ದಿನ ಪೆಜಕಾಯಿ,ಕುಕ್ಕು,ಸಾಂತಾಣಿ,ಕಿರೆಂಗ್ ಪೂಲ್,ನುಂಗೆಲ್ ಮೀನ್,ಗುಜ್ಜೆಪೂರಾ ಆಟಿ ತಿಂಗೊಲು ಮುಗಿಯೊಡ್ ದುಂಬೇ ಕಾಲಿ ಆವೊಂದಿತ್ತುಂಡ್.ಐಕಾದ್ ಅಕುಲು ಪಿದಯಿ ಇತ್ತಿನ ಪಚ್ಚ ತಜಂಕ್,ತೇವು,ತಿಮರೆ,ಅಂಚನೇ ಬೇತೆಬೇತೆ ಮರ್ದುದ ಅಂಶ ಇಪ್ಪುನ ದೈತ ತಪ್ಪುಲೆನ್ ಕೈಪುಗು ಗಲಸಿಯೆರ್.ಅಂಚನೇ ಕಂಡೊಡು ತಿಕ್ಕುನ ನರ್ತೆನ್ ಪೆಜ್ಜಿದ್‌ ತಿನರೆ ಶುರು ಮಲ್ತೆರ್.ಇಂಚಿನ ಮಾತೇಟ್ಲಾ ಮರ್ದುದ ಅಂಶ ಇತ್ತುಂಡು.ಇತ್ತೆ ವಿದ್ಯೆ ಕಲ್ತುದು ಐಟ್ ಏನೇನ ಅಂಶ ಇತ್ತುಂಡು ಪಂಡ್ ನಮ ನಾಡುವ ಆಂಡ ಶಾಲೆ ಬರವು ಕಲ್ಪಂದಿನ ಪೆರಿಯಕುಲು ಅವೆನ್ ದುಂಬೇ ತೆರಿದಿತ್ತೆರ್.ಅಕುಲು ಪಂತಿನ ಮರಿಯಾಲ ಈ ವರ್ಷ ನಮಕುಲಾ ತೂವರೆ ತಿಕುದುಂಡು.ಬರ್ಸ ಬರ್ಪಿನ ನಕ್ಷತ್ರೊಲೆನ್ ಐತ ರವುಸ ಏತುಂಡು ಪನ್ಪಿನೇನ್ ಪುಚ್ಚೆದ ಪುನೊನು ಪಿದಯಿ ದೀವೆರೆ ಆವಂದಿನಲಕ ಬರೊಂದಿತ್ತುಂಡು ಪನ್ಪಿನೇನ್ ಗಾದೆದ ಮುಖಾಂತರ ಪೊರ್ಲುಡೇ ಪಂತೆರ್.ಅಂಚನೇ ಆಟಿಡ್ ಮರ್ಮಾಲೆನ್ ಅಪ್ಪೆಲ್ಲಡೆ ಕಡಪುಡುನೇತ ಬೆತ್ತಡ್ಡಿ ಇತ್ತಿನ ಬಡಪತ್‌ಅಂಚನೇ ಮಾಮಿ ಮರ್ಮಲೆಗ್ ಆಟಿಡ್ ಬೇಲೆ ಇಜ್ಜಂದೆ ಕಟಿಪಿಟಿ ಶುರವಾವರೆ ಬಲ್ಲಿ ಪನ್ಪಿನ ಕಾಳಜಿ ನಮ್ಮ ಹಿರಿಯಾಕ್ಲೆಡ ಇತ್ತುಂಡು.ಅಂಚನೆ ಆಟಿದ ಅಮಾಸೆದ ಕಷಾಯೊಡು ಇಪ್ಪುನ ಮರ್ದುದ ಅಂಶ ವರ್ಷ ಇಡೀ ಬರ್ಪಿನ ರೋಗ ರುಜಿನೊನು ತಡೆಪುನ ತಾಕತ್ ಉಂಡು.ಆಟಿ ಆಡೊಂದು ಆಡೊಂದು ಬರ್ನಗ ಉರು ಆಪಿನೇಕ್ ಇಲ್ಲದುಲಯಿದ ಗೊಬ್ಬುಲೆದ ಮುಖಾಂತರ ಮನರಂಜನೆನ್ಲ ಪಡೆವೊಂದಿತ್ತೆರ್.ನನೊಂಜಿ ವಿಶೇಷವಾಯಿನ ಆಟಿ ಕಳೆಂಜ ಇಲ್ಲದ ಅನಿಷ್ಟ ಪಂಡ ದರಿದ್ರೊನು ನಿವಾರಣೆ ಮಲ್ಪುವೆ ಪಂಡ್ ಆಯೆ ಬರ್ಪಿನೇನ್ ಕಾತೊಂದಿತ್ತೆರ್. ಕುಲೆತ ಮದಿಮೆಮಲ್ಪುನ , ಅಂಚನೇ ತೀರ್ ದ್ ಪೋತಿನಕುಲೆಗ್ ಬಳಸುನ ಕ್ರಮೊತ ಮೂಲಕ ತನ್ನೊಟ್ಟುಡೇ ಅಕುಲು ಇಪ್ಪೊಡು ಪನ್ಪಿನ ಆಸೆಲಾ ಅಕಲೆಡ ಇತ್ತುಂಡು.ಈ ತಿಂಗೊಳುಡೇ ನಡಪುಂಡು .ಆಟಿ ತಿಂಗೊಲುಡು ಬಲಿಯಂದ್ರೆ ತನ್ನ ಅಪ್ಪೆನ್ ಬೊಕ್ಕ ಅಜ್ಜಿನ್ ತುಳು ನಾಡುನು ತೂವರೆ ಕಡಪುಡೆ ಪರ್ಬೊದ ಪೊರ್ತು ಒಟ್ಟೆ ಜಲ್ಲೊಡು ಓಡ ಒಚ್ಚೊಂದು ಬರ್ಪೆ ಪನ್ಪಿನ ನಂಬಿಕೆಲ ಉಂಡು. ಇತ್ತೆ ನಾಡೊರ್ಮೆಡ್ ನಡಪುನ ಆಟಿದ ಆಚರಣೆನ್ ಸಂಘಟನೆ,ಜಾತಿ ಸಂಘಟನೆಲ್ ನಡಪಾವೊಂದುಲ್ಲ. ಅವ್ವು ಗೌಜಿ ಗಮ್ಮತ್ಡ್ ಕಳೆದು ಪೋವರೆ ಬಲ್ಲಿ ಅಪಗದ ಹಿರಿಯೆರ್ ಅನುಭವಿಸಿನ ಬಂಗದ ದಿನ ಇತ್ತೆ ಬೊಡ್ಚಾವಂದಿನೇಕ್ ಖರ್ಚು ಮಲ್ಪುನ ಜವನೆರೆನ ದುಂಬು ದೀವೊಡು. ಆಟಿ ತಿಂಗೊಲುದ ಆನಿದ ಬಂಗೊನು ನೆಂಪುಗು ದೀವೊಡು.ಅತ್ತಾವಂದೆ ಗಮ್ಮತ್ ಮಲ್ತುಂಡ ಪ್ರಯೋಜನ ಇಜ್ಜಿ. ಗತಕಾಲದ ಸ್ಮರಣೆ ಇನಿತ ದಿನೊಟು ನಮ್ಮ ಜೋಕುಲೆಗ್ ಪನೊಡು.

ಪಂಡುದ್ ಸೈಂಟ್ ಸಿಸಿಲಿ ಪಿಯು ಕಾಲೇಜಿದ ಕನ್ನಡ ಉಪನ್ಯಾಸಕಿ ವಾಸಂತಿ ಅಂಬಲಪಾಡಿ ಪಂಡೆರ್.ಆರ್ ಬಡಾನಿಡಿಯೂರು ಕರಾವಳಿ ಯುವಕ ಯುವತಿ ಮಂಡಳಿದ ವತಿಡ್ದ್ ನಡತಿನ ಆಟಿಡೊಂಜಿ ದಿನ ಕಜ್ಜೊಡ್ ಮಲ್ಲ ಬಿನ್ನೆರಾದ್ ಪಾತೆರಿಯೆರ್.

ಆಟಿಡೊಂಜಿ ದಿನ
ಲೇಸ್ ದ ಅಧ್ಯಕ್ಷತೆಡ್ ಕರಾವಳಿ ಮಹಿಳಾ ಮಂಡಳಿದ ಗುರ್ಕಾರ್ದಿ ಅಶ್ವಿನಿ ಉಮೇಶ್ ಪಾತೆರ್ದ್ ತುಳು ಸಂಸ್ಕ್ರತಿ, ಆಚಾರ ವಿಚಾರೊಲೆನ್ ದುಂಬುದ ಪೀಳಿಗೆಗ್ ಮುಟ್ಟಾವುನ ಬೇಲೆ ನಮ ಮಲ್ಪೊಡ್ ಪಂಡೆರ್.
ಮಿತ್ತ ಚಾವಡಿಡ್ ಗೌರವಾಧ್ಯಕ್ಷೆ ಕೀರ್ತಿ ಜಗನ್ನಾಥ್, ಗೌರವ ಸಲಹೆಗಾರೆರ್ ಶೋಭಾ ಸಾಲ್ಯಾನ್ ಇತ್ತೆರ್.
ಕಾರ್ಯದರ್ಶಿ ವಿಶಾಲ ರಮೇಶ್ ಕಜ್ಜೊದ ನಿರೂಪಣೆ
ಮಲ್ತುದ್ ಅನಿತಾ ಸುವರ್ಣ
ಸ್ವಾಗತ ಮಲ್ತೆರ್.. ಶೋಭಾ ಸಾಲ್ಯಾನ್ ಧನ್ಯವಾದ ಮಲ್ತೆರ್.
ಸುಮಾರ್ 25 ಬಗೆತ್ತ ಆಟಿದ ತೆನಸುಲೆನ್ ಮಾತಾ ಮಹಿಳಾ ಸದಸ್ಯೆರ್ ಇಲ್ಲಡೇ ಮಲ್ತ್ ಕನತುದ್ ಜೋಕುಲು ಮಾತಾ ಒಟ್ಟಾದ್ ವನಸ್ ಮಲ್ತೆರ್..ಆಟಿ ತಿಂಗೊಲುಡ್ ತುಳುನಾಡುಡ್ ಆಪಿನ ತೇವು,ತೊಜಂಕ್, ದ ಪೊಲಬುನ್ ಈ ಮುಖೇನ ಜೋಕುಲೆಗ್ ಪರಿಚಯ ಮಲ್ತ್ ಕೊರಿಯೆರ್.