ಆಟಿದ ಒಟ್ಟಟ್ಟಿಲ್ ಮಲ್ತುದ್ ಬಲಸಿನ ಸುಮನಸಾ ಸಂಸ್ಥೆದ ಪೊಣ್ಣುಜೋಕುಲು..

ಕೊಡವೂರುಡ್ ಆಟಿದ ಅಟ್ಟಿಲ್ ದ ಗೌಜಿ

‘ಸಾಂಸ್ಕೃತಿಕ ಸಂಘಟನೆ ಸುಮನಸಾ ಕೊಡವೂರು ವತಿಡ್ದ್ ಸುಮನಸಾದ ಕಾರ್ಯಾಲಯಡ್ ಆಟಿದ ಒಟ್ಟಟ್ಟಿಲ್ ಕಾರ್ಯಕ್ರಮ ಐತಾರದಾನಿ ಗೌಜಿಡ್ ನಡತುಂಡ್
ಪತ್ರೊಡೆ, ತೊಜಂಕ್ ಬೋಳೆ ಸುಕ್ಕ, ತಿಮರೆ ಚಟ್ನಿ, ಕುಡುತ ಸಾರ್, ಎಟ್ಟಿ ಚಟ್ನಿ, ರ‍್ವೊಳಿ ತೊಪ್ಪು ದೋಸೆ, ಮಾನಕ್ನೂಂಡೆ, ತೇಟ್ಲ ಗಸಿ, ಪೆಲಕಾಯಿ ಗಟ್ಟಿ, ಉರ್ಪೆಲ್ ಅರಿತ ಪುಂಡಿ, ಉರ್ಪೆಲ್ ಅರಿತ ನುಪ್ಪು, ಬೊಳಂತೆರಿತ ಪುಂಡಿ, ಕೋರಿ ಸುಕ್ಕ, ಕೊಯೆಲ್ ಸುಕ್ಕ, ಕೋರಿ ಸಾರ್, ಕಡ್ಲೆಬೇಳೆ ಪಾಯಸ, ಮೆಂತೆ ಗಂಜಿ, ಉಪ್ಪಡ್ ಪಚ್ಚೀರ್, ಅತ್ತರಸ, ಬಜಿಲ್ ಕೋರಿ.. ಇಂಚ ತುಳುನಾಡುಡ್ ಆಟಿ ತಿಂಗಳುಡ್ ದುಂಬುದ ಕಾಲೊಡ್ ಮಲ್ತೊಂದಿತ್ತಿನ ಸುಮಾರು 21 ಬಗೆತ್ತ ಖಾದ್ಯೊಲ್ ಬೊಕ್ಕ ಇಂಚಪ್ಪೊದ ಅಟ್ಟಿಲ್ ರಡ್ಡ್ ಬಗೆಟುಲಾ ಮಲ್ದಿತ್ತೆರ್.
ಸುಮನಸಾ ಸಾಂಸ್ಕೃತಿಕ ಸಂಘಟನೆದ ಪೊಣ್ಣು ಜೋಕುಲೇ ಸೇರ್ದ್ ಅಟ್ಟಿಲ್ ಮಲ್ತುದ್ ಬಲಸಿಯೆರ್. ಸುಮನಸಾ ಬಳಗದ ಮಾತಾ ಸದಸ್ಯೆರು ಈ ಬೇತೆ ಬೇತೆ ರುಚಿನ್ ಉಂಡುದ್ ಖುಷಿ ಪಟ್ಟೊಂಡೆರ್. ಗೌರವಾಧ್ಯಕ್ಷ ಎಮ್.ಎಸ್.ಭಟ್ ಬೊಕ್ಕ ಅಧ್ಯಕ್ಷ ಪ್ರಕಾಶ್ ಜಿ. ಕೊಡವೂರು ಅಟ್ಟಿಲ್‌ದ ಅಟ್ಟಣೆಗ್ ಚಾಲನೆ ಕೊರಿಯೆರು. ಆಟಿ ತಿಂಗೊಲ್ದ ಪಿರಾಕುದ ಜೀವನ ಶೈಲಿದ ಉದ್ದೇಶದ ಬಗೆ ಮಾಹಿತಿ ಕೊರಿಯೆರ್. ಬೊಕ್ಕ ಮಾತೆರ್ಲಾ ಮನರಂಜನಾ ಕಾರ್ಯಕ್ರಮೊಲೆಡ್ ಪಾಲ್ ಪಡೆಯೆರ್.
ಸುಮನಸಾ ಸಂಚಾಲಕ ಭಾಸ್ಕರ್ ಪಾಲನ್ ಬಾಚನಬೈಲು , ಪ್ರಧಾನ ಕಾರ್ಯದರ್ಶಿ ಚಂದ್ರಕಾಂತ ಕುಂದರ್ ಸೇರಿನಂಚ ಮಸ್ತ್ ಜನ ಪಾಲ್ ಪಡೆದ್ ಕಜ್ಜೊಗ್ ಮೆಚ್ಚುಗೆ ಪಂಡೆರ್. ಉಪಾಧ್ಯಕ್ಷ ಯೋಗೀಶ್ ಕೊಳಲಗಿರಿ ಕಾರ್ಯಕ್ರಮ ನಿರೂಪಣೆ ಮಲ್ತೆರ್.